1 Ja’ o jech la spas ta mantal ti boch’otic te tsobolic xchi’uc ti yaj yajchanc’optac ti jech ac’o lajuc yo’ntonic ta sc’opanel Rioxe, xchi’uc la spas ta mantal ti ac’o mu xlaj yo’ntonic ta sc’opanel Riox ta yo’ntonique.

2 Xchi’uc la spas ta mantal ti ac’o liquicuque xchi’uc ti ac’o va’iicuque.

3 Ja’ o jech la svoc’ ti pane xchi’uc la jyac’be benticion yanvelta, jech la jyac’be sve’ ti yajchanc’optaque.

4 Ti c’alal laj sve’ique, la spas ta mantal ac’o xch’aquic ti pane, xchi’uc ti ac’o yac’beic ti boch’otic te tsobolique.

5 C’alal la jyac’beic ti boch’otic te tsobolique, ja’ o la jyich’ic ac’bel ya’lel ts’usub xtoc, xchi’uc la jyich’ic pasel ta mantal ti ac’o yac’beic ti boch’otic te tsobolique.

6 Tana un, me ja’uc jchanc’opetic xchi’uc me ja’uc boch’otic te tsobolic la jyich’ic batel pan xchi’uc ya’lel ts’usub.

7 Ta bats’imelel ti jech la jyich’ic ac’bel sve’ic pan xchi’uc ti la jyich’ic ac’bel yuch’ic ya’lel ts’usub xtoque.

8 Jech la jyich’ic albel: Ti boch’o ta sve’ li’ pane, ja’ ta sve’ jbec’tal ta sventa xch’ulel, xchi’uc ti boch’o ta xuch’ li’ ya’lel ts’usube ja’ ta xuch’ jch’ich’al ta sventa xch’ulel, jech ti xch’ulele muyuc xa bu ta xvi’naj xchi’uc muyuc xa bu ta xtaquij yo’nton ta baq’uin, yu’un jech noj o ta sbatel osil.

9 Ja’ o jech ti c’alal la sve’ic xchi’uc la jyuch’ic ti boch’otic te tsobolique, jech nojic ta Espíritu, jech avanic ta jmoj xchi’uc jech la stojbeic ta vocol Jesús ti boch’o te sq’uelojic xchi’uc ti boch’o te ta xaybeic sc’ope.

10 Ja’ o jech ti c’alal scotolic la stojbeic ta vocole, jech la jyich’ic albel yu’un ti Jesuse; ja’ jech, tana c’ot ta pasel cu’un ti mantaletic la jyac’bun jtotic ta sventa li’ jteclum, ti ja’ic scomelal snailal Israele.

11 Xchi’uc xa vules me ta ajolic ti c’u x-elan li lo’ilaj xchi’uc ti la jcal ti c’alal me c’ot ta pasel ti ya’yejtac Isaiase—ja’ jech, ts’ibabil, teoy ta atojolalic vo’xuc, jech tana un, chanic me lec.

12 Ta bats’imelel, ta bats’imelel cha calboxuc ti c’alal me c’ot ta pasele, yu’un ja’ xa c’ot ta pasel ti c’usi la jyal jtotic ta steclumale, ti ta snailal Israele.

13 Ti scomelalic va’yic, ti bu tanijbilic batel ta scotol sba banamile, ta xich’ic tsobel ta sloq’uem c’ac’al xchi’uc ta smaleb c’ac’al, xchi’uc ta jot xocon sloq’uem c’ac’al xchi’uc ta jot xocon smaleb c’ac’al, xchi’uc ta x-otquinatic yu’un Cajvaltic Riox, ti boch’o la jyich’ic o pojele.

14 Ti jtotique la spasun ta mantal ti ac’o xcac’boxuc ta apuculalic ti li’ banamile.

15 Jech ta xcalboxuc, ti me muyuc la sutes yo’ntonic ti boch’otic ma’icuc snailal Israel ti c’alal me jech la jyich’ic li’ benticion, ti c’alal me laj xa ox spuclinic batel li’ jteclumale.

16 Ja’ jech ti vo’xuc scomelaloxuc snailal Jacobe, cha batic ta stojolalic; xchi’uc te cha vac’ abaic ta o’lol ti te bu epique; ja’ jech cha c’otic ta stojolalic jech chac c’u cha’al jcot bolom yu’nic ta scotol chon bolometic ta te’tic, xchi’uc xco’laj xchi’uc yol muc’ta bolom ta stojolal epal chijetic, ja’ jech ti me la jeloic ta o’lole, cha pech’ic ta teq’uel xchi’uc biq’uitic chbat, jech muyuc boch’o xu’ ta spoj.

