1 Ao ngkai, tariu aika kam tangiraki, nooria, I taetae nakoimi bwa ngkana kam aki rairinanomi ao batami a na tiku ni kamaroa.

2 Eng, ngkana kam aki rairinanomi, ao ami aine a na bon korakora bukin aia tang ni wenei n te bong are a kammamma iai; bwa kam na kataia ni birinako ao e na bon akea te tabo ni karabaraba; eng, ao bon te maraia nakoia ake a bikoukou, bwa ana bon rawawata ma n aki kona ni birinako; ngaia are, a na bon toubekaki inano ao a na katukaki bwa a na mate.

3 Eng, te maraia nakoia te botanaomata aio ake a bon aranaki bwa ana botanaomata Nibwaai bwa ngkana aki rairananoia, ngkana a na noori kanikina ma kamimi aikai ni kabane ake a tia ni kaotaki nakoia; bwa nooria, a bon riki bwa a na aomata te Uea ngaia aika a rineaki; eng, e a bon tia n tangiriia ana botanaomata Nibwaai, ao e a tia naba ni katuaia; eng, i nanon aia bong ni bure ao e a tia ni kaeta kawaia ibukina bwa e tangiriia.

4 Ma nooria tariu, e a tia n ribaia Reimwanaite ibukina bwa a bubuaka aia mwakuri n aki toki, ao aio bon ibukina bwa e buakaka aia katei aia bakatibu. Ma nooria, e roko te kamaiu nakoia rinanon aia kabwarabwara Nibwaite; ao ibukin aio ao e a tia te Uea ni kananaua aia bong ni maiu.

5 Ao I tangiria bwa kam na nooria bwa angiia riki a bon nakonako i nanon kawain tabeia, ao a bon nakonako n te aro ni karaurau imatan te Atua, ao a bon kawakina ana tua ma ana kaetieti ao ana moti n aron ana tua Mote.

6 Eng, I taku nakoimi, bwa angiia riki a bon karaoa aei, ao a bon kataia ma te botumwaaka ae aki bwarannano bwa a na uotiia tariia nakon ataakin te koaua; ngaia are a rikirake ikotakia riki ma mwaitia ni katoa bong.

7 Ao nooria, kam bon ataia ngkami, bwa kam a tia ni kakoaua, bwa mwaitia ake a uotaki nakon ataakin te koaua, ma n ataa buakakaia ma kammairan aia katei aia bakatibu, ma ni kairaki bwa a na kakoauai koroboki aika tabu, eng, aia taeka ni burabeti burabeti aika a tabu ake a koreaki, are e kairia nakon onimakinan te Uea, ao te rairannano, are te onimaki ma te rairannano are e karika bitakin te nano irouia—

8 Ngaia are, ngkai a mwaiti aika a roko n aei, kam ataia ngkami bwa kam nene ma ni matoatoa i nanon te onimaki, ao n aio are ngaia are kam a kainaomataki iai.

9 Ao kam ataia bwa a tia n taunii aia bwai ni buaka, ao a bon maaku ni manga tabeki rake bwa mwiina ao a na bure; eng, ao kam kona n noria bwa a bon maaku ni bure—bwa nooria a na bon kariaia bwa a na toubekaki inano man tiringaki irouia aia kairiribai, ao a bon rawa n tabeki aia bwai ni buaka ni kaaitaraia, ao aio ibukin aia onimaki iroun Kristo.

10 Ao ngkai, ibukin matoatoaia ngkana a bon kakoaua te bwai are a bon kakoaua, bwa ibukin neneia ngke a bon kaotaki teuana te tai, nooria, e na kakabwaiaia te Uea ma ni kananaua aia bong ni maiu, e ngae ngke a buakaka.

11 Eng, ngkana arona bwa a na kerikaaki n aia aki onimaki, te Uea e na bon kananaua naba aia bong ni maiu, ni karokoa ae roko te tai are e a kaman taekinaki irouia ara bakatibu, ao iroun naba te burabeti are Tinoti, ao burabeti aika a mwaiti riki, ni kaineti ma kaokakia tarira, aika Reimwanaite, riki nakon ataakin te koaua—

12 Eng, I taku nakoimi, bwa ni boong aika kaitira ao a na berita te Uea e a manga aroraki naba nakoia tarira, aika Reimwanaite; e ngae ngke a mwaiti taian karawawata aika a bon reke irouia, ao e ngae ngke a na bon kakioaki ma ikai nako ikanne iaon te aba, ao a na ukoukoraki, man oreaki ma ni kamaenakoaki n taabo aika a raroa, ma n akea nneia ni karabaia, ao te Uea e na bon nanoangaia.

13 Ao aio e bon kaineti ma te taeka ni burabeti, ao a na manga kairaki nakon te atatai ae koaua are bon ataakin aia Tia Kabomwi, ao aia tia kaawakin tiibu ae korakora ma ni koaua, ao a na warekaki i buakoia ana tiibu.

14 Ngaia are I kangai nakoimi, bwa e na raoiroi riki ibukiia nakoimi ngkana kam aki rairinanomi.

15 Bwa nooria, ngke arona bwa a kaotaki nakoia taian mwakuri ake a korakora ake a bon tia ni kaotaki nakoimi, eng, nakoia are a bon tia ngkoa ni bua i nanon te aki kakoaua ibukin aia katei aia bakatibu, kam na bon kona n nooria ngkami bwa a na bon aki manga oki ni kerikaki n aia aki onimaki.

16 Ngaia are, e taku te Uea: N na bon aki kamaunai raoi ngkami, ma N na karekea te anga are i nanon te bong ae I taku bwa e riai iai ao a na manga okirai, e taku te Uea.

17 Ao ngkai nooria, e taku te Uea, ni kaineti ma te botanaomata ae Nibwaite: Ngkana aki rairananoia, ma n ira nanou, N na bon kamaunaia raoi, e taku te Uea, ibukin aia aki kakoaua e ngae ngke a mwaiti mwakuri aika a korakora ake I a tia ni karaoi; ao ngkai e maiu te Uea n te kakoaua ao bwaai aikai a na bon riki, e taku te Uea.