Almaj Libron
Almaj wawan

1 Jinataj Almaqa Diospa palabranta runasman willarerqa. Ñawpajta Zarahemla nisqa jallp’api tiyakojkunaman chayta willarqa, chantá tukuy jallp’antimpi tiyakojkunaman chayta willarqa.

2 Kaykuna paypa nisqasnin kanku kikin escribisqanman jina. Kaykunata willarqa Zarahemla llajtapi iglesiapi kajkunaman, nispa:

3 Tatay, Alma, ñoqa, Almata, kamachiwarqa Diospa iglesiampi kuraj sacerdote kanaypaj, chayta ruwawarqataj Diospa tiyniyoj, kaykunasta ruwanampaj, kasqanrayku. Niykichis tatay Nefi nisqa jallp’aj kantunnejpi iglesiata wakichisqanta. Arí, Mormon nisqa jallp’apipis iglesiata wakicherqa. Mormon nisqa yakuspitaj hermanosninta bautizarqa.

4 Nillaykichistaj paykuna rey Noej llajtanmanta salvasqas kasqankuta Diospa khuyayninrayku, atiyninraykutaj.

5 Chaymantataj lamanita runas paykunata presocharqanku ch’in lugarpi. Arí, niykichis presochasqas kasqankuta, chaywampis Señorqa watejmanta presochasqa kasqankumanta nisqampa atiyninwan paykunata salvarqa. Kay jallp’antimpitaj Diospa iglesianta wakichiyta qallarerqayku.

6 Kunantaj niykichis, hermanosníy, pikunachus kay iglesiamanta kajkuna kankichis, ¿Allintachu tatasniykichispa presochasqankuta yuyarinkichis? Arí, ¿Paypa khuyayniyoj, pacienciayoj ima paykunawan kasqanta allintachu yuyarinkichis? Jinapis, ¿Allitachu yuyarinkichis paykuna ukhu pachamanta orqhosqas kasqankuta?

7 Qhawaychis, sonqosninkuta tijrarqa, arí, wañuy jina puñuymanta paykunata rijch’aricherqa; paykunataj Diosman rijch’arerqanku. Jiná, paykuna laqha chawpipi karqanku, chaywampis wiñaypaj nisqaj k’anchaynin paykunata k’ancharerqa. Arí, wañuypa waskhasnin paykunata mayt’orqa, ukhu pachaj cadenasnimpis paykunata mayt’orqa. Wiñaypaj tukukuytaj paykunata suyarqa.

8 Kunantaj tapuykichis hermanosníy, ¿Tukuchisqaschu karqanku paykuna? Mana, niykichis, mana tukuchisqaschu karqanku.

9 Watejmantataj tapuykichis, ¿Wañuypa waskhasnin p’itisqaschu? Jinapis, ¿Paykunata mayt’una ukhu pachaj cadenasnin watarasqaschu? Niykichis, arí, watarasqas karqanku, chayraykutaj jatunyakorqanku, kacharichiy munakuyta takerqankutaj. Nillaykichistaj salvasqas kasqankuta.

10 Kunantaj tapuykchis, ¿imayna salvasqas kanku? Arí, ¿Imapi suyarqanku salvakuyta? ¿Imapjtaj wañuypa waskhasninmanta paskarasqas karqanku, arí, ukhu pachaj cadenasninmantapis?

11 Kayta niyta atiykichis — ¿Manachu creerqa tatay Alma, Abinadij nisqasninta? ¿Manachu Diospa nisqasninta parlarqa, manatajchu creerqa tatay chaykunata?

12 Feninman jinataj sonqompi sumaj tijray karqa. Tukuy kaykuna cheqa kasqankuta niykichis.

13 Payqa Diospa palabranta willarqa tatasniykichisman. Chantá sonqosninkupi sumaj tijray karqa, k’umuykorqankutaj. Paykuna cheqa kawsaj Diospi confiarqankutaj. Chantá paykuna tukukuykama feniyoj karqanku, chayraykutaj salvasqas karqanku.