17 Ti ac’obe ta xtoy ta sventa a vaj contratac, xchi’uc scotol ti avaj contrataque ta xich’ic milel.

18 Ti vu’une ta jtsob ti boch’otic ja’ jteclumale, jech chac c’u cha’al jun vinic tstsob c’usi oy yu’un ta yut snae.

19 Yu’un ta spas jech jteclumal jech chac c’u cha’al yaloj jtotique, jech ti a xulube ta jpas ta yax-elan taq’uin, ti sni’ abic’achtaque, ta jpas ta c’unil c’anal taq’uin, xchi’uc cha tuch’esanan epal jteclum, xchi’uc ta xcac’be ta smoton Cajvaltic ti sc’ulejalique, xchi’uc ti c’usitic oy yu’nique ta xich’ Cajvaltic ta sbejel banamil, xchi’uc ja’ jech, ja’uc ti boch’o jech ta spase.

20 Ta to xc’ot ta pasel, xi ti jtotique, ta baq’uin ti jmachita sventa mantale ta xc’ot ta stojolalic, ti me muyuc sutes yo’ntonique ta xyal ta stojolalic, jech ta scotol steclumal ti boch’otic ma’icuc snailal Israele xi ti jtotique.

21 Ja’ jech chc’ot ta pasel ti ta xcac’ jteclumal ta snailal Israele.

22 Ja’ jech, li’ ta xcac’ jteclumal ti li’ ta banamile, ja’ sventa ti c’uxi chc’ot ta pasel c’usi la jcalbe Jacob ti ja’ a totique; xchi’uc ti ja’ chc’ot ta ach’ Jerusalene. Ti stsatsaltac vinajele li’ ta xc’ot ta stojolalic li’ jteclume, jech, vu’un jtuc te oyun ta o’lol avu’nic.

23 Xchi’uc ja’ vu’un ti boch’o la jyalbe sc’oplal o no’ox Moisés, ti jech la jyal: Ti jtotic ti ja’ Jrioxtique ta sliques yan lequil vinic, ta stojolalic quermanotactic, ti ja’uc o jech x-elan chac c’u cha’al vu’une ti ja’ ta xa’ybeic scotol ti c’usitic ta xale, xchi’uc ta xc’ot ta pasel scotol ch’ulelal ti me muyuc xa’yic ti c’usi ta xal ti li’ lequil vinique, ta xich’ jipel loq’uel ti li’ ta jteclume.

24 Ta bats’imelel cha calboxuc, jech, scotolic ti lequil viniquetic ti ja’ o no’ox o te xlictal ta Samuel xchi’uc ti boch’otic chcomanan c’alal chlajananique, xchi’uc ti c’uyepal c’opojemique, ja’ la jyalic ta jamal ta jventa.

25 Xchi’uc ja’ jech, ti vo’xuque ja’ xnich’onoxuc ti lequil viniquetique; xchi’uc ja’oxuc snailal Israel. Xchi’uc ja’ vo’xuc ti c’usi la jyal jtotic ta stojolal a totic, ti jech la jyalbe Abraham: Ta anich’nabto ta xich’ic benticion scotol jnaclejetic ta banamil.

26 Yu’un ti jtotique la sliquesun ta sventa ti c’uxi chi tal ba’yuc ta atojolalique, xchi’uc la stacuntal ti jech tal cac’boxuc benticione, xchi’uc ti c’uxi xa loq’ues a vaic ta a bolilic ta jujuntale, jech ti va’ye, ja’ ti yu’un ja’ xnich’onoxuc ti c’usi o no’ox yaloj jtotique.

27 Ta ts’acal ti c’alal me la vich’ic benticione, ja’ to ta xc’ot ta pasel yu’un jtotic ti c’usi la jyalbe o no’ox Abraham ti jech la jyal: Ta anich’nabicto ta xich’ic benticion scotol jnaclejetic ta banamil, xchi’uc ta jventa ta xich’ic ac’bel Ch’ul Espíritu ta stojolalic ti boch’otic ma’icuc snailal Israele, ti va’ay benticion ta xich’ic ac’bel ti boch’otic ma’icuc snailal Israele, ja’ ta xich’ic tsatsubtasel o ta scotolic, ti yu’un ja’ ta snutsic loq’uel jteclumal ti ja’ic snailal Israele.

28 Yu’un ja’ tsmajic jteclum ti li’ta banamile, ti me jech, c’alal me la jyich’ic ti saquil jlequil c’ope, me ta stsatsubtas yo’ntonic ta jcontrainel vu’une, ta xcac’ ac’o sutuc batel sbolilic ta sjol stuquic, xi ti jtotique.

29 Xchi’uc ta jt’ab ta co’nton ta ora ti cusi caloj ta sventa jteclumale, xchi’uc calojbeic ti ta jliquesic ta c’unc’un jtuc ti me sta sc’ac’alile, xchi’uc ta xcac’beic ti ja’uc spuculalicuc ti yosil stotic ti ja’ sbanamil Jerusalen ti bu ac’bilic o no’ox ta sbatel osile, xi ti Rioxe.

