1 Musap gaed, pi walageg, dakir yib ngaenʼmed ni kaʼam poeyed fapi thin rokʼ fare profet i Zenos, ni weliy ngakʼ fapi gidiiʼ ku Israel, ni gaʼar:

2 Mmotoyil gaed, O gimed e gidiiʼ ku Israel, ngam rungʼaged e pi thin rog, ni gag ba profet rokʼ fare Somoel.

3 Ya musap gaed, aray rogon ni yoeg fare Somoel, bay gu taʼareb nagmed, O gimed e gidiiʼ ku Israel, nga bake gakʼiy ni olive nifiʼiy, ni bay beeʼ nib moʼon ni fek nge yung nga mileayʼ rokʼ; me tugul, nge ilal, me tabab ko lʼud iyaen.

4 Me yibi buch ni fare masta ko farengi wuldug e yaen nga mileayʼ, me guy ni fare ke gakʼiy ni olive rokʼ e arame ke tabab ko lʼud iyaen; me gaʼar: Bay gu thʼethʼaeb papaʼngin, mug fofuʼog nge liyeg taʼaben, mug fogloliy, ni gomanga thethaey e noef riy nib mirerey, me paer ni dab ki yimʼ.

5 Me yibi buch ni thʼethʼaeb papaʼngin, me fofuʼog taʼaben iyaen, me fogloliy ni boed rogon e thin rokʼ ni yoeg.

6 Me yibi buch u tomuren ni boʼor e rran ni ke yaen ma arame thetheay nochi noef riy, nib achig mab mirerey; machane musap gaed, nga malʼugun e arame tabab ngay ni nge yimʼ iyaen.

7 Me yibi buch ni fare masta ko farengi mileayʼ e sap me guy, me gaʼar ngakʼ ba tapigpig rokʼ: Be kireb anʼug ngay ni ra yimʼ e re ke gakʼiy ney; ere, ngam man mu poef papaʼngin baken e gakʼiy ni olive ni pan, mag fek iyib ngog ngaray; ma gadow poefpoef e tin baʼaram i papaʼngin ni ke tabab ni nge yimʼ iyaen, ma gadow fek ngad yinʼew nga mite nifiy ni nge moʼoruf.

8 Ere musap gaed, i gaʼar fare Somoel ko farengi mileayʼ, nggu fek boech nib yoʼor e pi noef ney nib mirerey, nggu waen gu puthuy ko gin gubaʼadag; ma dariy fan ni faʼanra mus nga likʼngin e reke gakʼiy ney mangki yimʼ, ra buch ni rayog nugu ayuweg waʼamngin ni fan ngog; ere, bay gu fek e pi noef ney nib mirerey, nggu puthputhuy raed ko chigin gubaʼadag.

9 Gur e ngam fek fapi yupaʼ i noef ko fare ke gakʼiy ni olive ni pan, ngam puthuy ngay, nga luwan e tin baʼaram ni kug chuweg; ma tin baʼaram ni kug chuweg e bay gunʼ nga mite nifiy nge muʼuruf, ni nga dabi suguy dakean e buutʼ ko farengi mileayʼ rog.

10 Me yibi buch ni fare tapigpig rokʼ fare Somoel ko farengi mileayʼ e rinʼ ni rogon e thin ni yoeg fare Somoel ko farengi mileayʼ, me puthputhuy ngay fapi papaʼngin fare ke gakʼiy ni olive ni pan.

11 Ma fare Somoel ko farengi mileayʼ e guy rogon ni thingar ni fofuʼog taʼaben nge liyeg, man thʼethʼaeb papaʼngin, man fogloliy, ni be gaʼar ngakʼ fare tapigpig rokʼ: Be kireb anʼug ngay ni rayimʼ e rake gakʼiy ney; ere, sana rabuch ni rayog nugu ayuweg fapi likʼngin nge paer ni dabi yimʼ, ni gomanga yog nugu ayuwegraed ni fan ngog, arfan ni kug rinʼ e pinnʼey.