14 Kunantaj tapuykichis, iglesiamanta hermanosníy, ¿Diosmanta espiritunejta necesqaschu kankichis? ¿Kanchu rijch’aynin uyasniykihispi? ¿Kay sumaj tijray kanchu sonqosniykichispi?

15 Qankunata Ruwajpa kacharichiynimpi feniyojchu kankichis? ¿Fe ñawiwanchu ñawpajman qhawankichis kay wañoj cuerpo wiñaypaj kawsarimunanta rikuspa, kay ismoj mana ismojwan jatarichinanta rikuspa, Diospa ñawpaqempi sayarinampaj kay wañoj cuerpoj ruwasqasninman jina juzgasqa kanampaj?

16 Niykichis, ¿Chay p’unchaypi Señorpa nisqanta uyariyta reparawajchischu?, nispa: Ñoqaman jamuychis bendecisqa kajkuna, imaraykuchis jallp’a patpi ruwasqaykichis allin ruwaykuna kanku.

17 Maná chayrí, ¿Chay p’unchaypi Señorman llullakunaykihista reparawajchischu?, nispa: Señor, jallp’a patapi ruwasqayku allin ruwaykuna karqanku — chay jinamanta ¿Pay salvasunkichismanchu?

18 Chayrí, ¿Juchamanta yachaywan, phutiywan ima junt’asqa, tukuy juchasniykichista sumajta yuyarispa, arí, tukuy sajra ruwasqasniykichista sumajta yuyarispa, arí, Diospa kamachisqasnimpa contrampi kasqaykichista yuyarispataj, Diospa juzgana tiyanampa ñawpaqenman pusasqas kanaykichista, chayta reparawajchischu?

19 Nillaykichistaj, ¿Chay p’unchaypi llimphu sonqoyoj, llimphu makiyojpis Diosta qhawayta atiwajchischu? Niykichistaj, ¿Diospa rijch’aynin uyasniykichisman churasqa kajtin qhawayniykichista oqhariyta atiwajchischu?

20 Niykichis, ¿Salvasqa kayta suyayta atiwajchischu supaypa kamachisninman tukushajtiykichis?

21 Niykichis, chay p’unchaypi mana salvasqas kanaykichista yachankichis. Imaraykuchus p’achasnin mana t’ajsasqaschu yuraj, llimphisitukanankukama chayqa, mana ni pipis salvakuyta atinchu. Arí, p’achasnin t’ajsasqa kananku tiyan, mana ima ch’ichiyoj kanankukama. Chay ruwakun llajtanta juchasninkumanta Kacharichejpa yawarninwan, pimantachus tatasninchis parlarqanku.

22 Kunantaj tapuykichis, hermanosníy, ¿Diospa juzgana tiyanampa ñawpaqempi ch’ichi, yawarchasqa p’achayoj sayakunkichis chayqa, imaynataj sientekuwajchisri? Qhawaychis, ¿Imatataj contraykichispaj willanqanku kaykuna?

23 ¿Manachu wañuchejkuna kasqaykichista willanqanku, arí, manachu tukuy imaymana sajra ruwasqaykichista willanqanku?

24 Hermanos, ¿Chay runa Abrahanwan, isaacwan, Jacobwan, tukuy llimphuchasqa profetasqampis, pikunachus t’ajsasqas mana ch’ichi p’achayoj kanku, chay runa paykunawan Diospa reinompi tiyakunanta yuyankichischu?

25 Niykichis, Mana. Pay janaj pachaj reinompi lugarniyoj kananta mana yuyayta atiwajchischu, imaraykuchus chayta yuyaspa Ruwajninchista qallariymantapacha llullachankichis. Chayrí pay qallariymantapacha llulla kasqanta ninkichis. Jinapis, paykuna wijch’usqas kanqanku supaypa reinompa wawasnin kasqankurayku.

26 Kunantaj niykichis, hermanosníy, sonqosniykichispi sumaj tijray karqa, kacharichiy munakuy takiyta munarqankichistaj chayqa, tapuykichisman, ¿Chay jinachu kashankichis kunan?

