1 Ja’ o jech ti Jesuse la spas ta mantal yajchanc’optac, ti ac’o yich’ic batel pan xchi’uc ya’lel ts’usube.

2 C’alal ja’o bat yich’ictal ti pan xchi’uc ya’lel ts’usube, la spas ta mantal ac’o chotiicuc ta banamil ti boch’otic te tsobolique.

3 Ja’ ojech c’alal c’otic ti yajchanc’optac xchi’uc pan xchi’uc ya’lel ts’usube, la stsac ti pane la svoc’ xchi’uc la sts’uiltas; jech la jyac’be ti yaj yajchanc’optaque xchi’uc la spas ta mantal ti ac’o sve’ique.

4 Ti c’alal la sve’ic xchi’uc ti jech nojique, la spas ta mantal ti ac’o yac’beic ti boch’otic te tsobolique.

5 Jech ti c’alal la sve’ic xchi’uc nojic ti boch’otic te tsobolique, la jyalbe ti yajchanc’optaque: Ja’ jech, ta xich’ pasel ta mantal junucal a avu’nic, ti va’ye ja’ ta xcac’be stsatsal ti c’uxi ja’uc svoc’ pan xchi’uc sts’uiltas ti c’uxi xu’ xac’be boch’otic ja’ic ta jch’ulnae, ta scotolic ti boch’otic ta xch’unic xchi’uc ta xich’ic vo’ ta jbie.

6 Jech, jechuc me xa pasilanic o ta scotol c’ac’al, jech chac c’u cha’al vu’un la jpas, ti la jvoc’ xchi’uc ti la jts’uiltas xchi’uc ti la jcac’boxuc ti pane.

7 Ti jech cha pasique ja’ ti c’uxi xa taic ta na’el ti jbec’tal c’u x-elan la jcac’ ta ilele, xchi’uc ja’ ta xal ta jamal ta stojolal jtotic ti yu’un jech cha taicun ta na’el, ti me jech cha taicun ta na’el ta scotol c’ac’ale, cha vich’ic J-espíritu ti c’uxi ja’uc te cha xchi’noxuc oe.

8 Ja’ o jech ti c’alal la jyal va’ay lo’iletique, la spas ta mantal yajchanc’optac ti ac’o stsaquic ti ya’lel ts’usub te ta bise, xchi’uc ti ac’ouc yuch’ique xchi’uc ti ac’o yac’beic yuch’ic xtoc ti boch’otic te tsobolique.

9 Ja’ jech la spasic, la jyuch’ic xchi’uc nojic o; xchi’uc la jyac’beic ti boch’otic te tsobolique, ti va’aye la jyuch’ic xchi’uc nojic o.

10 Ja’ o jech c’alal la spasic ti c’usitic va’ay ti jchanc’opetique, Ti Jesuse jech la jyal: Oy benticion avu’nic ta sventa ti c’usi li’e, ja’ jech chc’ot ta pasel o ti jmantaltaque, xchi’uc ja’ ta xal ta jamal ta stojolal jtotic ti yu’un avalojbe a vo’ntonic spasel ti c’u x-elan la jpasoxuc ta mantale.

11 Ja’ jech xa pasbeic scotolic ti boch’otic ta sutes yo’ntonique, xchi’uc ti boch’otic ta xich’ic vo’ ta jbie; xchi’uc ja’ xa pasic ti c’uxi xu’ xa taic ta na’el ti ja’ jch’ich’al, ti ja’ la jamal ta aventaic ti c’uxi xu’ xal ta jamal ta stojolal jtotic ti jech cha taicun ta na’el ta scotol c’ac’ale, ti me jech cha taicun ta na’ele, cha taic Jch’ul Espíritu ti c’uxi te cha xchi’noxuc oe.

12 Jech ta xcac’ mantal ti ja’uc jech xa pasic ti c’usitic va’aye. Ti me ja’ jech cha pasic ta scotol c’ac’al ti c’usitic va’aye, cha vich’ic benticion, yu’un ja’ te avac’oj abaic ta sba jtonal.

