1 Ang mga pulong nga ginhambal ni Jacob nga utod ni Nefi, sa katawhan ni Nefi, pagkatapos sang pagkamatay ni Nefi:

2 Karon, pinalangga kong mga kauturan, ako, si Jacob, suno sa responsibilidad kon sa diin napaidalom ako sa Dios, sa pagtuman sing maayo sang amon palangakoan upod ang kaligdong, kag agud nga mahimo ko nga makakasan ang akon mga biste sang inyo mga sala, nagkadto ako sa templo sa sini nga adlaw agud nga mapahayag ko sa inyo ang pulong sang Dios.

3 Kag kamo mismo nakahibalo nga halin pa sadto nangin matutum ako sa palangakoan nga sa diin ako gintawag; apang ako sa sini nga adlaw ginapabug-atan sing tuman pa gid nga handum kag kabalaka para sa kaayohan sang inyo mga kalag sangsa sadto.

4 Kay tan-awa, tubtob sa sini nga tion, nangin matinumanon kamo sa pulong sang Ginuo nga akon ginhatag sa inyo.

5 Apang tan-awa, magpamati kamo sa akon, kag hibal-on nga paagi sa bulig sang labing gamhanan nga Tagtuga sang langit kag duta makasugid ako parte sang inyo mga panghunahuna, kon paano nga nagasugod kamo sa pagpakasala, nga ang amo nga sala tuman ka makangilil-ad sa akon, huo, kag makangilil-ad sa Dios.

6 Huo, nagapasubo ini sang akon kalag kag nagapalangupos ako sa kahuya sa atubang sang akon Tagtuga, nga kinahanglan gid nga magsaksi ako sa inyo parte sa kalainan sang inyo mga tagipusuon.

7 Kag nagapasubo man ini sa akon nga kinahanglan gid ako nga maggamit sing dako nga kaisog sa paghambal parte sa inyo, sa atubang sang inyo mga asawa kag inyo mga anak, nga ang madamo sa ila may mga balatyagon nga tuman ka sensitibo kag putli kag halalungan sa atubang sang Dios, nga ang amo nga butang nahamut-an sang Dios;

8 Kag sa panan-aw ko nga nagkadto sila diri sa pagpamati sang makapahamuot nga pulong sang Dios, huo, ang pulong nga nagapaayo sang napilasan nga kalag.

9 Gani, nabudlayan ang akon kalag nga mapilitan ako, tungod sang kaistrikto sang kasugoan nga akon nabaton halin sa Dios, sa pagpaandam sa inyo suno sa inyo mga krimen, sa pagpadako sang mga pilas sinang mga napilasan na ngadaan, imbes nga paumpawan kag paayohon ang ila mga pilas; kag inang mga wala pa mapilasan, imbes nga magpaayaw sa makapahamuot nga pulong sang Dios may mga sundang nga ginapaungot sa pagdulut sa ila mga kalag kag pagpilas sang ila halalungan nga mga kaisipan.

10 Apang, bisan pa sang kadakuon sang hilikuton, kinahanglan gid nga akon himuon suno sa istrikto nga mga kasugoan sang Dios, kag sugiran kamo parte sang inyo kalainan kag mga kangil-aran, sa atubang sang mga putli sing tagipusuon, kag sang masinulub-on nga tagipusuon, kag sa idalom sang pagpasiplat sang nagadulut nga mata sang Dios nga Makagagahum.

11 Gani, kinahanglan gid nga sugiran ko kamo sang kamatuoran suno sa kaathag sang pulong sang Dios. Kay tan-awa, sang ginpamangkot ko ang Ginuo, sa sini nga paagi nag-abot ang pulong sa akon nga nagasiling: Jacob, magtaklad ka sa templo sa buwas, kag ipahayag ang pulong nga ihatag ko sa imo para sa sining katawhan.