27 ¿Mana juchachakuspa purinkichischu Diospa ñawpaqempi? ¿Kunititan wañuwajchis chayqa, niyta atiwajchischu llamp’u sonqoyoj kasqaykichista8 ¿Niyta atiwajchischu p’achasniykichis t’ajsasqa yuraj kanankukama kasqankuta Cristoj yawarninnejta, pichus llajtanta juchasninkumanta kacharichej jamorqa?

28 Qhawaychis, ¿Orgullomanta llimphuchasqaschu kankichis? Niykihis, mana chaymanta llimphuchasqas kankichis chayqa, mana Diosta rikunaykichispaj wakichisqaschu kankichis. Usqhayta wakichiskunaykichis tiyan, imaraykuchus janaj pachaj reinon qayllapiñan, mana wakichisqa runataj mana wiñaypaj kawsayniyojchu kanqa.

29 Niykichis, ¿ujllapis kanchu chawpiykichispi pichus envidiakoj? Niykichis chay runa mana wakichisqachu. Usqhayta wakichikunaykichista munaymantaj, hora qayllapiña kasqanrayku. Payqa mana yachanchu mayk’ajchus chay hora jamunanta; imaraykuchus chay runa mana llimphuchu.

30 Watejmantataj niykichis, ¿Ujllapis chawpiykichispi kanchu pichus hermanonmanta burlata ruwakoj, chay jinapis runa masinta qhatiykachaj?

31 ¡ay chay runamanta, imaraykuchus payqa mana wakichisqachu. P’unchaytaj qayllapiña kashantaj Diosman kutirinampaj, mana chayqa, mana salvakuyta atinchu.

32 Arí, ¡ay tukuy qankuna sajra ruwajkunamantapis! Diosman kutiriychis, Diosman kutiriychis, imaraykuchus chayta nin Señor Dios.

33 Tukuy runasta wajyan, khuyaypa makisnintaj paykunaman mast’asqa. Payqa nin: Diosman kutiriychis, ñoqataj jap’ísqaykichis.

34 Arí, nin: Noqaman jamuychis, kawsatmanta sach’aj poqoyninta mikhunkichistaj. Arí, kawsaymanta t’antata, yakutawan qhasilla mikhunkichis.

35 Arí, ñoqaman jamuychis allin ruwaykunata apamuwaspa. Manataj ruthusqaschu kankichis nina lawrayman wijch’usqas kanaykichispaj.

36 Qhawaychis, p’unchay qayllapiña maypachachus tukuy mana sumaj frutota poqochej, chay jinapis tukuy mana allin ruwanata ruwaj, pay kikin waqarinan kanqa, muchunan kallanqataj.

37 O qankuna sajra ruwajkunapis, pikunachus kay pachaj qhasi imasmanta jatunchasqas kankichis, pikunachus allin ruwaypa ñanninta rejsisqaykichista willankichis, chaywampis pantasqa ñampi purinkichis, mana michejniyoj ovejas jinalla. Chaywampis Michejqa qankunata wajyan, wajyashanrajtaj. Jinapis, ¡Wajyasqanta mana kasunkichischu!

38 Willaykichis allin Michejpa wajyasusqaykichista. Arí, kikin sutinmanta wajyasunkcihis, mayqen sutinchus Cristo. Mana allin Michejpa wajyasqanta, mayqen sutimantachus pay wajyasunkichis, mana kasunkichis chayqa, qankuna mana allin Michejpa ovejasninchu kankichis.

39 Kunantaj, ¿Mana allin Michejpa ovejasnin kankichis chayqa, mayqen tropamanta kankichis? Niykichis, supay qankunaj michejniykcihis kasqanta. Qankunarí paypa tropan kankichis. Kunantaj, ¿Pitaj chayta neganman? Niykichis, pichus chayta neganman, payqa llulla, supaypa wawantaj.

