1 Fapi thin ni weliy Jacob, ni fachaʼ ni walagen Nephi, ngakʼ fapi gidiiʼ rokʼ Nephi, u tomuren ni ke yimʼ Nephi:

2 Chiney, gimed pi walageg nib tʼuf rog, e gag, Jacob, nu rogon e muruwel rog ngakʼ Got, ni nggu rinʼ u fithikʼ e tamilngaenʼ, ni gomanga yog ni nggu chuweg madag u fithikʼ e pi denen romed, e kugub nga langgin fare temple e dabaʼ ni nge yog nuggu weliy ngomed fapi thin rokʼ Got.

3 Ma gimed manang romed ni ke yibi madaʼ ko ngiyalʼ ney ni gube rinʼ e muruwel rog nib felʼ rogon; machane biney e rran e kug muchuch nga butʼ ko kirbaenʼ nge magafaenʼ ni fan ko pinʼen nib tʼuf ko yaʼel romed nib thil nga yungiyalʼ.

4 Ya musap gaed, ke yibi madaʼ ko ngiyalʼ ney, ma gimed be fol ko fapi thin rokʼ fare Somoel, ni ir faram e kug piiʼ ngomed.

5 Machane musap gaed, ngam motoyil gaed ngog, mi gimed nang nu dakean fare ayuw rokʼ fachaʼ ni gubin ma ra yog rokʼ niʼir e Tasunmiy e tharmiy nge fayleng ma ra yog nuggu weliy riy ngomed e tafnaey romed, u rogon ni kam tabab niged i muruwliy e denen, nib denen ni be yibi mʼug nib ubchiyaʼ ni gube guy, arragon, mab ubchiyaʼ u mit Got.

6 Arragon, me kireb anʼug ngay mug sulsul riy nga tomur ko tamraʼ ni kug tay u pʼoewchen e Anisunmiyeg, ni thingar gu micheg ngomed morngaʼagen e pi denen ni ubchiyaʼ ni bay u lan gumʼirchaʼmed.

7 Nge ku arragon niki kireb anʼug ngay ni thingar gu pag nga kanawo morngaʼagmed u pʼoewchen e pi leʼengimed nge bitir romed, ni boʼor i yaed e rib simnguy laniyaenʼ mab muding mab mʼing dakean u pʼoewchen Got, ni aray e mitinʼen nib felʼ u waenʼ Got.

8 Ma gube lemnag ni karbaed ngaray ni ngar rungʼaged fare thin rokʼ Got nib gamog u wunʼuy, arragon, fare thin ni ma chuweg e denen royiy.

9 Ere, kar gu muchuch nga butʼ ko kirbaenʼ ni thingar gu rinʼ, ni bachan e motochiyel ni ke yib ngog rokʼ Got, ni nggu machib ngomed ni bachan e pi denen romed, mug gel nag e gafgowaenʼ ngakʼ e piʼin ni ke gafgowaenʼ raed, ni manga boech ma kar pired ni yaed ba falfalaenʼ; nge piʼin ni dawori gafgowaenʼ raed, ni gonpon e susun e ngar mur niged fare thin rokʼ Got nib gamog u wunʼuy, e kar gafgow gaed nga morngaʼagen e pi ngongol romed ni kireb nibe kaen ngoraed ma be gafgow nag laniyaenʼ raed.

10 Machane, yug aram rogon fini moʼomawʼ, ma thingar gu rinʼ ni boed rogon ni ke motochiyel nag Got, ni nggog ngomed ni rogon e pi ngongol nge denen romed ni ubchiyaʼ, u pʼoewchen e piʼin nib machalbog gumʼirchaʼraed, nge piʼin ni ke kalngaenʼ, u tan e gachin u oewchen fare Got ni Gubin ma ra yoeg rokʼ.

11 Ere, thingar gu weliy ngomed e tin riyulʼ ni rogon fini tamilang fare thin rokʼ Got. Ya musap gaed, napʼan nug meybil ngakʼ fare Somoel, ma aray rogon ni yib fare thin ngog ni gaʼar: Jacob, ngam man nga langgin fare temple gabul, ngam weliy fare thin ni bay gu piiʼ ngom ngakʼ e pi gidiiʼ ney.

