1 Xchi’uc ta bats’imelel cha calboxuc, ti ta xcac’ jun sq’uelubil ti c’uxi xu’ xa na’ic ti baq’uin jutuc xa sc’an xc’ot ta pasel ti c’usitic va’aye, ti baq’uin ta jtam jteclumal ti te bu nom tanijbilic batel ti ja’ic snailal Israele xchi’uc ti ac’o spasic yanvelta ta muyuc uts’intael ta stojolalique.

2 Ja’ jech, ja’ ti li’ sq’uelubil ta xcac’ ta q’uelele, yu’un ta bats’imelel cha calboxuc ti baq’uin ta xich’ aq’uel ta otquinel c’usitic li’ cha calboxuc ti ta boch’otic ma’icuc snailal Israele, xchi’uc ti c’usi ta to xa calboxuc vu’une, xchi’uc ta stsatsal Ch’ul Espíritu ti jech ta xac’ jtotic ti c’uxi xu’ sna’ic ta sbenticion li’ jteclum ti ja’ic scomelal snailal Jacobe, xchi’uc ta sventa jteclumal vu’un ti jech ta xich’ic tanijel batel ta stojolalique.

3 Ta bats’imelel ta bats’imelel cha calboxuc, ti baq’uin cha yac’boxuc a na’ic jtotic ti c’usitic li’e, ta xac’ sbaic ta stojolal jtotic ta aventaic.

4 Yu’un ja’ jech chac c’u cha’al sna’oj jtotic ta xich’ic aq’uel ti li’ ta banamile, xchi’uc ta xich’ic albel ti yu’un ja’uc jun jteclum muyuc uts’intael ta sventa stsatsal jtotique, ti c’uxi ac’o te oyuc ta stojolalic ti c’usitic li’e xchi’uc c’alalto ta scomelal xnich’nabic ti c’uxi ac’o c’otuc ta pasel ti c’usi la jyal jtotic ta sventa snailal Israele.

5 Ja’ jech, jech ti li’ abtelaletic; xchi’uc ti abtelaletic ta xlic yich’ pasel li’ ta ora ta atojolalique, vo’xuc cha vaq’uic ta boch’otic ma’icuc snailal Israel ta anichi’nabic ti jech ac’o ch’ayuc c’usi chopol spasojic ta sventa c’usitic chopole.

6 Yu’un ja’ jech lec ti ac’o talicuc ta jtotic ti boch’otic ma’icuc snailal Israele, ti c’uxi xu’ xac’ ta ilel stsatsal ti ta boch’otic ma’icuc snailal Israele, jech ti va’ay, me muyuc la stsatsubtas yo’ntonique, ti me la sutes yo’ntonic xchi’uc me chtalic ta jtojolal xchi’uc ti me ta xich’ic vo’ ta jbie xchi’uc ti me ta xotquinic scotol ti jlequil c’op ti c’uxi xu’ xich’ic atael ta sventa boch’otic ja’ic jteclumal, ti ja’ic snailal Israele.

7 Ja’ jech ti c’alal me c’ot ta pasel scotol ti c’usitic va’aye, xchi’uc ti me sjapoic yotquinel ti anich’nabique, jech ja’ xa sq’uelubil o, ti c’uxi xu’ sna’ic ti yu’un lic xa yich’ pasel ti yabtel jtotic ti c’uxi c’otuc ta pasel ti c’usi la jyal ta jteclumal ti ja’ic snailal Israele.

8 C’alal me tal ti va’ay c’ac’ale, ti ajvaliletique ta smac yeic, yu’un ta xilic ti c’usi muyuc yich’ojic albele, xchi’uc ta snop ta sjolic ti c’usi muyuc baq’uin ya’yojique.

9 Yu’un ti baq’uine ta spas jtotic ta jventa vu’un, jun abtelal ti ja’ jun muc’ta abtelal xchi’uc alac’sba ta stojolalic; xchi’uc oy o no’ox boch’o a avu’nic ti muyuc ta xch’unique, ac’o me ta xich’ic albel.

10 Xchi’uc ti xcuxlejal caj abtele oy ta jc’ob, ja’ yo jech mu xu’ c’uxi xa vutic, ac’o me tuch’em xa ta sventaic, ja’ jech vu’un ta jpoxta, yu’un ta xcac’be yilic ti yu’un ja’ muc’ ti c’usi jna’ vu’un jech chac c’u cha’al c’usi sna’ li’ pucuje.

11 Ja’ jech chc’ot ta pasel, ti boch’otic muyuc ta xch’unic ti a’yejetic ti ja’ ta jventa vu’un ti ja’un Jesucristoe, ja’ jech ti jtotique ta xac’ ac’o yich’ic batel ta boch’otic ma’icuc snailal Israel, xchi’uc ta xac’be stsatsal ti c’uxi ac’o pasuc jech chac c’u cha’al la jyal Moisés tsyayijesic boch’otic ma’icuc snailal Israele, ja’ jech ta xich’ic loq’uesel ta stojolalic boch’otic ja’ic jteclumal ti ja’ic boch’otic c’usi yich’ojic o no’ox albele.