40 Niykichis, imachus sujmaj, Diosmanta jamusqanta, imatajchus sajra, supaymanta jamusqanta.

41 Chayrayku runa allin ruwaykunata ruwan chayqa, allin Michejpa nisqanta kasun, payta qhatillantaj. Chaywampis, pichus sajra ruwaykunata ruwan payqa supaypa wawanman tukun, supaypa nisqanta kasusqanrayku, payta qhatillantaj.

42 Pichus chayta ruwajtaj, paymanta pagota jap’inan tiyan, chayrayku pagompaj wañuyta jap’in, wañusqa kanampaj tukuy allin ruwaykunamanta.

43 Kunantaj, hermanosníy, uyarinawaykichista munayman, imaraykuchus kallpaywan parlani. Imaraykuchus sut’inta parlarqaykichis mana pantanaykichispaj. Jinapis, Diospa kamachisqanman jina parlarqaykichis.

44 Imaraykuchus Diospa llimphu t’aqanman jina, mayqenchus Jesucristopi, chayman jina wajyasqa kani chay jinamanta parlanaypaj. Arí, kay jamoj imasmanta, mayqen imasmantachus tatasninchis willarqanku, chaykunamanta kamachisqa kani willanaypaj kay runasman.

45 Chaytaj mana tukuychu. ¿Manachu ñoqa kikiymanta kaykunata yachasqayta reparankichis? Willaykichis kaykuna, imatachus willarqaykichis, chaykuna cheqa kasqankuta yachasqayta. ¿Imaynatataj cheqa kasqankuta yachasqayta reparankichis?

46 Niykichis Diospa Santo Espiritunnejta yachachiwasqas kasqankuta. Qhawariychis, ñoqa ashkha p’unchaykunata ayunarqani, Diosmanta mañakorqanitaj kaykunata kikillaymanta yachanaypaj. Kunantaj kikillaymanta cheqa kasqankuta yachani, Señor Dios, Santo Espiritunnejta, chaykunata rikuchiwasqanrayku. Kaytaj sut’inchay espiritu, mayqenchus ñoqapi kashan.

47 Astawampis, niykichis tatasninchispa nisqasninkoj cheqa kasqanta rikuchiwasqanta, ñoqapi sut’inchay espirituman jinapis, mayqenchus Diospa Espiritumpa rikuchisqanman jinapis.

48 Niykichis, imatachus jamoj imasmanta willaykichis, chayta kikillaymanta cheqa kasqankuta yachani. Nillaykichistaj Jesucristo jamunanta yachasqayta. Arí, Churi, Tataj sapa Wawampis, k’acha kaywan, khuyaywan, cheqa kajwan ima junt’asqa. Payrí, kay pachaj juchasninta pampachaj jamonqa. Arí, sapa sutimpi mana kuyurej creejpa juchasninta pampachan.

49 Kunantaj, kay t’aqanman jina wajyasqa kasqayta niykichis, arí, munassqa hermanosniyman willanaypaj, arí, sapa kay jallp’api tiyakojman, arí, tukuyman willanaypaj, machu kajman joven kajmampis, preso kajman libre kajmampis, arí, niykichis machu kajman, manaraj machu kajman, wiñaj miraymampis, arí, paykuna Diosman kutirikunankuta, mosojmanta nacekunankutapis wajyanaypaj.

50 Arí, kayta nin Espiritu: Diosman kutirikuychis, tukuy kay pacha, imaraykuchus janaj pachaj reinon qayllapiña. Arí, Diospa Wawan k’anchayninwan, kallpanwan, jatun kayninwan, atiyninwan, kamachiyninwan ima jamun. Arí, munsqa hermanosníy, niykichis Espiritoj nisqanta, nispa: Tukuy kay pachaj Reynimpa k’anchayninta qhawaychis, jinapis, usqhayta janaj pachaj Reynenqa tukuy runaspa wawasninkuman k’ancharimonqa.

51 Espiritu willawantaj, arí, sinchi parlaywan qhapariwan, nispa: Riy kay llajtaman, paykunata wajyamuytaj, nispa – Diosman kutiriychis, mana diosman kutirinkichis, chayqa, manapuni janaj pachaj reinonta chayaqeykichispaj jap’inkichischu.

