1 Ja’ jech c’ot ta pasel ti Samuel jlamanita vinique, ep no’ox la xcholbe sc’oplal ti c’usitic xu’ ta xich’ ts’ibaele.

2 Xchi’uc jech la jyal ta stojolalic: ja’ jech, ta xcac’ ta ilel jun sq’uelubil; yu’un ta to xjelo vob jabil, ja’ to jech, ta xtal ti xnich’on Riox ti c’uxi chtal scolta scotolic ti boch’otic chch’unbeic sbie.

3 Xchi’uc ja’ jech, ti li’e ja’ ta xcac’ ta ilel sq’uelubil ti c’alal me sta sc’ac’alil ta xtale: yu’un ti li’e, ta xvinaj muc’tiquil saquil osil ta vinajel, ti c’uxi mu oyuc ic’al osil ta yac’ubalil c’alal me tale, ti c’uxi jech c’ac’altic o chilic ti viniquetique.

4 Ja’ jech, jun no’ox c’ac’al ti jun ac’ubal xchi’uc jun c’ac’ale, jech chac c’u cha’al jun no’ox c’ac’al ti jech muyuc ac’ubaltique; ti va’aye ja’ sventa sq’uelubil; yu’un cha vilic chloc’ ti c’ac’ale xchi’uc cha vilic xch’ay no’ox toc. ja’ o jech, cha na’ic ta bats’imelel ti oy chib c’ac’al xchi’uc jun ac’ubaltique; xchi’uc xtoc, muyuc ta x-ic’um ti ac’ubaltique; ti va’aye ja’ yac’ubalil ti c’alal sc’anto xvoq’ue.

5 Xchi’uc ja’ jech, ta xvinaj jun ach’ c’anal, ti jech muyuc bu baq’uin xavilic oe, ti va’ay xtoque ja’ jun sq’uelubil no’oxtoc.

6 Xchi’uc ja’ jech, ti va’aye ma’uc o scotol, yu’un ta xvinaj ep sq’uelubil xchi’uc svinajeb ta vinajel.

7 Xchi’uc ta to xc’ot ta pasel ti ta to xa nojic ta xi’ele xchi’uc ti ta xbat a ch’ulelique, ti jech cha yalic o ta banamile.

8 Xchi’uc ta xc’ot ta pasel ti boch’o ta xch’un ti xnich’on Rioxe, oy xcuxlejal ta sbatel osil.

9 Xchi’uc ja’ jech yalojbun Cajvaltic, ta yabat, ti jech ac’o xtal cal ti va’aye; jech, la spasun ta mantal ti ac’o xtal jcholboxuc ti c’usitic va’aye, jech, yalojbun: Alo li’ ta jteclum: Ac’o sutes yo’ntonic, xchi’uc ac’o smeltsanbeic sbe ti Cajvaltique,

10 Ja’ jech tana, ja’ no’ox yu’un lamanitaun, xchi’uc ti jech li c’opoj ta a’yejetic ti Cajvaltic la spasun ta mantale, xchi’uc ti jech tsots ava’yic ti vo’xuque, xchi’uc ti jech cha c’an cha milicune, xchi’uc ti jech cha c’an cha jipicun loq’uel ta atojolalique.

11 Xchi’uc cha va’yic ti ca’yejtaque, ja’ ta sventa ti jech li muy li’ ta scoral tonal muc’ta jteclume, ti c’uxi xu’ xa va’yic xchi’uc ti c’uxi xu’ xa na’ic ti c’u x-elan ta smeltsanvan Riox ti jech cha smalaic ta sventa a bolilique, xchi’uc xtoc ti c’uxi xu’ xa votquinic ti ta sventa sutesub o’ntonale.

12 Xchi’uc xtoc, ti c’uxi xu’ xa na’ic ta sventa c’u x-elan ta xtal Jesucristo ti ja’ xnich’on Rioxe, ti totil ta vinajel xchi’uc ta banamile, ti boch’o la spas scotol ti c’usitic oy ta sliquebal o no’oxe; xchi’uc ti c’uxi xu’ xa na’ic ti sventa sq’uelubil c’u x-elan chtale, ta sventa ti c’uxi xu’ xa ch’unbeic sbie.

13 Ti me cha ch’unbe ti sbie, cha sutes a vo’nton ta scotol amultac, ta sventa ti c’uxi xu’ cha ta ti coltael ta sventa c’u x-elan chcoltavan stuque.

14 Xchi’uc ja’ jech, ta xcac’boxuc yan sq’uelubil, ti ja’ jun sq’uelubil c’u x-elan ta xchame.

15 Ja’ jech xtoc, ta bats’imelel ti yu’un jech stac’ xcham ta sventa ti c’uxi xu’ ta xtal coltaele; jech, yu’un ja’ ta yu’un xchi’uc ja’ lec ti jech ta xcham ti c’uxi xu’ chc’ot ta pasel ti cha’ cuxesel yu’un animaetic. Ti c’uxi xu’ xich’ iq’uel batel viniquetic ta stojolal Cajvaltique.

16 Jech, ti li’ animae ta to xcha’ cuxi, xchi’uc ta to xcha’ cuxiic ti viniquetic c’u x-elan ta xchamic ta sba veltae, ti chamel ta ch’ulelale, yu’un te xa bevel ta stojolal Cajvaltic ta sventa c’u x-elan yal ta mulil Adán, scotolic ti viniquetique jech ac’bilic jech chac c’u cha’al chamenic o ya’eluc, jech chac c’u cha’al c’usitic oy li’ ta ora, xchi’uc jech, jech chac c’u cha’al c’usitic oy ta ch’ulelaletic.

