1 Karon tan-awa, nahitabo nga ako, si Jacob, human makapangalagad og maayo sa akong katawhan pinaagi sa pulong, (ug dili ako makasulat apan sa diyotay ra sa akong mga pulong, tungod sa kalisod sa pagkulit sa among mga pulong diha sa mga palid) ug nahibalo kami nga ang mga butang nga among gisulat sa mga palid kinahanglang magpabilin;

2 Apan ang bisan unsa pa nga butang ang among isulat bisan asa gawas lang diha sa mga palid siguradong mangahanaw ra ug mangawala; apan makasulat kami og pipila ka pulong diha sa mga palid, nga maghatag sa among mga anak, ug usab sa minahal namong kaigsoonan, og gamay nga kahibalo mahitungod kanamo, o mahitungod sa ilang mga amahan—

3 Karon nalipay kami niining butanga; ug makugihon kaming naghago aron makulit kini nga mga pulong diha sa mga palid, nanghinaot nga ang minahal namong kaigsoonan ug ang among mga anak modawat niini uban sa mapasalamatong mga kasingkasing, ug mainampingong mobasa niini aron sila makakat-on uban sa kamaya ug dili sa kasubo, dili usab sa pagtamay, sa una nilang mga ginikanan.

4 Tungod kay, alang niini nga katuyoan gisulat namo kining mga butanga, aron sila masayod nga kami nakaila kang Kristo, ug aduna kami paglaom kami sa iyang himaya daghang gatosan ka tuig sa wala pa siya moanhi; ug dili kay kami lamang ang adunay paglaom sa iyang himaya, apan usab ang tanang balaan nga mga propeta nga nanag-una kanamo.

5 Tan-awa, nagtuo sila kang Kristo ug nagsimba sa Amahan pinaagi sa iyang ngalan, ug usab nagsimba kami sa Amahan pinaagi sa iyang ngalan. Ug tungod niini nga katuyoan gisunod namo ang balaod ni Moises, kay nagpunting kini sa among mga kalag ngadto kaniya; ug tungod niini nga hinungdan gibalaan kini sa Dios ngari kanamo isip usa ka matarong nga butang, kay giisip kini nga pagkamasulondon ni Abraham sa mga sugo sa Dios didto sa kamingawan ang paghalad sa iyang anak nga si Isaac, nga mao ang usa ka simbolikanhong paghulagway sa Dios ug sa iyang Bugtong Anak.

6 Busa, nangita kami sa mga propeta, ug aduna kami daghang pagpadayag ug espiritu sa pagpanagna; ug kay aduna kami sa tanan niini nga mga pagpamatuod naangkon namo ang usa ka paglaom, ug ang among pagtuo dili na matarog, hangtod nga kami sa pagkatinuod makahimo na sa pagsugo pinaagi sa ngalan ni Jesus ug ang mga kahoy, o ang mga bukid, o ang mga balod sa dagat motuman kanamo.

7 Bisan pa niana, gipakita sa Ginoong Dios kanamo ang among kahuyang aron among mahibaloan nga pinaagi sa iyang grasya, ug sa iyang walay kataposang mga pagpakigbagay ngadto sa anak sa mga tawo, nga kami adunay gahom sa pagbuhat niini nga mga butang.

8 Tan-awa, mahinungdanon ug kahibulongan ang mga buhat sa Ginoo. Pagka tulukibon sa giladmon sa iyang mga misteryo; ug imposibleng mahibaloan sa tawo ang tanan niyang mga paagi. Ug walay tawo nga masayod sa iyang mga paagi gawas kon ipadayag kini kaniya; busa, kaigsoonan, ayaw biaybiaya ang mga pagpadayag sa Dios.

9 Kay tan-awa, pinaagi sa gahom sa iyang pulong ang tawo miabot sa ibabaw sa yuta, diin nga yuta gilalang pinaagi sa gahom sa iyang pulong. Busa, kon ang Dios makahimo sa pagpamulong ug nalalang ang kalibotan, ug sa pagpamulong ang tawo nalalang, O unya, nganong dili man kaha makasugo sa yuta, o sa mga hinimo sa iyang mga kamot sa ibabaw niini, sumala sa iyang kabubut-on ug kahimuot?

