1 Ia oqo, oi kemuni na wekaqu lomani, raica, au sa tukuna vei kemuni ni kevaka ko ni sa sega ni veivutuni, ena lala mai na nomuni veivale.

2 Io, kevaka ko ni sa sega ni veivutuni, era na lolosi na nomuni yalewa ena siga ni nodra vakasucu gone; ni ko ni sa via dro ka sega na vanua ni ivakavakaruru; io, ena ca vei ira e ra sa bukete, ni ra sa bibi ka sega ni dro rawa; ia e ra na buturaki sobu ka biu tu me ra mate.

3 Io, ena ca vei ira na tamata oqo ka ra vakatokai me tamata i Nifai ka vakavo ga kevaka era veivutuni ena gauna era na raica kina na vei ivakatakilakila kece oqo kei na veika veivakurabuitaki ka na vakaraitaki vei ira; raica era sa tamata digitaki ni Turaga; io, e lomani ira na tamata i Nifai ko koya, ka sa vosataki ira talega; io, sa totogitaki ira ena veisiga ni nodra caka ca baleta ni lomani ira.

4 Ia raica e a cati ira na wekaqu ko ira na Leimanaiti baleta ni sa dau ca tu ga na nodra ivalavala, ia oqo e baleta na cala ni nodra ivakarau ko ira na nodra qase. Ia raica, sa yaco mai vei ira na veivakabulai ena nodra ivunau na Nifaiti; ia ena inaki oqo e a vakabalavutaka kina na Turaga na nodra gauna.

5 Ia au gadreva mo ni kila ni lewevuqa cake vei ira era sa vakayacora tiko na nodra itavi, era sa lako vakadodonu tiko ena mata ni Kalou ka ra sa raica me ra muria na nona ivunau, kei na nona ilesilesi kei na nona lewa me vaka na lawa i Mosese.

6 Io, au sa kaya vei kemuni, ni ra lewevuqa cake vei ira era sa kitaka tiko na ka oqo, era sa sasagataka sara tiko vagumatua ena yalodina me ra vakatavulici ira na wekadra me ra kila na dina; a sa levu cake tiko ga na kedra iwiliwili ena veisiga.

7 Ka raica, ko ni sa kila vakai kemuni ga ni ko ni a sa vakadinadinataka, ni o ira kecega era sa mai kila na dina, ka ra kila na ca kei na vakasisila ni nodra ivakarau na nodra qase, ka ra sa tuberi me ra vakabauta na ivolanikalou tabu, io, na nodra parofisai na parofita tabu, ka ra sa volai tu, ka tuberi ira me ra vakabauta na Turaga, ka veivutuni, io na vakabauta kei na veivutuni ka kauta mai ki vei ira na veisau ni yalo—

8 O koya gona, o ira kece era sa yacova mai oqo ko ni sa kila vakai kemuni, ni ra sa kaukauwa ka tudei tu ena vakabauta kei na veivakabulai era sa sereki kina.

9 Ka ko ni sa kila talega ni ra sa buluta na nodra iyaragi ni valu, ka ra sa rere ni tauri yaragi tale de ra ivalavala ca kina; io, ko ni sa kila ni ra sa rere ni kitaka na ivalavala ca—raica era sa bolea me ra buturaki ira sobu ka vakamatei ira ko ira na nodra meca, ka ra na sega ni laveta vei ira na nodra iseleiwau, ena vuku ni nodra sa vakabauta na Karisito.

10 Ia oqo, ena vuku ni nodra tudei ena nodra vakabauta na ka ko ya, ka ra vakabauta ena vuku ni nodra dei ena gauna era sa vakararamataki kina, raica, ena vakalougatataki ira na Turaga ka vakabalavutaka na nodra veisiga, e dina ga ni tu na nodra caka cala—

11 Io, kevaka sara mada ga era sa na malumalumu sobu mai ena vuku ni tawavakabauta, ena vakabalavutaka ga na Turaga na nodra veisiga me yacova na gauna ka ra a vosa kina na noda qase, kei na parofita tale ga ko Sinosi, kei ira talega na parofita e vuqa, me baleta na nodra vakalesui tale ko ira na wekada na Leimanaiti ki na kilai ni dina—

12 Io, au sa kaya vei kemuni, ena vakayacori ena gauna mai muri na vosa ni yalayala ni Turaga vei ira na wekada na Leimanaiti; e dina ga era sa sota kaya na veika rarawa e vuqa ka ra na vakasevi vaka ka vaka ena delai vuravura, ka vakasasataki ka yaviti ka veiseyaki yani ka sega na vanua me ra vakaruru kina; ia ena yalololoma ga vei ira na Turaga.

13 Ka sa yaco oqo me vaka na parofisai, ni ra na kila na dina, sai koya na kilaka me baleta na nodra Dauveivueti ka nodra ivakatawa uasivi ka dina, ka ra okati me nona sipi.

14 O koya gona au sa kaya kina vei kemuni, ni na vinaka cake vei ira ka ca vei kemuni ka vakavo ga kevaka ko ni sa veivutuni.

15 Ia raica, kevaka me a vakaraitaki vei ira na veika lelevu ka a vakaraitaki vei kemuni, io vei ira ka ra a sa malumalumu sobu ena tawavakabauta ena vuku ni nodra ivakarau na nodra qase, ko ni sa rawa ni raica rawa ni ra na sega tale ni malumalumu sobu ena tawavakabauta.

16 O koya sa kaya kina na Turaga: Au na sega ni vakarusai ira sara, ia au na vakalesui ira tale mai vei au ena siga ka’u nanuma ni vinaka, sa kaya na Turaga.

17 Ka raica oqo, sa kaya na Turaga me baleti ira na Nifaiti: Kevaka era na sega ni veivutuni ka yalataka me ra vakayacora na lomaqu, au na vakarusai ira sara vakadua sa kaya na Turaga, ena vuku ni nodra tawavakabauta e dina ga ni’u a cakava e vuqa na veicakacaka lelevu ena kedra maliwa; me vaka ni sa bula dina tiko na Turaga era na yaco vakaidina na veika oqo, sa kaya na Turaga.