1 Anajwan k’ehomaq reetal, kik’ulman naq laa’in, aj Jakob, chirix k’anjelak chi naab’al chiru lin tenamit rik’in aatin (ut ink’a’ naru nintz’iib’a yal ta ka’ch’in ajwi’ li waatin, xb’aan xch’a’ajkil xtz’iib’ankil li qaatin chiruheb’ perel ch’iich’), ut naqanaw naq li k’a’aq re ru naqatz’iib’a chiruheb’ perel ch’iich’ tento taakanaaq;

2 A’b’anan yalaq k’a’ru naqatz’iib’a chiru k’a’aq re ru chik li moko perel ch’iich’ ta tento taa’oso’q ut taasachmanq reetalil; a’ut naru naqatz’iib’a junjunq aatin chiruheb’ perel ch’iich’, li tixk’e reheb’ li qalal qak’ajol, jo’ ajwi’ eb’ li qas qiitz’in raarookeb’ qab’aan, jun ch’ina b’iisaq lix na’leb’eb’ chiqix, malaj chirixeb’ lix yuwa’eb’—

3 Anajwan rik’in li na’leb’ a’in nasaho’ qach’ool; ut nokok’anjelak chi yalb’il qaq’e re xtz’iib’ankil li aatin a’in chiruheb’ perel ch’iich’, ut naqayo’oni naq eb’ li qas qiitz’in li raarookeb’ qab’aan ut eb’ li qalal qak’ajol te’xk’ul a’an rik’in b’antioxink sa’ xch’ooleb’, ut te’iloq chiru, re naq te’xtzol rik’in sahil ch’oolejil, ut moko rik’in ta rahil ch’oolej, chi moko rik’in xik’ ilok, chirix li xb’een xna’ xyuwa’eb’.

4 Xb’aan naq a’in ajwi’ aj-e naq xqatz’iib’a li k’a’aq re ru a’in, re naq te’xnaw naq laa’o kiqanaw chirix li Kristo, ut ak qayo’on chaq lix loq’al k’iila cient chihab’ ma nak’ulun; ut moko ka’aj ta wi’ laa’o qayo’on chaq lix loq’al; jo’kaneb’ aj b’an wi’ chixjunil li santil profeet li ke’wan chaq junxil chiqu.

5 K’ehomaq reetal, eb’ a’an ke’xpaab’ li Kristo ut ke’xloq’oni li Yuwa’b’ej sa’ lix k’ab’a’, ut jo’kan ajwi’ laa’o naqaloq’oni li Yuwa’b’ej sa’ lix k’ab’a’. Ut a’in aj-e naq naqapaab’ lix chaq’rab’ laj Moises, rik’in naq naxb’eresi li qaam rik’in a’an; ut xb’aan a’in naq santob’resinb’il choq’ qe jo’ tiikilal, jo’ chanru ajwi’ naq kik’ehe’ sa’ ajl chirix laj Abraham sa’ li yamyookil ch’och’ naq ki’ab’in chiru lix taqlahom li Dios rik’in xmayejankil laj Isaak li ralal, a’ li wan choq’ reetalil li Dios ut li Ralal Junaj Chirib’il.

6 Jo’kan ut, naqatz’ileb’ rix li profeet, ut wan k’iila na’leb’ naqak’ul chi k’utb’esinb’il, ut li musiq’ej re profeetil aatin, ut rik’in chixjunil a’in li nak’utuk xyaalal qe, naqataw jun qayo’onihom, ut li qapaab’aal ink’a’ chik na’eek’an, jo’kan naq nokoru chi taqlank chi yaal sa’ xk’ab’a’ li Jesus ut toja’ eb’ li che’ neke’ab’in chiqu, malaj eb’ li tzuul, malaj lix b’oolam li palaw.

7 A’b’anan, li Qaawa’ Dios naxk’ut chiqu lix q’unal qametz’ew re naq taaruuq taqanaw naq a’ sa’ xk’ab’a’ li rusilal, ut xnimal lix kub’sihom rib’ choq’ reheb’ li ralal xk’ajoleb’ li winq, naq wan qawankil chixb’aanunkil li k’a’aq re ru a’in.

8 K’ehomaq reetal, ninq ut sachol ch’oolejeb’ lix k’anjel li Qaawa’. K’a’jo’ naq ink’a’ naru xtz’ilb’al rix xchamal lix muqmuukil na’leb’ a’an, ut moko naru ta naq li winq tixtaw xyaalal chixjunileb’ lix b’e. Ut maajun winq nanawok re lix b’e, ka’ajwi’ wi k’utb’esinb’il chiru; jo’kan ut, ex was wiitz’in, mixik’ eeril lix k’utb’esihom li Dios.

9 Xb’aan naq k’ehomaq reetal, rik’in lix wankilal li raatin ke’chal li winq sa’ xb’een li ruchich’och’, a’ li ruchich’och’ li kiyo’ob’tesiman rik’in lix wankilal li raatin. Jo’kan ut, wi li Dios kiru chi aatinak ut kiwan li ch’och’, ut chi aatinak ut kiyo’ob’tesiman li winq, k’a’ pe’ ut naq ink’a’ naru chixtaqlankil li ruchich’och’, malaj lix yiib’ahom li ruq’ li wan sa’ xb’een, jo’ chanru li naraj ut li nasaho’ wi’ xch’ool?