12 Ere, man mu rinʼ e tin ni gabe rinʼ, mag matangiy fare ke gakʼiy, mag fogloliy, ni boed rogon ni kugog.

13 Ma tin baʼaray e bay guwaen nggu yung ko gin thʼabi sobutʼ ko farengi mileayʼ rog, ni gin gubaʼadag ni nggu yung ngay, e dariy rogon ngom; ma gube rinʼ ni gomanga yog nug ayuweg fapi papaʼngin ni fan ngog ni yib ko fare ke gakʼiy; nge ku gomanga yog nugu chaʼariy waʼamngin ni bay riy ni fan ngog, bingyalʼ; Ya be kireb anʼug ngay ni rayimʼ e reke gakʼiy ney nge waʼamngin ni bay riy.

14 Me yibi buch ni fare Somoel ko farengi mileayʼ e arame yaen ko gin ni baʼadag ni nge sor ngay, nge yaeni mithaeg fapi papaʼngin ni yib ko fare ke gakʼiy ni olive ni fiʼiy ko gin thʼabi sobutʼ ko farengi mileayʼ, ni boech nga bayang ma boech nga bayang, ni be yaen u rogon nibe finey ma baʼadag.

15 Me yibi buch ni rib nʼuw napʼan ni ke yaen, ma fare Somoel ko farengi mileayʼ e gaʼar ngakʼ fare tapigpig rokʼ: Moy, nga darow ko farengi mileayʼ, ngad muruwliyew.

16 Me yibi buch ni fare Somoel ko farengi mileayʼ, nge fare tapigpig, e ranow ko farengi mileayʼ ni ngar muruwel gow. Me yibi buch ni fare tapigpig e gaʼar ko masta rokʼ: Musap, muchangar aray; am guy fare ke gakʼiy.

17 Me yibi buch ni fare Somoel ko farengi mileayʼ e sap me guy fare ke gakʼiy ni ir faram e fare papaʼngin fare ke olive ni pan e kan puthuy ngay; make tugul me tabab i piiʼ waʼamngin. Me guy ni rib mangil; ma waʼamngin ni bay riy e boed rogon waʼamngin e gakʼiy nif felʼ.

18 Me gaʼar ngakʼ fare tapigpig: Musap, fapi papaʼngin fare ke gakʼiy ni pan e ke tugul ni be un i fek rangin likʼngin fare ke gakʼiy, ma arame tugul likʼngin nge gel; ere bachan e ke gel likʼngin ma arame fapi yupaʼ i papaʼngin fare ke gakʼiy ni pan e kʼuf nge piiʼ e waʼamngin nib fel. Chiney, e faʼan gomanga daed puthuyew e pi papaʼngin ney ngay, make yimʼ e reke gakʼiy ney. Ere chiney e, musap, nggu chaʼariy e waʼamngin nib yoʼor, niʼir e ke piiʼ fare ke gakʼiy; nge pi waʼamngin riy e nggu chaʼariy ni fan ngog bingyalʼ.

19 Me yibi buch ni fare Somoel ko farengi mileayʼ e gaʼar ngakʼ fare tapigpig: Moy, nga darow ko fagin thʼabi sobutʼ ko farengi mileayʼ, ngad guyew, fapi yupaʼ i papaʼngin ni yib ko fare ke gakʼiy ko ke kʼuf nib yoʼor waʼamngin fa dawor, ni gomanga ki yog nug chaʼariy e waʼamngin, ni fan ngog bingyalʼ.

20 Me yibi buch ni arame ranow ko gin ni mithaeg fare masta fapi yupaʼ i papaʼngin riy ni yib ko fare ke gakʼiy, me gaʼar ngakʼ fare tapigpig rokʼ: Musap ko tiney, me sap me guy e tin sommʼon ni ke kʼuf nib yoʼor waʼamngin, ma arame ki guy nib mangil. Me gaʼar ngakʼ fare tapigpig: Mufek boech e waʼamngin riy, ngam taʼ, ni gomanga nge yog nug chaʼariy ni fan ngog bingyalʼ; ya musap, me gaʼar, ka aray nʼumngin i napʼan ni kug fogloliy, ma ke kʼuf nib yoʼor waʼamngin.

21 Me yibi buch ni fare tapigpig e gaʼar ngakʼ fare masta rokʼ: Mangfan ni mub ngaray ngam yung e reke gakʼiy ney, ara paʼney e paʼngin fare ke gakʼiy? Ya muguy, ireray e gin ni immoy ni dariy yongoʼolen e butʼ riy u dakean gaʼangin yang e mileayʼ rom.