12 Ere chiney musap gaed, pi walageg, ireray fare thin ni gube yoeg ngomed, ni boʼor i gimed e ke tabab i gay e gol, nge silber, nge gubin mit banʼen ni yib ko wasey nib felʼ, u lan e renam ney, ni ireray fare nam nni michmicheg ngomed nge pi bitir romed, ni gubin mit ma bay riy.

13 Nge paʼ e chaʼ nibe piiʼ e gabin ngomed e rib falfalaenʼ ngay ni be tawaʼath nagmed, ni ke yog nib yoʼor ngomed e falaʼab; ma bachan e bay bochi gimed ni ke yog ngakʼ nib yoʼor ngakʼ bochi walagmed ere kam langlang gaed ngalang u fithikʼ e ufʼuf u gumʼirchaʼmed, ma kam elʼel niged laniyaenʼmed ma kam tolang niged e tafnaey romed ni bachan e rib tolang puluwon e mad ni gimed be chuw ngay, mi gimed gafgow nag pi walagmed ni bachan e gimed be lemnag nib felʼ rogmed ngoraed.

14 Ere chiney, gimed pi walageg, gimed be lemnag ni Got e ra yoeg nib felʼ e romed riy u fithikʼ e pinnʼey? Musap gaed, gube yoeg ngomed ni, Dangaʼ. Ya be yoeg ni gimed ba kireb riy, ma faʼan gimed ra paer riy ni arragon u fithikʼ e pinnʼey ma pi gechig rokʼ e bay yib ni papay nge aw ngomed.

15 O gomanga yug muguyed ni rayog ni nge kurufmed e changar rokʼ, ma taʼareb e gachin u oewchen me piliyegmed ngam ngaelʼ gaed ni ab!

16 O gomanga yug muchuw gaed u fithikʼ e biney e dodow ko denen nge ngongolen e fananikan. Nge, O gomanga yug mmotoyil gaed ko fapi thin rokʼ ni be chiyliy, me siy mu paged nge paer ni re ufʼuf ney u gumʼirchaʼmed e nge gatheay e yaʼel romed!

17 Mu lemniged pi walagmed ni boed ni gimed ma lemniged gimed, mi gimed gol ngoraed ngam piiʼed boech banʼen romed ngoraed, ni gomanga falʼ rograed ni boed gimed.

18 Machane u mʼon ni ngam gayed e falaʼab, mu gayed fare gilʼilungun Got.

19 Ma tomuren ni ke yog ni dugil e tafnaey romed ngakʼ Kristus ma bay yog e falaʼab ngomed, ni faʼan gimed ra gay; ma ngam gayed ni fan e ngam rinʼed e tin nib mangil ngay—ni ngam piiʼed e mad ko piʼin dariy e mad roraed, mi gimed duruwiʼiy e piʼin ni kar mʼaed ko bilig, mi gimed pag e piʼin yaed bay u kalbus, mi gimed piiʼ e gapas nga laniyaenʼ e piʼin nib mʼar nge piʼin nib kirbaenʼ raed.

20 Ma chiney, gimed pi walageg, kug non ngomed ni morngaʼagen e ufʼuf; nge piʼ i romed ni ke gafgow nag laniyaenʼ e chaʼ ni buguliyoror romed, ma kam gafgow niged ni fan e kam ʼuf gaed u lan gumʼirchaʼmed, nga bogi banʼen ni Got e ke piiʼ ngomed, ere mang e nga moeged riy?

21 Damur lemniged ni mitinnʼey e rib fananikay fachaʼ niʼir e sunmiy gubin e gidiiʼ? Ma taʼareb rogon e gidiiʼ u waenʼ. Ma gubin e gidiiʼ ni sum ko ʼab; ma taʼareb rogon fan ni sunmiy raed, ni thingar rafol gaed ko pi motochiyel rokʼ mi yaed liyoer ngakʼ ni gubinechuboeg.

22 Ma chiney e nggu teleg i weliy ngomed morngaʼagen e ufʼuf. Faʼan manga dab gu weliy ngomed morngaʼagen ba denen nib ubchiyaʼ, ma gumʼirchaʼ rog e kari falfalaenʼ ni bachmed.

23 Machane fare thin rokʼ Got e be chuchuyeg nga butʼ ni bachan e pi denen romed ni ubchiyaʼ. Ya musap gaed, aray rogon ni yog fare Somoel: Pi gidiiʼ ney e arame bay ri ubchiyaʼ gaed nga fithikʼ e denen; dar yog ni ngar nanged fan e pi chep ni thothup, ya yaed be gay e towaey riy u napʼan ni yaed be rinʼ e tin nib galong, ni bachan e pinʼen nni yoloey ni morngaʼagen David nge Solomon ni fak.