13 Jech ti boch’otic ja’ jechtic sba tspasilanic jech chac c’u cha’al li’e, ma’uc te yac’oj sbaic ta sba jtonal, yu’un ja’ te liquemtal yi’bel ta ba yi’tic, c’alal me tal vo’, xchi’uc me tal ic’ xchi’uc me yich’ jubel ic’ ta stojolale ta xyal ta lum, jech ti smactac c’atinvaque, jamal xa ti c’uxi xu’ ta xich’ic iq’uele.

14 Ja’ jech cha taic benticion vo’xuc ti me la ch’unic ti jmantaltac ti bu Riox la spasun ta mantal ac’o caq’ue.

15 Ta bats’imelel, ta bats’imelel cha calboxuc ti ac’o xa chabi abaique xchi’uc ti ac’o xa c’opanic Riox ta scotol c’ac’ale, mu me ja’uc me syalesoxuc ta mulil pucuje, xchi’uc me jech xic’oxuc batel ta chuquele.

16 Ja’ jech chac c’u cha’al jc’opanoj Riox ta atojolalique, ja’ jech xa c’opanic Riox ti vo’xuc te ta jch’ulnae, achi’uquic ti boch’otic ja’ic jteclumal ti jech ac’o sutes yo’ntonique xchi’uc ti ac’o xich’ic vo’ ta jbie. Ja’ jech, vu’un saquil osilun; vu’un cac’oj avilic c’u x-elan.

17 Ja’ o jech ti c’alal la jyal va’ay lo’iletic ti ta yajchanc’optaque, joyij batel yanvelta ti te bu ep tsobolique, xchi’uc jech la jyal:

18 Ja’ jech ta bats’imelel, ta bats’imelel cha calboxuc ti ac’o xa chabi a vaique xchi’uc ti ac’o xa c’opanic Riox ta scotol c’ac’ale, mu me ja’uc me xa ochic batel ta mulile, yu’un ti pucuje ta sc’an slilinoxuc jech chac c’u cha’al trigo.

19 Ja’ jech scotoluc me c’ac’al xa c’opanic ta jbi.

20 Yu’un c’usiuc no’ox ti cha c’anbeic jtotic ta jbie, ti me a na’ojic ti cha taique, xchi’uc ti me leque, cha vich’ic ac’bel.

21 C’opanic jtotic ta sventa anailalic scotol c’ac’al ta jbi, ti c’uxi xu’ xich’ic benticion a vajnilique xchi’uc anich’nabique.

22 Ja’ jech xa tsob abaic ta jujuliquel; xchi’uc mu me boch’ouc mu xa vac’ te oyuc ti c’alal cha tsob abaique, ac’o me te oyuc achi’uquic, mu me xa valbe mo’oj.

23 Ja’ no’ox c’opanbeic Riox ta stojolalic, mu me xa nutsic loq’uel, ti me ta xtal jujuliquel ta atojolalique, c’opanic jtotic ta stojolalic ta jbi.

24 Toyic a xojobalic ti c’uxi ac’o sacubuc sbejel banamile, ja’ jech, ja’ vu’un ti saquil osilun ti tsc’an jech cha vaq’uic ta toyole: Ti c’u x-elan la vilic la jpase. Ja’ jech, la vilic ti c’u x-elan la jc’opan jtotique, xchi’uc vo’xuc texticooxuc a cotolic.

25 Xchi’uc la vilic ti la jpas mantal ti jech muyuc boch’o chnomaj batel avu’nique, yu’un ja’ no’ox jpasoj mantal ti ac’o xtal ta jtojolale, ti c’uxi xu’ xtal a piquic xchi’uc xtal aq’uelic, ti c’uxi ja’ jech cha pasic ta scotol banamile, xchi’uc ti boch’o muyuc ta xch’un li’ mantale, yu’un ja’ ta xac’ sba ta iq’uel batel ta ch’ayel.

26 Ja’o jech ti c’alal la jyal va’ay lo’iletic ti Jesuse, la sjoybin sat yanvelta ti te buoy yajchanc’optac bu st’ujoje, jech la jyalbe:

27 Ja’ jech, ta bats’imelel, ta bats’imelel cha calboxuc, ti ta xcac’boxuc yan mantale, ja’ o chi bat ta jtotic ti c’uxi xu’ chba jch’un yan mantal ti ja’ stuc la jyac’bune.