22 Ma fare Somoel ko farengi mileayʼ e gaʼar ngakʼ: Dab mu fonow nigeg; Gu manang ni immoy ni bangi banʼen ni dariy yongoʼolen; ma, kugog ngom faram, ni kug fogloliy ni ka aray nʼumngin i napʼan, ma kamguy ni ke kʼuf nib yoʼor waʼamngin.

23 Me yibi buch ni fare Somoel ko farengi mileayʼ e gaʼar ngakʼ fare tapigpig rokʼ: Musap ngaray; muguy kug yung ba paʼ i paʼngin fare ke gakʼiy; ma gur e gamnang ni giney e butʼ e ba gel e kireb riy ko fagin sommʼon. Machane, muguy fare ke gakʼiy. Kug fogloliy ni ka aray nʼumngin i napʼan, make kʼuf nib yoʼor waʼamngin; ere, mu tʼaer ngam tay, ni nge yog nug chaʼariy nifan ngog bingyalʼ.

24 Me yibi buch ni fare Somoel ko farengi mileayʼ e ki gaʼar bayay ngakʼ fare tapigpig rokʼ: Musap aray, ngam guy kub paʼ e paʼangin, ni kug yung; muguy ni kuʼug fogloliy boech, make kʼuf ke yib waʼamngin.

25 Me gaʼar ngakʼ fare tapigpig: Musap aray ngam guy faken tomur. Musap, kaney e gu yung nga dakean bang e butʼ nib mangil; ma ka aray nʼumngin i napʼan ni kug fogloliy, ma kemus ni taʼ bochiyang ko fare ke gakʼiy e kʼuf ke piiʼ e waʼamngin nib fel, nge gin ni ke magaey ko fare ke gakʼiy e kʼuf ke piiʼ e waʼamngin ni pan; musap, kuʼug fogloliy e kaney e gakʼiy ni kuboed rogon fayu kenem.

26 Me yibi buch ni fare Somoel ko farengi mileayʼ e gaʼar ngakʼ fare tapigpig: Mu tʼaer ngam luf fapi papaʼngin ni dawori piiʼ e waʼamngin nib mangil, nga munʼ nga mite nifiy.

27 Machane, me gaʼar fare tapigpig ngakʼ: Ngad thʼethʼaebew papaʼngin, ma gado fofuʼog taʼaben nge liyeg, ma ka gadow fogloliy nge nʼuw napʼan buchʼuw, ma sana gomanga rayog ni kʼuf nge piiʼ e waʼamngin nib felʼ ngom, ni nge yog nam chaʼariy ni fan nga bingyalʼ.

28 Me yibi buch ni fare Somoel ko farengi mileayʼ nge fare tapigpig rokʼ fare Somoel ko farengi mileayʼ e ri fogloliyew gubin fapi waʼamngin ko farengi mileayʼ.

29 Me yibi buch ni nʼuw napʼan ni ke yaen, ma fare Somoel ko farengi mileayʼ e gaʼar ngakʼ fare tapigpig rokʼ: Moy, nga darow nga lan farengi mileayʼ, ni gomanga yog ni kud muruwel gow bayay u lan farengi mileayʼ. Ya musap, fare ngiyalʼ innʼem e be chugur iyib; ma tomuren e gabin e ke chugur ni nge taw; ere, thingar gu chaʼariy e waʼamngin ni fan ngog bingyalʼ.

30 Me yibi buch ni fare Somoel ko farengi mileayʼ nge fare tapigpig e ranow nga lan farengi mileayʼ; mar bow nga bake gakʼiy ni papaʼngin ni immoy riy e kan tetʼaer kan chuweg, ma fapi papaʼngin e gakʼiy ni pan e kan puthuy ngay; ere musap gubin mite waʼamngin ni ke suguy lʼugun fare ke gakʼiy.

31 Me yibi buch ni fare Somoel ko farengi mileayʼ e riʼ lamen boech fapi waʼamngin, ni gubin mit ni tabab ko tin yoʼor nge madaʼ ko tin nib lich. Ma fare Somoel ko farengi mileayʼ e gaʼar: Musap, ke aray nʼumngin i napʼan ni kad fogloliyew e reke gakʼiy ney, ma kug chaʼariy e waʼamngin nib yoʼor ni fan ngog bingyalʼ.