12 Kag karon tan-awa, mga kauturan ko, amo ini ang pulong nga akon ginapahayag sa inyo, nga madamo sa inyo ang nagsugod sa pagpangita sang bulawan, kag sang pilak, kag sang tanan nga sari sang malahalon nga mga milinahon, nga sa diin ini nga duta, nga isa ka duta sang panaad sa inyo kag sa inyo kaliwatan, tuman kabugana.

13 Kag ang kamot sang Dios labing nahamuot nga nagayuhum sa inyo, sa bagay nga nakaangkon kamo sang madamo nga manggad; kag tungod kay ang pila sa inyo nakaangkon sing mas bugana sangsa sina sang inyo mga kauturan nag-alsa kamo sa bugal sang inyo mga tagipusuon, kag nagpatiskog sang inyo mga liog kag nagpataas sang inyo mga ulo tungod sang pagkamalahalon sang inyo mga panapton, kag ginhingabot ang inyo mga kauturan bangod nagapati kamo nga mas maayo kamo sangsa ila.

14 Kag karon, mga kauturan ko, nagapati bala kamo nga ginapakamatarong kamo sang Dios sa sini nga butang? Tan-awa, ginasiling ko sa inyo, Wala. Kundi nga ginakondenar niya kamo, kag kon magpamilit kamo sa sining mga butang ang iya mga paghukom pat-od gid nga magatupa sing madasig sa inyo.

15 O kabay kuntani nga ipakita niya sa inyo nga mahimo niya kamo nga madutlan, kag sa isa ka pasiplat sang iya mata mahimo niya kamo nga sakiton paubos sa yab-ok!

16 O kabay kuntani nga hilwayon niya kamo halin sa sining kalainan kag kangil-aran. Kag, O kabay kuntani nga magapamati kamo sa pulong sang iya mga sugo, kag indi pag-itugot nga gub-on sining bugal sang inyo mga tagipusuon ang inyo mga kalag!

17 Panumduma ang inyo mga kauturan pareho sa inyo mga kaugalingon, kag mangin mainabyanon sa tanan kag maalwan sang inyo pagkabutang, agud nga mangin manggaranon sila pareho sa inyo.

18 Apang antes kamo magpangita sang manggad, pangitaa anay ninyo ang ginharian sang Dios.

19 Kag pagkatapos nga makaangkon kamo sing isa ka paglaum kay Cristo magaangkon kamo sing manggad, kon pangitaon ninyo ang mga ini; kag magpangita kamo sang mga ini para sa tinutuyo nga maghimo sang maayo—sa pagpabayo sang mga hublas, kag sa pagpakaon sang mga ginagutom, kag sa paghilway sang mga bihag, kag sa paghatag sing kaumpawan sa mga masakiton kag sa mga nagaantos.

20 Kag karon, mga kauturan ko, naghambal ako sa inyo parte sa bugal; kag ang iban sa inyo nga nagpaantos sang inyo isigkatawo, kag naghingabot sa iya bangod mga bugalon kamo sa inyo mga tagipusuon sang mga butang nga ginhatag sa inyo sang Dios, ano ang masiling ninyo parte sini?

21 Wala bala kamo nagapati nga ang amo sina nga mga butang mga kangil-aran sa iya nga nagtuga sang tanan nga unod? Kag ang tagsa ka tinuga pareho kamalahalon sa iya panulok. Kag ang tanan nga unod naghalin sa yab-ok; kag para sa amo man nga katuyoan gintuga niya sila, agud nga magtuman sila sang iya mga kasugoan kag maghimaya sa iya tubtob sa wala’y katapusan.

22 Kag karon ginatapos ko ang paghambal sa inyo parte sa sining bugal. Kag kon indi lamang nga kinahanglan ko gid nga maghambal sa inyo parte sa isa ka mas grabe nga krimen, ang akon tagipusuon magakasadya sing tuman tungod sa inyo.

23 Apang ang pulong sang Dios nagapabudlay sa akon tungod sang inyo mas grabe nga mga krimen. Kay tan-awa, ini ang siling sang Ginuo: Ining katawhan nagasugod sa pagdugang sa kalainan; wala nila mahangpi ang balaan nga mga kasulatan, kay nagatinguha sila sa pagpakamatarong sang ila mga kaugalingon sa paghimo sang mga pagpanghilawas, tungod sang mga butang nga nasulat parte kay David, kag kay Solomon nga iya anak.

