1 Ere chiney, musap gaed, pi walageg, ni woed ni gu weliy ngomed ni bay gu prophesy, muguyed, ireray e pi prophecy rog—ni fapinʼen nre profet ney i Zenos e ke weliy, ni morngaʼagen fapi gidiiʼ ku Israel, niʼir faram e ke taʼareb nagraed nga bake gakʼiy ni olive ni fiʼiy, ni thangri yibi buch.

2 Nge fare rran ni ra kʼiyeg paʼ riy bayay ko yan lʼagruw yay ni ra kunuy e gidiiʼ rokʼ, e ireram e re rran, arragon, ni ireram e yan tomur, ni fapi tapigpig rokʼ fare Somoel e bay ranoed iyaen ni bay gelingin roraed, ni ngar fogloliyed mar thʼethʼaebed papaʼngin fapi yuke gakʼiy ko farengi mileayʼ rokʼ; ma tomuren e binem ma arame fare ngiyalʼ nib tomur e kari chugur ni bayi taw.

3 Ma rib felʼ waʼathan e piʼin ni muruwel u fithikʼ e lʼagaenʼ u lan farengi mileayʼ rokʼ; ma rib buch waʼathan e piʼin ni bay ni tharbog raed ko gin tagilʼraed! Ma fare fayleng e bayi moʼruf ko nifiy.

4 Ma rib sug e murnguy rokʼ e Got rodaed ngodaed, ya kumnang fapi gidiiʼ ku Israel, ni yow lʼagruw ni likʼngin nge papaʼngin; me kʼiyeg paʼ nga dakeanraed ni nge ayuwegraed ni poloʼ fare rran; ma rib ʼelʼel laniyaenʼ raed nge gidiiʼ ni ma non nib togopluw; machane oren e piʼin ni dabra ʼelʼel niged gumʼirchaʼraed e yaedra thap nga gilʼilungun Got.

5 Ere, piwalageg, gube wenig ngomed u fithikʼ e thin nib tamilang ni ngam kalngaenʼgaed, mi gimed yib u poloʼ i gumʼirchaʼmed, ngam chechʼeyed gimed ngakʼ Got ni woed nibe chechʼey ir ngomed. Nge ngiyalʼ ni ra kʼiyeg paʼ ngomed nib sug ko murnguy u lan e tamilang ni rran, ma dabmu ʼelʼel niged gumʼirchaʼmed.

6 Arragon, dabaʼ, e faʼan gimed ra rungʼag e thin rokʼ, ma dabmu ʼelʼel niged e gumʼirchaʼ romed; fa mangfan ni ngam mʼaed?

7 Ya musap gaed, tomuren ni kan chathowoliymed ko fare thin rokʼ Got nib mangil ni poloʼ e rran, ma gimed piiʼ e waʼamngin nib kireb, ma thingar ni thʼaebmed nga butʼ minʼinmed nga mite nifiy?

8 Musap gaed, gimed ra fek yathin e pi yu bugithin ney? Gimed ra fek yathin fapi thin ko fapi profet; ma gimed ra fek yathin gubin fapi thin ni kan weliy ni morngaʼagen Kristus, u tomuren ni aray fini yoʼor e piʼin ni kar weliyed morngaʼagen; mi gimed yoeg ni deriyulʼ fare thin nib mangil rokʼ Kristus, nge fare gelingin Got, nge fare tawaʼath ko fare Kan ni Thothup, mi gimed tileg gamʼingin fare Kan ni Thothup, mi gimed moning nag fare woʼen e bayul, ni kan tay ni fan ngomed?

9 Dam nanged ni faʼan gimed rarinʼ e pinnʼey, ma fare gelingin e bayul nge fare foskoyamʼ, niʼir e bay rokʼ Kristus, e ra fekmed ngam sakʼiy gaed u fithikʼ e tamraʼ nge mʼingaenʼ nga tagilʼ e pufthin rokʼ Got?

10 Ma rogon gelingin yalen e justice, ya yalen e justice e dabiyog i siyeg, ni thingar mmaroed nga langgin fare lupath ko nifiy nge dramrom, ni dabi math e dramrom riy, nge ath riy e be yaen ngalang ni dabi tal, nib lupath ko nifiy nge dramrom nib gechig ni dabi mʼay biʼid.

11 O ere, gimed piwalageg nib tʼuf rog, mu kalgaed ngaenʼmed, mi gimed yaen ko fare garog nib wuʼinʼin, mi gimed yaen ko re ginnʼem iyaen nib achig radan, nge madaʼ ko ngiyalʼ ni ke yog ngomed e yafos ni manemus.

12 O mu gonop yed; mang e kubay ni gura yoeg?

13 Ere fin aray, e nggu fingichiymed mug waen, nge madaʼ ko ngiyalʼ ni kug madaʼ nagmed u tagilʼ e pufthin rokʼ Got, ni ireray e re tagilʼ e pufthin ni ma gafgow e piʼin nib tadenen riy ko murus nge tamdag. Amen.