32 Machane musap, ngiyalʼ ney e piiʼ e waʼamngin nib yoʼor, ma dariy reb riy nib mangil. Ere muguy, gubin mit e waʼamngin nib kireb ma bay riy; ma dariy falʼngin ngog, ni yug aram rogon e muruwel nib gel ni kad tayew riy; ere chiney e be kireb anʼug ngay ni nge yimʼ e re ke gakʼiy ney.

33 Ma fare Somoel ko farengi mileayʼ e gaʼar ngakʼ fare tapigpig: Mang e ngad rinʼew ko fare ke gakʼiy, ni gomanga yog nuggu chaʼariy bayay e waʼamngin riy nib mangil ni fan ngog.

34 Ma fare tapigpig e gaʼar ngakʼ e masta rokʼ: Musap, bachan e kam puthuy ngay fapi yu papaʼngin fare ke gakʼiy ni olive ni pan ma kar ayuweged ke lʼeag pi likʼngin, ni kar pired ni yaed ba fos ma dawor ra mʼaed; ere muguy ni kuyaed ba mangil

35 Me yibi buch ni fare Somoel ko farengi mileayʼ e gaʼar ngakʼ fare tapigpig rokʼ: Fare ke gakʼiy e dariy falʼngin ngog, nge pi likʼngin ni bay riy e dariy falʼngin ngog ni nʼumngin i napʼan ni bay i piiʼ waʼamngin nib kireb.

36 Machane yug aram rogon, ma gumnang ni pi likʼngin e ba mangil, ma baʼfan ni gube lemnag ere kug ayuwegraed, ere bachan e kar pired nib gel ke madaʼ ko ngiyalʼ ney ere kar piiʼed e waʼamngin nib mangil ko fayupaʼ i paʼngin ni pan.

37 Machane musap, fapi papaʼngin ni pan e ke tugul nib yoʼor ni dakur yog gaed u likʼngin fare ke gakʼiy; ere bachan fapi papaʼngin ni pan e ke yoʼor ni dab kiyog ko fapi likʼngin ere ke kʼuf nib yoʼor waʼamngin nib kireb; ma ku bachan e ke kʼuf nib yoʼor waʼamngin nib kireb ere arfan ni kam guy ni arame be sonon iyaen; ni dakuriy napʼan me lʼud, min fek nga ninʼ nga mite nifiy, ma kemus ni faʼanra kubay banʼen ni rayog ni ngad rinʼew ngay nge paer nib dammol.

38 Me yibi buch ni fare Somoel ko farengi mileayʼ e gaʼar ngakʼ fare tapigpig rokʼ: Mman nga darow ko gin thʼabi sobutʼ ko farengi mileayʼ, ngad guyew fapi yupaʼ i papaʼngin ni yib ko fare kenggin ko ki piiʼ e waʼamngin nib kireb fadawor.

39 Me yibi buch ni arame ranow nga lan fagin thʼabi sobutʼ ko farengi mileayʼ. Me yibi buch ni arame ruguyew ni waʼamngin fapi yupaʼ i papaʼngin ni yib ko fare kenggin e ki kireb; arragon, fatin sommʼon, nge fatin migid, nge fatin tomur; e gubin ma ke kireb.

40 Ma fapi waʼamngin e gakʼiy ni pan ko yupaʼ ni tomur e ke gel faraed ko fayu paʼanem i paʼangin fare ke gakʼiy niʼir e ma piiʼ e waʼamngin nib mangil, ni mus ko fapi paʼngin make lʼud nge yimʼ.

41 Me yibi buch ni fare Somoel ko farengi mileayʼ e yoer, me gaʼar ngakʼ fare tapigpig: Mang e kubay ni gurarinʼ ko mileayʼ rog?

42 Musap, u gunang ni gubin fapi waʼamngin ko farengi mileayʼ ni ke kireb, ma kemus ni yigoʼ tiney. Ere chiney e tiney ni immoy ni i piiʼ e waʼamngin nib mangil e ki kireb; ere chiney gubin fapi gakʼiy ko farengi mileayʼ rog e dakuriy banʼen ni yaed ba felʼ ngay ma kemus ni ngan thʼaeb nga butʼ ma ninʼ raed nga mite nifiy.