17 Yu’un ti li’ c’u x-elan ta xcha’ cuxi Cristoe, ja’ ta scolta scotol viniquetic, jech ta scotol viniquetic xchi’uc ta xic’tal yanvelta ta stojolal Cajvaltic.

18 Jech, xchi’uc ac’o c’otuc ta pasel ti sutesub o’ntonale, yu’un ti boch’o ta sutes yo’ntone muyuc ta xich’ tuch’esel xchi’uc muyuc ta xich’ jipel ta c’oc’, ja’uc ti boch’o muyuc ta sutes yo’ntone ja’ ta xich’ tuch’esel xchi’uc ta xich’ aq’uel ta c’o’ xchi’uc ta xtal yanvelta ta stojolalic ti lajel ta ch’ulelale, jech, ja’ xa xch’ibal velta lajel, yu’un bevel xa chcomic yanvelta ta sventa c’usitic oy ta sventa lequilal.

19 Ja’ jech, suteso avo’ntonic suteso avo’ntonic, mu me ja’uc no’ox yu’un ava’ay c’usitic li’ xchi’uc me muyuc xa ch’un, ti jech cha vac’ abaic ta sventa ch’ayele, xchi’uc ti jech cha vich’ic jochel batel ta va’ay xch’ibal velta lajele.

20 Xchi’uc ja’ jech, jech chac c’u cha’al la jcal ta sventa yan sq’uelubile, ti sq’uelubil c’u x-elan ta xchame, ja’ jech, ti ta sc’ac’alil c’alal ta xchame, ta x-ic’um ti c’ac’ale, xchi’uc muyuc xa bu ta xac’ xojobal; jech xchi’uc u, xchi’uc c’analetic; xchi’uc muyuc saquil osil li’ ta banamil oxib c’ac’al, ja’ o no’ox ti c’u x-elan ora ta xloc’ xch’ulele, ja’ to ti c’alal me cha’ cuxi ta scotol animaetique.

21 Jech, ti c’alal ta xac’ ta c’abal xch’ulele, ta xloc’ chauc xchi’uc sacsevul epal ora, xchi’uc ti banamile ta xbac’ xchi’uc ta xnic; ti tonetic oyic ta sba banamil ti jech oyic ta ba banamil xchi’uc ti jech oyic ta yut banamile, ti jech xa votquinic ti li’ ta ora ti jech tsotsique, jech ja’ epic ti jech tu j-ech’em stsatsalique biq’uitic ta xbat.

22 Jech, ta xvoc’anan ta o’lol, xchi’uc muyuc xa bu jech ta xvoc’anan xchi’uc chjavanan o ta baq’uin, xchi’uc ja’ jech jujubej o ta sba scotol banamil, jech, jech chac c’u cha’al ta ba banamil xchi’uc ta yut banamil.

23 Xchi’uc ja’ jech xtoc; ta to xc’ot ta pasel epal vocoliletic; xchi’uc vitsetic ti jech ta spasic ta slomleje, jech chac c’u cha’al stenlejal, xchi’uc ep parajeetic ti jech stenlejal ti li’ ta orae, jech ta spasic ta muc’tiquil vitsetic.

24 Xchi’uc ep coraletic biq’uitic ta xbat, xchi’uc ep muc’tiquil jteclum ti muyuc c’usi ta xcome.

25 Xchi’uc ta xjamanan epal muquinaletic, xchi’uc ep ta xaq’uic ta c’abal yanimaic, xchi’uc ep ch’ul viniquetic ta xvinajic ta epal viniquetic.

26 Xchi’uc ja’ jech, yalojbun ti abate, yu’un la jyalbun ti ta xlic chauc xchi’uc sacsevul epal orae.

27 Xchi’uc la jyalbun ti c’alal ja’ o jech ti chauc xchi’uc sacsevul xchi’uc jech vocolile, ja’ to te ta xvinaj ti c’usitic va’aye, xchi’uc ti ta xpixiic ta ac’ubaltic oxib c’ac’al scotol banamile.

28 Xchi’uc la jyalbun abat ti ta to xvinaj muc’tic c’usitic jech chac c’u cha’al va’ay ta sventa ti c’uxi xu’ xa ch’unic ti sq’uelubil xchi’uc ti svinajeb ta xvinaj ta sba scotol li’ banamil, ta sventa ti c’uxi mu xa tsotsuc ta ch’unel cha’yic ti xnich’nab viniquetique.

29 Ta sventa ti boch’otic ta sc’an ta xch’unique stac’ ta xcolic, ta sventa ti boch’otic mu sc’an xch’unique ta xich’ic q’uelbel stalelic, xchi’uc xtoc, ta xich’ic aq’uel batel ta ch’ayel, ta xich’ic talel stuquic ti c’u x-elan ta xich’ic aq’uel ta ch’ayele.

30 ja’ jech, na’icme, na’icme, quermanotac vu’un, yu’un ti boch’o ta xchame, ta xcham ta yu’un no’ox stuc, xchi’uc ti boch’o ta spas bolililetique, ta spas ta scontra no’ox stuc, ja’ jech, colemoxuc, ta spasel ti c’usi cha c’an atuq’uique, ja’ jech, Riox yac’ojboxuc a na’ic xchi’uc ti jech colemoxuc oe.

31 Ja’ yac’ojboxuc stuc ti c’uxi xu’ xa na’ic ti c’usi lec xchi’uc c’usi chopole xchi’uc ja’ yac’ojboxuc ti ac’o xa t’ujic ti cuxlejal o me lajebale, yu’un ti me lec la pasique, cha vich’ic cha’ aq’uel yanvelta ta lequilal, o me ta xa vich’ic liquesel ta ach’ ta lequilal, ti me ja’ cha pasic ti c’usi chopole, ja’ jech ta sventa c’usi chopol ta xa vich’ic cha’ liquesel.