10 Jo’kan ut, ex was wiitz’in, meesik’ xk’eeb’al xna’leb’ li Qaawa’; sik’omaq b’an xk’ulb’al eena’leb’ sa’ ruq’. Xb’aan naq k’ehomaq reetal, laa’ex ajwi’ nekenaw naq a’an nak’ehok na’leb’ rik’in chaab’il na’leb’ank, ut rik’in tiik ruhil na’leb’, ut rik’in nimla uxtaan, sa’ xb’een chixjunil lix yiib’ahom.

11 Jo’kan ut, ex was wiitz’in raarookex inb’aan, k’amomaq wi’chik eerib’ sa’ usilal rik’in a’an, xb’aan lix tojb’al rix li maak xb’aan li Kristo, li Ralal Junaj Chirib’il, re naq teek’ul jun li wakliik chi yo’yo, jo’ chanru li wankilal re waklesink chi yo’yo li wan rik’in li Kristo, ut toxexk’ute’q jo’ li xb’een taa’uuchinq chiru li Kristo choq’ re li Dios, chi wanq eepaab’aal, ut eetawomaq xchaab’ilal eeyo’onihom chirix li loq’alil rik’in a’an, naq toj maji’ naxk’utb’esi rib’ sa’ li tz’ejwalej.

12 Ut anajwan, ex li raarookex inb’aan, misach eech’ool naq ninye eere li na’leb’ a’in, xb’aan naq k’a’ naq ink’a’ taa’uxq aatinak chirix lix tojb’al rix li maak xb’aan li Kristo, ut xk’eeb’al qach’ool chixtawb’al tz’aqal qana’leb’ chirix, jo’ ajwi’ chixtawb’al qana’leb’ chirix li wakliik chi yo’yo ut li ruchich’och’ li toj taachalq?

13 K’ehomaq reetal, ex was wiitz’in, li ani na’aatinak jo’ profeet, chi’aatinaq re taatawe’q ru xb’aaneb’ li winq, xb’aan naq li Musiq’ej naxye li yaal ut ink’a’ natik’ti’ik. Jo’kan ut, na’aatinak chirix li k’a’aq re ru jo’ chanru tz’aqal wan, ut chirix li k’a’aq re ru jo’ chanru tz’aqal taawanq; jo’kan ut, li na’leb’ a’in k’utb’esinb’il chiqu chi saqen ru, re xkolb’al li qaam. A’ut k’ehomaq reetal, moko qajunes ta naqaye qanawom chirix li k’a’aq re ru a’in; xb’aan naq li Dios kixye ajwi’ reheb’ li profeet najter.

14 A’ut k’ehomaq reetal, eb’ laj Judio ke’wan choq’ jun tenamit jipeb’ xk’a’uxl; ut xik’ ke’ril li aatin li saqen ru, ut ke’xkamsiheb’ li profeet, ut ke’xsik’ li k’a’aq re ru li ink’a’ ke’ru chixtawb’al ru. Jo’kan ut, sa’ xk’ab’a’ lix mutz’ileb’ ru, ut a’ mutz’ uhej a’an kichal xb’aan xq’axb’al li aajel raj ru xsik’b’al, tento te’t’ane’q, xb’aan naq li Dios kixmaq’ lix saqenkil ru chiruheb’, ut kixq’axtesi k’iila na’leb’ reheb’ li ink’a’ neke’ru chixtawb’al ru, xb’aan naq jo’kan ke’rataw. Rik’in ut naq ke’rataw a’an, li Dios kixb’aanu, re naq te’tichk’oq.

15 Ut anajwan laa’in, aj Jakob, k’amb’il inb’e xb’aan li Musiq’ej re tin’aatinaq jo’ profeet; xb’aan naq nink’e reetal rik’in li naxk’anjela wi’ li Musiq’ej wik’in, naq sa’ xk’ab’a’ lix tichk’ojikeb’ laj Judio eb’ a’an te’xtz’eqtaana li pek li ke’ru raj chi kab’lak wi’ re kawaq lix k’ojob’ankil.

16 A’ut k’ehomaq reetal, jo’ yeeb’il sa’eb’ li loq’laj hu, li pek a’in taa’ok choq’ li nim, ut li rosob’l, ut li jun ajwi’ chi tz’aqal k’ojleb’aal te’ruuq wi’ chi kab’lak laj Judio.

17 Ut anajwan, ex raarookex inb’aan, chanru taaruuq taa’uxq naq eb’ a’in, chirix naq xe’xtz’eqtaana li tz’aqal k’ojleb’aal, te’ruuq wi’chik chi kab’lak sa’ xb’een, re naq taa’ok a’an choq’ xjolomil lix xukeb’?

18 K’ehomaq reetal, ex was wiitz’in raarookex inb’aan, tinte cheru li muqmuukil na’leb’ a’in, wi chi yalaq chan ru ink’a’ na’eek’an inxaqxookilal sa’ li Musiq’ej, ut nintichk’ok sa’ xk’ab’a’ naq q’axal ink’a’uxl cherix.