43 Ere muguy e tiney ni tomur, ni paʼngin e ki yimʼ, ma rug yung ko gin nib mangil e butʼ riy; arragon, niʼir e thʼabi gubaʼadag u fithikʼ gubin yang i butʼan farengi mileayʼ rog.

44 Ma kamguy niku kug thʼaeb nga butʼ e tin nike suguy dakean e giney e butʼ, ni nge yog ni nggu yung e kaney e gakʼiy ngay.

45 Ma kamguy ni bang ko kaney e ke piiʼ e waʼamngin nib mangil, nge bang riy e ke piiʼ e waʼamngin e gakʼiy ni pan; ere bachan e dag thʼaeb e tinem e paʼngin ni bay riy nggunʼ nga mite nifiy, ere muguy, ke gel faraed ko fatinem e paʼngin nib mangil kar thanged mit kar mʼaed.

46 Ere chiney, musap, yug aram rogon gelingin e muruwel nge ayuw ni kad tayew ko mileayʼ rog, ma fapi gakʼiy ni bay u dakean e ke misilpig, ni be piiʼ e waʼamngin ni kireb; ma tiney e kuʼug athapeg ni nge yog ni nggu saʼaʼayuweg, ni nge yog ni nggu fek e waʼamngin riy nggu tay ni fan ngog bingyalʼ. Machane, musap, kar boeded fayu kenem e gakʼiy ni olive ni pan, ma dakuriy falʼngiraed ngab yang ere kemus ni ngan thʼaeb raed nga butʼ ma ninʼ raed nga mite nifiy; ma ribe kireb anʼug ngay ni ngar mʼaed.

47 Machane mang e kubay ni kug rarinʼ u lan farengi mileayʼ rog? Gulley gu warwareg paʼag i muruwliy, mug pag ni dag fogloliy? Dangay, kuʼug fogloliy, ma kug fofuʼog taʼaben nge liyeg, ma kug thʼethʼaeb papaʼngin, ma kug tay e yongoʼol ngay; ma dar tal paʼag ko muruwel riy nib chugur ni nge poloʼ rebo rran riy, ma fare tomur e ke chugur iyib. Ma be kireb anʼug ngay ni thingar gu thʼethʼaeb nga butʼ gubin fayuke gakʼiy ko farengi mileayʼ rog, ni gunʼ nga mite nifiy ngar moʼruf gaed. Miniiʼ e chaʼ ni ke kireb nag e mileayʼ rog?

48 Me yibi buch ni fare tapigpig e gaʼar ko masta rokʼ: Gathi gomanga bachan e kan pag ke nʼunʼuw e gakʼiy ngalang ko farengi mileayʼ rom—gathi fapi papaʼngin ni bay riy e kegel ko fapi likʼngin ni bay riy nib mangil? Ma bachan e kegel fapi papaʼngin ko fapi likʼngin ni bay riy, ere muguy kar tugul gaed nib papay nge pag nga rogon i gelingin fapi likʼngin, ya kar feked gelingin ngoraed. Musap, gube gaʼar, gathi ireray fan ni fapi yuke gakʼiy ko farengi mileayʼ rom e kireb rogon?

49 Me yibi buch ni fare Somoel ko farengi mileayʼ e gaʼar ko fare tapigpig: Mman nga darow ngad thʼethbew nga butʼ fapi gakʼiy ko farengi mileayʼ ngad yinʼew nga mite nifiy, ni nga dabra suguyed dakean farengi mileayʼ rog, ya kug muʼ i rinʼ e tin ni nggu rinʼ. Mang e kubay ni gura rinʼ ko mileayʼ rog?

50 Machane, musap, i gaʼar fare tapigpig ngakʼ fare Somoel ko farengi mileayʼ; mu tay nge nʼuw napʼan boech.

51 Ma fare Somoel e gaʼar: Arragon, bay gu tay nge nʼuw boech napʼan, ya be kireb anʼug ngay ni nggu dar gaed fapi gakʼiy ko mileayʼ rog.

