Ti Jesucristoe la jyac’ sba ta ilel te ta steclumal Nefi. Ti C’alal te to ox tsobolic ti viniquetic te ta banamil ep c’usi oye, (Abundancia) Xchi’uc te la spas yabtel ta sventaic, ja’ jech x-elan ti la jyac’ sba ta ilele.
Co’ol sba xchi’uc capitulo 11 calaltota 26.
Svuluchibal Capitulo
Ti Jtotique ta xal ta jamal ta sventa snich’on ti bu lec sc’anoje—Cristo ta xac’ sba ta ilel xchi’uc ta xalbe sc’oplal c’u x-elan ta xcoltavan—Ti boch’otic ja’ic steclumale ta spiquic ti bu tuch’emic sc’obtaque, yacantaque xchi’uc ti xch’elape—Ti boch’otic te tsobolique ta xalic ¡Q’uejimol!—Ja’ la jyac’ c’u x-elan ta pasel ti ich’um vo’e—Ti espíritu bu mu sc’an xi jtoyutique ja’ yu’un pucuj—Ja’ stac’ xch’unic viniquetic ti slequil c’op Cristoe, stac’ xich’ic vo’ xchi’uc ta xich’ic Ch’ul Espíritu.
1 Ja’ jech ti c’alal te tsobolic epal Nefitaetic ti te ta xocontac Templo te ta sbanamil bu ep c’usi oye (abundancia) jech te laval sba cha’yic xchi’uc ta xi’ic ta jech no’ox, xchi’uc ta xac’be sba yilic ta jujuntal ti c’usi ech’em laval sba la jyilique.
2 Xchi’uc ta xlo’ilajic ta sventa ti li’ Jesucristoe, ti boch’o la jyac’ ta ilel sq’uelubil c’u x-elan chame.
3 Ja’ o jech, ti c’alal ja’ o jech ta xlo’ilajic ta jujuntale, ja’ o jech la jya’yic oy boch’o lo’ilaj xco’laj xchi’uc lo’ilaj tal ta vinajel ya’eluc, jech la sq’uelic ta xocontaquic, yu’un muyuc xa’yic lec ti lo’il la jya’yique, yu’un ma’uc chopol ti snuq’uilal lo’ile xchi’uc me ja’uc tsots ti lo’ile, och c’alal ta yut yo’ntonic ti boch’otic la jya’yique, xchi’uc ti jech nic scotol sbec’talique, jech, xchi’uc och c’alalto ta yut xch’ulelic, ti jech chic’bat yo’ntonique.
4 Ja’ o jech la jya’yic yan velta xtoc ti lo’ile, xchi’uc muyuc la jya’ybeic lec smelolal.
5 Ja’ o jech la jya’yic yoxibal xa ox velta ti lo’ile, la jyac’ xchiquinic ta ya’yel; xchi’uc ja’ te lec sq’uelojic batel ti te bu chbaq’ue, xchi’uc ja’ te sq’uelojic batel lec ti vinajel te bu chtal ti lo’ile.
6 Ja’ jech ta yoxibal to velta la jya’ybeic smelolal ti lo’il la jya’yique; jech la jyich’ic albel:
7 Jech ti jnich’on lec jc’anoje, ti boch’o lec xcuxet co’nton yu’une, xchi’uc ti ja’ cac’ojbe jbie: ja’uc me xa va’ybeic ti c’usi chale.
8 Ja’ jech ti c’alal ta xa’yique la jyaq’uic batel satic yan velta ta vinajel, ja’ jech; la jyilic jun vinic ti te tal ta vinajele, xchi’uc slapoj jun natil c’u’il lec sac, jech te tal ta stojolalic xchi’uc la jyac’ sba ta o’lol ta stojolalic. Ti satic boch’otic te ep tsobolique ja’ la sq’uelic, jech muyuc sc’an la sjam yeic, xchi’uc me ja’uc la sc’opan sbaic ta jujuntal, yu’un mu sna’ic c’u x-elan smelolal, yu’un la snopic me ja’ jun yabat Riox, ti jech tal ta stojolalique.
9 Ja’o jech la xbech sc’ob, xchi’uc la sc’opan ti jteclume, jech la jyal:
10 Ja’ jech, vu’un Jesucristoun, ti boch’o la jyalic ta jamal lequil viniquetic ta xtal ta sventa sbejel banamile.
11 Ja’ jech, vu’un saquil osilun xchi’uc cuxlejalun ta sbejel banamil, jech cuch’oj xa ti ch’ailbis bu la jyac’bun jtote, xchi’uc laj xa cac’be xcuxetel yo’nton jtot ti jech laj xa quich’ ta jech no’ox ti smultac sbejel banamile, xchi’uc ti jech la jcac’ jba ti ta c’usi tsc’an ti totil ta scotol c’usitic oy ta sliquebal banamil o no’oxe.
