1 Ja’ jech c’ot ta pasel ti c’alal laj yo’nton ta lo’il Jesús ta va’ay x-elan lo’iletique, jech laj sq’uel no’oxtoc ti xocontac bu tsobolique jech la jyalbeic: Ja’ jech, ti jc’ac’alile jutuc xa sc’an.

2 Ta xquil ti tu jc’unoxuque, ti jech mu xa va’ybeic smelolal ti lo’iletic c’u x-elan lo’ilajemun ti jtotic la spasun ta mantal ti jech ac’o xi lo’ilaj li’ ta orae.

3 Ja’ jech, batanic ta anaic, xchi’uc nopic lec ta ajolic ti lo’iletic c’u x-elan la jcale, xchi’uc c’anbeic jtotic ta jbi ti ac’o xa va’ybeic lec smelolale; xchi’uc meltsanic lec a jolic ti c’uxi xu’ xa va’ybeic lec smelolal oc’ome, jech chital yanvelta ta atojolalic.

4 Yu’un ti li’ ta orae, taxi bat ta stojolal jtotic, xchi’uc ta xbat cac’ jba ta ilel ta stojolalic ti bu ch’ayemic jtsop Israele, yu’un muyuc ch’ayemic ti ta stojolal jtotique, yu’un ja’ sna’oj stuc ti bu yic’oj batele.

5 Ja’o jech, ti c’alal la jyal jech ti Jesuse, la sq’uel yanvelta ti xocontac bu tsobolique, jech la jyil ti ta x-oq’uique, xchi’uc ti ja’ q’uelbil tajmeque, ti xco’laj xchi’uc yu’un tsc’anic ti jech ac’o comucto muc’tajaluc xchi’uquique.

6 Xchi’uc ja’ jech la jyal: Ti xc’uxul co’nton ta atojolalique ja’ ta xpixoxuc ta slequilal.

7 ¿Me oy boch’o ip cha’ay avu’nic? iq’uic talel li’i, ¿me oy boch’o coxo, me ma’ sat, me motin, me luben, me tuch’emic, me chc’a’ic, me xmoch’oj sba c’usiuc no’ox yu’nic, me coc, me ta xat yo’ntonic ta c’usiuc no’oxe? iq’uictal li’e, vu’un ta jcoltaic, yu’un oy xc’uxul co’nton ta stojolalic; yu’un ti xc’uxul co’ntone pixil ta lequilal.

8 Ta xquil ti cha c’anic cha q’uelic ti c’usi la jpas ta stojolalic a vermanotaquic te ta Jerusalene, yu’un chquil ti xch’unolajel a vo’ntonique xu’ xa no’ox o ti c’u x-elan xu’ ta jcoltaoxuque.

9 Ja’ o jech ti c’alal la jyal jech va’aye; scotolic ti boch’otic te tsobolique ta jmoj chapal c’op nopajic batel, xchi’uquic ti yaj chamelique, xchi’uc ti boch’o ta xat yo’nton yu’nique, xchi’uc ti xcoxoique, xchi’uc ti sma’satique, xchi’uc ti s-uma’ique, xchi’uc scotolic ti boch’otic ta xat yo’ntonic ta scotol ta chop at o’ntonale, jech la scoltaanan scotol, jech chac c’u cha’al ip cha’yic ti boch’otic yic’ojanic batele.

10 Scotolic ti va’yique, xchi’uc ti boch’otic la jyich’ic coltaele, xchi’uc ti boch’otic muyuc ipique, la squejan sbaic ta yacantac, xchi’uc la jyich’ic ta muc’, ja’ o jech ti c’alal nopajic batel ti boch’otic te tsobolique, la sts’uts’beic ti yacantaque, ja’ to ti c’uxi la jyatintasbeic yacantac ta ya’lel satique.

11 Ja’ o jech xtoc la spas mantal ti ac’o yiq’uictal sbic’tal xnich’nabique.

12 Jech ti c’alal la jyiq’uictal ta sbic’tal nich’nabique, la jyaq’uic ta banamil te ta xocontac, ti Jesuse va’al ta o’lol icom, jech ti boch’otic te tsobolique la jyaq’uic jeloicuc scotol, ja’to ti c’uxi jeloic scotolique.

