1 Ja’ o jech ti c’alal la jyal Jesús ti c’usitic va’ay lo’iletique, la sc’opan ta jujuntal ti yaj yajchanc’optaque, jech la jyalananbe: ¿c’usi ti cha c’anbicun vu’un c’alal me li bat ta jtotique?

2 Jech la staq’uic scotolic, ja’ xa no’ox oxibic muyuc staq’uic, jech la staq’uic: Ta jc’ancutic ti ta ts’acal ti c’alal me li ch’icutic jech chac c’u cha’al sjabilal vinique, ta jc’ancutic ac’o xlaj ti cabtelcutic bu laj a vac’buncutic, ti c’uxi xu’ xi talcutic ta anil no’ox te bu cha pas mantale.

3 Ti stuque jech la jyal: Oy benticion avu’nic yu’un cha c’anic c’usitic va’ay ta jtojolal; ja’ jech, ta ts’acal ti c’alal me la sta lajchab xchanvinic jabil ajabilalique, cha talic ta jtojolal bu ta jpas mantal, ja’ ta jventa vu’un cha ta xcuxubil avo’ntonic.

4 Ti c’alal la jyich’ic chi’nel ta lo’ile, sut batel ti te buoyic oxibique jech la jyich’ic albel: ¿c’usi cha c’anic ta jpas ta atojolalic ti c’alal me li bat ta stojolal jtotique?

5 Te la jyal yo’ntonic ti stuquique, yu’un muyuc la jyalic ti c’usi tsc’anique.

6 Ti stuque jech la jyal: Jech tana, xcotquin ti c’usi chanopique, yu’un ja’ cha c’anic ec ti c’usi la sc’an ta jtojolal Juan boch’o lec jc’anoje, xchi’uc ti boch’o la xchi’nun ta spasel cabtel ti c’alal sc’an to ox xquich’ liquesel yu’nic boch’otic ma’icuc snailal Israele.

7 Jech tana un, ech’em benticion avu’nic ti vo’xuque, yu’un muyuc bu cha pas a va’yic ti c’u x-elan lajele, yu’un cha cuxiic ta sq’uelel scotol ti c’usitic tspas jtotic ta sventa xnich’nab viniquetic, xchi’uc ja’ to me c’ot ta pasel scotol ti c’usitic tsc’an jtotique, ti c’alal me li tal vu’un ta jxojobal xchi’uc ta stsatsaltac vinajele.

8 Mu xa baq’uin xu’ xa chamic o ta sventa xc’uxultac chamel, ja’ no’ox ti baq’uin vu’un chi tal ta jxojobale, ta jmuts’el no’ox ta satil xu’ cha jeltaic ta mu xa xa na’ xa chamic ti jech xa na’ic to xa chamique, xchi’uc cha vich’ic ac’bel benticion ti te bu ta spas mantal jtote.

9 Xchi’uc muyuc cha va’yic c’usi c’ux ti c’alal jech oyto a sbec’talique, xchi’uc me ja’uc at o’ntonal, yu’un ja’ no’ox ta smulic li’ scotol banamil, ta jpas scotol ti c’usi la c’anic ta sventa c’usitic va’ay ta jventae, yu’un cha c’an cha viq’uictal ta jtojolal ti xch’ulelic viniquetic ti yu’un yo’to jech oy banamile.

10 Ja’ no’ox ta sventa c’usi va’ay ti xu’ cha taic xcuxetel a vo’ntonique, xchi’uc ti cha chotiic te bu ta spas mantal jtote, jech, ti xcuxetel a vo’ntonique, lec ts’acal chc’ot, jech chac c’u cha’al yac’ojbun xcuxetel co’ntone, yu’un ja’ jech cha c’otic jech chac c’u cha’alun vu’un, xchi’uc ti vu’une ja’ jechun jech chac c’u cha’al jtotic, yu’un ti jtotic xchi’uc vu’une jununcutic o.

11 Ti Ch’ul Espíritue ta xal ta jamal ta sventa jtotic xchi’uc ta jventa vu’un, xchi’uc ti jtotique ta xac’be Ch’ul Espíritu xnich’nab viniquetic ta jventa vu’un.

12 Ja’ o jech ti c’alal la jyal Jesús va’ay lo’iletique, la spic ta jujuntal ta sbic’tal sc’ob, ja’ xa no’ox muyuc spic ti oxibic boch’otic ta xcomique, ja’ o jech bat.

13 Xchi’uc ja’ jech jamanan ti vinajeletique, xchi’uc ja’ jech la jyich’ iq’uel batel ta vinajel, xchi’uc la jya’yic xchi’uc la jyilic c’usitic alaq’uic sba ti jech mu sna’ic c’uxi lec ta alele.

