Ang Libro ni Jacob
ang Utod ni Nefi

1 Kay tan-awa, natabo ini nga singkwenta’y singko ka tuig ang naglabay halin sa tion nga si Lehi nagbiya sa Jerusalem; gani, si Nefi naghatag sa akon, kay Jacob, sing isa ka kasugoan parte sa magagmay nga mga lamina nga sa diin ining mga butang nakurit.

2 Kag ginhatagan niya ako, si Jacob, sing isa ka kasugoan nga dapat ako magsulat sa sining mga lamina sing pila sang mga butang nga akon ginakabig nga labing importante; nga indi ako dapat magsulat, luwas lang kon malip-ot lamang, parte sa kasaysayan sining katawhan nga ginatawag nga katawhan ni Nefi.

3 Kay nagsiling sia nga ang kasaysayan sang iya katawhan dapat nga ikurit sa iban pa niya nga mga lamina, kag nga dapat ko amligan ining mga lamina kag ipasa ang mga ini sa akon kaliwatan, sa tanan nga henerasyon.

4 Kag kon may mga pagpangwali nga sagrado, ukon rebelasyon nga dako, ukon pagpropesiya, nga dapat ko ikurit ang labing importante nga mga punto sang mga ini sa sining mga lamina, kag magsulat parte sa mga ini tubtob sa mahimo, para kay Cristo, kag para sa amon katawhan.

5 Kay tungod sang pagtuo kag dako nga kabalaka, matuod gid nga ginpakita ang mga ini sa amon parte sa amon katawhan kon ano nga mga butang ang magakalatabo sa ila.

6 Kag madamo man kami sing mga rebelasyon, kag sang espiritu sang bugana nga propesiya; gani, nakahibalo kami parte kay Cristo kag sang iya ginharian nga magaabot.

7 Gani nagpangabudlay kami sing matutum sa tunga sang amon katawhan, agud basi pa lang makumbinsi namon sila sa pagpalapit kay Cristo, kag mag-ambit sang kaayo sang Dios, agud basi pa lang nga makasulod sila sa iya kapahuwayan, kay basi kon sa ano man nga mga paagi magasumpa sia sa iya kaakig nga indi sila makasulod, pareho sang pagpanghangkat sa mga adlaw sang pagsulay samtang ang mga anak ni Israel yara sa kamingawan.

8 Gani, ginapangayo namon sa Dios nga makumbinsi namon kuntani ang tanan nga tawo nga indi magrebelde sa Dios, sa paghangkat sa iya sa kaakig, kundi nga ang tanan nga tawo magpati kay Cristo, kag magpamalandong sang iya kamatayon, kag mag-antos sang iya krus kag magbatas sang kahuluy-an sang kalibutan; gani, ako, si Jacob, nangako sa akon kaugalingon nga magtuman sang kasugoan sang akon utod nga si Nefi.

9 Karon si Nefi nagsugod sa pagtigulang, kag nabatyagan niya nga pat-od gid nga mapatay sia sa indi madugay; gani, naghaplas sia sing isa ka tawo nga mangin isa ka hari kag isa ka tagdumala sang iya katawhan subong, suno sa mga pagginahum sang mga hari.

10 Si Nefi bangod palangga sing tuman sang katawhan, bangod isa sia ka dako nga manug-amlig nila, nga naggamit sang espada ni Laban sa pagpangapin sa ila, kag nagpangabudlay sa tanan niya nga mga adlaw para sa ila kaayohan—

11 Gani, tuman nga naghandum ang katawhan nga huptan sa panumduman ang iya ngalan. Kag kon sin-o man ang dapat maggahum bulos sa iya ginpangtawag sang katawhan, ika-duha nga Nefi, ika-tatlo nga Nefi, kag iban pa, suno sa mga pagginahum sang mga hari; kag sa amo nga paagi sila gintawag sang katawhan, bisan ano pa man ang ila ngalan.

12 Kag natabo ini nga napatay si Nefi.

13 Karon ang katawhan nga indi mga Lamanhon mga Nefinhon; ugaling, gintawag sila nga mga Nefinhon, mga Jacobnon, mga Josefnon, mga Zoramnon, mga Lamanhon, mga Lemuelnon, kag mga Ismaelnon.

14 Apang ako, si Jacob, indi magkilala sa ila pagkatapos sini sa amo nga mga ngalan, kundi nga tawagon ko sila nga mga Lamanhon nga nagatinguha sa paglaglag sang katawhan ni Nefi, kag inang mga mainabyanon kay Nefi tawagon ko nga mga Nefinhon, ukon ang katawhan ni Nefi, suno sa mga pagginahum sang mga hari.

15 Kag karon natabo ini nga ang katawhan ni Nefi, sa idalom sang pagginahum sang ika-duha nga hari, nagsugod sa pagpatig-a sang ila mga tagipusuon, kag nagpinagusto sila sa malain nga mga paggawi, pareho kay David sang dumaan nga panahon nga naghandum sang madamo nga asawa kag oloasawa, kag amo man si Solomon nga iya anak.

16 Huo, kag nagsugod man sila sa pagpangita sang madamo nga bulawan kag pilak, kag nagsugod sila sa pag-alsa diutay sa bugal.

17 Gani, ako, si Jacob, naghatag sa ila sining mga pulong samtang nagpanudlo ako sa ila sa templo, pagkatapos sang una nga pagbaton sang akon tulumanon halin sa Ginuo.

18 Kay ako, si Jacob, kag ang akon utod nga si Jose nakonsagrar nga mga pari kag mga manunudlo sining katawhan paagi sa kamot ni Nefi.

19 Kag gintuman namon sing maayo ang amon palangakoan sa Ginuo, nga gin-ako sa amon kaugalingon ang responsibilidad, nga nagasabat sang mga sala sang katawhan sa amon kaugalingon nga mga ulo kon wala namon sila pagtudloi sang pulong sang Dios sa bug-os nga katutum; gani, paagi sa pagpangabudlay sa amon ikasarang ang ila dugo mahimo nga indi magtupa sa amon mga biste; indi gani ang ila dugo magatupa sa amon mga biste, kag indi kami makita nga wala’y mantsa sa katapusan nga adlaw.