28 Ja’ jech, ja’ ti li’ mantal cha cac’boxuc vu’une, mu xa vac’beic stsac jbec’tal xchi’uc jch’ich’al ti c’alal cha vaq’uic me a na’ojic oy smule.

29 Yu’un ti boch’o ta sve’ jbec’tal xchi’uc ti boch’o ta xuch’ jch’ich’al c’alal me oy smule, ja’ ta sve’ xchi’uc ta xuch’ ch’ayel ta sventa xch’ulel, ja’ jech, ti me a na’oj jun vinic me oy smul ti jech ta sve’ xchi’uc ti jech ta xuch’ ti jbec’tal xchi’uc ti jch’ich’ale, stac’ xa valbe ti mu sve’e.

30 Ja’ no’ox mu me xa nuts loq’uel ti te bu oyoxuque, ja’ no’ox q’uelo lec xchi’uc c’opano jtotic ta stojolal ta jbi; ti me jech c’ot ta pasel me la sutes yo’nton xchi’uc ti me la jyich’ vo’ ta jbie, ja’ jech xu’ xa ch’am xchi’uc xu’ xa vac’be ti jbec’tal xchi’uc ti jch’ich’ale.

31 Jech ti me muyuc la sutes yo’ntone, jech muyuc ta xich’ atael ti te bu oyic jteclumal ti c’uxi mu soques jteclumale, xchi’uc ja’ jech, xcotquinan ti jchijtaque, xchi’uc atabilic.

32 Ja’ no’ox mu me xa nutsic loq’uel ti te ta snail atsobumbailique, xchi’uc ti te bu cha c’opanic Rioxe, yu’un tsc’an me cha q’uel o lec ti va’aye, yu’un mu xa na’ me ta to sutic tal, xchi’uc me ta sutes yo’ntonic ti jech ta jcoltaique, yu’un ti vo’xuque ja’ ta a ventaic vo’xuc ti c’uxi xu’ chtal ta stojolalic ti coltaele.

33 Ja’ jech, q’uelic ti li’ lo’iletic bu vu’un la jpas mantal ti c’uxi mu xa bat ta ch’ayele, yu’un ¡abul sba ti boch’o ta x-ac’at ta ch’ayel yu’un jtotique!

34 Ta xcac’ ti li’ mantaletique ja’ ta sventa ti c’u x-elan oy sa’ c’op o no’ox ta atojolalique, xchi’uc cha vich’ic benticion ti me muyuc cha sa’ic c’op ta vo’xuque.

35 Ja’ jech, tana ti li’e, chi bat ta stojolal jtotic, yu’un ja’ lec ti chi bat ta jtotic ta sventa yu’un jc’anojoxuc vo’xuque.

36 Ja’ o jech ti c’alal laj yo’nton ta yalel va’ay lo’iletic ti Jesuse, la spicanan ta sc’ob ti yajchanc’optac bu la st’uje, ta jujuntal ja’ to ti c’uxi la spic scotole, xchi’uc la sc’opanan ti c’alal la spicanane.

37 Jech ti boch’otic te tsobolique muyuc la jya’yic ti lo’iletic la jyale, ja’ jech, muyuc xalic ta jamal; ja’uc ti jchanc’opetique la jyalic ta jamal ti jech la jyich’ic ac’bel stsatsalic ti c’uxi xu’ xaq’uic Ch’ul Espíritue. Ja’ to te ta ts’acal ta xcac’ ta ilel ti yu’un ja’ ta bats’imelel ti c’usi la jyalic ta jamale.

38 Ja’ o jech ti Jesús c’alal laj yo’nton ta spicanel scotole, ja’o c’ot toc xchi’uc la smac scotol ti boch’otic te tsobolic c’uxi mu xilic Jesuse.

39 Ja’o jech, ti c’alal jech la jyich’ic maquele, ja’ o jech loc’ batel ta stojolalic xchi’uc muy batel ta vinajel. Ti jchanc’opetique la jyilic xchi’uc ta xalic ta jamal ti jech muy batel ta vinajel yan veltae.