13 Ja’o jech ti c’alal te xa oy scotolique, ti Jesuse te va’al ta o’lol, xchi’uc la spas mantal ti ac’o quejiicuc ta banamil scotolic ti boch’otic te tsobolique.

14 Ja’ o jech ti c’alal quejelic xa ta banamile, lo’ilaj yo’nton Jesús ta yut yo’nton, jech la jyal: Tati abul jba chca’ay ti ta sventa sbolilic li’ jteclum snailal Israele.

15 Ja’ o jech ti c’alal la jyal jech va’ay lo’iletique, la squejan sba ec xtoc ti ta banamile, ja’o jech la sc’opan jtotic, ti c’u x-elan la sc’opan ti jtotique mu stac’ ts’ibael, jech ti boch’otic te tsobolic la jya’yique, la jyalic ta jamal.

16 Ja’ jech x-elan sba ti ta xalic ta jamale; muyuc baq’uin xil satil xchi’uc me ja’uc chiquinil ya’yoj jech, jech chac c’u cha’al li’ ta orae, ti yu’un muc’tic xchi’uc ti alaq’uic sba ti c’usitic la jquiltic xchi’uc ti c’usitic la jca’ytic ti Jesús la sc’opan jtotique.

17 Xchi’uc muyuc oq’uil xu’ ta xal, xchi’uc me ja’uc oyuc jun vinic ti boch’o xu’ ta sts’ibae, me ja’uc yo’nton vinic ti jech xu’ xal ti jech muc’tic xchi’uc ti alaq’uic sba jech chac c’ucha’al c’usitic la jquiltic xchi’uc ti c’usitic la jca’ytic ti Jesús la jyale, xchi’uc muyuc boch’o xu’ yu’un jech tspas xcuxetel o’ntonal ta snojes jch’uleltic ti c’alal la jca’ytic ta sc’anbe jtotic ta jventatic vu’tique.

18 Ja’ o jech ti c’alal laj yo’nton ta sc’opanel jtotic ti Jesuse, jech te lic, jech muc’tic no’ox xcuxetel yo’ntonic ti boch’otic te tsobolique, ti jech la jyich’ic tsalele.

19 Ja’ o jech la jyich’ic c’opanel yu’un ti Jesuse, pasatic ta mantal ti ac’o liquicuque.

20 Jech te liquic ti ta banamile, ja’ jech la jyich’ic albel: Oy benticion a avu’nic ta sventa xch’unolajel a vo’ntonic, ta na un, ja’ jech ts’acal xa o ti xcuxetel co’ntone.

21 Ja’ jech ti c’alal la jyal va’ay lo’iletique, oc’, ti boch’otic te tsobolique la jyalic ta jamal ti c’usitic Va’aye xchi’uc la stsac tajujuntal ti svic’tal xnich’nabique, la jyac’be benticion, xchi’uc la sc’anbe slequilal jtotic ta stojolalic.

22 C’alal la spas ti va’aye, oc’ no’ox yanvelta xtoc.

23 Xchi’uc la sc’opan ti boch’otic te tsobolique, jech la jyalbeic: Q’uelic ti a vic’tal xnich’nabique.

24 Ja’ o jech, ti c’alal la stoy satic ti c’alal la sq’uelique, te la sq’uelic batel vinajel, xchi’uc la jyilic jam ti vinajele, xchi’uc la jyilic abatetic ti te oyic ta vinajel ti xco’laj xchi’uc ta o’lol c’oc’ oyic yileluque, yalictal la sjoyibtaic ti vic’tal ololetique, xchi’uc jech la jyich’ic joyibtael ta c’oc’; jech ta abatetic la jyich’ic q’uelel.

25 Jech ti boch’otic te tsobolique, la jyilic xchi’uc la jya’yic xchi’uc la jyalic ta jamal, xchi’uc sna’ojic ta bats’imelel ti yu’un jech ta bats’imelel ti c’usi la jyalic ta jamale, yu’un scotolic la jyilic xchi’uc la jya’yic, ta jujuntal la jya’yic jech, oyic van cha’mil xchi’uc vob ciento (2,500) ch’ulelaletic, ja’ jech capalic ta viniquetic, ta antsetic xchi’uc ta ololetic.