12 Ja’ o jech c’alal laj yo’nton Jesús ta yalel scotol ti va’ay lo’iletique, scotolic ti boch’otic te tsobolique yalic ta lum scotolic, yu’un vul ta sjolic ti jech yich’ojic o no’ox albel ta stojolalic ti jech ta xac’ sba ta ilel Cristo ta stojolalic ta ts’acal ti c’alal me bat ta vinajele.
13 Ja’ o jech la jyich’ic chi’nel ta lo’il yu’un Cajvaltic, jech la jyal:
14 Licanic xchi’uc la’ic ta jtojolal, ti c’uxi xu’ xa tic’ ac’obic ta jch’elape, xchi’uc ti c’uxi xu’ xapiquic ti yab lavux ta jc’obtac xchi’uc ti ta cacantac ti c’uxi xu’ xa ch’unic ti vu’un Xrioxun Israele, xchi’uc ti Rioxun ta sventa scotol banamile, xchi’uc ti li milat ta sventa smul sbejel banamile.
15 Ja’o jech ti boch’otic te tsobolique liquic, xchi’uc la stic’ sc’obic ti ta xch’elape, xchi’uc la spiquic ti yab lavuxetic ta sc’obtac xchi’uc ta yacantaque, ti va’aye la spasic, ta jujuntal batic, ja’ to ti c’uxi scotolic c’otique, la jyilic ta satic xchi’uc la spiquic ta sc’obic, xchi’uc la sna’ic o ta bats’imelel, xchi’uc la jyalic ta jamal ti ja’ ti boch’o sts’ibaojic o no’ox lequil viniquetic ta xtale.
16 Ti c’alal scotolic batic xchi’uc ti la sna’ique, jmoj avanic jech la jyalic:
17 ¡Q’uejinic! ¡ts’uiltasbiluc ti sbi toyol Rioxe; jech te yalic ta lum te ta yacan Jesús, jech la yich’ic ta muc’:
18 Ja’ jech la xchi’in ta lo’il Nefi, (yu’un ti Nefie te oy ti te bu tsobolique) la jyalbe ti ac’o nopajuc batele.
19 Jech lic ti Nefie, nopaj batel xchi’uc la snijan sba ta stojolal Cajvaltic, xchi’uc la sts’uts’be yacantac.
20 Ti Cajvaltique la jyalbe ti ac’o xlique, ja’ jech te lic xchi’uc va’i ta sat.
21 Ti Cajvaltique jech la jyal: Ta xcac’bot a vu’el ti c’uxi xu’ xa vac’ ta vo’ li’ jteclum ti c’alal me li muy ta vinajel yan veltae.
22 Xchi’uc xtoc, ti Cajvaltique la jyic’tal yantic, xchi’uc ja’ no’ox jech la jyalbeic xtoc, xchi’uc la jyac’ananbe svu’elic ta sventa ac’ vo’, jech la jyalbeic: ja’ jech x-elan ti xu’ xa vaq’uic vo’e, xchi’uc muyucuc me c’op avu’nic ta vo’xuc no’ox.
23 Ta bats’imelel ta xcal ti boch’otic ta sutes yo’ntonic yu’un smulic ta sventa ava’yejique, xchi’uc ti me tsc’anic ta xich’ic vo’ ta jbie, ja’ jech x-elan ti xu’ xa vaq’uic ich’ vo’e, ja’ jech, cha ochic batel ta yut vo’ xchi’uc ta jbi cha vac’ ta vo’.
24 Xchi’uc ja’ jech x-elan sba ti lo’iletic cha valique; cha valbeic sbi, jech cha valic.
25 Ja’ jech ac’bilun jtsatsal yu’un Jesucristo, vu’un cha cac’ot ta vo’ ta sbi Riox totil, xchi’uc Riox nich’onil, xchi’uc Ch’ul Espíritu. Jechuc.
26 Ja’ jech cha muc ochel ta yut vo’, xchi’uc ja’ jech cha loc’ yanvelta ti ta yut vo’e.
27 Ja’ jech x-elan ti cha vaq’uic vo’ ta jbie, yu’un ja’ jech, ta bats’imelel ta xcal ti totil xchi’uc nich’onil xchi’uc ti Ch’ul Espíritue, yu’un junic no’ox o, xchi’uc ti vu’une ja’un ta totil, ti totile ja’ ta vu’un, ti totil xchi’uc vu’une jununcutic o.
