1 Ja’ o jech ti c’alal ja’ o chanoic xchi’uc chcholic ti c’usi la jya’yic xchi’uc ti c’usi la jyilic ti yajchanc’optac Jesuse, xchi’uc ti ta xaq’uic vo’ ta sbi Jesuse, ja’ o jech ti jchanc’opetique te tsobolic xchi’uc tsots ta sc’opanic Riox xchi’uc yictaoj yiximic.

2 Te tal ta stojolalic yan velta ti Jesuse, yu’un ta sc’anbeic jtotic ta sbi, tal ti Jesuse te la jyac’ sba ta o’lol ta stojolalic, xchi’uc jech la jyich’ic albel: ¿c’usi cha c’an cha cac’boxuc? xi

3 Ti stuquique jech la jyalic: Cajval, ta jc’ancutic ti ac’o xa valbuncutic c’usi sbi ta xcac’becutic ti a ch’ulnae; yu’un ta sjaq’uic jteclum ta sventa ti c’usi va’ye.

4 Ti Cajvaltique jech la jyal: Ta bats’imelel ta bats’imelel cha calboxuc: ¿c’uyu’un ti ta xmucul c’opojic xchi’uc ti ta sa’ic c’op ti jteclum ta sventa va’aye?

5 ¿Me yu’un muyuc a q’uelojic ta ts’ibiletic ti tsc’an cha tsaquic ta jech no’ox ta aventa a tuq’uic ti sbi Cristo, ti ja’ jbie? yu’un ta ja’ jech biil cha vich’ic iq’uel ti ta slajebal c’ac’ale.

6 Ti boch’otic ta stsac ta sventa stuc jbie, xchi’uc ti me ta xch’un mantal c’alalto ta slajebal c’ac’ale, ti va’ye ja’ ta xcol ta slajebal c’ac’al.

7 Ja’ jech, c’usiuc no’ox ti cha pasique, pasic ta jbi, ti c’uxi xu’ xa vaq’uic ta ch’ulna ti jbie, xchi’uc ta jbi xa c’anbeic jtotic ti ac’o yac’be benticion ch’ulna ta jventae.

8 ¿C’uxi xu’ chc’ot ta jch’ulna ti me ma’uc ta xich’ jbie? yu’un ti me jun ch’ulna ja’ yich’ojbe sbi Moisese, yu’un ja’ xch’ulna Moisés un bi, o me ta xich’ ac’bel sbiin ta sbi jun vinique; yu’un ja’ xch’ulna ti va’ay vinique; ti me ja’ ta xich’ jbie, yu’un ja’ jch’ulna xchi’uc ti me ja’ jech pasbil jech chac c’u cha’al jmantaltaque.

9 Ta bats’imelel cha calboxuc, ti vo’xuque oyoxuc o me ta jmantaltac, ja’ jech, c’usiuc no’ox ti cha c’anique, c’anic ta jbi, xchi’uc ti me cha c’anbeic jtotic ta sventa jch’ulnae, xchi’uc ti me cha pasic ta jbie, ti jtotique ta xayboxuc.

10 Ti me ta jmantaltac pasbil ti ch’ulnae, ti jtotique ta xac’ yabtel stuc ta stojolal.

11 Ti me mu pasbiluc ta jmantaltaque, xchi’uc ti me pasbil no’ox ta yu’un viniquetique, xchi’uc me ta yabteltac pucuje, ta bats’imelel cha calboxuc ti cha ta xcuxetel a vo’ntonic ta sventa yabtel jayibuc c’ac’ale, ja’ xa me te ta xtal o ti slajebal c’ac’ale, xchi’uc ti ta xich’ic bojele xchi’uc ti ta xich’ic jipel ochel ta c’oc’ ti bu mu xa xu’ sutic o talele.

12 Yu’un ja’ ta xchi’nic batel ti yabtelique, yu’un ja’ ta sventa yabtelic ti ta xich’ic milele; taic me ta na’el ti c’usitic la jcalboxuque.

