1 Ta bats’imelel ta bats’imelel cha calboxuc, ta jc’an ti ac’o xa vac’beic limoxna ti boch’otic abul sbaique, ja’ no’ox mu me xa bac’ limoxna ti c’alal me oy viniquetic sq’uelojic ta satique, yu’un ti me jech la pase, muyuc cha yac’bot a moton jtotic ti te oy te ta vinajele.

2 Ja’ jech, ti c’alal cha vac’ alimoxnae, mu xa jupan a voq’ues ta satic, jech cha c’u cha’al ta spasic j-epal c’opetic te ta snail tsobunbail xchi’uc ti te ta xoraltic, ta sventa ti c’uxi xu’ xilic viniquetique, Ta bats’imelel ta xcal ti te oy smotonique.

3 Jech ti c’alal cha vac’ limoxnail li’ vo’te, mu me sna’ a ts’et c’ob ti c’usi ta spas abats’i c’obe.

4 Ta sventa ti c’uxi ta muculuc no’ox la vac’ a limoxnae, jech ti a tot te sq’ueloj ta mucule, ta xac’bot a moton ta satilal.

5 Ti c’alal cha c’opan Rioxe mu xa pas jech chac c’u cha’al j-epal c’op, yu’un ti j-epal c’ope ja’ lec cha’ay ti ta sc’opan Riox ta yoc’ snail tsobunbaile xchi’uc ti ta xchiquintac xoraltic ti c’uxi xu’ xilic viniquetique, Ta bats’imelel ta xcal ti te xa oy smotonique.

6 Jech ti vo’ot c’alal cha c’opan Rioxe, ochan ta yut a na, c’alal me a macoj xa ti sti’ a nae, c’opano ti a tot bu mu xvinaj buoye, ti atot sq’ueloj ta mucule, ta xac’bot a moton ta satilal.

7 Xchi’uc ti c’alal cha c’opan Rioxe, mu liquel liqueluc xaval ti c’usi cha vale, mu jechuc xa pasic jech cha c’u cha’al boch’o tsc’opanic sloc’omique, yu’un ti stuquique ta scuyic me ja’ to te ta x-a’ybatic ti c’alal me ep ta xc’opojique.

8 Mu xa pas jech chac c’u cha’al stuquic, yu’un ti jtotique sna’oj xa ti c’usi chtun a vu’un c’alal sc’anto xa c’ane.

9 Ja’ jech x-elan ti c’uxi xu’ xa c’opan Rioxe: Jtoticot te oyot ta vinajel, ac’o ich’atan ta Muc’ cu’uncutic.

10 Ja’uc xich’ pasel c’usi cha c’an ti li’ ta banamil jech chac c’u cha’al te ta vinajele.

11 Pasbuncutic pertonal jmulcutic jech chac c’u cha’al ta jpasbecutic pertonal boch’o oy smul cu’uncutique.

12 Xchi’uc mu xa vac’ xi yalcutic ta mulil, xchi’uc pojuncutic ta c’usi chopol.

13 Yu’un ja’ avu’un ti pasub mantalile xchi’uc ti tsatsalile, xchi’uc ti lequilale, jech ta scotol c’ac’al o, jechuc.

14 Yu’un ti me cha pasbeic pertonal smul ti viniquetique, jech cha spasboxuc pertonal ti jtotic ta vinajele.

15 Jech ti me muyuc cha pasbeic pertonal smul ti viniquetique, ti jtotique muyuc cha spasboxuc pertonal ec xtoc.

16 Xchi’uc xtoc, ti c’alal cha victa aviximique, mu xa pasic jech chac c’u cha’al j-epal c’opetic, ti ta xat yo’nton ta satic yu’un ta xaq’uic ta ilel ta sat viniquetic ti jech ta xictaic ixime, ta bats’imelel ta xcal ti te xa oy smotonique.

17 Jech ti vo’ot c’alal cha victa ixime, jaxo ta aceite a jol, xchi’uc poco a sat.

18 Ti c’uxi mu xa vac’ ta ilel yu’un viniquetic ti jech cha victa ixime, ja’ no’ox atot, ti te oy ta mucule xchi’uc ti ta xil ta mucule, ta xac’bot a moton ta satilal.

19 Mu xa pas ac’ulejal ta banamil, ti bu ta soc yu’un xjoch’e, xchi’uc xcuxe, xchi’uc ti bu ta xilic j-eleq’uetic ta xelc’anique.

