1 Ja’ jech, epic ti boch’otic la jya’yic ya’yej Samuel jlamanita vinic c’u x-elan ic’opojtal te ta scoral tonal muc’ta jteclume, ti boch’otic la xch’unbeic ti ya’yeje batic xchi’uc bat st’unic Nefi; ti c’alal batique la staic, xchi’uc la jyal scotol smulic jech muyuc la smuc smulic ta stojolal, yu’un tsc’anic ti ac’o xich’ic vo’ ta sventa Cajvaltique.

2 Jech ti boch’otic muyuc la xch’unic ti ya’yejtac Samuele ilinic ta stojolal; xchi’uc la jyac’beic ton ti te ta ba coral tone, xchi’uc epic ti la jyaq’uic t’ilubte’il ti c’alal te oy te ta ba coral tone, jech ti S-espíritu Cajvaltique te oy ta stojolal, jech muyuc xt’uch’ yu’nic ti ta stonique xchi’uc ti ta st’ilub te’ique.

3 C’alal la jyilic ti va’ay muyuc bu xt’uch’ yu’nique, oy to ep boch’otic la xch’unic ti ya’yejtaque, jech batic bat sa’ic Nefi ti c’uxi bat yich’ic vo’e.

4 Ja’ jech, ti Nefie te ta xac’ ich’ vo’, xchi’uc ta xcholbe sc’oplal, xchi’uc ta xalbe sc’oplal ti sutesub o’ntonal ta jteclume, ta xac’be ta ilel sq’uelubil xchi’uc svinajeb; xchi’uc ta x-abtej ta c’usitic lavalic sba ti te ta jteclum ti c’uxi xu’ sna’ic ti jutuc xa sc’an xtal ti Cristoe.

5 Jech la yich’ic albel ti c’usi jutuc xa sc’an xc’ot ta pasel, ta sventa c’uxi xu’ sna’ic xchi’uc ti c’uxi xu’ st’ab ta yo’ntonic ti c’alal me c’ot ta pasel ti c’u x-elan la jyich’ic ac’bel sna’ic ta ba’yuc ti c’uxi xu’ xch’unique, ja’ jech, ti c’alal la xch’unic ti ya’yejtac Samuele batic ta stojolal Nefi ti c’uxi bat yich’ic vo’e, ja’ jech la sutes yo’ntonic xchi’uc ta xalic ta jamal smulic ti c’alal chc’otique.

6 Ja’ epic ti muyuc la xch’unic ya’yejtac Samuele; ja’ jech, c’alal la jyilic ti muyuc stac’ stuch’esic ta stonic xchi’uc ti ta st’ilub te’ique, la jya ptaic ti banquilaletic yu’nique, jech la jyalic: Tsaquic ti li’ vinique xchi’uc chuquic, yu’un oy pucuj ta stojolal; xchi’uc ja’ ta stsatsal pucuj oy ta stojolal ti jech mu xtuch’ cu’uncutic ta jtoncutique xchi’uc ta jti’lub tilubte’cutique; ja’ jech tsaquic chuquic, xchi’uc iq’uic batel.

7 C’alal batic bat stsaquique, ja’ jech yal ti ta coral tone, xchi’uc jato batel ta steclumal stuc, jech, c’alalto ta smuc’ta teclumal stuc, xchi’uc sjapo yalbel smelolal xchi’uc cholbel sc’oplal ti te ta steclumal stuque,

8 Ja’ jech, muyuc xa bu xich’ na’el c’uxi bat ti ta stojolalic nefitaetique, xchi’uc ja’ jech x-elan ti jteclume.

9 Ja’ jech, laj ti sjabilal vaquib yo’vinic (86) jabil ti c’alal ja’o ochem ta ajvalilal jueces ti te ta steclumal Nefie.

10 Xchi’uc ja’ jech laj xtoc ti sjavilal vucub yo’vinic (87) jabil ti c’alal ja’ o ochem ta ajvalilal Jueces ti c’alal jech ja’ ep oyic jteclum ta sventa stoyubbailic xchi’uc ti ta c’usi tu j-ech’em bolilile, xchi’uc ja’ jutuquic ti ja’ ta xanoic ta c’usi lec ta xil Rioxe.

11 Ti li’e ja’ jech x-elan lecubic ti ta sjabilal vaxaquib yo’vinic (88) jabil c’alal ochemic ta ajvalilal Juecese.

12 Ti ta sjabilal baluneb yo’vinic (89) jabil ti c’alal ochemic ta ajvalilal Juecese jutuc jeltaj ti c’u x-elan tspasic ti jteclume, yu’un ti viniquetique sjapoic yaq’uel sbaic ta epal bolililetic, xchi’uc ech’emto tu j-ech’em la spasic ti c’usitic ma’uc jech chac c’u cha’al smantaltac Rioxe.

