Ana Boki Iakobwa
Tarin Nibwaai

1 Bwa taraia, e koro bukina bwa ai nimabwi ma nimaua te ririki ae a tia n nako man te tai are e kitana iai Ierutarem Riaai; mangaia ae e anganai Nibwaai, ngai ae Iakobwa, te tua ibukin taian bwaatua ake a uarereke, ake a tia ni koreaki iai bwaai aikai.

2 Ao e anganai, ngai ae Iakobwa, te tua bwa N na koroi iaon bwaatua aikai bwaai tabeua ake I taku bwa a rangi ni kakawaki; bwa N na kakimototoa au koroboki ake I karin, aika rongorongoia te botanaomata aio, aika a aranaki bwa ana botanaomata Nibwaai.

3 Bwa e taku bwa a riai ni koreaki rongorongoia ana botanaomata iaon ana bwaatua ake tabeua, ao N na kaawakin bwaatua aikai ao n anganiia kanoau, man te roro teuana nakon te roro teuana.

4 Ao ngkana a tataekin bwaai aika a tabu, ke ni kaotioti bwaai aika a kakawaki, ke n taetae ni burabeti, ao N na riai ni koroi taekaia iaon bwaatua aikai, ao n taekin kanoaia n aron ae tau mwaitina, ibukin Kristo ao ibukiia ara botanaomata.

5 Ao ngkai e korakora te onimaki ma te ingainga n nano, ao e a tia ni kaotaki nakoira taekaia ara botanaomata, ma bwaai aika a na riki nakoia.

6 Ao ti a karekei naba kaotioti aika a mwaiti, ao tamnein taeka ni burabeti ae bati; mangaia ae ti ataa iai taekan Kristo ma ueana, aika a na roko.

7 Mangaia ae ti teimatoa ni beku i buakoia ara botanaomata, bwa ti aonga ni kairi nanoia nakon Kristo, ao ni katoonga ana raoiroi te Atua, bwa aonga n rin i nanon ana rau, bwa e aonga n aki kan tuea n unin nanona bwa a na aki rin iai, n aron te tai are a rinanon te rereua iai tibun Iteraera ao a aki toki ni kataa te Uea.

8 Mangaia ae ara kaantaninga imatan te Atua bwa ti na kona ni kairi nanoia aomata ni kabane bwa a na aki kaitaraa te Atua, ni kaunna, ma a na bane ni kakoaua Kristo, ao n iangoa matena, ao n namakina rawawatan ana kaibangaki ao n uota buakakan te aonaba; mangaia ae Ngai ae Iakobwa, I a motikia inanou bwa N na kakoroa bukin ana tua tariu ae Nibwaai.

9 Ao e roko te kara iroun Nibwaai, ao e nooria bwa e a kaan matena; mangaia ae e a kabira te aomata temanna bwa e na riki bwa te uea ao te tia tautaeka ibukiia ana botanaomata ngkai, n aron te katei ibukin rineaia uea.

10 E korakora tangiran Nibwaai irouia ana botanaomata, ngkai e a tia n riki bwa te tia kamanoia, ao n tia ni katoka kaia ni kabongana ana kabaang Raban, ao n teimatoa i nanon maiuna n tararua mweraoia—

11 Mangaia ae a motikia bwa a na kamaiua arana bwa kanuringana. Ao aomata ni kabane ake a rineaki i mwina irouia aomata bwa a na uea, a na aranaki bwa Nibwaai te kauoman, Nibwaai te kateniman, n aiaron anne, katein rineaia uea; ao a na aranaki irouia aomata, e ngae ngkana e kaokoro araia ma anne i mwaain rikiia n uea.

12 Ao e koro bukina bwa akea bwa e a mate Nibwaai.

13 Ao aomata ake tiaki Reimwanaite a riki bwa Nibwaite; ao aranaki bwa Nibwaite, Iotebwaite, Iakobwaite, Tioramwaite, Reimwanaite, Remueraite ao Itimaeraite.

14 Ma Ngai ae Iakobwa, I aki kan weteia n aara aika a kakaokoro aikai, man N na weteia bwa Reimwanaite aomata ake a kataia n tiringia ana botanaomata Nibwaai, ao N na araniia aomata ake a iraorao ma ana botanaomata Nibwaai bwa Nibwaite, ke ana botanaomata Nibwaai, n aron katein rinean te uea.

15 Ao ngkai e koro bukina bwa a rikirake ana botanaomata Nibwaai ni matoatoa nanoia, n ana tai n tautaeka te kauoman n uea, ao a kakukurei nanoia ni karaoan bwaai aika a buakaka, n aiaron Tawita ngkoa ngke tangiriia buuna ma ana kinano aika a mwaiti, n aiaron naba Toromon, ae natina.

16 Eng, ao a moana naba ukoukoran koora ma tirewa, ao a moanna naba n rikirake kamoamoaia.

17 Mangaia ae Ngai ae Iakobwa, I a taekin nakoia taeka aikai ngke I reireinia i nanon te tembora, i mwin tian reken weteau mai iroun te Uea.

18 Bwa Ngai ae Iakobwa, ma tariu ae Iotebwa ti a tia ni katabuaki bwa ibonga ao taan reirei ibukiia te botanaomata aio, i aan bain Nibwaai.

19 Ao ti a kakorakoraira n nakoara aikai imatan te Uea, ao ti kamatoaira ni mwiokoara, n tauraoi ni bukinaki ibukin aia bure ara botanaomata ngkana ti aki bekumwaaka n tataekina ana taeka te Atua nakoia; mangaia ae ngkana ti kakorakoraira ni beku ao a na aki kabarekaki kunnikaira n raraaia; ma ngkana ti aki ao a na kabarekaki ara kunnikai n raraaia, ao ti na aki itiaki n te kabanea ni bong.