1 Kodwa bhekani, mina, Jakobe, ngizokhuluma kini enimsulwa enhliziyweni. Bhekani kuNkulunkulu ngokugxila komqondo, futhi nikhuleke kuye ngokholo olukhulu, futhi uyoniduduza ezinkathazweni zenu, futhi uyonikhulumela, futhi athumele ukulunga phezu kwalabo abafuna ukunibhubhisa.

2 O nonke nina enimsulwa enhliziyweni, phakamisani amakhanda enu namukele izwi elithokozisayo likaNkulunkulu, futhi nizitike othandweni lwakhe; ngokuba ningakwazi, uma imiqondo yenu igxilile, njalo.

3 Kodwa, maye, maye, kini eningekho msulwa enhliziyweni, nina eningcolile ngalolu suku phambi kukaNkulunkulu; ngokuba ngaphandle kokuthi niphenduke izwe liqalekisiwe ngenxa yenu; futhi amaLamani, angangcolile njengani, nokho aqalekiswe ngesiqalekiso esibuhlungu, ayonihlupha ngisho nize nibhubhe.

4 Futhi isikhathi siyeza masinyane, sokuthi ngaphandle kokuthi niphenduke ayolithatha izwe lenu eliyifa, futhi iNkosi uNkulunkulu iyohola abalungileyo baphume phakathi kwenu.

5 Bhekani, amaLamani abafowenu, enibazondayo ngenxa yokungcola kwabo kanye naleso siqalekiso eseza phezu kwezikhumba zabo, alunge kakhulu kunani; ngokuba awawukhohliwe umyalelo weNkosi, owanikwa ubaba—wokuthi kumele babe noyedwa kuphela umfazi, futhi izancinza bangabi nazo nasinye, futhi kungabi bikho bufebe obenzekayo phakathi kwabo.

6 Manje, lomyalelo bayazama ukuwugcina; ngalokho-ke, ngenxa yalokhu kuwugcina, lomyalelo, iNkosi uNkulunkulu ayiyikubabhubhisa, kodwa iyokuba nomusa kubo; futhi ngolunye usuku bayokuba ngabantu ababusisiwe.

7 Bhekani, abayeni babo bayabathanda abafazi babo, futhi abafazi babo bayabathanda abayeni babo; futhi abayeni babo kanye nabafazi babo bayabathanda abantwana babo, futhi ukungakholwa kwabo kanye nenzondo yabo kini kungenxa yobubi obukhulu boyise; ngalokho-ke, ngabe ningcono kangakanani nina kunabo, emehlweni oMdali wenu omkhulu na?

8 O bafowethu, ngiyesaba ukuthi ngaphandle kokuthi niphenduke ezonweni zenu ukuthi izikhumba zabo ziyokuba mhlophe kakhulu kunezenu, uma senilethwa kanye nabo phambi kwesihlalo sikaNkulunkulu.

9 Ngalokho-ke, ngininika umyalelo, oyizwi likaNkulunkulu, ukuthi ningabe nisabethuka nanini ngenxa yobumnyama bezikhumba zabo; noma nibethuke ngenxa yokungcola kwabo; kodwa nikhumbule ukungcola kwenu uqobo, futhi nikhumbule ukuthi ukungcola kwabo kweza ngenxa yoyise.

10 Ngalokho-ke, niyokhumbula abantwana benu, ukuthi nizidabukise kanjani izinhliziyo zabo ngenxa yesibonelo enisenze phambi kwabo; futhi phezu kwalokho, khumbulani ukuthi, ngenxa yokungcola kwenu, ningaletha abantwana benu ekubhujisweni, futhi izono zabo ziyonqwabelana phezu kwamakhanda enu ngosuku lokugcina.

11 O bafowethu, yizwani amazwi ami; vusani amandla emiphefumulo yenu; zithintitheni ukuze nivuke ebuthongweni bokufa; futhi nizikhulule ebuhlungwini besihogo ukuze ningabi yizingelosi kudeveli, ukuze niphoswe kulelochibi lomlilo kanye nesibabuli elingukufa kwesibili.

12 Manje mina, Jakobe, ngakhuluma eziningi kakhulu izinto kubantu baNefi, ngibaxwayisa ngokumelene nokuhlobonga kanye nenkanuko, kanye nayo yonke inhlobo yesono, ngibatshela ngomphumela omubi waso.

13 Futhi ingxenye yokwekhulu yezenzo zalaba bantu, manje abasebeqala ukuba baningi, ayizukubhalwa kulezi zingcwephe; kodwa eziningi zezenzo zabo zibhaliwe ezingcwepheni ezinkudlwana, nezimpi zabo, nemibango yabo, kanye nokubusa kwamakhosi abo.

14 Lezi zingcwephe zibizwa ngezingcwephe zikaJakobe, futhi zenziwa ngesandla sikaNefi. Futhi ngenza isiphetho sokukhuluma lamazwi.