1 Ja’ jech ta xich’ pasel ti c’u x-elan ts’ibabile, q’uejinan vo’ot ti mu xa na’ xa alaje, ti jech muyuc bu a voq’uesoj olole, ¡avanan ta q’uejimol xchi’uc xcuxetuc no’ox a vo’nton xa avan, ti vo’ot muyuc baq’uin xa alaje! Yu’un ja’ ep yoltac ta xat yo’nton ti boch’otic oy smalale, xi ti Cajvaltique.

2 Ac’bo xcuxetel yo’nton ti te buoy a na ta poq’ue, xchi’uc quio batel ti smactac poc’ yut a nae, mu xa pas pucujil, natubtaso ti a ch’ojone, xchi’uc tsots xa pas ti a avoytaque.

3 Yu’un ta a bats’i c’ob xchi’uc ta a sts’et c’ob ta xa ch’i, xchi’uc avalab a nich’nab ta xich’ ta spuculal osilic ti li’ sbejel banamile, xchi’uc ta xac’beic oyuc yajval ti muc’tiquil jteclum bu muyuc yajvale.

4 Mu xa xi’, yu’un muyuc bu cha vich’ q’uexlaltasel, xchi’uc mu xa bat avo’nton yu’un muyuc bu cha vich’ q’uexlaltasel, yu’un ja’ no’ox ta xch’ay ta a vo’nton ti c’u x-elan amul ta atsebale, xchi’uc muyuc xa bu cha vich’ t’abbel ti c’u x-elan la vich’ utel c’alal cham a malale.

5 Yu’un ti boch’o la spasot xchi’uc ti amalale, ja’ sbi jtotic ta sbejel banamil, xchi’uc ti a vaj coltavaneje ja’ jch’ul totic ta Israel, ja’ ta sbiin Riox ta scotol banamil.

6 Yu’un ja’ jech chac c’u cha’al sutemal ants ta xat yo’nton xch’ulel, la jyic’ot ti jtotique xchi’uc jech chac c’u cha’al ach’ ajnilalot, ti c’alal la vich’ coltaele: xi ti a Rioxe.

7 Uni jliquel la jcomtsanot, jech ta muc’ta c’uxubinel xa ta jtamot.

8 Jech xchi’uc ta sc’ac’al c’onton jutuc la jmac jsat jliquel, ja’ yo jech ta c’uxubinel ta sbatel osil ta xcac’ ta a tojolal, xi ti Cajvaltic boch’o la sloq’uesbot a mule.

9 Yu’un ti li’e ja’ jech x-elan chca’ay jech chac c’u cha’al vo’etic yu’un Noe; yu’un jech chac c’u cha’al caloj ta bats’imelel ti vo’etic yu’un Noe ti muyuc ta snojes banamil ta baq’uine; ja’ jech xtoc caloj ta bats’imelel ta atojolal ti muyuc xa baq’uin chi ilin ta a tojolale.

10 Yu’un ti vitsetique ta xch’ay, xchi’uc ti bic’tal vitsetique ta xich’ loq’uesel, ja’uc ti slequil co’ntone muyuc ta xloc’ ta a tojolal, xchi’uc me ja’uc ta xich’ loq’uesel ti c’usi la jyich’ alel ta sventa jteclumale, xi ti jtotic boch’o oy yutsilal ta a tojolale.

11 Vo’ot ti cha vat a vo’nton jech la sjipot iq’ue, xchi’uc ti muyuc xa bu cha ta boch’o xu’ cha spatbot a vo’ntone, ja’ jech, vu’un ta xcac’be yibel a tonaltac ta alac’sba sts’ibaltac, xchi’uc ta yax-elan ton ta xcac’ ti a avibeltaque.

12 Ti a ventanataque ta jpas ta sacts’ayan nenetic, xchi’uc ti smactac a nae ta taq’uinetic xchi’uc scotol ti yibeltaque ta jpas ta lequil tonetic.

13 Xchi’uc scotol ti a xnich’nabtaque ta xich’ic albel yu’un Cajvaltic. Xchi’uc muc’tic no’ox chc’ot ta baq’uin ta stojolalic a nich’nabtac ti jech muyuc uts’intaele.

14 Jech ta lequilal cha vich’ aq’uel yanvelta, yu’un nom xa oyot ta stojolal ti boch’o tsc’an cha spasot ta mantale, yu’un muyuc xa xi’el cha va’ay, xchi’uc ti muc’ta xi’ele muyuc xa chnopaj ta a tojolal.

15 Ja’ jech, ta bats’imelel ta stsob sbaic ta a contra vo’ot, jech ma’uc ta jventa vu’un; ti boch’o ta stsob sbaic ta acontra vo’ote, ja’ ta xyalic ta aventa vo’ot.

16 Ja’ jech, lajxa jpas jun jtentaq’uin ti jech ta sjub ac’al ta c’oq’ue, xchi’uc ti ta sloq’ues yabtejebtac ta sventa yabtele, xchi’uc jpasoj jsoquesvanej ti c’uxi xu’ soquese.

17 Me junuc abtejebal pasbil xu’ xcuch yu’un ta a contra vo’ot, xchi’uc scotol oq’uiletic ta xalic ta a contra vo’ot ti c’alal me la vich’ q’uelbel a talele, jech vo’ot cha vac’ batel ta ch’ayel. Yu’un ti, li’e ja’ ti spuculalic boch’otic ja’ic yaj abtel Cajvaltic, yu’un ti slequil abtele ta xtal ta jtojolal, xi ti Cajvaltique.