52 Ere, man ngad fekew boech fapi papaʼngin nug yung ko fayungin nib sobutʼ ko farengi mileayʼ rog, ngad puthuyew raed ko fare ke gakʼiy ni rabaed riy; ma ngad poefew nge chuw ko fare ke gakʼiy, fatinem e papaʼngin nib moʼoy waʼamngin, ma gadow puthuy ngay fapi yupaʼ i papaʼngin ni yib ko fare ke gakʼiy.

53 Ma biney e nggu rinʼ ni fare ke gakʼiy e gomanga yog ni paer ni dabi yimʼ, ma sana, rayog nug ayuweg fapi likʼngin ni bay riy ya baʼ fan ni gube lemnag.

54 Ma, musap, fapi likʼngin ko fapi yupaʼ i papaʼngin ni yib ko fare ke gakʼiy niʼir e guyung ko fagin nug baʼadag e kubay ni kabfos; ere nga kug ayuwegraed ni baʼfan ni gube lemnag, bay gufek boech i papaʼngin e kaney e gakʼiy, ma bay gu puthuy raed ngoraed. Arragon, bay gu puthuy ngoraed fapi papaʼngin ko fare ke gakʼiy ni chitiningraed, ni gomanga yog ni kug ayuweg likʼngin ni fan ngog, ya napʼan ni kar gel gaed ma sana rayog ni ngar piiʼed e waʼamngin nib mangil ngog, ma gomanga yog ni gu falfalaenʼ ko fapi waʼamngin ko farengi mileayʼ rog.

55 Me yibi buch ni ra fekew ko fare ke gakʼiy nib felʼ ni ke ngaelʼ ni gakʼiy ni pan, ngar puthuyew ko fayu kenem e gakʼiy nib felʼ, niki ngaelʼ ni gakʼiy ni pan.

56 Ma kur fekew ko fayu kenem e gakʼiy nib felʼ ni ke ngaelʼ gakʼiy ni pan, ngar puthuyew ko fare ke gakʼiy ni chitiningraed.

57 Ma fare Somoel ko farengi mileayʼ e gaʼar ngakʼ fare tapigpig: Dab mu poef ngam chuweg fapi papaʼngin e gakʼiy ni pan ko fayu ke gakʼiy, ma kemus ni yigoʼ tin thʼabi gel e moʼoy riy; ma ngam puthuy ngay ni boed rogon ni kugog.

58 Mag do fogloliy bayay fayu ke gakʼiy ko farengi mileayʼ mag do thʼethʼaeb fapi papaʼngin ni bay riy; mag do poef ko fayu ke gakʼiy e tin baʼaram e paʼangin ni ke lʼud, ni thingari yimʼ, ngad yinʼew nga mite nifiy.

59 Ma nggu rinʼ e biney ni, gomanga, fapi likʼngin ni bay riy e lʼeag me gel ni bachan e yaed e tin nib felʼ; nge bachan e thilyeg ni kan tay ko fapi papaʼngin, ma tin nib felʼ e rayog ni gel ko tin nib kireb.

60 Ere bachan e kug ayuweg fapi papaʼngin ni yib ko fare ke gakʼiy nge fapi likʼngin ni bay riy, ma kug puthuy ngay fapi papaʼngin ni yib ko fare ke gakʼiy bayay ni chitiningraed, ma kug ayuweg fapi likʼngin fare ke gakʼiy ni chitiningraed, ni sana, fayu ke gakʼiy ko farengi mileayʼ rog e rayog ni piiʼ bayay e waʼamngin nib mangil; me yog nug falfalaenʼ bayay nga waʼamngin farengi mileayʼ rog, ma, sana, rayog nug falfalaenʼ ni rib gel ni kug ayuweg fapi likʼngin nge fapi yupaʼ i papaʼngin fatin sommʼon e waʼamngin—

61 Ere, mman ngam pining boech e tapigpig, ni nge yog ni ngad gonopiyed rogon e muruwel u poloʼ i gelingdaed u lan farengi mileayʼ, ni nge yog ni ngad tʼaered midlen i woʼen, ni gomanga yog ngog bayay e waʼamngin nib felʼ, nib waʼamngin nib felʼ nib mangil ma ire thʼabi felʼ u fithikʼ gubin mit e waʼamngin.

