Ana Boki Ereman

1 Ao ngkai nooria, e a koro bukina bwa ni moan waakinan aia kaabwi n ririki n tautaeka taan moti i aoia ana botanaomata Nibwaai, ao e reke te kaangaanga ae korakora i buakoia ana botanaomata Nibwaite.

2 Bwa nooria, e a mate Bwaoraan, ma n iranako kawain te aonaba ni kabane; ngaia are e a korakora te itabaraara bwa antai mai i buakoia natin Bwaoraan ae e na reke irouna te kaintekateka ni motikitaeka.

3 Ao ngkai aikai araia ake a uneakina te kaintekateka ni motikitaeka, are a karika itabaraaraia te botanaomata: Bwaoraan, Baantii, ao Bwakuman.

4 Ngkai bon tiaki ti aikai natin Bwaoraan (bwa a bon mwaiti natina), ma aikai ake a bon uneakina te kaintekateka ni motikitaeka: ngaia are, a karekea teniua te bwenaua i buakoia te botanaomata.

5 Ma e ngae n anne, e a koro bukina bwa e rineaki Bwaoraan n nanoia aomata bwa mataniwia taan moti ao te kowana i aoia ana botanaomata Nibwaai.

6 Ao e a koro bukina bwa ngke e nooria Bwakuman bwa e aki kona n reke irouna te kaintekateka ni motikitaeka, e a katiteuana naba ma nanoia te botanaomata.

7 Ma nooria, Baantii, ao mwakoroia te botanaomata ake a tangiria bwa e na riki bwa aia kowana, a bon korakora uniia; ngaia are e a tauraoi ni mwaamwanaia te botanaomata bwa a na teirake ni kaaitaraia tariia.

8 Ao e a koro bukina bwa ngke e nang karaoa aio, e a bon anaaki, ma ni kabowiaki n aron nanoia te botanaomata, ma ni baireaki matena; bwa e a tia n teirake ni kaitara ma n ukoukora kamaunakin inaomataia te botanaomata.

9 Ngkai, ngke aomata ake a tangiria bwa e na riki bwa aia kowana a nooria bwa e a baireaki matena, ngaia are a bon un, ao nooria, a kanakoa temanna ae Kitekuman, nakon ana kaintekateka ni motikitaeka Bwaoraan, bwa e na tiringa Bwaoraan ngke e tekateka iaon ana kaintekateka ni motikitaeka.

10 Ao e kakioaki irouia ana toro Bwaoraan; ma nooria, e bon rangi ni birimwaaka Kitekuman ngke e birinako n te aro are bon akea ae e kona ni karekea.

11 Ao e nako nakoia ake a kanakoa, ao a bane ni karaoa te berita ae tabu, eng, n tuea iroun aia Tia Karikia ae akea tokina, bwa akea ae a na tuangnga bwa Kitekuman e tiringa Bwaoraan.

12 Ngaia are, Kitekuman e bon aki ataaki i buakoia ana botanaomata Nibwaai, bwa are e bwainna ni karaba n te tai are e tiringa iai Bwaoraan. Ao Kitekuman ma ana koraki, ake a tia ni karaoa te berita ae tabu mangaia, a bon reitaki ma aomata, n te aro are a bon aki kona n ataaki; ma a mwaiti ake a kuneaki ao a bon baireaki mateia.

13 Ao ngkai nooria, e a rineaki Bwakuman, n aron nanoia aomata, bwa mataniwia taan moti ao te kowana i aoia aomata, bwa e na tautaeka n onea mwiin tarina are Bwaoraan; ao aio are e bon riai n reke irouna. Ao a bane ni karaoaki aikai i nanon aia kaabwi n ririki n tautaeka taan moti; ao e a toki.

14 Ao e a koro bukina bwa n aia kaabwi ma teuana n ririki n tautaeka taan moti, ao Reimwanaite a bon ikota te taanga ni buaka ae moan te mwaiti kaaina, ma n anganiia taian kabaang, ma kabaang aika a uarereke ma taian kai ni katebe, ma kanoan te katebe, ma otangan atuuia, ma otangan bwabwaia, ma aekan nako taian otanga.

15 Ao a roko rikaaki riki bwa ana katei umwaianrianna ni kaaitaraia Nibwaite. Ao a bon kairaki iroun te mwaane are arana Koriantamwa; ao rikina e bon riki mai Taraemera; ao e bon birinako ma i buakoia Nibwaite; ao bon te aomata ae bubura ma ni korakora.

16 Ngaia are, aia uea Reimwanaite, ae arana bon Tubwarota, are bon natin Amoron, e taku i nanona bwa Koriantamwa bon te mwaane ae korakora, ao e kona ni kaaitaraia Nibwaite ma korakorana ao wanawanana ae bati, n te aro are ngkana e kanakoa nakoia ao e na kona n tokanikai i aoia Nibwaite.

17 Ngaia are e bon kakiriweia bwa a na un, ao e ikotiia ana taanga ni buaka, ao e rinea Koriantamwa bwa e na riki bwa aia tia kairiri, ma n tua bwa a na mwananga rikaaki nakon te aba are Taraemera bwa a na buaka ni kaaitaraia Nibwaite.