14 Xchi’uc la jyich’ic albel ti ac’o mu xalique, xchi’uc muyuc la jyich’ic ac’bel stsatsalic ta yalel ti c’usi la jyilic xchi’uc ti c’usi la jya’yique.

15 Xchi’uc muyuc stac’ la jyalic me oy sbec’talic o me muyuc sbec’talic; yu’un xco’laj xchi’uc muyuc sbec’talic la jya’yic ti stuquique, xco’laj xchi’uc yich’ic jeltael ta mu xa sna’ xcham ya’yic ti jech oyto sbec’talic ti yu’un jech la jyilic ti c’usitic oy yu’un Rioxe.

16 Ja’ jech c’ot ta pasel yanvelta ti la spasic yabtelic li’ ta sba banamile, ja’ jech, mu ja’uc jech la spasic jech chac c’u cha’al c’usitic la jyilic xchi’uc la jya’yic ti ta sventa mantaletic la jyich’ic ac’bel te ta vinajele.

17 Ja’ jech tana, mu jna’ me sna’ xchamic o me mu sna’ xchamic, ti ja’ o baq’uin o no’ox la jyich’ic jeltaele.

18 Ja’uc ti li’e ja’ jna’oj: Jech chac c’u cha’al poco’ lo’iletic bu yich’oj alel, ti bu loq’uic ta scotol banamile, xchi’uc ti bu abtejic ta scotol jteclumale, xchi’uc ti bu la stsobic ta ch’ulna ti boch’otic jayibic ta xch’unic c’u x-elan la xcholic c’ope, la jyaq’uic ta vo’, ti c’alal la jyich’ic vo’e la jyich’ic ti Ch’ul Espíritue.

19 Xchi’uc la jyich’ic aq’uel batel ta chuquel ta boch’otic ma’icuc sventa ch’ulnae, ti chuquinabe mu stac’ spajesic, yu’un ta sboc’ sba ta o’lol.

20 Xchi’uc la jyich’ic jipel ta banamil, ja’ jech la syayijesic ti banamil ta sventa ya’yej Rioxe, Xchi’uc ja’ ta stsatsal la jyich’ic pojel ta yut banamil, xchi’uc ja’ jech, ti yu’un mu stac’ sjoq’uic natil ch’en ti c’uxi xu’ spajesique.

21 Xchi’uc oxten la jyich’ic jipel batel ti te bu horno, c’oc’ stsantsune, jech muyuc c’usi spasic junucal.

22 Xchi’uc chib velta la jyich’ic jipel batel ti te bu oyic jti’vanej chon bolometique, xchi’uc, tajinic xchi’uquic jti’vanej chon bolometic jech chac c’u cha’al olol chtajin xchi’uc olol chij ta to xchu’une, jech muyuc xich’ic uts’intael.

23 Ja’ jech xanoic ta scotol ti te ta steclumal Nefie, xchi’uc la xcholic smantaltac Cristo ta scotol yajvaltac banamil ti te ta sba banamile, ti va’yique la jyac’ sbaic ta Cajvaltic, xchi’uc la jyac’ sbaic ta xch’ulna Cristo. Ja’ jech la jyich’ic benticion ti va’ay jteclum ta jcoj yajvaltac jech chac c’u cha’al ya’yejtac Jesuse.

24 Jech tana, ti vu’un Mormonune, ta jcomtsan sts’ibael jayibuc c’ac’al ta sventa ti c’usitic va’aye.

25 Ja’ jech jutuc xa mu la jts’ibabeic sbiic ti boch’otic muyuc spasojic ya’yic poroval lajele, yu’un ti jtotique muyuc xac’ jts’iba; ja’ yo jech muyuc ta jts’iba, yu’un mac’bil ta sbejel banamil.

26 Jech tana, ti vu’une quiloj, xchi’uc ja’ abtejemic ta jtojolal.

27 Xchi’uc ja’ jech, ta xc’otic ta stojolalic boch’otic ma’icuc snailal Israel, jech ti boch’otic ma’icuc snailal Israele muyuc ta xotquinic.

28 Xchi’uc te ta xchi’nic ti boch’otic ma’icuc snailal Israele, jech ti boch’otic ma’icuc snailal Israele, muyuc ta xotquinic.

29 Ti c’alal me tsc’an Cajvaltic ta xu’nin stuc c’usi sna’e, ta xc’ot ta pasel ti ta x-abtejic ta scotol quirisianoetic ti bu tanijbilic batel ta Israeletique, xchi’uc ta scotol banamil, jnaclejetic, c’opetic, xchi’uc jteclumetic, xchi’uc ja’ ta sventaic ta xich’ic batel ch’ulelaletic ta stojolal Jesús, ti c’uxi c’otuc ta pasel ti c’usi tsc’anane, xchi’uc ja’ ta sventa smuc’ta tsatsal Riox oy ta stojolalic.