28 Ja’ jech chac c’u cha’al caloj mantale, ja’ jech cha vaq’uic ich’ vo’, xchi’uc muyuc c’op avu’nic, jech chac c’u cha’al oy ono’oxe; xchi’uc muyuc c’op avu’nic ta sventa c’usi ta jchanubtasojoxuc, jech chac c’u cha’al oy li’ ta orae.
29 Yu’un ta bats’imelel ta bats’imelel cha calboxuc, yu’un ti boch’o oy chopol espíritu ta stojolale, ma’uc cu’un, yu’un ja’ yu’un pucuj, ti ja’ totil ta sventa uts’intaele, xchi’uc ja’ ta socbe yo’ntonic viniquetic ti c’uxi xuts’inta sbaic ta jujuntale.
30 Ja’ jech ti va’aye ma’uc lequil c’op ti jech ta xac’be sc’ac’al yo’nton ta yo’ntonic viniquetic ti jech ta scontrain sbaic ta jujuntale, ti jba’yuc lequil c’ope ja’ li’e, ac’o lajuc o ti c’u x-elan va’aye.
31 Ja’ jech ta bats’imelel ta bats’imelel ta xcal ti jech ta xcal ta jamal ti jlequil c’ope.
32 Ti li’e ja’ ti jlequil c’ope, xchi’uc ja’ ti jlequil c’op yac’ojbun jtotique xchi’uc vu’un ta xcal ta jamal ta sventa totil, ti totile ta xal ta jamal ta jventa vu’un, xchi’uc ti Ch’ul Espíritue ta xal ta jamal ta sventa jtotic xchi’uc ta jventa vu’un, xchi’uc ti vu’une ta xcal ta jamal ti ja’ ta spas ta mantal scotol viniquetic li’ totil, ta scotol banamil ti ac’o sutes yo’ntonique xchi’uc ti ac’o xch’unicune.
33 Boch’ouc no’ox me la xch’unun vu’un xchi’uc me la jyich’ vo’e, ti va’aye ja’ ta xcol, xchi’uc ti boch’otic ch-ochic te bu ta spas mantal Rioxe.
34 Ti boch’o muyuc ta xch’unune, xchi’uc ti me muyuc ta xich’ vo’e, ja’ ta Ch’ayel ta xbat.
35 Ta bats’imelel ta bats’imelel cha calboxuc, ti li’e ja’ ti jlequil c’ope, xchi’uc ta sventa jtot cha calboxuc ta jamal ti ta sventa jlequil c’ope; ti boch’o ta xch’unune, ja’ ta xch’un xtoc ti jtotique, ti jtotique ja’ ta xal ta jamal ta jventa vu’un, yu’un ta jvu’lan xchi’uc c’oc’ xchi’uc Ch’ul Espíritu.
36 Ja’ jech x-elan ta xal ta jamal ti jtotic ta jventae, xchi’uc ti Ch’ul Espíritue ta xal ta jamal ta sventa jtotic xchi’uc ta jventa vu’un, yu’un ti jtotique xchi’uc vu’une xchi’uc Ch’ul Espíritue jununcutic o.
37 Xchi’uc cha calboxuc ti tsc’an cha sutes a vo’ntonique, xchi’uc ti cha sutes abaic jech chac c’u cha’al jun biq’uit olole, xchi’uc ti cha vich’ic vo’ ta jbie, yu’un ti me mu jechuc la pasique mu xu’ xa vich’ic ti c’usitic li’e.
38 Yan velta cha calboxuc no’oxtoc ti tsc’an cha sutes a vo’ntonique, xchi’uc ti cha vich’ic vo’ ta jbie, xchi’uc ti cha sutes abaic jech chac c’u cha’al jun biq’uit olole, yu’un ti me mu jechuc la pasique mu xu’ xa ochic te bu ta spas mantal Riox.
39 Ta bats’imelel ta bats’imelel cha calboxuc ja’ jlequil c’op ti li’e, ti boch’otic ta xac’ sbaic ta va’aye, ja’ ta xac’ sba ta sba li’ jtone, ti smactac li’ c’atinvaque mu xac’ sba ta yaj contraic.
40 Ti boch’otic ta xalic jechtic sba jech chac c’u cha’al li’e, xchi’uc me ta xaq’uic jech chac c’u cha’al jlequil c’ope, ti va’yique ja’ te talemic ta chopolil, xchi’uc ma’uc te yac’oj sba ta sba jton, yu’un ja’ te yac’oj sba ta ba yi’, xchi’uc ti smactac c’atinvaque jamal ta sventa ti c’uxi xich’ic iq’uele, ti c’alal me tal nojelale xchi’uc ti me tal tsots iq’ue.
41 Ja’ jech batanic ti li’ ta jteclume, bat albo ya’yic ti lo’iletic la jcale, c’alalto ta sti’iltac banamil.