1 Ao e a koro bukina bwa ngke e a tia n toki aia kaonobwi ma uoua n ririki n tautaeka taan moti, a bane n tia n riki bwaai aikai ao mwaitia Reimwanaite a riki, bwa aomata aika a raoiroi, n te aro are raoiroia e rianako riki nakon raoiroia Nibwaite, ibukin aia kanene ma matoatoaia n te onimaki.

2 Bwa nooria, a bon mwaiti Nibwaite ake a bon matoatoa ma n rawa n rairananoia ma ni korakora buakakaia, n te aro are a bon aki butimwaea ana taeka te Atua ao taian kabwarabwara ma taetae ni burabeti ni kabane ake a roko i buakoia.

3 Ma e ngae n anne, bon iai te kimwareirei irouia kaain te ekaretia ibukin rairakiia Reimwanaite, eng, ibukin ana ekaretia te Atua, are e a tia ni kateaki i buakoia. Ao a bon iraorao imarenaia, ma ni kimwareirei imarenaia, ma ni karekea te kimwareirei ae korakora.

4 Ao e a koro bukina bwa a mwaiti Reimwanaite ake a ruo nakon te aba are Taraemera, ma n taekinna nakoia te botanaomata aika Nibwaite aron rairakia, ma ni kairoroia nakon te onimaki ao te rairannano.

5 Eng, ao a bon mwaiti aika a kabwarabwara ma te mwaaka ao te kariaiakaki ae korakora n anga te tua, bwa a na kairiia aika a mwaiti nakon te nanorinano ae moan te nano, bwa a na riki bwa taan irira te Atua ao te Tiibu te Teei.

6 Ao e a koro bukina bwa a mwaiti Reimwanaite aika a nako nakon te aba are i meang; ao Nibwaai ma Riaai a nako nakon te aba are i meang bwa a na kabwarabwara nakoia aomata. Ao ikai are e a toki iai te kaonobwi ma teniua n ririki.

7 Ao nooria, bon iai te rau ni kabuta te aba, n te aro are a bon nakon mwakoron te aba are a tangiria Nibwaite, tao i buakoia Nibwaite ke Reimwanaite.

8 Ao e a koro bukina bwa Reimwanaite naba a bon nako nakon taabo ake a kan nako iai, tao i buakoia Reimwanaite ke Nibwaite, ao a bon inaomata n iwawaki imarenaia, ni kabobwai ao ni kaboonakoi aia bwai, ao ma n karekea aia raka, n aron are a tangiria.

9 Ao e a koro bukina bwa a bon rikirake ni korakora kaubwaia, bon ngaiia Reimwanaite ao Nibwaite, ao e bon mwaiti aia koora ae rianako, ao aia tirewa, ma aekan nako te biti ae kakawaki, n te aba i maiaki ao te aba i meang.

10 Ngkai te aba are i maiaki bon arana Riaai, ao te aba are i meang arana bon Mureki, i mwin natin Tetekia; bwa te Uea e kaira Mureki nakon te aba i meang, ao Riaai nakon te aba i maiaki.

11 Ao nooria, bon iai aekan nako te koora n aaba aika uoua aikai, ao te tirewa, ao aekan kaubwain te tano n aekana nako; ao bon iai naba taan mwakuri aika a kamiimi, ake a karaoi aekan mwakuri man kaubwain te tano ma ni katamaroa; ao ngaia are a riki ni kaubwai.

12 A bon karikirakei arokaia taian wiita ni kamwaitia, i meang ao i maiaki; ao a bon korakora rikiraken maiuia, i meang ao i maiaki. Ao a kamwaita aia kariki ma ni korakora matoatoaia n te aba. Ao a karikirakeia aia nanai ma ikota ni man, eng, ma ni mwaiti aia man aika a marikarika.

13 Nooria, aia aine a bon mwakuri ma n raranga, ma ni karaoi aekan kunnikai nako, rinen aika a raoiroi rarangakia ma aekan nako te kunnikai, bwa karabaia. Ao ngaia are e a toki te kaonobwi ma aua n ririki i nanon te rau.

14 Ao n te kaonobwi ma nimaua n ririki ao bon iai naba korakoran kimwareireia ma te rau, eng, e bon mwaiti te kabwarabwara ma te taeka ni burabeti ae bati ni kaineti ma te bwai ae e na riki. Ao ikai are e a toki iai te kaonobwi ma nimaua n ririki.