62 Ere, man nga darow ngad muruwel gow u poloʼ i gelingdow ko yan tomur, ya musap fare tomuren e be chugur iyib, ma ireray e yan tomur ni nggu thʼethʼaeb papaʼngin e gakʼiy u mileayʼ rog.

63 Mu puthuy ngay fapi papaʼngin; mu tabab ko tin tomur ni nge yog ni ngar manged e tin mʼon, ma nge yog ni tin mʼon e nge tomur, mag fofuʼog taʼaben fayu ke gakʼiy nge liyeg, ni tin nib ilal nge madaʼ ko tin nib bitir, ni tin mʼon nge tin tomur; nge tin tomur nge tin mʼon, ni nge yog ni gubin min fogloliy bayay ko yan tomur.

64 Ere, mu fofuʼog nge liyeg taʼaben, mag thʼethʼaeb papaʼngin fayuke gakʼiy, mag tay e yongoʼol ngay taʼabyay, ko yan tomur, ya fare tomuren e ke chugur iyib. Ma faʼanra tiney ni tomur e puthuy ni ngan tay ngay e ra tugul riy, me kʼuf nge piiʼ e waʼamngin nib felʼ, me ere ngam tʼaer midlen i woʼen, me yog ni ngar tugul gaed.

65 Ma napʼan ni yaedra tabab ko tugul mag chuweg fatinem e papaʼngin niʼir e be piiʼ e waʼamngin nib moʼoy, nibe yaen u rogon gelingin e tin nib mangil ni bay riy nge rogon gaʼangin; ma dab mu chuweg nge chuw e tin nib kireb ni bay riy ni gubin taʼabyay, ya fapi likʼngin ni bay riy e yug ragel ko fapi paʼangin ni kan puthuy ngay, nge fapi paʼangin ni kan puthuy ni bay riy e rayimʼ, mug dar gaed fayu ke gakʼiy ko farengi mileayʼ rog.

66 Ya be kireb anʼug ngay ni ngu dar gaed fayu ke gakʼiy ko farengi mileayʼ rog; ere, ngam chuweg nge chuw e tin nib kireb ni be yaen u rogon ni be tugul e tin nib mangil, ni nge yog ni fapi likʼngin nge mallʼugun e paer ni taʼareb gelingin, nge yaeni madaʼ ko ngiyalʼ ni ke gel e tin nib mangil ko tin nib kireb, ma tin nib kireb e ngan thʼaeb nga butʼ nga ninʼ nga mite nifiy, ni nga dabra suguyed dakean e buutʼ ko farengi mileayʼ rog; ma arame bay gu wolguy nggu chuweg e tin nib kireb u dakean e mileayʼ rog.

67 Nge fapi papaʼngin ni yib ko fare ke gakʼiy nib felʼ e bay gu puthuy bayay ko fare ke gakʼiy nib felʼ;

68 Nge fapi papaʼngin ko fare ke gakʼiy nib felʼ e bay gu puthuy ko fapi papaʼngin nib felʼ ko fare ke gakʼiy; ma aram rogon ni bay gu sulweg raed nga taʼabang bayay, ni ngar piiʼed e waʼamngin nib felʼ, mar pired ni kar taʼareb gaed.

69 Nge tin nib kireb e ngan nʼaeg, arragon, nga wuruʼ gaʼangin yang e binaw ko farengi mileayʼ rog; ya muguy, ireray e yan tomur ni nggu thʼethʼaeb paʼangin e gakʼiy u mileayʼ rog.

70 Me yibi buch ni fare Somoel ko farengi mileayʼ e lʼoeg fare tapigpig rokʼ; ma fare tapigpig e yaen nge rinʼ ni boed ni chiyliy fare Somoel ngakʼ, me yaeni fek in e tapigpig; ni dar yoʼor gaed.

71 Ma fare Somoel ko farengi mileayʼ e gaʼar ngoraed: Mmaroed, ngam muruwel gaed u lan farengi mileayʼ, u poloʼ i gelingmed. Ya musap gaed, ireray e yan tomur ni nggu fogloliy e mileayʼ rog; ya fare tomur e kari chugur ni nge taw, ma fare ngiyalʼ innʼem e be yib ni rib papay; ma faʼan gimed raʼun ngog ngam muruwel gaed u poloʼ i gelingmed ma rayog e falfalaenʼ ngomed ko fapi waʼamngin niʼir e bay gufek nggu chaʼariy ni fan ngog ko fare ngiyalʼ innʼem ni bay yib ni dab ki nʼuw napʼan.

