1 Ja’ o jech la jyich’ic pasel ta mantal ti ac’o sts’ibaic ti lo’iletic bu la jyal jtotic ta Malaquiase, ti bu ja’ ta xal ta stojolalique, ja’ jech ti c’alal la jyich’ ts’ibaele, ja’ stuc la jyalbe smelolal, ja’ jech x-elan ti lo’iletic la jyich’ic albele, jech la jyal: ja’ jech la jyal ti jtotic ta Malaquiase: Ta jtactal caj almantal, xchi’uc ja’ ta smeltsan jbe ta jsat vu’un, xchi’uc li’ xcujcun o ti ta stemplo Cajvaltic ti boch’o cha sa’e, jech, ti j-almantal ti boch’o lec cha va’aye, ja’ jech, ta xtal, xi ti Cajvaltic ta vinajele.

2 ¿Boch’ovan xu’ chcuch yu’un ti c’alal me sta sc’ac’alil ta xtale? xchi’uc ¿boch’ovan xu’ va’al chcom ti c’alal me la jyac’ sba ta ilele? yu’un xco’laj xchi’uc jsacubtasvanej c’oc’ xchi’uc xavon te ta chuc’unajebale.

3 Xchi’uc ta xchoti jech chac c’u cha’al jpas saquil taq’uin xchi’uc ta spocbe xnich’nab Levi, xchi’uc ja’ jech ta spas jech chac c’u cha’al c’anal taq’uin xchi’uc saquil taq’uin, ti c’uxi xu’ xaq’uic ta stojolal Cajvaltic ti c’uyepal muyuc la slajes staq’uinic c’alal la jyictaic yiximic ta lequilale.

4 Jech ti c’u x-elan c’usi ta xaq’uic Juda xchi’uc Jerusalene ja’ lec chil Cajvaltic, jech chac c’u cha’al o no’ox ta poco’ vo’nej, xchi’uc ti c’u cha’al ta poco’ jabil ech’emic xae.

5 Ti vu’une chi nopaj ta atojolalic ta sventa ta jq’uel talelil; xchi’uc vu’un texticoun ta sventa scontra j-ac’ chameletic xchi’uc jmulaviletic, xchi’uc ta scontra boch’otic j-epal c’opetic, xchi’uc ta scontra boch’otic muyuc ta stojic yaj abtelic, xchi’uc boch’o ta suts’intaic jyan lumetic, xchi’uc me muyuc ta xi’icune, xi ti Cajvaltic ta vinajele.

6 Yu’un vu’un Cajvalticun, xchi’uc muyuc bu chi jeltaj o, ja’ jech, muyuc bu cha lajic o vo’xuc xnich’nabtac Jacob.

7 Jech, ja’o no’ox ti ta sc’ac’alil a totic la chac’ a vaic ta jmantaltaque, xchi’uc ti muyuc la ch’unique, sutanic tal ta jtojolal, jech chi sut ta atojolalic ti vu’une, xi ti Cajvaltic ta vinajele. Jech ti vo’xuque cha valic: ¿c’uxi xu’ chi jsututic?

8 ¿Me ta xelc’an vinic ti Rioxe? vo’xuc a velc’anojicun, ti vo’xuque cha valic: ¿C’usi ti quelc’anojbotcutique? ja’ ti jun ta lajuneb c’usi oy avu’nique xchi’uc ti c’uyepal muyuc xa lajesic c’alal cha victaic ixime.

9 Ti vo’xuque tu jch’em chopoloxuc ta sventa chopolil, vo’xuc a cotolic ti c’u a vepalic li’ ta muc’ta jteclume, avelc’anojicun.

10 Ich’ictal ta snail scotol ti jun ta lajuneb c’usi oy avu’nic ti c’u xi oyuc ve’lil ta jnae, pasun a va’ay ta poroval tana ti ta c’usi va’aye, xi ti Cajvaltic ta vinajele, xchi’uc ta jam sventanailtac vinajel, xchi’uc ta xcac’ jbenticion ta atojolalic ja’ to ti c’uxi muxa xa na’ic bu cha vaq’uique.

11 Xchi’uc ta jloq’ues jsocvanej avu’nic ta sventa ti yu’un jc’anojoxu que, xchi’uc muyuc ta jsoques c’usi ta xch’i ta abanamilic, xchi’uc me ja’uc ts’usub xu’ xac’ sat me mu to yorailuque, xi ti Cajvaltic ta vinajele.

12 Scotol banamil ta xalic ti ep benticion a vich’ojique, yu’un ja’ lequil banamil, xi ti Cajvaltic ta vinajele.

13 Yu’un tsots c’otemic ti a va’yejic ta jtojolale, xi ti Cajvaltic ta vinajele ja’ yo jech cha valic ti vo’xuque: ¿C’usi ti chopol calojcutic ta a tojolale?

14 Xchi’uc avalojic: jeche’ no’ox ti chi j-abtejutic ta sventa Rioxe, ¿c’usi lec chi yac’butic ti jech ta jpasbetic smantale, xchi’uc ti jech ta xcat co’ntontic ta sat ti Cajvaltic ta vinajele?.

15 Xchi’uc ta xcaltic ti ja’ lec chilic ti boch’otic jch’unej mantaletique, jech, ti boch’otic muyuc ta spasic bolililetique ta xich’ic ich’el ta muc’; jech, xchi’uc ta xich’ic pojel ta boch’otic c’usi chopol tspasic ta sat Riox.

16 Ti boch’otic ta xi’ic Rioxe c’opojic ta c’unc’un ta jujuntal xchi’iltaquic; xchi’uc ti Cajvaltique la jya’ay, xchi’uc jech la jyich’ ts’ibael jun libro ta sventa c’uxi ac’o svules ta sjolic ta sat stuc ta sventaic ti boch’otic ta xi’ic Cajvaltic xchi’uc ti boch’otic ta snopic ta sbie.

17 Jech ja’ cu’untac, xi ti Cajvaltic ta vinajele, ti baq’uin ta jmeltsan jtontac lec alac’sbaique, ta jpasbe pertonal jech chac c’u cha’al vinic ta spasbe pertonal xnich’on ti bu ta xtun yu’une.

18 Jech ti vo’xuque, cha sutic xchi’uc cha q’uelic to ti boch’otic lequique xchi’uc ti boch’otic muyuc lequique; xchi’uc ti boch’otic ja’ ta spasic c’usi tsc’an Rioxe xchi’uc ti boch’otic ma’uc ta spasique.