1 Asin ngonian, namomootan kong manga katugangan, magdarangog, sakuyang sinasabi sa saindo na sagkod na kamo dai magsorolsol an saindong manga harong magiging mamundo.

2 Iyo, sagkod na kamo dai magsosorolsol an saindong manga kababaihan magkakaigwa nin dakulang kadahilanan nin pagmundo sa aldaw kan saindang pagpapasoso; huli ta kamo magbabalo na magdurulag asin ta dai nin masisirongan; iyo, asin herak man sainda na manga bados, huli ta sinda magagabatan asin dai makakadulag; kaya sinda magkatuturongtungan asin mababayaan na mapara.

3 Iyo, herak man sa manga tawong ini na inarapod na manga tawo ni Nephi na sagkod na sinda dai magsorolsol, kun mahiling ninda an gabos na manga tanda asin manga ngangalasan na ini na ipapahiling sa sainda; huli ta totoo, na sinda manga pinili na tawo kan Kagurangnan; iyo, an manga tawo ni Nephi na saiyang namootan, asin man saiyang pinadurusahan; iyo, sa aldaw nin saindang manga kasumbikalan sinda pinadusahan huli ta sinda namomootan niya.

4 Alagad magdarangog sakuyang manga katugangan, an manga Lamanite saiyang ikinaanggot huli ta an saindang manga gibo danay na mararaot, asin ini huli sa kasumbikalan kan manga kapanondan kan saindang manga kamagurangan. Alagad totoo, na an kaligtasan uminabot sa sainda sa paagi kan paghulit kan manga Nephite; asin sa katuyohan na ini an Kagurangnan pinahalawig an saindang manga aldaw.

5 Asin sakuyang minamawot na saindong mahiling na an kadakolan sainda nasa dalan kan saindang katungdan, asin maingat sindang naglalakaw sa atubangan kan Dios, asin maingat nindang sinusunod an saiyang manga tugon asin an saiyang manga ipinapakuyog asin an saiyang manga kahatolan sunod sa manga katugonan ni Moises.

6 Iyo, sakuyang sinasabi sa saindo, na an kadakolan sainda ginigiribo ini, asin sinda naghiringuha nin daing kapagalan na madara ninda an manga natatada kan saindang manga katugangan sa pagkaaram kan katotoohan; kaya igwang dakol na nakakadagdag sa saindang bilang aroaldaw.

7 Asin totoo, na saindong naaraman sa sadiri nindo, huli ta saindong nasaksihan ini, na kun gurano kadakol sa sainda an nadara sa kaaraman nin katotoohan, asin sa pakaaram kan mararaot asin marurumpot na manga kaugalian kan saindang manga kamagurangan, asin nadara sa pagtubod kan banal na manga kasuratan, iyo, an manga propesia kan banal na manga propeta, na nakasurat na, na nagdara sa sainda sa pagtubod sa Kagurangnan, asin sa pagsolsol, na kun arin na pagtubod asin pagsolsol nagdulot sa sainda nin pagbabago nin puso—

8 Kaya, kun gurano kadakol an uminarabot digdi, saindong naaraman sa sadiri nindo na makukusog asin masasarig sa pagtubod, asin sa bagay na nakapagpatalingkas sa sainda.

9 Asin saindo man na aram na ilinubong ninda an saindang manga armas na pang-gera, asin natakot sinda na kapotan an manga ini na tibaad sa kun anong paagi sinda magkarasala; iyo, nahihiling nindo na sinda natatakot na magkasala—huli totoo na papabayaan ninda an saindang sadiri na turungtongan asin garadanon kan saindang manga kaiwal, asin ta dai ibibirikyaw an saindang manga espada laban sainda, asin ini huli sa saindang pagtubod ki Cristo.

10 Asin ngonian, huli sa saindang kusog kun sinda nagtuturubod sa bagay na saindang tinuturubodan, ta huli sa saindang pagsarig kun sinda naliwanagan, totoo, an Kagurangnan bebendisionan sinda asin papahalawigon an saindang manga aldaw, sa ibong kan saindang kasumbikalan—

11 Iyo, maski na sinda diit-diit na magrarayo sa pagtubod an Kagurangnan papahalawigon an saindang manga aldaw, sagkod na umabot an panahon na pinagsasabi kan satuyang manga kamagurangan, asin man kan propeta na si Zenos, asin dakol pang iba na manga propeta, manunungod kan pagsulit kan satuyang manga katugangan, an manga Lamanite, sa giraray sa kaaraman kan katotoohan—

12 Iyo, sinasabi ko sa saindo, na sa huring manga panahon an pangako kan Kagurangnan ipapaabot sa satuyang manga katugangan, na manga Lamanite; asin sa ibong kan dakol na manga kasakitan na maabot sa sainda, asin sa ibong na sinda isusurubol padigdi asin paduman sa ibabaw kan kinaban, asin sinda paghaharanapon, asin gagaradanon asin iwawaragas sa harayo, na dai nin matatagoan, an Kagurangnan magiging maheherakon sa sainda.

13 Asin ini susog sa manga propesia, na sinda dadararahon giraray sa totoong kaaraman, na iyo an kaaraman kan saindang Paratubos, asin an saindang dakula asin totoong pastor, asin mabilang sa saiyang manga karnero.

14 Kaya sakuyang sinasabi sa saindo, na magiging orog na marahay pa sa sainda ki sa saindo sagkod na kamo magsorolsol.

15 Huli nanggad, ta kun an manga makapangyarihan na manga gibo ipinahiling sa sainda na ipinahiling sa saindo, iyo, sa sainda na diit-diit na nagrayo sa pagtubod huli sa kaugalian kan saindang manga kamagurangan, saindong mahihiling sa saindong sadiri na dai na nanggad giraray sinda pagruluya pa sa pagtubod.

16 Kaya, sabi kan Kagurangnan: Dai ko sinda rurumpagon, alagad gigibohon ko na sa aldaw kan sakuyang kadunungan sinda magbaralik giraray sa sakuya, sabi kan Kagurangnan.

17 Asin ngonian magdarangog, sabi kan Kagurangnan, manunungod sa manga tawo kan manga Nephite: Kun sinda dai magsorolsol, asin magsurunod kan sakuyang boot, rurumpagon ko nanggad sinda, sabi kan Kagurangnan, huli sa saindang dai pagtubod sa ibong kan makapangyarihan na manga gibo na sakuyang ginibo sa sainda; asin siring sa katunayan na nabubuhay an Kagurangnan siring man na an manga bagay na ini mangyayari, sabi kan Kagurangnan.