Sbalunebal xcha’vinic Capitulo
Ti c’alal me loc’ Slibro Mormone ja’ svinajeb ti yu’un sjapoj xa stsobel Israel xchi’uc ti chc’ot ta pasel c’usi yaloj Cajvaltique—Ti boch’otic mu xch’unic c’usi chac’ ta ilel xchi’uc ti stsatsale ta slajebal c’ac’ale ta xich’ic ac’bel vocolil.
1 Xchi’uc ja’ jech tana cha calboxuc c’usi sna’ ti Cajvaltique, ti lo’iletic li’e ta sq’uel lec ti c’uxi c’otuc ta stojolalic boch’otic ma’icuc snailal Israel jech chac c’u cha’al yaloj o no’oxe, ja’to jech te cha na’ic o ti yu’un ta xa xc’ot ta pasel c’usi yaloj jtotic ta stojolalic xnich’nabtac Israeletique, jech chac c’u cha’al la sliquesanan banamiletic ti ja’ spuculalique.
2 Xchi’uc ja’ to te cha na’ic ti ya’yejtac Riox bu yalojbeic smelolal ch’ul viniquetique, ta xc’ot ta pasel scotol xchi’uc mu stac’ xa valic ti me ta xjalij ti jech ta xtal ta stojolalic xnich’nab Israele.
3 Xchi’uc muyuc lec ti me cha nop ta avo’ntonic me muyuc stu ti lo’iletic c’u x-elan yich’oj alele, xchi’uc ja’ jech, ti Cajvaltique ta svules ta sjol ti c’u x-elan yaloj ta sventa steclumal ti ja’ic snailal Israele.
4 Ti c’alal cha vilic me chc’ot ta atojolalic ti va’ay lo’iletique, yu’un mu stac’ xa bajic epal c’ac’al ti c’usi spasoj Cajvaltique, yu’un ti xmachita sventa lequilale te oy ta sbats’i c’ob, xchi’uc ja’ jech ti baq’uin me la va’yic ti yabteltaque, ja’ ta xac’ ti ac’o staoxuc ta orae.
5 ¡Abul sba ti boch’o ta sbaj c’usi spasanoj Cajvaltique; jech, abul sba ti boch’o mu jamaluc ta xal Cristo xchi’uc yabteltaque!
6 Jech, ¡abul sba ti boch’o mu jamaluc ta xal c’usitic yac’ojan ta ilel Cajvaltic ta slequil vinictaque, xchi’uc ti boch’o ta xal mu jechuc ta x-abtej Cajvaltic ti jech ta xac’ ta ilel ta slequil vinictaque, xchi’uc me ja’uc ti c’usi ta xalic lequil viniquetique, xchi’uc me ja’uc stsatsalil xchi’uc me ja’uc ta c’opetic, xchi’uc me ja’uc ta colesel, xchi’uc me ja’uc ta stsatsal Ch’ul Espíritu.
7 Jech ¡abul sba ti boch’o jech ta xal ta baq’uin, ti c’uxi xu’ sta staq’uinic, ti jech mu stac’ xac’ sq’uelubil stsatsal Jesucristoe! ti boch’o ta xal jech va’aye ja’ ta xac’ sba ta xnich’on pucuj, ti boch’o muyuc slequilal jech chac c’u cha’al ya’yej Cristoe.
8 Jech, mu xa xu’ xa laban xchi’uc xa baj ti Judioetique, xchi’uc me ja’uc xu’ xa labanic ti stuquique, xchi’uc me junuc boch’o xu’ jech xa pasbeic ti boch’otic ja’ic scomelal snailal Israele, yu’un ti Cajvaltique, sna’oj ti c’usi yaloj ta stojolalique, xchi’uc ja’ jech ta spas ta stojolalic jech chac c’u cha’al yaloje.
9 Xchi’uc xtoc, mu me xa valic ti me yu’un stac’ xa vaq’uic ta sts’et c’ob ti sbats’icob Cajvaltic, ti c’uxi mu xc’ot ta pasel ti jech tsq’uel talelil jech chac c’u cha’al yaloj o no’ox ta snailal Israele.