13 Ja’ jech cac’ojboxuc ti jmantaltaque, xchi’uc ja’ ti jmantaltac la jcac’boxuque, yu’un ja’ tal jpas ti c’usi tsc’an jtote, yu’un ja’ jtot la stacuntal.

14 Xchi’uc jtot la stacuntal ti c’uxi xu’ xquich’ liquesel ta cruse; ta ts’acal ti c’alal me la jquich’ liquesel ta cruse, jech stac’ chquic’tal ta jtojolal scotol viniquetic, jech chac c’u cha’al la jquich’ liquesel ta scotol animaetique, ja’ jech ec ti viniquetique ta xich’ic liquesel yu’un jtotic, ti c’uxi xu’ xc’otic ta jtojolal ti c’uxi ta jq’uelbeic stalelic ta sventa yabtelic ac’o me lequic xchi’uc a c’o me chopolic.

15 Ja’ jech x-elan smelolal ti la jquich’ liquesele; ja’ jech, jech chac c’u cha’al stsatsal jtotic, ti vu’un ta xquic’tal scotol viniquetic ti c’uxi ta xich’ic q’uelbel stalelic jech chac c’u cha’al yabtelique.

16 Ja’ jech chc’ot ta pasel ti boch’ouc no’ox ti ta sutes yo’nton xchi’uc ti ta xich’ vo’ ta jbie, ta xich’ nojesel, xchi’uc ti me ta xch’un mantal c’alal to ta slajebal c’ac’ale, ja’ jech vu’un ta xcal ti muyuc c’usi chopol spasoj ti c’alal ta xcac’ ta stojolal jtot c’alal me la sta sc’ac’alil la jyac’bun ta jq’uelbe stalel sbejel banamile.

17 Ti boch’o muyuc ta xch’un mantal c’alal to ta slajebal c’ac’ale, ja’ ti boch’o ta xich’ tuch’esele xchi’uc ti ta xich’ jipel ta c’oc’ ti bu mu xa xu’ sut talel ta sventa slequilal jtotique.

18 Ja’ jech x-elan ti ya’yejtac yac’oj stuc ta xnich’nab viniquetique; xchi’uc ja’ jech smelolal ti ta xc’ot ta pasel yu’un stuc ti ya’yejtac yac’oje, xchi’uc muyuc ta x-epal c’opoj, yu’un ta xc’ot ta pasel yu’un scotol ti ya’yejtaque.

19 Yu’un mu xu’ x-och boch’o muyuc lec ti te bu ta spas mantale, ja’ jech, mu xu’ boch’o ch-och ti ta xcuxubil yo’ntone, yu’un ja’ no’ox ti boch’otic xchuc’ojic sc’u’ic ta xch’ich’al, ta sventa xch’unolajel yo’ntonique xchi’uc ti la sutes yo’ntonic ta sventa scotol smulique xchi’uc ti lec tspas sbaic c’alalto ta slajebal c’ac’ale.

20 Ja’ mantal ti li’e: Suteso a vo’ntonic acotolic vo’xuc ti te oyoxuc ta sti’iltac banamile, xchi’uc talanic ta jtojolal xchi’uc ich’ic vo’ ta jbi, ti c’uxi xu’ xa vich’ic ts’uiltasel ta Ch’ul Espíritue, ti c’uxi muyucuc avic’ubalic xa cha c’otic ta jtojolal ta slajebal c’ac’ale.

21 Ta bats’imelel ta bats’imelel cha calboxuc ti li’e ja’ ti jmantaltaque, xchi’uc vo’xuc a na’ojic ti c’usitic tsc’an cha pasic ta jch’ulnae; yu’un ti abtelaletic la vilic la jpase, ja’ jech tsc’an cha pasic ec ti vo’xuque, yu’un ti c’usi la jpasbeic li’ yantique, ja’ jech tsc’an cha pasic ti vo’xuque.

