Svaquibal xcha’vinic Capitulo
Ti Jesuse ta xcholbe sc’oplal scotol c’usitic oy jech c’alalto ta sliqueb xchi’uc c’alalto ta slajeb—Ti bic’tal ololetique, jech c’alalto ta bu ech’em biq’uitic, ta xc’opojic ta alaq’uic sba lo’iletic ti jech mu stac’ xich’ ts’ibaele—Ti boch’otic ja’ic ta xch’ulna Cristoe oy yu’nic ta jmoj scotol ti c’usitic oye.
1 Ja’ o jech ti c’alal la jyal scotol c’usitic va’ay ti Jesuse, la jyalbe smelolal ta boch’otic te tsobolic, xchi’uc la jyalbe smelolal scotol, ta muc’tic xchi’uc ta biq’uitic.
2 Jech la jyal: Ti li’ ts’ibiletic bu muyuc o no’ox a vich’ojique, jtotic la spas mantal ti vu’un ac’o xcac’boxuque; yu’un ti c’usi sna’oje la jyal ti ta xich’ aq’uel ta anich’nabic baq’uine.
3 Xchi’uc la jyich’ic albel smelolal scotol, jech chac c’u cha’al ta sliquebal o no’ox xchi’uc c’alal metal stuc ta xojobal xchi’uc slequilal; jech, scotol ti c’usitic ta xc’ot ta pasel ta sba banamile, xchi’uc ja’ to ti c’usi chvos ta sc’ac’al c’oc’ scotol ti c’usitic oye, xchi’uc ti banamile ta xich’ tsobel jech chac c’u cha’al jun vun, xchi’uc ta xjelo ti banamile xchi’uc ti vinajele.
4 Ti ta sc’ac’alil baq’uin smuc’ul slajebal c’ac’ale, scotol jteclum, xchi’uc scotol jnaclejetic xchi’uc scotol banamil, c’opetic ta xc’otic ta stojolal jtotic ti c’uxi ta xich’ic q’uelel stalelic c’u x-elan yabtelic me lec o me chopole.
5 Ti me lequique, ta xcha’ cuxiic ta sventa cuxlejal sbatel osil, ti me yu’un chopolique ta xcha’ cuxiic ta sventa chopolil, yu’un jech chac c’u cha’al c’usi chib oy, jun ta jot jech jun ta jot, jech chac c’u cha’al vocolil xchi’uc lequilal, xchi’uc jech chac c’u cha’al lequilal oy ta Cristo ti yu’un jech oy o no’ox ti c’alal sc’antoox spas banamile.
6 Xchi’uc mu stac’ xich’ ts’ibael li’ ta libro me ja’uc jutuc xu’ ta xich’ ts’ibael ti c’usi la jyal Jesús ta bats’imelel ta stojolalic jteclume.
7 Ja’uc ti li’ staq’uin vuntac Nefie ja’ ep te tsacal ti c’usitic la xchanubtas jteclume.
8 Xchi’uc la jts’iba ti c’usitic li’e, ja’ juteb ti c’u x-elan la xchanubtas jteclume, xchi’uc la jts’iba ta sventa ti c’uxi ac’o c’otuc yanvelta ta stojolalic boch’otic ma’icuc snailal Israeletic ti li’ ta jteclume, ja’ jech chac c’u cha’al ya’yejtac Jesús yaloje.
9 Ti c’alal me la vich’ic ti li’e, yu’un ja’ lec ti ja’uc xa vich’ic ba’yuc ti c’uxi xu’ xa pasic poroval xch’unolajel a vo’ntonique, ti me jech c’ot ta pasel ti me la ch’unic ti c’usitic li’e, ja’ to jech cha vich’ic ac’bel avilic ti c’usitic ja’ muc’tique.
10 Ti me jech c’ot ta pasel me muyuc xa ch’unic ti c’usitic li’e, jech ta xich’ loq’uesel ta atojolalic ti c’usitic muc’tique, ta sventa ti c’uxi cha vich’ic aq’uel batel ta ch’ayele.
11 Ja’ jech, ta jts’iba c’u yepal xa ox ti la jyich’ ts’ibael ta sba staq’uin vuntac Nefie. Cajvaltic la jyalbun ti mu xu’ jts’ibae, jech la jyal: Ta jpasbe poroval xch’unolajel yo’nton li’ jteclumale.
12 Jech ti vu’un Mormonune, ta jts’iba ti c’usitic la spasun ta mantal Cajvaltique, jech tana ti vu’un Mormonune, ta xa jlajes li’ ca’yejtaque, ja’ ta japo sts’ibael ti c’usitic la jquich’ pasel ta mantale.
13 Ja’ jech, ta jc’an ti ac’o xa va’ybeic lec smelolal ti Cajvaltic ta bats’imelel la xchanubtas jteclum oxib c’ac’ale, jech ti va’aye, liquel liquel la jyich’ic ac’bel yilic, xchi’uc ep ta velta la jyich’ic voc’bel pan, la sts’uiltas xchi’uc la jyich’ic ac’bel.
14 Ja’ o jech la xchanubtas xchi’uc la xchabibe ti xnich’nabic boch’otic te tsobolique, xchi’uc la sjitunbe yoq’uic, jech la jyalic muc’tic xchi’uc alaq’uic sba lo’iletic ta stotic, ep jech chac c’u cha’al yac’oj ta ilel stuc ta jteclume, la sjitunbe yoq’uic ta sventa ti c’uxi xu’ xc’opojique.
15 Ja’ o jech ta ts’acal ti c’alal jech muy batel ta vinajel ti c’alal xchibal xa ox velta la jyac’sba ta ilel ta stojolalique, jech sut batel yanvelta ta jtotic ti c’alal jech la jyich’ic coltabel scotol yaj chamelique xchi’uc xcoxoique, xchi’uc ti la sjambe sat sma’satique, xchi’uc ti la sjambe xchiquin scoquilchiquinique, xchi’uc ti jech la spas scotol ta chop coltael ta stojolalique, xchi’uc ti la xcha’cuxes jun vinic te ta animaetique, xchi’uc ti la jyich’ic ac’bel yilic stsatsal ta stojolalique xchi’uc ti te bat te buoy jtotique.
16 Ja’ jech, c’ot ta pasel ti ta yoc’omal c’alal la tsob sbaic ti boch’otic te tsobolique, la jya’ay xchi’uc la jyil ti li’ ololetique, jech, c’alal ta uni ololetic la sjam yeic xchi’uc la jyalic alac’ sba lo’iletic, ti c’usi la jyalique, la jyich’ic albel viniquetic ti ac’o mu sts’ibaique.
17 Ja’ o jech ti yajchanc’optac bu st’ujoj Jesuse sjapoic ac’ vo’ xchi’uc sjapoic xchanubtaselic ti boch’otic ta xtalic ta stojolalique, xchi’uc ti jayibic boch’otic la jyich’ic vo’ ta sbi Jesuse nojemic com ta Ch’ul Espíritu.
18 Xchi’uc epic boch’otic la jyilic xchi’uc la jya’yic ti jech mu xu’ xich’ alele, xchi’uc ti mu xu’ xich’ ts’ibaele.
19 Chanubtasvanic xchi’uc la jyalic ta jujuntal, xchi’uc lec oy scotol yu’nic ti c’usitic oye, scotol viniquetic ta x-abtejic ta sventa lequilal ta jujuntal.
20 Ja’ jech la spasic scotol c’usitic oy, jech chac c’u cha’al Jesús la spas mantale.
21 Ti boch’otic la jyich’ic vo’ ta sbi Jesuse, la sbiinic xch’ulna Cristo.