18 Ao e a koro bukina bwa ibukin te itabarara ae moan te bati ao te kaangaanga ae bati n te tautaeka, ao e a bon aki tau mwaitia taan tararua n te aba are Taraemera; bwa a taku inanoia bwa aki kona n roko Reimwanaite n nako nukan abaia n ekaanako te kaawa are Taraemera.

19 Ma e a koro bukina bwa Koriantamwa e bon mwananga i moan ana taanga ni buaka ae moan te mwaiti kaaina, ma n roko nakoia kaain te kaawa, ao a bon rangi ni waekoa n te aro are ai bon akea aia tai Nibwaite n ikotiia kaain aia taanga ni buaka.

20 Ngaia are Koriantamwa e bon kakerikaka mwaitia taan tararua te tabo n rin nakon te kaawa, ao e mwananga ma ana taanga ni buaka ae bwanin nakon te kaawa, ma n tiringia ni kabane ake a taua te kaawa ae bwanin.

21 Ao e a koro bukina bwa Bwakuman, are mataniwia taan moti, e bon birinako mai iroun Koriantamwa, nakon oon te kaawa. Ao e a koro bukina bwa Koriantamwa e batiboia ma te oo, n te aro are e a mate iai. Ao ikai are e a toki iai ana bong ni maiu Bwakuman.

22 Ao ngkai ngke Koriantamwa e nooria bwa e taua te kaawa are Taraemera, ao e nooria Nibwaite bwa a birinako mai irouia, ao a tiringaki ma n anaaki, ao ma n teweaki nako nanon te nne ni kaikain, ao bwa e a tia n reke irouna tauakin te tabo ni katantan are te kabanea ni matoatoa ni kabuta te aba, e a rikirake ninikoriana n te aro are e a karaoa ana mwananga ni kaitaraa te aba ni kabuta.

23 Ao ngkai e aki ti tiku n te aba are Taraemera, ma e mwananga ma ana taanga ni buaka ae korakora, nakon te kaawa are te Mari; bwa e matoatoa nanona ni mwananga bwa e na buaka, bwa e aonga ni karekea mwakoron te aba are i meang.

24 Ao, e taku bwa matoatoan korakoraia e mena i nukan te aba, ngaia are e mwananga, ao e a aki reke aia tai n ikotiia ma a ti reke tabeman; ao n te aro aei are a bwakaria ma ni kabwakaia nako aontano.

25 Ma nooria, mwanangan Koriantamwa aio i nukan te aba e karekea ana raka ae korakora Moronaaia i aoia, e ngae ngke a rangi ni mwaiti Nibwaite ake a tia n tiringaki.

26 Bwa nooria, Moronaaia e taku bwa Reimwanaite a na rawa n roko nako nukan te aba, ma a na ti ekinakoi kaawa ake a bubura ake a mena i rarikin te tia n aron are mai i mwaaina; ngaia are Moronaaia e tua bwa aia taanga ni buaka ake a korakora riki a na kaawakin mwakoro ake a mena i rarikin te tia.

27 Ma nooria, aki maaku Reimwanaite n aron are e tangiria Moronaaia, ma a bon roko nako nukan te aba, ma n taua te kaawa are te kaawa n tua are bon te kaawa are Taraemera, ao a mwananga rinanon mwakoron te aba ake a kakawaki riki, ma n korakora aia tiritiri, nakoia mwaane, aine, ao ataei, ma n tauii kaawa aika a mwaiti ma taabo ni katantan aika a mwaiti.

28 Ma Moronaaia ngke e a kunea aio, e kanakoa Riaai n te tai naba arei ma te taanga ni buaka ni mwamwanangaia nakon taabo aika a mwaiti bwa a na kaunramwaia i mwaain ae a roko n te Aba ni Mari.

29 Ao e karaoa aio; ao e kaunramwaia i mwaain are e roko n te Aba ni Mari, ma ni buaka ma ngaiia, n te aro are a kerikaaki nakon te aba are Taraemera.

30 Ao e a koro bukina bwa e kaunramwaia Moronaaia i nanon aia tai ni kerikaaki, ao e buakaniia, n te aro are e riki bwa te buaka ae korakora iai kawawaean te raraa; eng, a mwaiti aika a mate, ao i buakoia ake a tiringaki e a bon kuneaki Koriantamwa.

31 Ao ngkai, nooria, aki kona ni kerikaaki Reimwanaite nakon iteraia nako, aki kona n nako meang, ke nako maiaki, ke nako maeao ke nako mainiku, bwa a bon otabwaniniaki n iteraia nako irouia Nibwaite.

32 Ao ngaia are Koriantamwa e a tia n uotiia Reimwanaite nako nukaia Nibwaite, n te aro are a mena i aan korakoraia Nibwaite, ao ngaia e a bon tiringaki, ao Reimwanaite a bon anga ngaia nako nanon baia Nibwaite.

33 Ao e a koro bukina bwa Moronaaia e a manga taua riki te kaawa are Taraemera, ma ni karekea te anga are Reimwanaite ake a tia n anaaki bwa bure a na kitana te aba i nanon te rau.

34 Ao ikai are e a toki iai aia kaabwi ma teuana n ririki n tautaeka taan moti.