Xtikib’ankil

Lix Hu laj Mormon a’an jun siir chi loq’laj hu, chanchan ajwi’ li Santil Hu. A’an jun tz’iib’anb’il esil chirix lix b’aanuhom li Dios najter sa’ li nimla ch’och’ America, ut wan chi sa’ lix tz’aqalil li evangelio li junelik nakana.

Li hu tz’iib’anb’il xb’aan k’iila najter profeet, rik’in li musiq’ej re profeetil aatin ut k’utb’esink. Li raatineb’ a’an, li tz’iib’anb’il chaq chiruheb’ perel ch’iich’ oor, kitz’iib’aak resil ut kik’ose’ ru xb’aan jun li profeet aj yehol esil, aj Mormon xk’ab’a’. Li tz’iib’anb’il esil naxye resil wiib’ li xninqal ru tenamit. Li jun ch’ol ke’el chaq Jerusalen waqib’ cient chihab’ ma nayo’la li Kristo, ut ke’xjach rib’ sa’ wiib’ chi tenamit, a’eb’ laj Nefita ut laj Lamanita neke’yehe’ re. Li jun ch’ol chik q’axal najter wi’chik ke’chal, naq li Qaawa’ kixjacheb’ ru li aatinob’aal sa’ li najt xteramil kab’l re Babel. Li jun ch’ol a’in, a’eb’ laj Jaredita neke’yehe’ re. Chirix k’iila mil chihab’, ke’sachman chixjunileb’, ka’aj chik laj Lamanita ke’kana, ut a’aneb’ xkomon lix xe’toonileb’ li ral ch’och’ sa’ li ch’och’ America.

Li jun chi na’leb’ q’axal nim tz’iib’anb’il resil sa’ lix Hu laj Mormon a’an lix k’ulunik ut xk’anjel li Qaawa’ Jesukristo sa’ xyanqeb’ laj Nefita, ka’ch’in chik chirix lix waklijik chi yo’yo. Naxk’ut xyaalal li tzol’leb’ re li evangelio, naxk’ut chi tzoltzo li k’uub’anb’il na’leb’ re li kolb’a-ib’, ut naxye reheb’ li winq k’a’ru tento te’xb’aanu re xk’ulb’al li tuqtuukilal sa’ li yu’am a’in, ut li kolb’a-ib’ chi junelik sa’ li yu’am toj taachalq.

Chirix naq laj Mormon kixchoy lix tz’iib’ahom, kixq’axtesi li esil re laj Moroni li ralal, li kitiqok re junjunq li tz’aqal raatin, ut a’an kixmuqeb’ li perel ch’iich’ sa’ li Tzuul Kumorah. Sa’ 21 xb’e li po Septiembre, 1823, laj Moroni, chi ak k’eeb’il chik xloq’al ut waklijenaq chi yo’yo, kixk’ut rib’ chiru li Profeet aj Jose Smith, ut kixk’e xna’leb’ chirix li najter tz’iib’anb’il esil, ut naq taa’aje’q xjaltesinkil ru sa’ li aatinob’aal Ingles.

Moqon chik ke’q’axtesiman li perel ch’iich’ re laj Jose Smith, li kijaltesink re li aatin rik’in lix maatan ut lix wankilal li Dios. Li tz’iib’anb’il esil ak puktesinb’il chik sa’ naab’al chi aatinob’aal, ut wan ajwi’ chik a’an chixk’utb’al xyaalal chi ak’il naq li Jesukristo a’an Ralal li yo’yookil Dios, ut naq chixjunileb’ li te’chalq rik’in ut te’paab’anq re li chaq’rab’ ut li k’ojob’anb’il k’anjel re lix evangelio te’ruuq chi kole’k.

Chirix li tz’iib’anb’il esil a’in li Profeet aj Jose Smith kixye: “Keb’inye re li komon naq lix Hu laj Mormon a’an li hu q’axal ch’olch’o ru wan sa’ li ruchich’och’, ut a’an li taqenaqil pek li xaqab’anb’il wi’ li qapaab’aal, ut jun li winq q’axal wi’chik taaruuq chixjilosinkil rib’ rik’in li Dios rik’in xpaab’ankil li na’leb’ wan chi sa’, chiru k’a’ruhaq chik chi hu.”

Rochb’een laj Jose Smith, li Qaawa’ kixkanab’ junlaju chik chirilb’al xjuneseb’ rib’ eb’ li perel ch’iich’ oor, ut chi wank choq’ aj yehol nawom chirix lix yaalalil ut lix diosilal lix Hu laj Mormon. Li aatin ke’xch’olob’ wi’ xyaalal wan arin jo’ “Lix Ch’olob’ahomeb’ li Oxib’ chi aj Yehol Nawom” ut “Lix Ch’olob’ahomeb’ li Waqxaqib’ chi aj Yehol Nawom.”

Naqatz’aama chiru chixjunileb’ li winq yalaq b’ar naq te’ril xsa’ lix Hu laj Mormon, naq te’xtz’il rix sa’ xch’ool li na’leb’ wan chi sa’, toja’ ut naq te’xpatz’ re li Dios, li Junelik Yuwa’b’ej, sa’ lix k’ab’a’ li Kristo, ma yaal li hu. Eb’ li neke’b’aanunk re chi jo’kan ut neke’patz’ok rik’in paab’aal te’k’ehe’q chixnawb’al naq yaal ut naq re li Dios, rik’in lix wankil li Santil Musiq’ej. (Chi’ilmanq sa’ Moroni 10:3–5.)

Eb’ li neke’k’uluk re chi jo’kan li choxahil yaal k’utb’il xb’aan li Loq’laj Musiq’ej te’xnaw ajwi’ rik’in li wankilal ajwi’ a’an naq li Jesukristo a’an aj Kolol re li ruchich’och’, naq laj Jose Smith a’an laj k’utb’esinel ut profeet chiru sa’eb’ li roso’jik kutan a’in, ut naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an lix awa’b’ejihom li Qaawa’, xaqab’anb’il jun sut chik sa’ li ruchich’och’, royb’eninkil lix kab’ xk’ulunik li Mesias.