1 Ja’ jech tana, quermanotac ti vu’un lec jc’anojoxuque, ja’ jech, ta xcalboxuc ti me muyuc xa sutes avo’ntonique, ti anaique xocol ta xcom.

2 Jech, ti me muyuc xa sutes avo’ntonique, ti a vajnilique ech’emto ta sna’ic ti baq’uin ta xchu’untas yolique, yu’un ta spas yilic me xu’ xjatoic, xchi’uc muyuc xa bu xu’ xich’ic coltael, jech, abul sbaic ti boch’otic oy xch’utique, yu’un ta yalal no’ox mu stac’ xjatoic; ja’ jech, ta xich’ic majel xchi’uc ta xjipatic comel ti c’uxi xu’ chchamic oe.

3 Jech, ¿abul sbaic ti boch’otic ja’ic li’ ta steclumal Nefie, ti me muyuc sutes yo’ntonic ti c’alal me la jyilic ti va’ay scotol sq’uelubil xchi’uc ti sinajeb c’u x-elan ta xich’ic albele! ja’ jech ti li’e, ja’ic xa ox lequil jteclum t’ujbilic yu’un Cajvaltic, jech, ja’ sc’anoj ti steclumal Nefitaetique, xchi’uc yac’ojbe vocolil no’oxtoc, jech, yac’ojbe vocolil ti ta sc’ac’alil sbolilique, yu’un sc’anojanan.

4 Ja’ jech quermanotac vu’un, muyuc bu sc’anoj ti Lamanitaeque yu’un ech’em no’ox chopol ti yabtelique, ti va’aye ja’ ta sventa ti c’u x-elan c’usitic chopol ta spasic stotique, ja’ jech c’ot lequilal ta stojolalic ta sventa ti c’u x-elan la xcholic c’op nefitaetique, ja’yo jech la jyich’ic natubtasel sc’ac’alilic yu’un Cajvaltic.

5 Ta jc’an ti ac’o xa q’uelic ti ja’ epic ti ja’ te oyic te ta sbelal c’u x-elan cajal ta yac’olic spasele; xchi’uc chanoic ta lequilal ta sat Riox, xchi’uc ta xaq’uic persa spasel ti smantaltaque xchi’uc ti mantaletique xchi’uc ti c’u x-elan tsc’an jech chac c’u cha’al ta smantaltac Moisese.

6 Jech, cha calboxuc ti ja’ epic ti ja’ ta spasic ti c’usitic va’aye, ti jech muyuc chlubic ta yaq’uel persa ta c’unc’un yiq’uelictal ti scomelal xchi’ilic ta sventa c’usi na’bil ta bats’imelele, ja’ jech, ja’ epic ti ta xnopajic ta jujun c’ac’ale.

7 Xchi’uc ja’ jech, xa na’ a tuq’uic vo’xuc, ta sventa ti c’usi la vilic, ti jayibicuc stuquic ti jech chc’otic ta sventa c’usi na’bil ta bats’imelele, xchi’uc ti ta sna’ic ta sventa chopolile xchi’uc ti ta vocolil c’u x-elan nopen xa’yic stotique, jech la jyich’ic chanubtasel ta xch’unel ti ch’ul ts’ibiletique, jech, xchi’uc ti c’u x-elan ts’ibabil c’alal la xcholic c’op ch’ul lequil viniquetique, ti jech la jyiq’uic ta ch’unolajel o’ntonal xchi’uc ti ta sutesub o’ntonal ta sventa Cajvaltique, ti va’ay c’u x-elan ch’unolajel o’ntonal xchi’uc sutesub o’ntonale ja’ ta xjeltabat yo’ntonic.

8 Ja’ no’ox jech xtoc, ti jayibic boch’otic c’otemic xa ti ta c’u x-elan li’e; xa na’ a tuq’uic vo’xuc ti yu’un tuq’uic xchi’uc ti tsots xchi’uquic xch’unolajel yo’ntonique, xchi’uc ti ta c’u x-elan la vich’ic coltaele.

