1 Ka sa yaco ni ena kena sa mai cava na ikaonosagavulu karua ni yabaki ni nodra veiliutaki na turaganilewa, sa yaco oti na veika kece oqo ka ra sa dua na iwase levu ni Leimanaiti era sa tamata yalododonu, io era sa yalododonu cake vei ira na Nifaiti baleta ni ra sa dei sara ka tu vakadodonu ena vakabauta.

2 Ka raica, era sa lewevuqa na Nifaiti era sa yalokaukauwa ka sega ni via veivutuni, ka ra sa ca vakalevu sara, era sa cata kina na vosa ni kalou, kei na ivunau kei na parofisai kecega e lako yani ena kedra maliwa.

3 Ia era sa marau ga vakalevu na lewe ni lotu ni ra sa saumaki mai na Leimanaiti, io, ena vuku ni sa tauyavutaki na lotu ni Kalou ena kedra maliwa. Era sa veitokani, ka marau vata ka sa levu na nodra marau.

4 Ka sa yaco ni ra sa lewevuqa na Leimanaiti era sa lako sobu mai ki na vanua ko Saraemala ka tukuna vei ira na Nifaiti na vu ni nodra saumaki mai, era sa vakamasuti ira me ra vakabauta ka veivutuni.

5 Io, ka vuqa era sa vunau ena kaukauwa kei na lewa, sa lewevuqa kina era sa vakamalumalumutaki ira ka saumaki mai ena yalomalumalumu titobu sara me ra tisaipeli yalomalumalumu ni Kalou kei na Lami.

6 Ka sa yaco ni ra sa lako yani ki na vualiku e vuqa na Leimanaiti; erau sa lako tale ga ki na vualiku ko Nifai kei Liai me rau la’ki vunau vei ira na tamata. A sa cava na ikaonosagavulu katolu ni yabaki.

7 Ka raica, sa yaco na veisaututaki ena vanua taucoko ka ra sa lako na Nifaiti ki na vanua cava ga era via lako kina, vei ira na Nifaiti se kivei ira na Leimanaiti.

8 Ka sa yaco ni ko ira tale ga na Leimanaiti era sa lako ki na vanua cava ga era vinakata, vei ira na Leimanaiti se kivei ira na Nifaiti; era sa veicurumaki vinaka sara ka veivoli vata me ra rawata kina na veika era gadreva.

9 Ka sa yaco ni ra sa vutuniyau sara ko ira na Leimanaiti kei ira na Nifaiti; ka sa levu na nodra koula kei na siliva kei na veimataqali vatu talei kecega, ka kunei ena vanua ena ceva kei na vanua ena vualiku.

10 Sa vakatokai na vanua ena ceva ko Liai, ka sa vakatokai na vanua ena vualiku ko Muleki, na yacai koya na luvei Setekaia; ka ni a kauti Muleki na Turaga ki na vualiku ka kauti Liai ki na ceva.

11 Ka raica, sa levu na veimataqali koula kei na siliva kei na veimataqali oa talei ena vanua e rua oqo; era sa tu tale ga na tamata era sa liga maqosa ka matai sara ena cakacaka, era sa cakacakataka na veimataqali oa kecega ka ra vakasavasavataka; a sa yaco ni ra sa vutuniyau kina.

12 Era sa tea vakalevu na sila ena vualiku kei na ceva; ka ra sa vuavuai vinaka sara ena vanua ena vualiku kei na ceva. Era sa tubu me lewevuqa sara ka tiko sautu ena vanua. Era sa susuga na nodra qele ni sipi kei na bulumakau, io, kei na manumanu sa uro.

13 Raica era sa daucakacaka ka dautalitali ko ira na nodra yalewa, era sa talia na veimataqali isulu kecega, na isulu lineni tali vakamatailalai kei na isulu ena kena veimataqali me ra vakaisulu kina. Era sa tiko sautu me yacova ni cava na ikaonosagavulu kava ni yabaki.

14 Era sa tiko marau tale ga ka sautu ena ikaonosagavulu kalima ni yabaki, a sa vunautaki ka sa vuqa na parofisai me baleta na veika ena yaco mai. Sa mai oti tale yani na ikaonosagavulu kalima ni yabaki.