30 Xchi’uc jech xco’laj xchi’uquic yabattac Riox, ti me ta sc’anbeic jtotic ta sbi Jesuse, stac’ xaq’uic ta ilel ta viniquetic c’usiuc no’ox tsc’anic.

31 Ja’ jech, ja’ic ta spasic muc’tiquil abtelal xchi’uc alaq’uic sba, ti c’alal ja’o sc’anto xc’ot ti muc’ta c’ac’al ta baq’uine, xchi’uc ti baq’uin scotolic ta bats’imelel ta xac’ sbaic xchi’uc ta xich’ic q’uelbel stalelic ta stojolal Cristoe.

32 Jech ti te ta stojolalic boch’otic ma’icuc snailal Israele, ta spasic muc’tiquil abtelal xchi’uc alaq’uic sba ti c’alal sc’anto sta sc’ac’alil chq’uelat talelile.

33 A vich’ojicuc scotol ti ts’ibiletic bu ta xal scotol alaq’uic sba yabtel Cristoe, cha na’ic jech chac c’u cha’al ya’yejtac Cristo, ti ta xc’ot ta pasel ta bats’imelel ti c’usitic va’aye.

34 Jech, ¡Abul sba ti boch’o mu sc’an xaybe sc’op Jesuse, xchi’uc mu ja’uc ti boch’otic ja’ la st’uj stuc xchi’uc ti la stac’ batel ta stojolalique; yu’un ti boch’otic muyuc ta xich’ic ti ya’yejtac Jesús xchi’uc ti ya’yejtaquic ti boch’otic ja’ stacoj batele, yu’un muyuc ta xich’ ich’el ti stuque, ja’ no’ox jech ec ti stuque, muyuc ta xich’ ta slajebal c’ac’al ti boch’otic va’aye.

35 Yu’un ja’ lec ya’eluc ti muyucuc o no’ox voq’uicuque, ¿Me cha valic me stac’ pajesel ti c’usi lec yu’un jun Riox ti boch’o sabil sc’ac’al yo’ntone, xchi’uc ti pech’bil ta teq’uel ta yolon yacan viniquetic, ti yu’un ja’ te taluc o coltaele.

36 Xchi’uc jech tana, ja’ jech, ta xquich’ ta muc’ ti c’usi la jcal ta sventa boch’otic st’ujojanoj Rioxe, jech, ti yoxibalic la jyich’ic iq’uel batel ta vinajele, xchi’uc ti mu jna’ me la jyich’ic sacubtasel ta lajel ti jech ta mu xa sna’ xlajic oe.

37 Ja’ jech, ta ts’acal ti c’alal la jts’ibae, jac’ojbe Cajvaltic, xchi’uc ja’ la jyalbun ti yu’un tsots sc’oplal ti jech ac’o yich’ jeltael sbec’talique, yu’un ti me mu jechuc xich’ pasele, yu’un ta spas ya’yic poroval lajel.

38 Ja’ jech, ja’ ta sventa ti c’uxi mu spasic poroval ya’yic lajele, ja’ jech la jyich’ic jeltabel sbec’talic ta sventa ti c’uxi muyucuc xa’yic c’usi c’ux xchi’uc ato’ntonale, ja’uc no’ox ta smultac sbejel banamil.

39 Jech ti c’u x-elan jeltaele ma’uc jech x-elan jech chac c’u cha’al ta xich’ q’uelel ta slajebal c’ac’ale; ti stuquique jech la jyich’ic jeltael, ta sventa ti c’uxi muyucuc stsatsal pucuj ta stojolalique, xchi’uc ti c’uxi mu xich’ic yalesel ta mulile, ja’yo jech la jyich’ic ts’uiltasbel sbec’talic ta sventa ti c’uxi chc’otic ta ch’ul vinique, xchi’uc ti c’uxi mu xich’ic pajesel yu’nic stsatsaltac banamile.

40 Yu’un ja’ jech ch-oyiic o, ja’to ti c’alal me tal sq’uel talelil Cristoe, ti va’ay me sta sc’ac’alile, ta xa vich’ic muc’ta jelel, xchi’uc ta xa vich’ic iq’uel te bu ta spas mantal jtotic ti jech mu xa xu’ xa loq’uic o ta baq’uine, yu’un jech te cha chi’nic o jtotic ta sbatel osil te ta vinajel.