15 Ao e a koro bukina bwa n aia kaonobwi ma onoua n ririki n tautaeka taan moti, nooria e a tiringaki Titerom iroun te aomata ae aki ataaki i nanon ana tai n tekateka n te kaintekateka ni motikitaeka. Ao e a koro bukina bwa n te ririki naba anne ao natina te mwaane, are e bon rineaki irouia aomata bwa e na onea mwiina, e bon tiringaki naba. Ao ngaia are e a toki te kaonobwi ma onoua n ririki.

16 Ao ni moan te kaonobwi ma itiua n ririki ao e a manga rikirake ni korakora buakakaia te botanaomata.

17 Bwa nooria, te Uea e a tia ni kakabwaiaia i nanon te tai ae maan ma kaubwain aon te aba n te aro are a bon aki kiriwe nanoia bwa a na un, a na buaka, ke a na kawawaea te raraa; ngaia are a bane nanoia ni kaubwaia; eng, ao a waaki n ukoukora karekean aia raka bwa aonga n rietata riki nakon are raoia; ngaia are a tiritiri ni karaba, ma n iraa ao ni karaoi mwakuri n iowawa n anaibwai, bwa e aonga n reke rakaia.

18 Ao ngkai nooria, taan tiriaomata ao taan karaoi mwakuri n iowawa n anaibwai bon te koraki are a kateaki mai iroun Kitekuman ao Kateanton. Ao ngkai e a koro bukina bwa a bon mwaiti, i buakoia Nibwaite, ana koraki Kateanton. Ma nooria a bon mwaiti riki i buakoia mwakoroia Reimwanaite ake a bubuaka riki. Ao a bon aranaki bwa ana tia iraa ao ana tia tiriaomata Kateanton.

19 Ao bon ngaia ake a bon tiringa mataniwia taan moti are Titerom, ma natina, i nanon aia tai ni mena n te kaintekateka ni motikitaeka; ma nooria, a bon aki kuneaki.

20 Ao ngkai e a koro bukina bwa ngke Reimwanaite a kunea bwa iai taan kamwarua i buakoia e a bon korakora nanokawakia; ao a kabanea aia aanga ni kakorakoraia bwa a na kamaunaia mai iaon te aba.

21 Ma nooria, Tatan e kakiriwea nanoia angiia riki Nibwaite, n te aro are a ikotaki ma te koraki ni kakamwarua akekei, ma ni karaoa aia berita ao aia tuea mangaia bwa a na kawakiniia ma n tararuaia imarenaia i nanon aia tai ni mena i nanon te kaangaanga, bwa a na aki kainnano ibukin aia tiriaomata, aia mwakuri n iowawa n anaibwai, ao aia iraa.

22 Ao e a koro bukina bwa bon iai aia kanikina, eng, aia kanikina ni karaba, ma aia taeka ni karaba; ao e riki aio bwa a aonga ni kinaa tariia are e a ti a ni karaoa te tuea n te aro are ngkana e karaoa ae buakaka ao e na aki kaikoakaki iroun ae tarina, ke irouia naake a kaaina ana koraki, ake a tia ni karaoa te berita aio.

23 Are ngaia are a na tiriaomata, a na iowawa n anaibwai, a na iraa, ma ni karaoi aro ni kabekaau ma aekan nako mwakuri aika a bubuaka, aika a kaitarai tuan abaia ma ana tua te Atua.

24 Ao ane e kaaina aia koraki ao e kaota nakon te aba aron aia mwakuri aika a bubuaka ma aia mwakuri aika bati n ribaki, a na bon kabowiaki, n tiaki ae kaineti ma tuan abaia, ma n ae kaineti ma tuan aroia ni buakaka, are a tia n anganaki iroun Kateanton ma Kitekuman.

25 Ngkai nooria, bon taian tuea ao berita aika tabu ni karaba are Aramwa e tuanga natina te mwaane bwa a na aki butanako n te aonaba, bwa mwina ao a na riki bwa angan kabwakakiia aomata nakon te kamaunaki.

26 Ao ngkai nooria, taian tuea ao berita aika tabu ni karaba aikai a bon aki roko nakon Kateanton man taian rongorongo ake e anganaki Ereman; ma nooria, a bon reke i nanon Kateanton mai iroun teuare bon ngaia are e moan kaririia ara moan karo bwa a na kana te uaanikai are e tabuaki—

27 Eng, bon ngaia naba are e babaire ma Kain, bwa ngkana e tiringa tarina are Abera ao e na bon aki kona n ataaki rongorongona ni kabuta te aonaba. Ao e bon babaire ma Kain ao taan iriria man te tai anne.