12 Ti boch’otic ja’ic jteclumal, ti ja’ic scomelal snailal Jacobe, te ta x-oyiic ta o’lol yu’nic boch’otic ma’icuc snailal Israel, jech, ta o’lol yu’nic jech chac c’u cha’al muc’ta bolom ta o’lol yu’nic xchon bolomal te’tic, xchi’uc jech cha c’u cha’al olol bolom te ta o’lol bu tsobolic chijetic, jech chac c’u cha’al me jelo ta o’lole ta xpech’ ta teq’uel xchi’uc ta xvoch’, xchi’uc muyuc boch’o xu’ spoj.

13 Ti sc’obe ta stoy ta stojolalic li’ yaj contrataque, scotolic ti yaj contrataque ta xich’ic tuch’esel.

14 Jech ¡Abul sbaic ti boch’otic ma’icuc snailal Israele, ja’ xa no’ox ti me la sutes yo’ntonique! yu’un ta xc’ot ta pasel baq’uin, xi ti jtotique, ta jpojbot a ca’tac ta o’lol ta a tojololal, xchi’uc ta jsoquesan a carrotac.

15 Xchi’uc ta jtuch’es ti smuc’ta teclumal a banamile, xchi’uc ta jsoques scotol ti c’usitic tsotsique.

16 Xchi’uc ta jlajes o ta j-ech’el ti j-ac’ chameletic li’ ta a banamile, xchi’uc mu xa xu’ ep xa na’ ta a jol no’ox.

17 Xchi’uc ti a loc’omtac loc’tavilique ta jsoquesan xtoc, jech chac c’u cha’al c’usitic spasojanoj a c’ob ti te oy ta o’lol ta a tojolale, jech muyuc xa xu’ baq’uin xu’ xa vich’ ta muc’ ti c’usi spasojanoj a c’obtaque.

18 Xchi’uc ta jbul loq’uel te’tic ta a tojolal, xchi’uc ta jlajes scotol ti a muc’tiquil teclumaltaque.

19 Xchi’uc ta xc’ot ta pasel ti scotol epal c’opetic, xchi’uc ti c’usitic jeche’ no’oxe xchi’uc ti it’ix o’ntonale, xchi’uc ti uts’intaele, xchi’uc ti jlo’lavanej palee, xchi’uc ti pas mulil xchi’uc vinic antse, ta xich’ lajesel o ta j-ech’el.

20 Yu’un ta xc’ot ta pasel, xi ti jtotique, yu’un ti ta slajebal c’ac’ale ta jmil ta jteclumal ti boch’otic muyuc ta sutes yo’nton xchi’uc ti me muyuc chtal ta stojolal jnich’on ti tu jlec’ jc’anoj, ta snailal Israele.

21 Xchi’uc ta xcac’ ac’o spac sc’oplalic xchi’uc sc’ac’al yo’ntonic ta stojolalic, jech chac c’u cha’al boch’otic la sc’opanic yaj santoic, ti yu’un muyuc baq’uin c’otem ta xchiquinique.

22 Ti me la sutes yo’ntonic xchi’uc ti me la jya’ybicun ti jc’optaque, xchi’uc ti me muyuc stsatsubtas yo’ntonique, ta xcac’ jch’ulna ta stojolalic, xchi’uc xu’ x-ochic ti te bu c’usi caloje, xchi’uc ta xich’ic atael xchi’uquic ti li’ boch’otic ja’ic scomelalic Jacobe, ti yu’un ja’ cac’oj ta spuculal banamil li’ banamile.

23 Xchi’uc ta scoltaic jteclumal, ti ja’ic scomelal Jacob, xchi’uc ti jayibic ta xtalic snailal Israel, ti c’uxi xu’ chtal tspasic jun muc’ta jteclum ti ja’ ta sbiin ach’ Jerusalene.

24 Ja’ jech ta scoltaic jteclumal ti te tanpuquic ta sba scotol banamil, ti c’uxi xu’ stsob sbaic te ta ach’ Jerusalene.

25 Ja’ jech ta xtal ta stojolalic ti svu’el vinajele; xchi’uc xtoc te chi oyi ta o’lol yu’nic.

26 Ja’ jech ta xlic yich’ pasel ti yabtel jtotic ta baq’uine, jech, ti c’alal me la yich’ alel li’ mantaletic ta scomelal li’ jteclume. Ta bats’imelel cha calboxuc ti ta va’ay c’ac’ale ja’ xa te chlic ti yabtel jtotic ta stojolalic ti boch’otic bu tanpuquic jteclumale, jech, xchi’uc xtoc ti bu jtsop ch’ayemic, ti bu jtotic la sloq’uestal ta Jerusalene.

27 Jech, ta sjapo spasel yabtel jtotic ta scotolic boch’otic bu tanpuquic jteclumal, ti c’uxi xu’ smeltsan be sbeic ta sventa c’uxi xu’ xtalic ta jtojolale, xchi’uc ti c’uxi xu’ sc’opanic jtotic ta jbie.

28 Jech, ja’ te ba’yuc ta xich’ liquesel ta jtotic, ti abtelal sventa c’uxi xu’ xich’ meltsanel leque, xchi’uc ta scotol banamil, ti c’uxi xu’ sut ateclumal ti te ta spuculal sbanamilique.

29 Xchi’uc chloq’uic batel ta scotol banamil, xchi’uc muyuc ta xcolic batel ta anil, xchi’uc me ja’uc chjatoic loq’uel, yu’un vu’un ba’yuc be chibat yu’nic xchi’uc vu’un ta jchabiic, xi ti jtotique.