1 Ja’ jech c’ot ta pasel ti ta slajeb xa buluchib yo’vinic (91) jabile, ja’ o xa ti vaquib ciento (600) xa ox jabil sloq’uestal Lehi ta Jerusalen, ta sjabilal ti c’alal ja’ o ochem ta banquilal Juez Laconeo xchi’uc ti ja’ ajvalil ta scotol banamile.

2 Ti Nefi, xnich’on Helamáne, loq’uem xa ox batel ti li’ ta jteclum Zarahemlae, Ti banquilal xnich’on ti ja’ Nefie, la jyac’be yabtel ta sventa saquil taq’uin vunetic xchi’uc ta scotol poco’ lo’iletic ti bu nac’bilic o no’oxe, xchi’uc scotol ti c’usitic lec ch’ul nac’bil ti c’alal ja’o no’ox c’alal loc’tal Lehi ta Jerusalene.

3 Jech loc’ batel ti li’ ta banamile, jech muyuc boch’o sna’ c’uxi bat, ti xnich’on Nefie la snac’ ta yabil ti poco’ lo’iletique, jech, ti ja’ spoco’ lo’ilal li’ jteclume.

4 Ja’ o jech ti ta sliqueb sjabilal lajchab yo’vinic (92) jabile, ja’ jech c’ot ta pasel ta bats’imelel ti c’usi yalojbeic smelolal lequil viniquetique; yu’un lic c’otuc ta pasel muc’tiquil sq’uelubil xchi’uc c’usitic lavalic sba ti te ta jteclume.

5 Oy o no’ox jayibicuc ti boch’otic sjapoic yalel ti jeloven xa sc’ac’alil ti jech chc’ot ta pasel ti ya’yejtac c’usi la jyal Samuel jlamanita vinique.

6 Xchi’uc sjapoic stseintael yermanotaquic, jech la jyalic: Ja’ jech jelo xa ti sc’ac’alile, xchi’uc muyuc xc’ot ta pasel ti c’usi yaloj Samuele; jech jeche’ xa ech’ o ti xcuxetel co’ntontique xchi’uc ti xch’unolajel co’ntontic ta sventa va’aye.

7 Ja’ jech ep soc yu’nic ta scotol banamil, xchi’uc ti boch’otic xch’unojique sjapoic ep at o’ntonal ta sventa ti muyuc xilic c’usitic yich’oj o no’ox alele.

8 Yu’un jech, smalaojic lec ti baq’uin chc’ot ti sc’ac’alil xchi’uc ti yac’ubalil ti yan c’ac’ale. Ti jech jun no’ox c’ac’al o ti jech muyuc ac’ubaltic ti c’uxi mu jechuc no’ox x-ech’ ti xch’unolajel yo’ntonique.

9 Ja’ o jech ti boch’otic chopolique la xch’acbeic sc’ac’alil ti baq’uin xu’ xchamic scotolic ti boch’otic xch’unic ti c’usi nopen xa’yique, ja’ xa no’ox xu’ xcolic ti me c’ot ta pasel ti c’usi yaloj lequil vinic Samuele.

10 Ja’ o jech c’ot ta pasel ti Nefi, xnich’on Nefi, ti c’alal la jyil ti sbolilic steclumale, ti yo’ntone ep la jyat yo’nton.

11 Ja’ jech bat xchi’uc la squejan sba ta banamil, xchi’uc la sc’opan Riox ta scotol yo’nton ta sventa steclumal, jech, ja’ic ti boch’otic jutuc xa sc’an xich’ic vuq’uesel ta sventa yu’un ja’ te oy xch’unolajel yo’ntonic ta sventa c’usi nopen xa’yic stotique.