15 Ia sa qai yaco ena ikaonosagavulu kaono ni yabaki ni nodra veiliutaki na turaganilewa, sa laulabati kina ko Kisoramu ena nona idabedabe ni veilewai ka sega ni kilai o koya e laba. Ia e sa qai yaco ena yabaki vata ga ko ya sa laulabati tale kina na luvena era a digitaka na tamata me kena isosomi. Sa mai cava kina na ikaonosagavulu kaono ni yabaki.

16 Ia ena itekivu ni ikaonosagavulu kavitu ni yabaki, sa tekivu me ra sa ca sara mai vakalevu na tamata.

17 Ia raica, sa vakalougatataki ira mai vakabalavu na Turaga ena iyau kei vuravura ka ra a sega ni vakayavalati me ra cudru, veivaluvaluti, se vakadave dra; era sa tekivu vagolea na yalodra ki na nodra iyau; io era sa tekivu segata me ra rawa ka ka veisisivi kina vakai ira; o koya gona sa tekivu kina me ra laba vuni, butako ka kovekove me ra rawa iyau kina.

18 Ia ko ira na daulaba kei na dauvakacaca era sa lewe ni lawalawa ka rau a tauyavutaka ko Kisikumeni kei Ketianitoni. Ka sa yaco ni ra sa lewelevu ena kedra maliwa sara mada ga na Nifaiti era sa lewe ni ilawalawa i Ketianitoni. Ia raica, era sa lewelevu cake ena kedra maliwa na Leimanaiti ca. A ra sa vakatokai na daubutako ka daulaba i Ketianitoni.

19 Sai ira era a labati Kisoramu na turaganilewa levu kei na luvena, ena gauna erau a dui tiko kina ena idabedabe ni veilewai; era a sega ga ni kilai.

20 Ka sa yaco ni ena gauna era sa kila kina na Leimanaiti ni ra sa tiko ena kedra maliwa ko ira na daubutako, era sa rarawa vakalevu sara; ka segata vakaukauwa sara me ra vakawabokotaki ira mai na delai vuravura.

21 Ia raica, sa vakayavalata ko Setani na yalodra e vuqa cake na Nifaiti ka ra sa duavata kina kei ira na ilawalawa daubutako, era sa bubului ka veiyalayalati vata me ra na veitaqomaki ka veimaroroi ena veigauna dredre kecega, e ra na dau sota kaya, ka me kakua ni kilai na nodra laba, na nodra vakacaca, kei na nodra butako.

22 Ka sa yaco ni sa tu na nodra vei ivakatakilakila, io, na nodra vei ivakatakilakila vuni, kei na nodra vosa vuni; sa caka oqo me ra veikilai kina ko ira kece sa cakava na veiyalayalati; ia kevaka e dua vei ira sa kitaka e dua na ka ca me ra kakua ni vakacacani koya ko ira na nona ilawalawa era sa taura na veiyalayalati oqo.

23 Ka me ra laba kina, vakacaca, butako, ka ia na veibutakoci ka kitaka na caka ca kecega, ka veicalati kei na lawa ni nodra vanua kei na lawa ni nodra Kalou.

24 Ia kevaka e dua na lewe ni soqosoqo sa vakatakila ki vuravura na nodra caka ca kei na nodra itovo vakasisila, sa dodonu me lewai, e na sega ni lewai me vaka na lawa ni nodra vanua, ia ena lewai ga ena lawa ni isoqosoqo ka rau a virikotora tu ko Ketianitoni kei Kisikumeni.

25 Raica oqo, na vosa bubului kei na veiyalayalati vuni ka a vakarota ko Alama vua na luvena me kakua ni vakatakilai yani vei ira na tamata, ka ni rawa ni vakavuna na nodra vakarusai.

26 Raica oqo, e a sega ni kila ko Ketianitoni na vosa bubului kei na veiyalayalati vuni oqori mai na ivolatukutuku ka a soli vei Ilamani; ia raica, e a vakatakila vei Ketianitoni o koya vata ga ka a bacani rau na noda itubutubu taumada me rau kania na vuanikau vakatabui—

27 Io, o koya vata ga ka rau a bukivere vata kei Keni me labati Epeli na tacina ka na sega ni dua e vuravura ena kila. Ia sai koya ka bukivere vata kei Keni kei ira ka muri koya, me tekivu mai na gauna ko ya.

