Saad Bee Ąą Álnéehii

Naaltsoos Mormon wolyéhígíí éí Diyin God bizaad átʼé Bible átʼéhígi átʼéego. Diyin God America bikáaʼgi ałkʼidą́ą́ʼ diné dahinánę́ę yił naashnishgo naʼasdzo dóó Jesus Christ binaʼnitin doo ninítʼiʼii tʼáá ałtso biyiʼ.

Éí naaltsoos ląʼída ałkʼidą́ą́ʼ Diyin God yá dahalneʼii náásgóó haneʼii dóó Diyin God bitsʼą́ą́dę́ę́ʼ yáʼátiʼii beʼadziilii yee akʼedaʼashchį́. Éí dabizaad, béésh óola tʼą́hí bikááʼ nááháasdzo, Diyin God yá halneʼii nátʼą́ą́ʼ náhálneʼii Mormon wolyéego saad nááyíizo dóó áłtsʼíísígo áyiilaa. Naʼasdzo naakigo ayóo átʼéego dineʼé dah yikah ńtʼę́ęʼgo yaa halneʼ. Łaʼ éí Jerusalemdę́ę́ʼ yíkai 600 nááhaigo Jesus Christ bidiʼdoochííł yę́ędą́ą́ʼ. Áádóó bikʼijįʼ naakigo dineʼé ałtsʼákai, Nephi bidineʼé dóó Laman bidineʼé daolyéego. Łaʼígíí éí tʼah yíwohdą́ą́ʼ yíkai Bóhólníihii diné bizaad Tower of Babeldi ałʼąą áyiilaa yę́ędą́ą́ʼ. Díí diné éí Jared bidineʼé daolyéé ńtʼę́ę́ʼ. Ląʼídi mííl yázhí nááhaigo, tʼáá ałtso ásdįįd tʼáá hazhóʼó Laman bidineʼé tʼéiyá, dóó éí éiyá Americagi bitsįʼ yishtłizhii tʼáá íiyisíí bizází ádáátʼį́.

Tsʼídá aláahdi Naaltsoos Mormon wolyéhígíí biyiʼ áhóótʼįįdgo nááháasdzooígíí éí Bóhólníihii Jesus Christ tʼáá bí Nephi bidineʼé yitah binaanish áyiilaa bitsʼíís yiih náádzá dóó bikʼijįʼ. Éí Jesus Christ binaʼnitin yaa halneʼ, haitʼáo yisdáńdoodáłígíí yaa halneʼ, áádóó haitʼéego diné díí iiná biyiʼ hashtʼehodítʼé dóó náás iiná biyiʼ hoolʼáágóó yisdáʼiildéhígíí yee yił halneʼ.

Mormon ałtso naʼazogo nááháasdzooígíí, biyeʼ Moroni yeiníʼą́, éí éí áłchʼį́į́dígo bizaad łaʼ yiih yiyiizoh dóó béésh tʼą́hí dayiskʼid Cumorah yiiʼ néideesʼį́į́ʼ. Biniʼantʼą́ą́tsohgi yiziłígíí biyiʼ 21góó yoołkáałgo, 1823 yihahgo, tʼáá éí Moroni, dóó bitsʼíís dóó biyiʼsizíinii yił ahíináátʼáazhgo, ayóó átʼé ályaago, Diyin God Yá halneʼii Joseph Smith yichʼįʼ ííshjání áʼdiilyaa áádóó ałkʼidą́ą́ʼ nináʼádzoh yę́ę dóó bilagáanaa bizaadkʼehjí ádoolníiłgo yee neineeztą́ą́ʼ.

Náasdi índa béésh óola tʼą́hí Joseph Smith beítʼą́, éí Diyin God bibee adziilii dóó bibee aʼiilyéii bee bilagáanaa bizaadjí ályaa. Díí naʼasdzooígíí kʼad ląʼída bílaʼashdlaʼii bizaadkʼehjí ádaalyaa Jesus Christ éí Diyin God hináanii yiYeʼ nilį́ níigo ooʼíinii ániidí dóó idiitʼánígíí átʼé dóó tʼáá átʼé yikééʼ niikaiígíí dóó binaʼnitin bibeehazʼáanii índa bibee oʼoolnííł yikʼeh dahółʼínígíí yisdádookah.

Diyin God Yá halneʼii Joseph Smith díí naʼasdzooígíí baa náhátʼį́įgo kódííniid: “Shikʼisóó Naaltsoos Mormon wolyéhígíí éí nahasdzáán bikáaʼgi aláahdi naaltsoos doo biiʼ naʼiisdziʼii átʼé, dóó tʼáá ałtso nihinahaghaʼ bídéétʼiʼígíí átʼé, dóó binahjįʼ diné Diyin God tʼáá íiyisíí yééhodoosįįł binaʼnitin yikʼeh hółʼį́įgo, dóó doo łaʼ naaltsoos kótʼée da.”

Joseph Smith bił, Bóhólníihii hastóí łaʼtsʼáadah béésh óola tʼą́hí tʼáá bí deidínóołʼįįłgo yá hoołʼaʼ dóó Naaltsoos Mormon wolyéhígíí tʼáá aaníí dóó diyingo átʼéhígíí yá tʼáá íiyisíí ooʼíinii danilį́į dooleeł. Tʼáá aaníí deiiltsą́ daaníigo díí naaltsoos biyiʼ nááháasdzo “Tááʼ Daʼiiłtsáanii Bizaad Tʼáá Aanínígíí” dóó “Tseebíí Daʼiiłtsáanii Bizaad Tʼáá Aanínígíí” wolyéego.

Bílaʼashdlaʼii tʼáá ałtso Naaltsoos Mormon wolyéhígíí deiyidóołtah daniidzin, biyiʼ bikʼidiʼdootį́łígíí bijéí yee yéigo yaa ntsídadookos, áádóó Christ bízhiʼ binahjįʼ, Hoolʼáágóó aTaaʼ Diyin God éí díí naaltsoosísh tʼáá aaníí daaníigo ndeídídóołkił. Háiida díí yikʼeh hoolʼáágóó dóó oodlą́ągo ndaʼídééłkidgo Iiʼsizį́ Diyinii bibee adziil binahjįʼ tʼáá aaníí dóó diyingo bił béédahodoozįįł. (Moroni 10:3–5jįʼ danółʼį́)

Háiida Iiʼsizį́ Diyinii yitsʼą́ą́dóó diyingo iiłtsą́ągo tʼáá éí adziilii binahjįʼ ałdóʼ Jesus Christ nahasdzáán Yisdáʼiiníiłii nilį́ dóó Joseph Smith díí jį́įdi Diyin God bił ííshją́ą́ éʼélʼíinii dóó yá halneʼii nilį́ dóó Jesus Christ Binahaghaʼ Akéeʼdi Dayoołkáałgo Yá Naazínígíí éí Bóhólníihii nahasdzáán bikáaʼgi bił hazʼą́ągo ninaatʼáanii átʼé, Messiah nínáádoodááł bichʼįʼ hashtʼeʼádílnééh biniiyé.