12 Ja’ jech sbejel c’ac’al la sc’opan ti Cajvaltic ta scotol yo’ntone, xchi’uc ja’ jech ya’yej ti Cajvaltic tal ta stojolale, jech la jyal:

13 Toyo ajol xchi’uc cuxetuc no’ox a vo’nton, yu’un ti li’e, ti sc’ac’alile jutuc xa sc’an; ti li’ ta ac’ubaltique ta xich’ aq’uel ti sq’uelubile, xchi’uc ti oc’ome chi tal ta banamil ti c’uxi ta xcac’ ta ilel ta banamil ti ta xc’ot ta pasel cu’un ti c’usi la jca’c ac’o yalic ta yeic ti ch’ul lequil viniquetique.

14 Ja’ jech chi tal ta sventa cu’untac ti c’uxi xu’ c’otuc ta pasel scotol ti c’usi cac’oj ta na’el ta sventa xnich’nab viniquetic ta sliquebal banamil ono’oxe, xchi’uc ti c’uxi c’otuc ta pasel jech chac c’u cha’al tsc’an totil jech chac c’u cha’al tsc’an Nich’onil; Ta totil ta jventa vu’un, xchi’uc ti nich’onile ja’uc ta sventa jbec’tal, ja’ jech, ti sc’ac’alile c’ot xa, yu’un ti li’ ta yac’ubalil tanae ta xich’ aq’uel ti sq’uelubile.

15 Ja’ jech c’ot ta pasel ti lo’iletic la jyich’ albel Nefie, ja’ jech chac c’u cha’al yich’ alele; yu’un ja’ jech ti c’alal ch’ay ti c’ac’ale, muyuc x-ic’um osil, xchi’uc ti jteclume sjapoic xi’el ti jech muyuc x-ic’um osil c’alal sta yorail ch-och ac’ubale.

16 Jech oy epic, ti muyuc o no’ox la xch’unbeic ya’yejtaquic ti lequil viniquetique, jech yalic ta lum xchi’uc xco’laj xchi’uc anima comic, xchi’uc sna’ojic ti muyuc ta xc’ot ta stojolalic ti vuq’uesel c’u x-elan albil sc’oplal ta stojolalic boch’otic ta xch’unbeic ya’yejtaquic lequil viniquetique, yu’un ti sq’uelubil c’u x-elan o no’ox albilique yu’un te xa sq’uelojic.

17 Xchi’uc ja’ to te la sna’ic ti yu’un jutuc xa sc’an xtal ti xnich’on Rioxe, jech ta jbel no’ox ta c’op, scotolic ti quirisianoetic li’ ta sba scotol banamile, ti te xlic ta sloq’uem c’ac’al c’alal to ta smaleb c’ac’ale, xchi’uc, jech chac c’u cha’al banamil ta jot xocon sloq’uem c’ac’ale, xchi’uc jech chac c’u cha’al ta jot smaleb c’ac’ale, ep ixi’ic xchi’uc jech yalic ta lum.

18 Yu’un sna’ojic ti jech yalojic ta jamal o no’ox ti lequil viniquetic ta epal jabil ti c’usitic va’aye, xchi’uc ti sq’uelubil albilic ono’oxe yu’un sq’uelojic xa ta satic; xchi’uc sjapoic xi’el ta sventa sbolilic xchi’uc timuyuc la xch’unique.

19 Ja’ jech muyuc x-ic’um osil sbejel ac’ubal ti va’ay ta ac’ubaltique, yu’un jech sac osil o jech chac c’u cha’al o’lol c’ac’al yileluc, ja’ jech ti ta sobe loc’ c’ac’al yan velta jech chac c’u cha’al o no’ox chloq’ue; te la sna’ic o ti ja’ sc’ac’alil ti jech ta xvoc’ Cajvaltic ta sventa ti sq’uelubil la jyich’ aq’uele.

20 Yu’un ja’ jech c’ot ta pasel, jech, scotol ti c’usitic va’aye, scotol c’usitic, jech chac c’u cha’al la jyalic ti lequil viniquetique.

