1 Machane musap gaed, gag, Jacob, e gubaʼadag ni nggu non ngomed e piʼin nib machalbog gumʼirchaʼen. Mu changar gaed ngakʼ Got nib dugil laniyaenʼmed, mi gimed meybil ngakʼ u fithikʼ e mich, me falʼeg laniyaenʼmedʼ u fithikʼ e pi kirbaenʼ romed, me wenig nagmed ko oloboch romed, me piiʼ e gechig nge yib nga butʼ ngakʼ e piʼin ni yaed be gay rogon ni ngar gafgow niged gimed.

2 O gimed gubin e piʼin ni machalbog gumʼirchaʼen, mu puged oewchmed ngalang ngam thapeged fare thin ko mʼagaenʼ rokʼ Got, mi gimed mur nag e murnguy ni falfalaenʼ rokʼ, ya rayog, ni faʼanra dugil laniyaenʼmed ngakʼ, ni gubinechubog.

3 Machane, gafgow, nri gafgow, ngomed e piʼin ni de machalbog gumʼirchaʼen, ni gimed e piʼin ni gimed be rinʼ e ngongol ni dirngal e biney e rran u mit Got; ni faʼanra dab mu kalgaed ngaenʼmed ma bay gu kireb nag waʼathan e binaw nib fan ngomed; nge fapi Lamanites, ni dar rinʼed e ngognol ni dirngal ni boed rogmed, e yug aram rogon ni rib buch waʼathraed, ma yaedra gafgow nagmed nge madaʼ ko ngiyalʼ ni kam bilged tʼay e gafgow.

4 Ma fare ngiyalʼ innʼem e be yib ni rib papay, ni faʼanra dab mu kalgaed ngaenʼmed ma bay rabaed ngar suweyed fare binaw ni tafen med, nge fare Somoel ni Got e ra powiʼiy e piʼin nib matʼaw ngar chuw gaed u fithikʼmed.

5 Musap gaed, fapi Lamanites ni walagmed, ni gimed be fananikayed yaed ni bachan e pi ngongol roraed nib dirngal nge fare wol ni kireb ni ke aw nga wuruʼ i doewraed, e kuyaed ba yalʼuw buchʼuw ngomed; ya dawor ra paged talin fare motochiyel rokʼ fare Somoel, ni faʼan ni piiʼ ngakʼ e chitamangdaed—ni thingari ra beeʼ ma taʼareb leʼengin, ma dabra tugruw gaed, ma thingar dab ni rinʼ e ngongol ko gathar u fithikʼraed.

6 Ere chiney, re motochiyel ney e ngar fol gaed riy; ere, bachan e biney ni ngan rinʼ, ni ngan fol ko re motochiyel ney, ma fare Somoel ni Got e dab ki gatheayraed, machane bayi wurengaenʼ ngoraed; ma bayi rebo rran mar pired ni bogi gidiiʼ nifelʼ waʼathan.

7 Musap gaed, pi figirngiraed e yaed ma tʼufeg pi leʼengiraed, nge pi leʼengiraed e yaed ma tʼufeg pi figirngiraed; nge pi figirngiraed nge pi leʼengiraed e yaed ma tʼufeg e pi bitir roraed; ma michaenʼ roraed ni dariy nge fananikan roraed ngomed e bachan e denen rokʼ e pi chitamangraed; ere, ur fanam felʼ gaed ngoraed, u mit fare Tasunmiy romed?

8 O pi walageg, gube rus ngay ni faʼanra dab mu kalgaed ngaenʼmed ko pi denen romed ma ra wechwech yalchen i doewraed ngomed, u napʼan ni yira fekmed iyaen nga mit fare gilʼilngun Got.

9 Ere, ba motochiyel ni kug piiʼ ngomed, ni ir fare thin rokʼ Got, ni nge dab kum togopluw gaed ngoraed ni bachan e lumor u wuruʼ i doewraed; ara kudab kum togopluw gaed ngoraed ni bachan e pi ngongol roraed ni dirngal; machane thingari yib ngaenʼmed e tiromed e ngongol nib dirngal, ma nge yib ngaenʼmed ni pi ngongol roraed nib dirngal e yib ni bachan pi chitamangraed.

10 Ere, thingar mu tayed u wunʼmed e pi bitir romed, nge rogon ni kam amith niged gumʼirchaʼraed ni bachan fare falwok ni kam daged nga pʼoewchraed; nge ku arragon, ni ngam tayed u wunʼmed ni rayog, ni bachan e pi ngongol romed nib dirngal, mi gimed fek e pi bitir romed nga fithikʼ e gafgow, ma pi denen roraed e gimed rafek wengan ko fabin tomur e rran.

11 O pi walageg, mmotoyil gaed ko thin rog; mu gechgech gaed ngam gel niged laniyaenʼmed; mu ruruged gimed ni manga yigi yog nam odgaed ngam chuw gaed u fithikʼ fare denen; mi gimed pithigmed ko fare gechig nu infierno me yog ni siy mmanged boech e angel rokʼ fare moʼoniyanʼ, ni nga ninʼ med nga langgin e re lupath nir ko nifiy nge daramrom niʼir e bin lʼagruw e yamʼ.

12 Ma chiney e gag, Jacob, e kug weliy boech banʼen nib yoʼor ngakʼ fapi gidiiʼ ku Nephi, ni gube yog ngoraed nib togopluw ko iling u muchugbil nge dirngal nib galong, nge gubin mit e denen, ni gube yoeg ngoraed fini gaaʼ riyaʼen.

13 Ma raʼay guruy u morngaʼagen e tin ni irinʼ e tiney e gidiiʼ, ni ere chiney e be tabab ko yoʼor iyaen, ni dabiyog ni ngan yoloey nga dakean e tiney plates; machane boʼor i morngaʼagen e tin ni ur rinʼed ni kan yoloey nga dakean fayungin gaaʼ e plates, nge pi mael roraed, nge pi maleʼeg thin roraed, nge fapi lung ko pi pilung roraed.

14 Tiney e plates e kanoeg ni fapi plates ku Jacob, ni ra sum gaed u paʼ Nephi. Ere nggu tal i weliy e pi thin ney.