20 Ja’ lec ja’ xa pas ac’ulejalic ta vinajel, ti bu mu xjoch’ine xchi’uc ti bu mu xcuxine, xchi’uc ti bu mu xilic j-eleq’uetic ta xelc’anique.

21 Yu’un ti te bu oy ac’ulejalique, ja’ te oy a vo’ntonic.

22 Ti saquil abec’talique ja’ ti asatique, ja’ jech, ti yu’nuc lec sac li’ a sate, scotol a bec’tal nojem ta saquil osil ti jechuque.

23 Jech ti yu’nuc chopoluc li’ a sate, scotol abec’tal nojem ta ic’al osil, ja’ jech, ti me saquil osil oy ta ic’al osil ta abec’tale, ¡c’utovan x-elan xa na’ ti va’ay ic’al osiletique.

24 Ja’ jech me junuc vinic xu’ ta xtun ta chib viniquetic, yu’un ti yane chopol ta xil, ja’uc ti yane ja’ lec ta xil, yu’un me ja’ mu sc’an li’ yane o me ja’ ta sc’an li’ yane. Yu’un mu stac’ xa tunic yu’un Riox xchi’uc mu stac’ xa tunic sventa c’ulejal.

25 Ja’o jech c’ot ta pasel ti c’alal laj yo’nton ta yalel va’ay lo’iletic ti Jesuse, la sq’uel batel ti bu lajchabic st’ujoje, jech la jyalbe: Vuleso me ta a jolic ti lo’iletic la jcale, Yu’un ti li’e ja’ vo’xuc ti boch’otic la jt’ujanan ta sventa ti ac’o spasic abtelal ta sventa li’ jteclume. Jech cha calboxuc, mu me xa nopic ti c’uxi cha cuxiique, ta sventa ti c’usi cha ve’ique xchi’uc ti c’usi cha vu’ch’ique, xchi’uc xtoc, ti c’uxi xu’ cha taic sc’u’ li’ abec’talique, ¿me ma’uc tsots sc’oplal jcuxlejaltic jech chac c’u cha’al jve’eltic, xchi’uc jbec’taltic jech chac c’u cha’al jc’u’tic.

26 Ja’ q’uelavil ti mutetic ta vinajele, muyuc ta sts’unubajic, xchi’uc me ja’uc ta xc’aojinic, xchi’uc me ja’uc ta stsobic ta snail; jech, ti jtotic ta vinajele ta xac’be sve’el. ¿Me mu vo’xuc ech’em lecoxuc jech chac c’u cha’al stuquic?

27 ¿Me oy boch’o avu’nic, ti ta xat yo’nton ta sventa sts’ac sba jts’ocuc ta c’ob snatile?

28 Ti ta sventa a c’u’e, ¿c’uyu’un ti cha bat a vo’nton yu’une, ja’uc jechucanic chac c’u cha’al mutetic c’uxi ta xch’iique: muyuc ta x-abtejic xchi’uc ti muyuc ta xjalubajique.

29 Ja’ jech no’oxtoc ta xcal, me ja’uc Salomón ta scotol slequilal la slap junuc c’u’il jech chac c’u cha’al li’e,

30 Ja’ jech, ti me Riox ta xac’be sts’ilalil li’ osiletic jech chac c’u cha’al li’ ta orae, ti oc’ome ta xich’ aq’uel ta horno, ja’ jech cha yac’boxuc ac’u’ic ti me mu jlec’uc no’ox xch’unolajel a vo’ntonique.

31 Mu xa bat a vo’ntonic, ti jech cha valic: ¿c’usi ta jve’tic xchi’uc c’usi ta xcuch’tic o c’usi ta jlaptic? xa ch’iique.

32 Yu’un ti jtotic ta vinajele sna’oj ti ta xtun avu’nic scotol c’usitic va’aye.

33 Ja’ tsc’an ti ja’ jt’untic ba’yuc ti bu ta spas mantal Rioxe, xchi’uc ti slequilale, scotol ti c’usitic va’aye ta xich’ ts’aquel.

34 Ja’ jech, mu me xa nop ta sventa li’ oc’ome, yu’un ti oc’ome ta xa nop ta sventa scotol c’usitic oy avu’nic a tuq’uic, xu’ no’ox o ti c’usitic chopol a pasojique xi ti Jesuse.