1 Kunantaj, wawáy, hermanoykiman willasqaymanta astawanraj willasuyta munayman. ¿Manachu hermanoykej mana kuyoj kasqanta, feniyoj kasqanta, Diospa kamachisqasninta junt’anampaj llimphu kasqantawan rikunki? Chay jinapis, ¿Manachu allin ruwanasta qhawachisorqa?

2 Mana hermanoyki jinachu nisqasniyta kasorqanki zoramita runas chawpinkupi kaspa. Kunanqa kay contraykipi kapuwan; kallpaykipi, yuyaysapa kasqaykipi ima yupaychakuspalla karqanki.

3 Chaytaj mana tukuychu, wawáy. Ñoqapaj ancha millay ruwanata ruwarqanki; qan Diosmanta yachachinaykita saqespa Siron jallp’aman, mayqen jallp’achus lamanitaspa jallp’asnejpi, chayman rerqanki mask’aj Isabel sutiyoj qhencha warmita.

4 Arí, payqa ashkha qharispa sonqosninkuta suwarqa; chaywampis mana chayraykuchus allin karqa qampajpis, wawáy. Diosmanta yachachinayki karqa, ima ruwanachus ruwanaykipaj karqa.

5 ¿Manachu yachanki, wawáy, kaykuna millay kasqankuta Señorpa ñawpaqempi? Arí, ¿Manachu yachanki kaykuna tukuy waj juchasmanta asqan millay kasqankuta mana juchayoj kajpa yawarninta jich’achiy, Santo Espirituta negaywan juchasmanta qhepankupi?

6 Santo Espiritu qampi kajtinña, chantá chayta neganki chayqa, chayta negasqaykita yachanki, chay juchataj mana pampachasqachu kanqa. Arí, pitajchus wañuchin Diospa k’anchaynimpa, yachaynimpataj contrampi, chay runapaj trabajo juchan pampachasqa kanampaj, arí, nishayki, wawáy, chay runapaj trabajo juchasnin pampachasqas kanankupaj.

7 Kunantaj, wawáy, Dios munachun, mana chay jina may jatun juchayoj kanaykita. Mana allinniykipaj kajtenqa, mana juchasniykimanta astawan parlaykimanchu, phutiyniyoj kanaykipaj.

8 Chaywampis, mana juchashiykita Diosmanta pakayta atinkichu. Mana juchasniykimanta kutirinkichu chayqa, qhepa p’unchaypi chaykuna qampa contraykipi sayarimonqanku.

9 Kunantaj wawáy, Diosman, juchasmantapis kutirinaykita munayman manaña ñawisniykej qhawapayayninkunaj qhepanta rinaykipaj, astawan kaykunamanta jark’asqa kanaykita munayman. Mana chayta ruwankichu chayqa, ni imaynata Diospa reinonta jap’iyta atinkichu chayaqeykipaj. O yuyariy, nisqayta jap’iriy, kaykunamanta jark’arikuytaj.

10 Kamachiykitaj kuraj hermanosniykimanta mañanaykita yanapasunankupaj ruwayniykipi. Jovenllaraj kanki, hermanosniykej yanapayninkuta necesitallankitaj. Paykunaj yachachisusqankuta kasullay.

11 Ama ni mayqen qhasi, mana yachaj imaman pusajta saqekuychu. Ama supaywan sonqoykita chay sajra qhencha warmisman pusajta saqeychu. Qhawariy, wawáy, may chhika sajra ruwaykunata zoramitakunaman apamusqanki; ruwasqaykita qhawaspataj paykuna nisqasniyta mana creerqankuchu.

12 Kunantaj Señorpa Espiritun niwan: Wawasniykita kamachiy allinta ruwanankupaj, mana ashkha runaspa sonqosninkuta tukukuyman pusanankupaj. Chayrayku Diosta kasuypi kamachiyki, wawáy, sajra ruwanasniykita saqenaykipaj.

13 Kamachillaykitaj tukuy yuyayniykiwan, atiyniykiwan, kallpaykiwan ima Señorman kutirinaykita; manaña aswan runaspa sonqosninkuta sajra ruwanankupaj pusanaykipiaj, astawanqa paykunaman kutipuy, juchasniykita, sajra ruwasqasniykitawan willamuytaj.

14 Ama kapuykunata, ni kay pachaj qhasi imasta mask’aychu; chaykunata mana qanwan kuska apayta atinkichu.

15 Kunantaj, wawáy, uj chhikanta Cristoj jamunanmanta parlaykiman. Niyki, pay jamonqa kay pachaj juchasninta pampachaj, arí, payqa kusiy willaykunata salvakuymanta llajtanman willaj jamun.

16 Kunantaj, wawáy, kayta yachachinaykipaj wajyasqa karqanki, kay llajtaman kusiy willaykunata willanaykipaj yayayninkunata wakichinaykipaj, jinapis, salvacion paykunaman jamunampaj, wawasninkoj yuyayninkunata wakichinankupaj, pay jamojtin, nisqanta uyarinankupaj.

17 Kunantaj uj chhikanta yuyayniykita samarichisaj kay imasmanta. T’ukunki yuyaspa imapajchus kaykuna yachasqas kanku kay chhika manaraj pasashajtinku. Niyki, ¿Manachu uj runa Diospaj valesqa, jamoj pachapi runa kikillantaj?

18 ¿Manachu kay runasman kacharichiy nisqa ruwanamanta yachachisqa kanan tiyan wawasninkuman ima?

19 ¿Manachu kay p’unchaypi Señorqa angelninta kay kusiy willaykunata willajta ñoqanchisman, wawasninchisman ima kachamuyta atin, jamunan qhepan p’unchaypi jina?