1 Chiney e musap gaed, yibi buch ni gag, Jacob, e ke yoʼor ni kug fil ko gidiiʼ rog ni sabethin, (ma dabiyog nuggu yoloey ma kemus ni buchʼuw e thin, ni bachan e rib moʼomawʼ i ker e thin romaed nga dakean e plates) ma gamaed manang ni pinʼen ni gamaed be yoloey nga dakean e pi yungi plates e thingari paer;

2 Machane demutrug banʼen ni kug yoloeyed nga dakean yug banʼen ni gathi plates e rra kireb nge mathmath me mʼay ngab yang; machane kemus ni buchʼuw e thin rayog ni nggu yoloeyed nga dakean e plates, niʼir e bayi piiʼ ngakʼ e pi bitir romaed, nge pi walagmaed nib tʼuf romaed, buchʼuw e naʼab ni morngaʼagdaed, ara morngaʼagen e pi chitamangraed—

3 Ere chiney e pinnʼey e gamaed ba falfalaenʼ ngay; ere gamaed be muruwel nib gel ni nggu kired e pi thin ney nga dakean e plates, ni gamaed be athapeg ni gomanga thap ngakʼ pi walagmaed nib tʼuf romaed nge pi bitir romaed u fithikʼ e falfalaenʼ, mar sap gaed ngay ni gomanga yog ni ngar nanged u fithikʼ e falfalaenʼ ma gathi kirbaenʼ, ma ku gathi fithikʼ e muning, ni morngaʼagen e tin sommʼon e gallabthir roraed.

4 Ya, arayfan ni kug yoloeyed e pinnʼey, ni gomanga yog ni ngar nanged ni gamaed manang Kristus, ma ke dugil laniyaenʼ maed ko rir rokʼ ni boʼor miriʼay e duw nga mʼon ko wub ni bayi tay; ma gathi kemus ni yigoʼ gamaed e ke dugil laniyaenʼ maed ko rir rokʼ, ya ku aram rogon ngakʼ gubin e pi profet ni ur moyed nga mʼon romaed.

5 Musap gaed, i michaenʼraed ngakʼ Kristus mar liyoer gaed ngakʼ fare Chitamangiy u fithingan, nge gamaed ni ka gamaed be liyoer ngakʼ fare Chitamangiy u fithingan. Ya baʼaray fan ni gamaed be chaʼariy fapi motochiyel rokʼ Moses, be yalʼuweg maed iyaen ngakʼ; ere aray rogon e nʼen ni rinʼ me yog nug malʼaf gaed ko denen mug pired ni kug mataw gaed, ni ku aram rogon ni piiʼ ngakʼ Abraham u lan wuruʼ e binaw ni nge fol ko fare motochiyel rokʼ Got ni yoeg ngakʼ ni nge piiʼ fak ni Isaac ni maligach, ni boed rogon Got nge Fak ni Maʼagirag Rokʼ.

6 Ere, gu filed fapi thin ni yoloey fapi profet, me yog ngomaed nib yoʼor e yiʼiy nge fare nangaenʼ ko prophecy; ere bachan e ke yog ngomaed e tiney e mich ma arame yog ngomaed ba athap, ma mich romaed e paer ni dakir rur, ni aramfan ni riyulʼ nuggu nonad u fithingan Yesus me fol e pi gakʼiy romaed, ara pi burey, ara pi nʼew nu maday.

7 Machane, fare Somoel ni Got e dag ngomaed e pi moʼowaer romaed ni gomanga yog nug nanged nu dakean e murnguy rokʼ, nge adag rokʼ ngakʼ fapi bitir ko gidiiʼ, me yog riy ni nge yib gelingmaed ni nggu rinʼed e pinnʼey.

8 Musap gaed, rib felʼ ma rib maʼangʼang fapi muruwel rokʼ fare Somoel. Ridawori arfini moʼomawʼ i pirʼeg e tin nib riyulʼ rokʼ nib miith; ma rib math liyiben me yog ni nge pirʼeg beeʼ gubin i kanawoʼen. Ma dariy beeʼ ni rayog ni nge nang rogon e pi kanawoʼ rokʼ ma kemus ni faʼan yira yiʼiy nag ngakʼ; ere, pi walageg, dab kum dariy fan niged fapi yiʼiy rokʼ Got.