28 Ka sai koya vata tale ga ka vakauqeti ira na tamata me ra tara e dua na vale cecere me ra yaco kina ki lomalagi. Ia sai koya vata ga ka veretaki ira tiko na tamata ka ra lako mai na vale cecere ko ya ki na vanua oqo; sai koya ka vakatetea na cakacaka ni butobuto kei na itovo vakasisila ena dela ni vanua taucoko, me yacova ni sa dreti ira sobu na tamata me ra rusa vakadua ka kauti ira sobu ki na eli tawavakaiyalayala.

29 Io, sai koya vata ga ka a biuta ki yaloi Ketianitoni me tomana tiko ga na cakacaka butobuto kei na laba vuni; sai koya ka tekivutaka mai na vakatekivu ni tamata me yacova mai na gauna oqo.

30 Ka raica, sai koya na vu ni ivalavala ca kecega. Ka raica, sa kitaka tiko na nona cakacaka butobuto kei na laba vuni, a sa vakadewataka sobu mai na itabatamata ki na itabatamata na nodra bukivere kei na vosa bubului, kei na nodra veiyalayalati kei na nodra inaki ni caka ca kecega, a sa kitaka oqo me vesuka kina na lomadra na luve ni tamata.

31 Ia raica oqo, sa vesuka sara ko koya na lomadra na Nifaiti; io, ka ra sa caka ca vakalevu sara kina; io, sa lewevuqa cake sara vei ira era sa gole tani mai na sala ni valavala dodonu ka buturaka sobu e yavadra na vunau ni Kalou, era sa dui muria ga na lomadra ra tara cake na nodra dui matakau ena nodra koula kei na nodra siliva.

32 Ka sa yaco vei ira na caka cala kece oqo ena loma ni vica wale ga na yabaki, vakalevu cake ena ikaonosagavulu kavitu ni yabaki ni nodra veiliutaki na turaganilewa vei ira na tamata i Nifai.

33 Ka sa tubu na nodra caka cala ena ikaonosagavulu kawalu ni yabaki, era sa tagi ka rarawa vakalevu kina ko ira na yalododonu.

34 Eda sa raica eke ni ra sa malumalumu mai ena tawavakabauta ko ira na Nifaiti, ka sa tubu cake na nodra caka ca ka itovo vakasisila, ia ko ira na Leimanaiti era sa tubu vakalevu sara ena nodra kila na nodra Kalou; io era sa muria na nona lawa kei na nona ivunau ka lako ena dina kei na dodonu e matana.

35 Ia eda sa raica eke ni sa tekivu me vakasuka mai vei ira na Nifaiti na Yalo ni Turaga ena vuku ni nodra caka ca kei na kaukauwa ni lomadra.

36 Ia eda sa raica eke ni sa tekivu me sovaraka yani na Yalona na Turaga vei ira na Leimanaiti, ni ra sa yalorawarawa ka ra vinakata me ra vakabauta na nona vosa.

37 Ka sa yaco ni ra sa vakasasataki ira na ilawalawa daubutako i Ketianitoni ko ira na Leimanaiti; era sa vunautaka na vosa ni Kalou vei ira na wekadra era caka ca vakalevu cake, ka ra sa vakarusai vakadua kina mai na kedra maliwa na Leimanaiti ko ira na ilawalawa daubutako oqo.

38 Ka sa yaco, ena yasa ka dua, era sa tarai ira cake ka tokoni ira ko ira na Nifaiti, tekivu mai vei ira era caka ca vakalevu cake me yacova ni ra sa robota na nodra vanua taucoko na Nifaiti, ka ra sa temaki ira e lewelevu cake na yalododonu me yacova ni ra sa vakabauta na nodra cakacaka ka vakaivotavota ena veika era butakoca, ka duavata kei ira ena nodra laba kei na isoqosoqo vuni.

39 Era sa kovea na lewa ni cicivaki ni matanitu, era sa buturaki ira sobu ka yaviti ira ka vakacacani ira ka vakanadakui ira na dravudravua, kei ira era sa muria na Kalou ena yalomalua kei na yalomalumalumu.

40 Ia eda sa raica eke ni ra sa tu ena dua na itutu ca sara ka ra vakarau tu kina me tau vei ira e dua na veivakarusai tawavakaiyalayala.

41 Ka sa yaco ni sa mai cava eke na ikaonosagavulu kawalu ni yabaki ni nodra veiliutaki na turaganilewa vei ira na tamata i Nifai.