21 Xchi’uc xtoc vinaj jun ach’ c’anal, jech chac c’u cha’al albil o no’oxe.

22 Xchi’uc ja’ to te sjapo stanijel epal c’op ta scotol jteclum ti pucuje, ti c’uxi ta stsatsubtasbe yo’ntonique, xchi’uc ta sventa ti c’uxi ac’o mu xch’unic ti sq’uelubil xchi’uc ti svinajeb yilojique, jech ti ta va’ay epal c’op xchi’uc ti ta lo’laele, ja’ epic ti jteclum la xch’unic xchi’uc ti la jyac’ sbaic ta Cajvaltique.

23 Ja’ jech ti Nefie loc’batel ta jteclum xchi’uc epic yantic, la jyaq’uic ich’ vo’ ta sventa sutesub o’ntonal, ti c’uxi chc’ot ta pasel ti jech muc’ no’ox ta xch’aybat smulique, xchi’uc ja’ jech ti jteclume staic lequilal ta banamil.

24 Xchi’uc muyuc xa bu oyuc uts’intael, ja’ no’ox ti boch’otic sjapoic xcholel c’ope, ta sc’an ta spasic poroval ta sventa ts’ibiletic, ti yu’un mu xa persauc xich’ q’uelel ti smantaltac Moisese, ti va’aye la soquesic, ta sventa ti yu’un muyuc xa’ybeic smelolal ti ts’ibiletique.

25 Ja’ jech muyuc xjalij la jyac’ sbaic, xchi’uc ja’ te la jyac’ sbaic ti ta chopolil bu oyic o no’oxe, yu’un la jyich’ic ac’bel sna’ic ti muyuc to c’otemuc ta pasel ti mantaletique, yu’un o no’ox ja’ lec ti c’otuc ta pasel ti jech mu xch’ay jlec’uque, jech c’ot ta stojolalic ti lo’iletic ti yu’un ja’ lec ti jech chc’ot ta pasele; jech, me jbajuc xchi’uc me jlec’uc chjelo ti jech mu xc’ot ta pasele; yu’un jech, ti li’ ta sjabilale la jyich’ic ac’bel sna’ic ti c’usi chopol spasojique, xchi’uc la jyalic ti c’usi muyuc lec spasojique.

26 Ja’ jech laj ti sjabilal lajchab yo’vinic (92) jabile, jech tal ti c’usi ach’ cuxetel o’ntonal ta sventa ti sq’uelubiltac yich’ojic albele, jech chac c’u cha’al ya’yejic la jyalic scotolic ti ch’ul lequil viniquetique.

27 Xchi’uc xtoc ti ta sjabilal yoxlajunebal yo’vinic (93) jabile lec ono’ox jelo, xtoc. Ja’ xa no’ox ti j-eleq’uetic yu’un Gadianton ti te nacajtiquic ta te’tic te ta muc’ta jteclume, yu’un tu jtsotsic ti yaj chavinajetique, jech muyuc stsal yu’nic ti jteclume, ja’ jech ep la smil sbaic xchi’uc jech ep la smil sbaic ti ta jteclume.

28 Ja’ jech ep epajic ti ta sjabilal xchanlajunebal yo’vinic (94) jabile, yu’un epic Nefitaetic ti jech mu sc’an sbaic ti jech la snuts sbaic loq’uel ta stuquic no’oxe, ti va’aye la jyac’ at o’ntonal ta sventa Nefitaetic ti boch’otic li’oyic ta banamile.

29 Xchi’uc ep la jya’yic at o’ntonal Lamanitaetic ec xtoc, yu’un ja’ jech, oy ep xnich’onic ti jech ch’iic xchi’uc ti jech x-epajic ta jun no’ox jabil ti ta spasic c’usiuc no’ox tsc’an yo’ntonic stuquique, ti jayibic Zoramitaetique la spasic ta mantal, ta sventa yepal c’opic xchi’uc ta c’usi muyuc lec ya’yejic, ti c’uxi bat xchi’nic j-eleq’uetic yu’un Gadiantone.

30 Ja’ jech la jyilic at o’ntonal ec xtoc ti lamanitaetique, xchi’uc ja’ jech la jyictaic ti xch’unolajel yo’ntonique, xchi’uc ti lequilale, ja’ ta sventa xchopolil ach’ yalab xnich’nabic.