13 Ja’ o jech c’ot ta pasel ti ta sjabilal slajunebal yo’vinic (90) jabil c’alal ochem ta ajvalilal Juecese, vinaj epal sq’uelubil xchi’uc svinajeb ta jteclum xchi’uc c’ot ta pasel ti ya’yejtaquic lequil viniquetique.

14 Xchi’uc la jyac’ sba ta ilel abatetic ta viniquetic, ta bijil viniquetic, xchi’uc la jyich’ic albel c’usi lec ach’ ta sventa cuxetel o’ntonal; ja’ jech ti te ta sjabilale sjapoic xch’unel ti ts’ibiletique.

15 Muc’ ta jaluc, ti jteclume, sjapo stsatsubtasel yo’nton jech cha c’u cha’al nefitaetic xchi’uc jech chac c’u cha’al lamanitaetic; scotolic, ja’ xa no’ox ti boch’otic ja’ jch’unolajel yu’nique, xchi’uc ja’ la spat yo’ntonic ta spersa stuquic xchi’uc ti ta c’usi sna’ic stuquique, jech la jyalic:

16 Oy jayibicuc ti c’usitic oy ta scotole, stac’ la sna’ic lec ta sjolic no’ox, xchi’uc ja’ jech, jna’ojcutic ti scotol c’usitic va’ay abtelal ti muc’tic xchi’uc ti alaq’uic sba quich’ojcutic albele mu xu’ chc’ot ta pasel.

17 Xchi’uc sjapoic snopel lec ta stuquic no’ox, jech la jyalic:

18 Mu smeloluc ti ac’o xtal jun vinic jech c’u cha’al jun Cristoe, ti me ja’ jeche, ti me ja’ snich’on Riox, ti totil ta vinajel xchi’uc ta banamil jech chac c’u cha’al yich’oj alele, ¡C’uyu’un mu xac’ sba ta ilel ta jtojolalcutic jech chac c’u cha’al ta xac’ sba ta ilel ta stojolalic boch’otic te oyic ta Jerusalene?

19 Jech, ¡C’u yu’un mu xac’ sba ta ilel li’ ta banamil, jech chac c’u cha’al ta Jerusalene?

20 Xchi’uc ja’ jech vu’uncutic jna’ojcutic ti li’e ja’ ti c’usi muyuc stu c’usi nopen o no’ox a’ybil jech chac c’u cha’al yalojbutic ono’ox jtotic ti c’uxi xu’ jch’untic ti c’usitic muc’tic xchi’uc alaq’uic sba ta to xc’ot ta pasele. Ti va’aye ma’uc li’ ta jtojolalcutic, yu’un ja’ ta namal banamil, ta banamil ti bu mu xcotquincutique; ja’ jech, stac’ xi ch’aycutic ta o’ntonal, yu’un mu stac’ xcac’cutic xch’unolajel co’ntontic ta jsat jtuctic ti me ja’ ta bats’imelele,

21 Ti stuquique ta sventa xchopolil stalelic ti c’u x-elan ta xaq’uic ta ilel tsatsalile, xchi’uc ta to xaq’uic ta ilel tsatsalil ti c’uxi vu’uncutic mu xca’ybecutic smelolale, ti c’uxi ja’uc xi spasuncutic ta yaj abtel ya’yejtaque xchi’uc ti ja’uc xi pasutic ta yaj abtelic stuquic xtoque, ti c’uxi ja’uc o oyuncuticuc ta stojolal ti c’uxi xu’ xi xchanubtasuncutic ta a’yeje, xchi’uc ti c’uxi mu c’usi jchancutic o ta scotol c’ac’al cuxuluncutic ti me ja’ la jcac’ jbacutic ta stojolalique.

22 Xchi’uc ep c’usitic chavajil xchi’uc c’usitic jech no’ox la snop ta yo’ntonic; yu’un ch’ayem yo’ntonic ta sventa pucuj yu’un ja’ ta xich’ic sujel ta jujuliquel spasel ti bolililetique; jech, yu’un ja’ xano ta yalel c’opetic li’ ta sba banamil, ta sventa ti c’uxi stsatsubtasbeic yo’nton viniquetic ta scontrainel ti c’usitic leque xchi’uc ti c’usi jutuc xa sc’an xtale.

23 Ac’o me oy sq’uelubil xchi’uc svinajeb ta xich’ pasel ti ta steclumal Cajvaltique, xchi’uc ti ep sq’uelubil laval sbaique, ti pucuje la sta muc’ stsatsal ta yut yo’ntonic jteclum ta scotol sba banamil.

24 Ja’ jech laj o ti sjabilal lajuneb yo’vinic (90) jabil c’alal ochem ta ajvalilal Jueces te ta steclumal Nefie.

25 Xchi’uc ja’ jech laj ti slibro Helamáne, jech ja’ co’ol sba xchi’uc spoco’ lo’iltac Helamán xchi’uc snich’nab.