24 Musap gaed, riyulʼ ni David nge Solomon e boʼor leʼengirow nge tugruw rorow, niʼir e thʼabi kireb u pʼoewcheg, ni yoeg fare Somoel.

25 Ere, baʼaray rogon ni yoeg fare Somoel, kug powiʼiy e pi gidiiʼ ney nga wuruʼ fare nam nu Jerusalem, u gelingin paʼag, ni manga yog ni gu sunmiy ni fan ngog ba tabinaew nib mangil u waʼamngin i yin Yosef.

26 Ere, gag fare Somoel ni Got e dab gupag e pi gidiiʼ ney ni ngar rinʼed ni boed rogon ni rinʼ pi kakrom.

27 Ere, pi walageg, mmotoyil gaed ngog, mi gimed fol ko fapi thin rokʼ fare Somoel: Dariy bi gimed ni nge yoʼor ko taʼareb leʼengin; ma dab mu tugruw gaed.

28 Ya gag, fare Somoel ni Got, e ba felʼ ko tafnaey rog ni nga i paer e piʼin nib ppin nib machalbog. Ma tin gathar e thʼabi kireb u pʼoewcheg; aray rogon ni yoeg fare Somoel ko Yoʼor.

29 Ere, pi gidiiʼ ney e ngar rafol gaed ko pi motochiyel rog, ni yoeg fare Somoel ko Yoʼor, ara dangay ma ra buch waʼathan e binaw ni bachraed.

30 Ya faʼan gura rinʼ, ni yoeg fare Somoel ko Yoʼor, ni nggu yung ba awoch ni fan ngog, ma gura chiyliy ngakʼ e gidiiʼ rog; ni ngar fol gaed ko pinnʼey.

31 Ya musap gaed, gag, fare Somoel, e kug gguy e kirbaenʼ, ma kug rungʼag e mayoer ni be tay e pi ppin ni fak e gidiiʼ rog u lan e nam nu Jerusalem, arragon, ngo lan gubin e pi nam ko gidiiʼ rog, ni bachan e denen ni ubchiyaʼ nge pi fananikan rokʼ e pi figirngiraed.

32 Ma dab gupag, ni yoeg fare Somoel ko Yoʼor, ni fapi mayoer ni ʼi tay e pi ppin ni pidorang ni fak e pi gidiiʼ ney, ni yaed faram e kug powiʼiyraed nga wuruʼ fare nam nu Jerusalem, ni nge yib ngog ni togopluw ngakʼ e pi pumoʼon ko gidiiʼ rog, ni yoeg fare Somoel ko Yoʼor.

33 Ya dabra wawliyed nga orel nga kalbus fapi ppin ni fak e gidiiʼ rog ni bachan e sumunguy roraed, ara dangay ma gura gechig nagraed ni ubchiyaʼ, nge madaʼ nga napʼan ni kan gathey raed; ya dab ur gathar gaed iyaen, ni boed rogon pi kakrom, ni yoeg fare Somoel ko Yoʼor.

34 Ere chiney e musap gaed, pi walageg, gimed manang ni pi motochiyel ney e ni piiʼ faram ngakʼ e chitamangdaed, i Lehi; ere, kagmed manang ko sommʼon, ere ma kam baed mu taw gaed ngay ni ke buch e romed; ya kam rinʼed e pinnʼey ni susun e dab mu rinʼed.

35 Musap gaed, kam taw gaed nga ba dodow ko kireb ni dawori taw fapi Lamanites ngay, ni walagdaed. Kam gafgow niged laniyaenʼ nge gumʼirchaʼen e pi leʼengimed nib sumunguy, ma kam dariy fan niged gimed u pʼoewchen e pi bitir romed, ni bachan e folwok romed nib kireb u pʼoewchraed; nge kirbaenʼ u gumʼirchaʼraed ni be yaen ngalang ngakʼ Got e yira togopluw nag ngomed. Ma fan e richirogon fare thin rokʼ Got, ni yibi togopluw ngomed, me yoʼor e pi gumʼirchaʼ ni yimʼ ko amith, ni ke moʼochʼoch ko kirbaenʼ.