24 Tan-awa, sanday David kag Solomon matuod gid nga may madamo nga asawa kag oloasawa, nga ang amo nga butang kangil-aran sa akon panulok, siling sang Ginuo.

25 Gani, amo ini ang siling sang Ginuo, gintuytuyan ko ining katawhan pagwa sa duta sang Jerusalem, paagi sa gahum sang akon butkon, agud nga makapabangon ako para sa akon sing isa ka matarong nga sanga halin sa bunga sang mga balikawang ni Jose.

26 Gani, ako nga Ginuong Dios indi magtugot nga ining katawhan maghimo sing pareho sa ila sang dumaan nga panahon.

27 Gani, mga kauturan ko, pamatii ako, kag dungga ang pulong sang Ginuo: Kay wala sing bisan isa ka lalaki sa tunga ninyo nga magaangkon luwas sa isa ka asawa; kag ang mga oloasawa indi sia dapat mag-angkon;

28 Kay ako, nga Ginuong Dios, nagakalipay sa kaputli sang mga babayi. Kag ang mga pagkamakihilawason mga kangil-aran sa akon atubang; amo ini ang siling sang Ginuo sang mga Kasoldadohan.

29 Gani, ining katawhan dapat magtuman sang akon mga kasugoan, siling sang Ginuo sang mga Kasoldadohan, indi gani pagasumpaon ang duta tungod sa ila.

30 Kay kon kabubut-on ko, siling sang Ginuo sang mga Kasoldadohan, nga magbangon sang kaliwatan para sa akon, suguon ko ang akon katawhan; apang kon indi magapamati sila sa sining mga butang.

31 Kay tan-awa, ako, nga Ginuo, nakakita sang kasubo, kag nakabati sang mga pagkalisud sang mga anak nga babayi sang akon katawhan sa duta sang Jerusalem, huo, kag sa tanan nga kadutaan sang akon katawhan, tungod sang kalainan kag mga kangil-aran sang ila mga bana.

32 Kag indi ko pag-itugot, siling sang Ginuo sang mga Kasoldadohan, nga ang mga pakitluoy sang matahum nga mga anak nga babayi sining katawhan, nga akon gindala pagwa sa duta sang Jerusalem, magalab-ot sa akon batok sa mga lalaki sang akon katawhan, siling sang Ginuo sang mga Kasoldadohan.

33 Kay indi nila dapat pagdal-on nga bihag ang mga anak nga babayi sang akon katawhan tungod sang ila kalulo, luwas lang nga bisitahon ko sila sing isa ka masakit nga sumpa, bisan pa tubtob sa kalaglagan; kay indi sila dapat maghimo sang mga pagkamakihilawason pareho sa ila sang dumaan nga panahon, siling sang Ginuo sang mga Kasoldadohan.

34 Kag karon tan-awa, mga kauturan ko, nakahibalo kamo nga ining mga kasugoan ginhatag sa aton amay, kay Lehi; gani, nahibal-an na ninyo ang mga ini sang una; kag nagdala sa inyo mga kaugalingon sang dako nga pagkondenar; kay ginhimo ninyo ining mga butang nga wala ninyo dapat ginhimo.

35 Tan-awa, nakahimo kamo sing mas dalagko nga mga kalainan sangsa mga Lamanhon nga aton mga kauturan. Ginbuka ninyo ang mga tagipusuon sang inyo mapinalanggaon nga mga asawa, kag gindula ang pagsalig sang inyo mga anak tungod sang inyo malain nga mga ehemplo sa ila atubang; kag ang mga paghibubun-ot sang ila mga tagipusuon nagalab-ot sa Dios batok sa inyo. Kag tungod sang kaistrikto sang pulong sang Dios, nga nagapanaog batok sa inyo, madamo nga tagipusuon ang nagkalamatay, nga natuhog sang madalom nga mga pilas.