10 Busa, kaigsoonan, ayaw tinguhaa ang pagtambag sa Ginoo, apan sa pagdawat og tambag gikan sa iyang kamot. Kay tan-awa, kamo mismo nahibalo nga motambag siya pinaagi sa kaalam, ug sa kaangayan, ug sa dakong kalooy, sa tanan niyang mga buhat.

11 Busa, hinigugmang kaigsoonan, pakig-uli kaniya pinaagi sa pag-ula ni Kristo, ang iyang Bugtong anak, ug makaangkon kamo og pagkabanhaw, sumala sa gahom sa pagkabanhaw nga anaa kang Kristo, ug ihalad ngadto sa Dios isip ang unang mga bunga ni Kristo, nga adunay pagtuo, ug nakaangkon og maayong paglaom sa himaya diha kaniya sa dili pa niya ipakita dinhi sa unod ang iyang kaugalingon.

12 Ug karon, mga hinigugma, ayaw kamo og kahibulong nga gisultihan ko kamo niining mga butanga; kay nganong dili man hisgotan ang mahitungod sa pag-ula ni Kristo, ug pagkab-ot og hingpit nga kahibalo kaniya, sama sa pagkab-ot sa kahibalo mahitungod sa pagkabanhaw ug sa kalibotan nga moabot?

13 Tan-awa, akong kaigsoonan, siya nga managna, patagnaa siya aron makasabot ang mga tawo; kay ang Espiritu mamulong sa kamatuoran ug dili mamakak. Busa, naghisgot kini sa mga butang kon unsa gayod ang ilang tinuod nga kinaiyahan karon, ug sa mga butang kon unsa gayod ang ilang tinuod nga kinaiyahan sa umaabot; busa, kining mga butanga gipakita ngari kanamo sa yano nga paagi, alang sa kaluwasan sa atong mga kalag. Apan tan-awa, dili lamang kita ang mga saksi niining mga butanga; kay gipamulong usab kini sa Dios ngadto sa karaang mga propeta.

14 Apan tan-awa, ang mga Judeo mga tikig og liog nga katawhan; ug gibiaybiay nila ang yano nga mga pulong, ug gipatay ang mga propeta, ug nangita sa mga butang nga dili nila masabtan. Busa, tungod sa ilang pagkabuta, ang pagkabuta nga midangat tungod kay mitan-aw sila lapas sa tumong, mapukan gayod sila; kay gibawi man sa Dios ang iyang pagkayano gikan kanila, ug gihatagan sila og daghang butang nga dili nila masabtan, tungod kay mao man kini ang ilang gitinguha. Ug tungod kay nagtinguha man sila niini gibuhat kini sa Dios, aron sila mapandol.

15 Ug karon ako, si Jacob, gidasig sa Espiritu ngadto sa pagpanagna; kay akong gibati pinaagi sa impluwensya sa Espiritu nga ania kanako, nga pinaagi sa pagkapandol sa mga Judeo ilang isalikway ang bato diin mahimo unta silang magtukod ug makaangkon og lig-ong tukoranan.

16 Apan tan-awa, sumala sa mga kasulatan, kini nga bato mahimong mao ang bantogan, ug ang kataposan, ug mao lamang ang lig-on nga tukoranan, nga katukoran sa mga Judeo.

17 Ug karon, akong mga hinigugma, sa unsa man nga paagi sila, human mosalikway sa lig-ong tukoranan, aduna pay higayon nga makatukod diha niini, aron kini mahimong ilang ulohang bato sa pamag-ang?

18 Tan-awa, akong hinigugma nga kaigsoonan, akong ibutyag kaninyo kini nga misteryo; kana kon dili ko, sa bisan unsang paagi, matay-og gikan sa akong pagkalig-on sa Espiritu, ug mapandol tungod sa akong labihan nga kahingawa alang kaninyo.