72 Me yibi buch ni fapi tapigpig e ranoed ngar muruwel gaed u poloʼ i gelingraed; ma fare Somoel ko farengi mileayʼ e un ngoraed ko muruwel; mar fol gaed kopi motochiyel rokʼ fare Somoel ko farengi mileayʼ u fithikʼ gubin banʼen.

73 Ma arame tabab iyib e waʼamngin nib felʼ bayay ngalan farengi mileayʼ; nge fapi papaʼngin nib felʼ e tabab ko tugul me ilal ni rib papay; ma fapi papaʼngin ni ke ngaelʼ ni pan e ni tabab i poef ngan nʼaeg; mar tayed likʼngin nge malʼugun ni bay riy ni taʼareb rogon, ni be yaen u rogon gelingin fare ke gakʼiy nib felʼ.

74 Ere aray rogon nra muruwel gaed, u fithikʼ e lʼagaenʼ, nrogon fapi motochiyel rokʼ fare Somoel ko farengi mileayʼ, ni aram rogon nge madaʼ ko ngiyalʼ ni fa tin nib kireb e kan chuweg ko farengi mileayʼ, ma fare Somoel e ke ayuweg ni fan ngakʼ fayuke gakʼiy ma kar ngaelʼ gaed bayay ni fare waʼamngin nib felʼ; mar manged taʼab dowef; nge fapi waʼamngin e taʼab rogon; ma fare Somoel ko farengi mileayʼ e ke chaʼariy ni fan ngakʼ fare waʼamngin nib felʼ, niʼir e thʼabi tʼuf rokʼ ni aram ko sommʼon iyib.

75 Me yibi buch u napʼan ni guy fare Somoel ko farengi mileayʼ fapi waʼamngin rokʼ nib mangil, nge farengi mileayʼ rokʼ ni dakuriy e kireb riy, me pining fapi tapigpig rokʼ, me gaʼar ngoraed: Musap gaed, ireray e yay ni tomur ni kad fogloliyed e mileayʼ rog; ma kam guyed ni kug rinʼ ni boed rogon ni gubaʼadag; ma kug chaʼariy ni fan ngog fare waʼamngin nib felʼ, ni rib mangil, nri boed rogon ni immoy ko sommʼon. Ere nge felʼ waʼathmed; ya kuʼum yulʼyulʼ gaed i un ngog ko muruwel u lan farengi mileayʼ rog, ma kam fol gaed ko fapi motochiyel rog, ma kam yog niged ngog bayay fare waʼamngin nib felʼ, ma farengi mileayʼ rog e dakuriy e kireb riy, ma fapi kireb e kan chuweg, ere muguyed ngam uned ngog ko falfalaenʼ ni bachan e waʼamngin farengi mileayʼ rog.

76 Ya musap gaed, rib nʼuw napʼan ni gura tay fapi waʼamngin farengi mileayʼ rog ni fan ngog bingyalʼ, nibe yib ni rib papay; ma ireray e yan tomur ni kug fogloliy farengi mileayʼ rog, ma kug thʼethʼaeb papaʼngin, ma kug fofuʼog taʼaben nge liyeg, ma kug tay e yongoʼol ngay; ere bay gu chaʼariy rog fare waʼamngin, ni rib nʼuw napʼan, u rogon e pinʼen ni kug weliy.

77 Ma napʼan nra taw ko fare ngiyalʼ innʼem ni fare waʼamngin ni kireb e kesul bayay ngalan farengi mileayʼ rog, ma arame bay gguy rogon nge mukun e felʼ me mukun e kireb; ma tin nib felʼ e gura chaʼariy rog, ma tin nib kireb e gura chuweg nggu tay ko gin tagilʼ. Ma fin arame ke taw ko fare ngiyalʼ innʼem nike taw ko tomur; ma farengi mileayʼ rog e bay gu urufiy ko nifiy.