28 Ao bon ngaia naba are e karekea inanoia aomata bwa a na katea te taua ae tau rietana bwa a na nako karawa. Ao bon ngaia naba are e kairia aomata ake a roko man te taua nakon te aba aio; ake a kabutii mwakuri n roo ao mwakuri aika bati n ribaki ni kabuta te aba aio, ni karokoa ae a katikia aomata rikaaki nakon te kamaunaki, ao nako moone ae aki totoki.

29 Eng, bon ngaia naba are e karekea i nanon Kateanton bwa e na tiku ni waakina te mwakuri n roo, te tiriaomata ae raba ao e karaoa aio ma ni moan rikin te aomata ni karokoa te tai aio.

30 Ao nooria, bon ngaia are oin te bure ni kabane. Ao nooria, e bon waakina ana mwakuri n roo ma ana tiriaomata ae raba, ma n anga nako aia babaire ma aia tuea, ma aia berita, ma aia babaire aika a kakamaaku buakakaia, man te roro teuana nakon te roro teuana n aron ana konabwai n taua nanoia natiia aomata.

31 Ao ngkai nooria, e bon korakora ana tautau i aoia Nibwaite; eng, n te aro are a korakora buakakaia; eng, ao angiia a bon tannako ma ni kawain te raoiroi, ma n toubeka i aan waeia ana tua te Atua, ma ni karaoi oin aia waaki, ma ni karaoi oin aia bouananti aika aia koora ao aia tirewa.

32 Ao e a koro bukina bwa aro aika a buakaka aikai a bon reke irouia i nanon te maan ae e aki bati te ririki, n te aro are angiina riki a bon reke nakoia n aia kaonobwi ma itiua n ririki n tautaeka taan moti i aoia ana botanaomata Nibwaai.

33 Ao a bon rikirake i nanon buakakaia n te kaonobwi ma waniua n ririki naba ao e karika nanokawakia ma aia bwaebwaeti ake a raraoi.

34 Ao ngaia are ti a nooria bwa a moanna ni kekerikaki n aia aki onimaki Nibwaite, ma n rikirake n te buakaka ao mwakuri aika bati n ribaki, ao Reimwanaite a moanna ni korakora rikirakeia n ataakin te Atua; eng, a moanna ni waaki ni kaawakin ana kaetieti ma ana tua, ao ma n nakonako i nanon te koaua ao te eti i matana.

35 Ao ikai are ti a noora iai Tamnein te Uea bwa e a moanna ni kitania Nibwaite, ibukin buakakaia ao matoatoan nanoia.

36 Ao ikai are ti a nooria bwa te Uea e kabwaroa Tamneina i aoia Reimwanaite, ibukin maraun nanoia ao ingaingaia ni kakoaua ana taeka.

37 Ao e a koro bukina bwa Reimwanaite a bon kakaaia taan iraa ake ana koraki Kateanton; ao a kabwarabwara ana taeka te Atua i buakoia ake a buakaka riki, n te aro are te koraki ni kamwarua aikai a bon babane raoi ni kamaunaki ma i buakoia Reimwanaite.

38 Ao e a koro bukina bwa n te anga teuana, ao Nibwaite a bon karikirakeia ma ni boutokaiia, ni moanna mai irouia ake a buakaka riki, ni karokoa ae a kabuta ni kabane abaia Nibwaite, ma n tia ni kairoroia ake a raoiroi riki ni karokoa ae a kakoauai aia taeka ma n anai bwaai ake a karekei man aia mwakuri n iowawa, ma ni waaki ma ngaiia n aia mwakuri n tiriaomata ae raba ma aia babaire ni kamwamwane.

39 Ao ngaia are a bon karekea irouia tauakin taekan ana waaki te tautaeka, n te aro are a bon toubekaia i aan waeia ma n oroia ma n kainnanoia ao ma n katannako mai irouia ake a kainnano ma n nimamanei, ao taan irira te Atua ake a nanorinano.

40 Ao ngaia are ti nooria bwa a mena n te aro a e kakamaaku, ma n tai ibukin te kamaunaki ae aki totoki.

41 Ao e a koro bukina bwa e a toki aia kaonobwi ma waniua n ririki n tautaeka taan moti i aoia ana botanaomata Nibwaai.