22 Ti c’u x-elan cha pasic c’usitic va’aye, cha vich’ic benticion, yu’un cha vich’ic toyel ta slajebal c’ac’al.

23 Ts’ibaic ti c’usi la va’yic xchi’uc ti c’usitic la vilique, ja’ no’ox mu xa ts’ibaic ti bu la albatic mu xu’ xa ts’ibaique.

24 Ts’ibaic ti c’usi la spasic jteclum jech chac c’ucha’al ts’ibabil ta vo’nej o no’oxe.

25 Ja’ jech ta sventa libroetic bu ts’ibabil xchi’uc ti bu ta to xich’ ts’ibaele, ja’ jech ta xich’ q’uelbel stalel ti li’ jteclume, yu’un ja’ ta yu’nic ti ta xich’ ac’bel yilic yabtelic ta viniquetique.

26 Xchi’uc ja’ jech, scotol ti c’usitic va’aye, ja’ ts’ibabil yu’un jtotic, ja’ yo ja’ jech ta xich’ q’uelbel stalel sbejel banamil ti ta c’usitic ta xich’ ts’ibael ta libroetique.

27 Ana’ojic ti vo’xuc cha q’uelbeic stalelic li’ jteclum, jech chac c’u cha’al meltsanel cha cac’boxuc ti yu’un ja’ leque, ja’ jech, ¿c’u x-elan vinical xu’ cha pas abaic? ta bats’imelel cha calboxuc, ti ja’uc jech cha c’u cha’al vu’une.

28 Tana un chi bat ta stojolal jtotic, ta bats’imelel cha calboxuc, c’usiuc no’ox ti cha c’anbeic jtotic ta jbie, cha vich’ic ac’bel.

29 Ja’ jech, c’ano, ta xa vich’ ac’bel, c’opano, ta xa vich’ jambel, yu’un ti boch’o ta sc’ane, ta sta, xchi’uc ti boch’o ta sc’opane, ta xich’ jambel.

30 Xchi’uc ja’ jech, tu jmuc’ ti xcuxetel co’nton xchi’uc ti slequil co’nton ta a ventaique, jech xchi’uc ti ta viniquetic li’ ta orae, ti jtotique xcuxet no’ox yo’nton, xchi’uc ch’ul abatetic ta aventaic vo’xuc ti ja’oxuc li’ ta orae, yu’un muyuc boch’o junucal avu’nic ta xch’ay.

31 Ja’ jech, ta jc’an ti ac’o xa va’ybicun lec smelolale, yu’un ja’ ta xcal ti viniquetic boch’otic li’ cuxulic li’ ta orae, muyuc boch’o junucal ta xch’ay yu’nic, yu’un teoy scotol ti xcuxetel co’nton ta stojolalique.

32 Jech tana ti li’e, ta xcat co’nton ta sventaic ti boch’otic ja’ic ta xchancojal a nich’nabic ta xtale, yu’un ta xich’ic iq’uel batel ta chuquel ta sventa, jech chac c’u cha’al bat ta ch’ayel nich’onile, yu’un ta xchonicun ta saquil taq’uin xchi’uc ta c’anal taq’uin, ti bu xu’ ta x-och xjoch’e, xchi’uc ti bu xu’ ta xelc’anic j-eleq’uetique, ti ta baq’uine ta jvu’lanic, jech ta xcac’ sutuc ta sjol stuquic ti smulique.

33 Ja’ o jech ti c’alal laj yo’nton ta yalel va’ay lo’iletic ti Jesuse, jech la jyalbe yajchanc’optac: ochanic ta biq’uit ti’na, yu’un ja’ biq’uit ti ti’ na, xchi’uc ja’ biq’uit ti sbelal cuxlejale, xchi’uc ja’ muyuc epic ti boch’otic ta staique; ja’ muc’ ti ti’ na xchi’uc ja’ jamal ti sbelal lajebale, xchi’uc ja’ epic ti boch’otic tst’unique, ja’ to c’alal me och ti ac’ubale, ti c’uxi mu xa boch’o xu’ x-abteje.