52 Watejmanta niykichis, Espiritu nin: Qhawariy, ñapis hachawa sach’aj saphinman churasqaña kashan, chayrayku tukuy mana allinta poqoj sach’a k’utusqa kanqa, ninamantaj wijch’usqa kanqa, arí, ninaman, mayqenchus mana tukukuyniyoj, mana jayk’aj thasnukoj. Qhawariychis, yuyarillaychistaj, Ajllasqan chayta nin.

53 Kunantaj munasqa hermanosníy, niykichis, ¿Kay nisqasta awantawajchischu? Arí, ¿Waj laduman kaykunata churawajchischu, Ajllasqatataj saruwajchischu? Arí, ¿Sonqosniykcihispi jatunchakuwajchischu? Arí, ¿Valesqa p’achasqan p’achallikuwajchisrajchu? ¿Sonqosniykichispi kay pachaj qhasi mana valorniyojkuna munawajchisrajchu, kapuyniykichistapis?

54 Arí, ¿Waj runasmanta astawan jatunman qhawachikuwajchisrajchu? Arí, ¿hermanosniykichista, pikunachus k’umuykuspa Diospa llimphu t’aqanman jina purinku, paykunata qhatiykachawajchisrajchu? Paykuna chayta ruwaspa kay iglesiaman jamuchisqas kanku, Santo Espirituwan llimphuchasqas, chayraykutaj paykuna Diosman kutirinankupaj allin ruwanasta ruwanku.

55 Arí, ¿Wajcha necesitaj pobre runasta wasanchawajchisrajchu, paykunamanta kapuyniykichista jark’akuspa?

56 Por fin, tukuy sajra ruwanasta ruwajkuna, niykichis chay layra runas mana usqhayta Diosman kutirikunkuchu chayqa, ruthusqas, ninaman wijch’uswastaj kanqanku.

57 Kunantaj tukuyniykichis, pikunachus allin Michejpa nisqanta kasuyta munankichis, niykichis, sajra kajkunamanta jamuychis, t’aqakuychis, amataj ch’ichi imasninkuta llankhaychischu. Paykunaj sutisninkurí chinkachisqas kanqanku, sajra ruwajkunaj sutisninku, allin ruwajkunaj sutisninkuwan mana yaupasqas kanankupaj. Diospa nisqan junt’akunampaj, mayqenchus nin: Sajra runaspa sutisninku mana llajtaypa sutisninkuwanchu kanqanku.

58 Imaraykuchus allin ruwajkunaj sutisninku kawsaymanta libropi escribisqas kanqanku, paykunaman paña makiynejpi chayaqeta qosaj. Kunantaj, hermanosníy, ¿Ima niyta atisunman chaypa contranta? Niykichis, Sichus kaypa contranta parlankichis chayqa, mana importanchu, imaraykuchus Diospa nisqan junt’akunan tiyampuni.

59 Imaraykuchus, ¿Mayqen chawpiykichispi michej ashkha ovejayoj kaspapis mana chaykunata sumajta qhawan mana atojkuna yaykunankupaj, tropanta mana mikhunankupaj? Jinataj, atoj tropanman yaykun chayqa, ¿Manachu atojta qharqonman? Arí, atispapis, atojta wañuchisnman.

60 Kunantaj willaykichis allin Michej qankunata wajyasqanta. Paypa wajyasqanta uyarinkichis chayqa, tropanman yaykuchisonqanchis, ovejasnintaj kankichis. Paytaj kamachin mana atoj qankunaman jamojta saqenaykichispaj, mana tukuchisqas kanaykichispaj.

61 Kunantaj ñoqa, Alma, Kamachiwajpa parlayninwan kamachishaykichis qankunaman nisqasniyta kasunaykichispaj.

62 iglesiamanta kajkunaman kamachiy jinalla parlaykichis. Mana iglesiamanta kajkunamanrí invitaj jinalla parlani, nispa: Jamuychis, Diosman kutirikunaykichispaj bautizakuychis, kawsaymanta poqoyta mikhojkuna kanaykichispaj.