Svo’lajunebal Capitulo
La jyalbe sc’oplal Jesús ti jech c’ot xa ta pasel ta stojolal ti smantal Moisese—Ti nefitaetique ja’ic ti yantic chijetic bu la jyal Jesús te ta Jerusalene—Ta sventa bolililetic, ti steclumal Cajvaltic ta Jerusalen mu sna’ic ta sventa yantic chijetic bu tanijbilic batel ta Israele.
1 Ja’ o jech ti c’alal laj yo’nton Jesús ta yalel ti va’ay lo’iletique. La sq’uel xocontac ti te bu tsobolique, jech la jyalbeic: Ja’ jech tsc’an cha va’ay ti c’usitic li chanubtasvan c’alal sc’anto xibat ta stojolal jtote; ja’ jech ti boch’otic ta xvul ta sjolic ti c’u x-elan ca’yejtac vu’une, xchi’uc ti me la spasique ta xcol ta slajebal c’ac’al.
2 Ja’ o jech ti c’alal la jyal Jesús va’ay lo’iletique, la jyil ti oy boch’o xcuxet yo’ntonique, xchi’uc ti ta sjac’be sbaic c’usi van ta spas ti stuc ta sventa smantaltac Moisese; yu’un mu xa’ybeic smelolal ti lo’iletic ta sventa c’ustic vo’nej xa jelovene, yu’un ta scotol ti c’usitic oye pasemic xa ta ach’.
3 Ja’ jech la jyich’ic albel: Mu tu j-ech’emuc xa sa’ xcuxetel a vo’ntonic ta sventa ti jech la jcal pasemic xa ta ach’ ti c’usitic c’otemic ta pasel ta vo’neje.
4 Ja’ jech, ta xcal ti ta xc’ot ta pasel ti mantal bu la jyich’ ac’bel Moisese.
5 Ja’jech, ja’ vu’un ti boch’o la jyac’ mantale, xchi’uc vu’un ti boch’o la jyal oy c’usi ta xac’be steclumal Israele, ja’ yo jech, ti mantale ta xc’ot ta pasel ta jtojolal, yu’un ja’ tal jch’un ti mantale; ja’ yo jech, c’ot xa ta pasel.
6 Ja’ jech, ti vu’une, muyuc ta jch’ay ti lequil viniquetique, yu’un scotol ti c’usitic muyucto c’otem ta pasel ta jtojolale, ta bats’imelel ta xcal ti ta xc’ot ta pasel scotole.
7 Xchi’uc la jcalboxuc xa scotol ti c’usitic vo’nej xa jelovene, muyuc ta jch’ayes ti c’usi albil ta sventa jutuc xa sc’an xtale.
8 Yu’un ti c’usi la jcal ta sventa jteclume muyuc to bu c’otem ta pasel scotol; jech ti c’u x-elan mantal la jyich’ albel Moisese te ta xlaj o stu ta jtojolal.
9 Ja’ jech, ja’ vu’un mantalilun xchi’uc saquil osilun, q’uelicuntal li’ vu’une, xchi’uc q’uelabaic lec c’alalto ta slajebal c’ac’al, xchi’uc ta xa cuxi, yu’un ti boch’o ta sq’uel sba lec c’alal to ta slajebal c’ac’ale, ta xcac’be xcuxlejal ta sbatel osil.
10 Ja’ jech la jcac’ ti mantaletique, ch’unic me ti jmantaltaque, yu’un ja’ ti mantaletique xchi’uc ja’ lequil viniquetic ti li’i, yu’un ta bats’imelel la jyalic ta jamal ta jventa vu’un.
11 Ja’o jech ti c’alal laj yo’nton Jesús ta yalel ti va’ay lo’iletique, jech la jyalbe ti lajchabic boch’otic la st’uje:
12 Vo’xuc cajchanubtasvanejoxuc xchi’uc vo’xuc saquil osiloxuc ti li’ ta jteclum, ti ja’ic scomelal snailal Josee.
13 Xchi’uc xtoc ti li’ banamile ja’ apuculalic, xchi’uc ja’ la jyac’boxuc ti jtotique.
14 Xchi’uc muyuc baq’uin la pasun ta mantal jtotic ti jech xu’ xcal ta sventa a vermanoic te ta Jerusalene.
15 Xchi’uc muyuc baq’uin la spasun ta mantal jtotic ti jech ta xcalboxuc ta sventaic ti jvoc’ snailal Israele, yu’un ti jtotique la sloq’ues batel ta sbanamil.
16 Ja’ no’ox la spasun ta mantal stuc ti xu’ cha calboxuc jech cha c’u cha’al li’e.
17 Oy to yantic jchijtac ti ma’icuc li’ ta corale, ti va’yique, tsc’an ta xquic’tal xchi’uc ta xaybicun jc’op, yu’un jtsopic no’ox, xchi’uc jun no’ox jchabivanej.
18 Tana, ja’ ta sventa muyuc la jyac’ sbaic xchi’uc muyuc xch’unolajel yo’ntonic ti jech muyuc la jya’yic ti ca’yeje; ja’ jech, ti jtotique la spasun ta mantal ti muyucuc c’usi yan ep xcal jech chac c’u cha’al li’e.
19 Jech ta bats’imelel cha calboxuc ti ja’ Riox la spasun ta mantale, ja’ yo vu’un cha calboxuc, ti jech la jyich’ic ch’aquel batel ta sventa sbolilique, ja’ jech, ja’ ta sventa sbolilic ti jech mu sna’ic buoyique.
20 Xchi’uc ta bats’imelel cha calboxuc xtoc, ti jtotique la xa xch’ac yantic ti te ta va’yique; ja’ ta sventa sbolilic ti jech mu sna’ic buoyique.
21 Jech ta bats’imelel cha calboxuc ti ja’ vo’xuc ti voch’otic la jcal: Oyto yan jchij ti ma’icuc li’ ta corale; ti va’yique ta sc’an ta xquiq’uictal, xchi’uc ta xa’ybicun jc’op; xchi’uc ta stsob sbaic ta jmoj xchi’uc jun no’ox xcha’bielic xi chie.
22 Muyuc xa va’ybeic lec smelolal, yu’un la cuyic me ja’ic ti boch’otic ma’icuc snailal Israele, yu’un muyuc xa va’ybeic smelolal ti ja’ ta sventa c’u x-elan ta xcholic c’op boch’otic ma’icuc ta snailal Israel ti xu’ cha ch’unique.
23 Xchi’uc muyuc xa va’ybeic lec smelolal ti jech la jcal, ta xa’ybicun jc’op, xchi’uc muyuc xa va’ybicun smelolal ti voch’otic ma’icuc ta snailal Israel ti jech ta xa’yic baq’uin ti jc’ope, ti jech muyuc bu ta xcac’ jba ta ilel ta stojolalic, ti ja’ no’ox ta sventa Ch’ul Espíritue.
24 Ja’ jech, ti vo’xuque ava’yojbicun ti jc’ope, xchi’uc a avilojicun xa, xchi’uc vo’xuc ti jchijtacoxuque, ja’ xa te atabiloxuc o ti ta c’u x-elan jtotic la jyac’bune.