30 Xchi’uc ta xc’ot sc’ac’alil ti ta xich’ic cholbel sc’oplal ti saquil lequil c’ope.

31 Xchi’uc ta xch’unicun vu’un, ti ja’un Jesucristoune, xchi’uc ti xnich’onun Rioxe, xchi’uc ta sc’opanic jtotic ta jbi.

32 Xchi’uc ta xlic avanicuc ti jchabivanejetique, xchi’uc jmoj ta xq’uejinic, yu’un ta xilic lec ta satic.

33 Ja’ jech ta stsob ta ach’ yanvelta ti jtotique, xchi’uc ja’ ta xich’ic ac’bel ta spuculal banamilic ti Jerusalene.

34 Ja’ jech te ta staic ep xcuxetel yo’ntonic, ¡jmoj ta xq’uejinic ti te bu muyuc c’usi oy ta Jerusalene, yu’un ja’ jtotic ta spatbe yo’nton ti steclumale, xchi’uc la sloq’uesbe smul ti Jerusalene!

35 Yu’un ti Rioxe st’ananoj xch’ul c’ob ta sat scotol banamil, xchi’uc c’alal ta scotol sti’iltac banamil ta xilic ti c’u x-elan ta xcoltavan jtotique, yu’un ti jtotic xchi’uc vu’une jununcutic jchi’uc.

36 Ja’ jech ta xc’ot ta pasel ti c’usi ts’ibabile, ¡julovanic julovanic, xchi’uc ac’aba ta tsatsalil bu muyuc uts’intael; xchi’uc lapo lequic a c’u’ vo’ot Jerusalen ch’ul muc’ta jteclum, yu’un muyuc xa baq’uin xu’ ta xtalic ta a tojolal ti boch’otic chopolique xchi’uc ti boch’otic muyuc lec c’usi tspasique.

37 ¡Lilin a ba ta spucucal; lican, xchi’uc tsaco a chotleb, vo’ot Jerusalen; jituno ti c’usi chucul o a nuq’ue, ti vo’ot tiq’uilot ta chuquele stseb bu muyuc uts’intael.

38 Yu’un jech ta xal ti Cajvaltique: Ti vu’une muyuc bu chonbiloxuc cu’un, ja’ yo jech, muta taq’uinuc xu’ cha colic.

39 Ta bats’imelel ta bats’imelel cha calboxuc ti jteclumale ta xotquinic ti jbie, jech, ti ta baq’uine ta sna’ic ti vu’un chi c’opoje.

40 Xchi’uc ja’ jech ta xalic: Tu jlec’ alac’ sba ta ba amaltic ti yacantac boch’o ta xich’ic ich’beltal c’usi lec ach’e; ti ta spucbe sc’oplal muyuc pas c’ope; xchi’uc ti ta xich’ic ich’beltal lec alac’sba ach’ lequilale; xchi’uc ta xtal ta sventa coltaele, ti jech ta xal ta sventa bu muyuc uts’intael: Ti ja’ tspas mantal Rioxe.

41 Xchi’uc ta xich’ a’yel jech ta x-abanic, voc’o abaic voc’o abaic, loc’anic ti tee, mu xa piquic ti c’usi mu xtune, loc’anic ti te buoyoxuc ta o’lol yu’nique, sacubtaso a vaic, ti boch’otic yich’ojbeic svaso Cajvaltique!

42 Yu’un mu stac’ xa loc’ ta anil xchi’uc me ja’uc stac’ xa jato loq’uel, ti tee, yu’un ja’ ba’yuc be chbat avu’nic ti Cajvaltique, xchi’uc ja’ ta xchabioxuc batel Xriox Israel.

43 Ja’ jech, ti caj abate ta spas lequil abtel, xchi’uc ta xich’ muq’uimtasel xchi’uc ta xich’ ich’el ta muc’ xchi’uc toyol ta xich’ aq’uel.

44 Ja’ jech chac c’u cha’al ep boch’otic ep laval sba la jya’yic ta a tojolale, ti yu’un ep mu jechuc sbec’tal jech chac c’u cha’al jun vinic, xchi’uc ti c’u x-elane ja’ ech’em lec jech chac c’u cha’al xnich’nab viniquetic.

45 Xchi’uc laval ta x-a’yat yu’un epal muc’tiquil jteclum; xchi’uc ja’ ta sventa ta smacbe yeic li’ ajvaliletique, yu’un ta xilic ti c’usi muyuc bu albilic o no’oxe, xchi’uc ta xilic ti muyuc bu o no’ox ya’yojique.

46 Ta bats’imelel ta bats’imelel cha calboxuc scotol ti c’usitic li’i ta xc’ot ta pasel ta bats’imelel, jech chac c’u cha’al la spasun ta mantal jtotique. Jech ta xc’ot ta pasel ti c’usi yaloj jtotic ta sventa jteclumale, xchi’uc jech ti Jerusalene, xchi’uc ja’ xa spuculal banamil chc’ot.