9 Xchi’uc xa na’ic xtoc ti la xa smuquic yabtejebic sventa pas c’ope, ti yu’un ta xi’ic ta spiquele, yu’un mu xa sc’an sa’ smulic, jech, chavilic ti yu’un ta xi’ic ta spasel mulile, xchi’uc ja’ jech xtoc, ta xac’ sbaic ta pech’el ta teq’uel xchi’uc ta milel yu’un yaj contraic, xchi’uc muyuc ta stoy sjolic ta scontrainel ti stuquique, ti va’aye ja’ ta sventa ti xch’unolajel yo’ntonic ta sventa Cristoe.

10 Xchi’uc ta sventa stuq’uilic, ti c’alal ta xc’ot ta ch’unel yu’nic ti c’usi ta xch’unique, ja’ ta sventa, ti stuq’uilique, ti c’alal me la yich’ic sacubtasele, ja’ jech, ti Cajvaltique ta xac’ sbenticion xchi’uc ta snatubtasbat sc’ac’alilic, ta sventa ti yu’un ma’uc la spasic bolililetique.

11 Jech ac’o me xyalic to ta c’usi chopol, ti Cajvaltique ta snatubtasbe sc’ac’alilic ja’ to ti me c’ot sc’ac’alil ti c’u x-elan c’opojemic jtotique, xchi’uc xtoc ti lequil vinic Zenose xchi’uc ti yantic epal lequil viniquetic ta sventa ti c’u x-elan ta xich’ic cha’ liquesel ta ach’ quermanotactic lamanitaetic, ta sventa ti c’usi na’bil ta bats’imelele.

12 Jech cha calboxuc ti ta slajeb xa c’ac’ale la jyich’ tanijel ta stojolalic quermanotactic lamanitaetic ti c’usi yaloj Cajvaltique, ac’o me jech epto vocolil ta xich’ic, ti jech mu ta jaluc ta xich’ic aq’uel batel bu xloc’ x-ech’ic ta sba banamile, xchi’uc ti jech ta xich’ic nutsel xchi’uc ta xich’ic tuch’esel xchi’uc ti ta xtaniatic ti jech muyuc bu xu’ ta spoj sbaique, ti Cajvaltique ta xac’ slequilal ta stojolalic.

13 Ti va’aye ja’ ta xc’ot ta pasel ti c’u x-elan albil sc’oplal ti ta xich’ic iq’ueltal ta sventa c’usi na’bil ta bats’imelele, ti ja’ c’usi sna’oj ti coltavanej xchi’uc ti muc’ta jchabi chij ta bats’imelele, xchi’uc ti ta xich’ic ich’el ta venta xchi’uc xchijtaque.

14 Ja’ jech chacalboxuc ti ja’ lec ta stojolalic jech chac c’u cha’al vo’xuc, ti me muyuc cha sutes a o’ntonique.

15 Jech ti li’e, yu’nuc ja’uc o no’ox yich’ic ac’bel yilic ti lequil abtelal jech chac c’u cha’al la vich’ic ac’bel avilic vo’xuque, jech, ti bu soc ta sventa c’u x-elan nopen xa’yic a totique, stac’ xa q’uelic vo’xuc ti muyuc bu ta sut tspasic c’usitic chopole.

16 Ja’ jech, xi ti Cajvaltique: Muyuc bu ta jvuq’uesic o ta j-ech’el, ja’ no’ox ta xcac’ me sta sc’ac’alile ac’o sutuc batel ta jtojolal yan velta, xi ti Cajvaltique.

17 Xchi’uc ja’ jech ta xal ti Cajvaltic ta sventa steclumal nefitaetique: Ti me muyuc xa sutes avo’ntonic xchi’uc ti me muyuc xa vaq’uic persa spasel ti c’usi ta jc’ane, ta jvuq’uesoxuc o ta j-ech’el ta sventa c’usi chopol la pasic, xi ti Cajvaltique. Ja’ jech epal muc’tiquil abtelal la spas ta stojolalic, xchi’uc cuxul ti Cajvaltique, xchi’uc ta xc’ot ta pasel ti c’usitic va’aye, xi ti Cajvaltique.