1 Ja’ jech tana, jech chac c’u cha’al ti jpoco’ lo’iltactique, xchi’uc jna’ojcutic ti yu’un ja’ ta bats’imelele, yu’un ti li’ poco’ lo’iletic ti bu cajal ta yac’ol jun tuq’uil vinique, yu’un ta bats’imelel la spas ep sq’uelubil tsatsalil ta sbi Jesús, yu’un muyuc boch’o junuc vinic xu’ xac’ ta ilel sq’uelubil tsatsalil ta sbi Jesús, ja’ no’ox ti me yu’un sac scotol sbec’tal ta sventa sboliltaque.

2 Jech c’ot ta pasel, ti me li’ vinic muyuc soc ye ta xch’aquel ti jc’ac’aliltique, ti sjabilal oxlajuneb xcha’vinic (33) jabile jeloven xa.

3 Ti jteclume tsots la jyac’ sbaic ta spasel ti sq’uelubil bu yac’oj o no’ox lequil vinic Samuel jlamanita vinique, jech ti baq’uin ta xvinaj ti oxib c’ac’al ic’al osil li’ ta sba banamile.

4 La snopic me muyuc chc’ot ta pasel xchi’uc sjapo yutel sbaic stuquic ti te ta jteclume, ac’o me jech ep xa svinajeb yich’ojic ac’bel yilic.

5 Xchi’uc ja’ jech c’ot ta pasel ti ta sjabilal chanlajuneb xcha’vinic (34) jabile, ta xchanibal c’ac’al sliqueb u, lic jun tsatsal ic’ xchi’uc vo’ xchi’uc chauc, ti jech muyuc baq’uin jech xilic ta scotol banamile.

6 Xchi’uc xtoc jun muc’ta xibal sba q’uinubal xchi’uc chauc ti jech ta sniques o scotol banamil ti yu’un ta xa xvoc’ ta o’lol ya’eluque.

7 Xchi’uc la jyac’ ep sacsevul ti jech tu j-ech’em saquile, xchi’uc ti jech muyuc baq’uin xilic o ti li’ ta scotol banamile.

8 Xchi’uc c’ac’ ti muc’ta jteclum Zarahemlae.

9 Xchi’uc lom yalel ta chac nab ti muc’ta jteclum Moronie, xchi’uc ti yajvaltaque jic’oic.

10 Xchi’uc la stsob sba banamil ta sba ti muc’ta jteclum Moroniahe, jech ti ta yavil muc’ta jteclume, te vinaj jun muc’ta abnaltic.

11 Xchi’uc c’ot ta pasel muc’ta xibal sba vuq’uesel ti te ta jot xocon vinajel ta smaleb c’ac’ale.

12 Xchi’uc xtoc ja’ muc’ no’ox c’ot ta pasel muc’ta vuq’uesel xibal sba ti ta jot xocon vinajel te ta xocon loq’uem c’ac’ale. Xchi’uc ja’ jech ti ta scotol sba banamile ja’ to te jel o ta sventa ti ta chauquil vo’etique, xchi’uc ti ta sutub iq’uetique, xchi’uc ti ta chauquetique, xchi’uc ti ta sac-sevuletique, xchi’uc ti to muc’ta tsatsal niquel ta scotol banamile.

13 Tuch’anan scotol ti beetique, xchi’uc socanan scotol ti beetique, xchi’uc ep stenlejal osil ti jech pas ta chopole.

14 Xchi’uc jech ep lomanan yalel lequil muc’tiquil jteclumetic, xchi’uc ep laj c’ac’anuc, xchi’uc oy ep la jyich’ic niquesel ja’ to ti c’uxi lomanan ta banamil ti smuc’tiquil naique, xchi’uc ti jnaclejetic yu’une chamanan, xchi’uc ti banamile muyuc yajval comanan.

15 Xchi’uc oyvan jayibuc muc’tiquil jteclumetic ti jech cuch yu’nique, ti vocolil la jyich’ique ech’em ep no’ox tajmec, xchi’uc ep jnaclejetic yu’un ti jech chamique.

16 Xchi’uc oy o no’ox jayibicuc ti la jyich’ic cuchel batel ta sutub ic’, ti jech muyuc boch’o sna’ buto c’otique, ja’ no’ox sna’ic ti yu’un la jyich’ic cuchel batele.

17 Ja’ jech jeltaj comel scotol sba banamil ta sventa ti chauquil vo’etique, xchi’uc ti ta chauquetique, xchi’uc ti ta sac-sevuletique, xchi’uc ti ta niqueletic ta banamile.

18 Ja’ jech, ti tonetique voc’anan ta chib, xchi’uc biq’uitic batanan ta sba scotol banamil, ja’ yo jech biq’uitic xchi’uc voq’uemic xchi’uc javenic ta sba scotol banamil.

19 Ja’ jech ti c’alal laj ti chauque, xchi’uc ti sac-sevule, xchi’uc ti xibalsba chauquil vo’e, xchi’uc ti niquel ta banamile jech oxib ora jalij, ti yantique la jyalic ti jal ijalije, ja’ to un, scotol ti c’usi muc’tic xchi’uc ti xibal sbaic c’ot ta pasel ta oxib ora no’oxe, ja’ jech och ac’ubal ta sba banamil.

20 Ja’ jech och ac’ubal ta scotol sba banamil, ti c’uxi xa’yic ic’al osil ti jnaclejetic boch’otic muyucto bajemique.

21 Xchi’uc mu xu’ oyuc saquil osil ta sventa ti ic’al osile, me ja’uc xu’ stsan cantela me ja’uc antorcha, xchi’uc me ja’uc stsan jich’il si’ lec taquin, ta sventa ti yu’un mu xu’ oyuc jlec’uc saquil osile.

22 Mu xvinaj jlec’uc saquil osil ma’uc c’oc’, xchi’uc me ja’uc xojob chtal ta nom, xchi’ic me ja’uc c’ac’al, xchi’uc me ja’uc u, xchi’uc me ja’uc c’analetic, ta sventa ti c’uxul ic’al osil oy ta sba banamile.

23 Ja’ jech c’ot ta pasel, oxib c’ac’al jalij ti jech muyuc xvinaj jlec’uc saquil osile; ja’ jech ep xi’ic, xchi’uc avanic xchi’uc ech’em oq’uic ta scotol jteclum, jech, ep avanic jteclum ta sventa ti ic’al osil xchi’uc ti muc’ta vuq’uesel tal ta stojolalique.

24 Ti ta jun yabilique stac’ a’yel ti ta x-oq’uique, jech ta xalic; Jech, jsutesticuc o no’ox ti co’ntontic ti c’alal sc’an to ox xtal ti li’ muc’ta vocolil ta orae, ti jechuque colic jechuc ti quermanotactique, xchi’uc muyuc xc’aq’uic jechuc ti te ta muc’ta jteclum Zarahemlae.

25 Ti ta yan xtoque la jyich’ a’yel ti jech x-avetic xchi’uc ch-oq’uique, jech ta xalic: ¡jech jsutesticuc o no’ox co’ntontic ti c’alal sc’an to ox xtal ti li’ muc’ta vocolil ta orae, xchi’uc ti manchuc o no’ox jmiltic xchi’uc la jcac’betic ton xchi’uc la jnutstic loq’uel ti lequil viniquetique; jech ti jme’tique xchi’uc ti alac’ sba jtsebtique xchi’uc ti jnich’nabtique la jyich’ic q’uelel lec ti jechuque, xchi’uc muyuc xmuquic te ta muc’ta jteclum Moroníah ti jechuque! ja’ jech muc’tic xchi’uc tsots ti avanic jteclume.