1 Ja’ o jech ti c’alal la jyal va’ay lo’iletic ti Jesuse, sut batel yanvelta ti te bu tsobolique xchi’uc la sjam yan velta ti yee, jech la jyal: Ta bats’imelel ta bats’imelel ta xcal: mu xa q’uelbe stalel achi’il ta sventa ti c’uxi mu xa vich’ q’uelbel a talel eq’ue.

2 Yu’un ti c’u x-elan cha q’uel talelile, ja’ jech cha vich’ q’uelbel a talel ec xtoc; xchi’uc ti c’u x-elan cha bisvane ja’ jech cha vich’ bisel ec xtoc.

3 Xchi’uc, ¿c’u yu’un cha q’uel c’aep oy ta sat achi’il ti jech mu xa vil ti c’aep oy ta a sat atuque?

4 Jech, ¿c’uxi xu’ cha valbe achi’il: la’ jloq’uestic c’aep oy ta asat, ti jech oy c’aep ta asat atuque?

5 ¡J-epal c’op! loq’ueso ba’yuc sc’aepal a sat atuc, ja’ o jech xu’ xa vilbe lec sc’aepal sat ti achi’ile.

6 Mu xa vac’be c’usi tu jlec’ li’ ts’ietique, xchi’uc mu xa vac’be chitom ti c’usi lec sts’ayayete, yatsame xpech’ ta teq’uel xchi’uc yatsame biq’uitic xbat ta yacan.

7 Me la c’ane, ta xa vich’ ac’bel; me la sa’e, ta xa ta, me la tij li’ ti’ nae, ta xa vich’ jambel.

8 Yu’un scotol ti boch’otic ta sc’anique, ta staic, xchi’uc ti boch’o ta st’une, ta sta; xchi’uc ti boch’o ta stij ti’nae ta xich’ jambel.

9 Jech, ¿me oy boch’o jech vinical avu’nic, ti me c’anbat pan yu’un xnich’on, ti jech ta xac’be tone,

10 Xchi’uc me c’anbat choy, ti jech ta xac’be chone?

11 Ja’ jech ti vo’xuque chopoloxuc o no’ox, pero jech xa na’ic yaq’uel c’usi tsc’an anich’onic, a ¿ja’uc ti Riox ti te oy te ta vinajele ta xac’ c’usitic lec ta stojolalic ti boch’otic ta chc’anbate?

12 Ja’ jech, ti c’usitic cha c’an ta spasic ti viniquetic ta atojolalique, ja’ jech xa pasic ti vo’xuc ta stojolalique, yu’un ti li’e ja’ ti mantale xchi’uc ti lequil viniquetique.

13 Ochanic batel ta biq’uit be, yu’un ja’ muc’ ti sti’nail, xchi’uc ja’ jamal ti sbelal ch’ayebale, xchi’uc ja’ epic ti boch’otic ta x-ochic batel tee.

14 Yu’un ja’ biq’uit ti sti’nail xchi’uc ja’ biq’uit ti sbelal bu ta x-ic’van batel ta cuxlejale, xchi’uc muyuc epic ti boch’otic ta staique.

15 Bijubanicme, mu me xa slo’laic ti jlo’lavanej lequil viniquetic ti jech ta xal ta atojolalic ti xco’laj xa xchi’uc chij x-elanique, jech ti ta yo’ntonique xco’laj xchi’uc jti’vanej bolom.

16 Xu’ xa votquinic ta sventa c’usi ta spas, ¿yu’un me stac’ xa ta ts’usub ti ta ch’ixtique, xchi’uc me stac’ xa ta igo te’ ti ta ch’ixe.

17 Ja’ no’ox jech xtoc, scotol ti lequil te’e ta xac’ lec sat, ja’ jech xtoc ti bu mu lequil te’uque muyuc lec sat ta xac’.

18 Jun lequil te’e mu xu’ xac’ chopol sat, xchi’uc ti jun chopol te’e mu xu’ xac’ lec sat.

19 Scotol ti te’etic me muyuc lec ta xac’ sate, ta xich’ sebel xchi’uc ta xich’ aq’uel ta c’oc’.

20 Ja’ yo jech, ta sat xu’ xa votquinic.

21 Yu’un mu scotolicuc ti boch’otic chi yalbicun: Cajval, Cajval, ta x-ochic ta slequilal vinajele; yu’un ja’ no’ox ti boch’o ta spas c’usi ta sc’an jtot te oy ta vinajele.

22 Ti ta slajebal c’ac’ale oy epic ti chi yalbicuc; Cajval, Cajval, ¿muyuc bu jcholcutic c’op ta abi, xchi’uc muyuc bu jloq’uescutic pucujetic ta abi, xchi’uc muyuc jpasojcutic ta abi alaq’uic sba abtelaletic?

23 Ja’ jech ta jtac’beic: Muyuc baq’uin la jcotquinoxuc, q’uejabaic ta jtojolal, yu’un ja’ la pasic bolililetic.

24 Ja’ jech boch’ouc no’ox ti ta xa’ay li’ ca’yejtaque, xchi’uc ti me la spase, ja’ jech chac c’u cha’al jun vinic la smeltsan sna ta ba ton;

25 Jech tal vo’, tu jtsots no’ox ti vo’e, xchi’uc tsots la sjub ic’, xchi’uc tsots c’ot ti ta nae, jech muyuc bu xlom, yu’un pasbil ta ba ton.

26 Scotolic ti boch’otic ta xa’ybicun li’ ca’yejtac xchi’uc me muyuc la spasique yu’un ja’ jechic jech chac c’u cha’al jun vinic la spas sna ta yi’tic.

27 Jech tal ti vo’e, tu jtsots no’ox ti vo’e, xchi’uc tsots la sjub ti iq’ue, xchi’uc tsots c’ot ti ta nae, jech lom o ti nae, muc’tic no’ox c’ot ta pasel ti jech lom oe.