9 Ya musap gaed, u dakean gelingin fare thin rokʼ me yog ni yib e gidiiʼ nga dakean e fayleng, ni fare fayleng ni sunmiy u dakean gelingin fare thin rokʼ. Ere, faʼanra Got e yog ni nge non me sum e fayleng, me non me sum e gidiiʼ, O ere, mangfan ni dabiyog ni nge taʼ morngaʼagen e fayleng, ara pinʼen ni muruwliy nga paʼ ni bay u dakean, ni boed rogon ni be finey ma baʼadag?

10 Ere, piwalageg, gathi ngam gayed rogon ni ngam fonow niged Somoel, ya ngam feked e fonow u paʼ. Ya musap gaed, gimed ma gimed manang niʼir e ma fonow u fithikʼ e gonop, ngu yalen e justice, ngu fithikʼ e murnguy, u poloʼ i gaʼangin e muruwel rokʼ.

11 Ere arfan, piwalageg nib tʼuf rog, ni ngam falʼeged thilmed u dakean e bayul rokʼ Kristus, ni Maʼagirag Rokʼ ni Fak, me yog e foskoyamʼ ngomed, u rogon fare gelingin fare foskoyamʼ niʼir e bay rokʼ Kristus, min fekmed ni gimed e tin sommʼon-i waʼamngin Kristus iyaen ngakʼ Got, nifan e mich romed, ma ke yog ngomed ba athap ko rir rokʼ nib mangil u mʼon ni nge yibi mʼug ni gidiiʼ.

12 Ere chiney, gimed e piʼin nib tʼuf rog, dab mu gingaed ngay ni kugog ngomed e pinnʼey; ya mangfan ni dab ni weliy morngaʼagen fare bayul rokʼ Kristus, me yog ni tamilang anʼuy u morngaʼagen, ni ku woed ni nge tamilang anʼuy u morngaʼagen ba foskoyamʼ nge reb e fayleng ni bay yib?

13 Musap gaed, piwalageg, chaʼ ni ma prophesy, e ngam paged nge prophesy ngan nang fan; ya fare Kan ni Thothup e mayoeg e tin riyulʼ ma darmabaen. Ere, ma weliy morngaʼagen bogi banʼen ni rogon ni bay, nge morngaʼagen bogi banʼen ni rogon ni bay yib; ere pinnʼey e kan dag ngodaed ni chirogon, ni fan ko thap rodaed ni poloʼ. Machane musap gaed, gathi kemus ni yigoʼ gadaed e mich ko pinnʼey; ya Got e ki weliy e pinnʼey ngakʼ e pi profet ni kakrom.

14 Machane musap gaed, fapi Jews e bogi gidiiʼ ni immoy nib ʼelʼel laniyaenʼ raed; ma kar dariy fan niged fapi thin nib tamilang, ma kar liiʼed fapi profet ngar mʼaed, mar gayed e tin baʼariy banʼen ni dabiyog ni ngar nanged fan. Ere, bachan e maʼew u oewcherad, nib maʼew ni ke yib ni fan e changar nge thumʼ nga wuruʼ fare pow, ere thingar ra mul gaed; ya Got e ke chuweg e tamilang rokʼ roraed, me piiʼ ngoraed nib boʼor ni bogi banʼen ni dabra nanged fan, ya aram rogon ni yaed baʼadag. Ere bachan e yaed baʼadag me rinʼ Got, ni nge yog ni tun ayraed.

15 Ere chiney e gag, Jacob, e ke wawliyeg fare Kan ni Thothup ni nggu prophesy; ya ba tamilang anʼug u rogon e pi muruwel ko fare Kan ni Thothup ni bay rog, ya dakean e mul nra tay fapi Jews e yaedra fek riy yathin fare war, niʼir e manga boech ma kar dumow gaed nga dakean me yog e dayif nib ayal ngoraed.

16 Machane musap gaed, rogon e pi chep ni thothup e, re malang ney e ra yaeni aw niʼir e thʼabi felʼ, nge ire tomur, ma kari mus e re dayif nib ayal, nu dakean e rayog ni nge dumow fapi Jews ngay.

17 Ere chiney, gimed e piʼin nib tʼuf rog, buʼuw rogon me yog ko pichaʼaney, u tomuren ni kar feked yathin fare dayif nib ayal, ma ku rayog ni ngar dumow gaed nga dakean, ni nge yog ni mang taʼan e dayif roraed?

18 Musap gaed, gimed pi walageg nib tʼuf rog, bay gu tamilngeg ngomed e tin riyulʼ nib miith; ni faʼan gura rinʼ, ni demutrug rogon, ma dabi worwar e tafnaey rog riy u rogon fini dugil laninʼug ngakʼ fare Kan ni Thothup, mug mul ni bachan e magafaenʼ rog ngomed.