1 Ao ngkai, tariu aika kam tangiraki, n aron are I taekinna nakoimi bwa N na moana au taetae ni burabeti, taraia, aio kanoan au taeka ni burabeti—bwa bwaai ni kabane ake e taekin Tinoti, aika taekan te bata are Iteraera, are e kabootauia iai ma te kai te oriwa ae ribanaki, a na bon bane ni koro bukiia.

2 Ao n te bong are e arora iai baina n te kauatai ni kamaiuia ana botanaomata, ao bon te bong, eng, ae te kabanea n tai are a na nako iai ana tia mwakuri te Uea ni mwaakana, bwa a na kamwarakea ma ni kaitiaka ana nne ni kurebe; ao i mwin aio ao e na roko te toki.

3 Ao a na kakabwaiaki ake a tia ni kakaonimaki ni mwakuri i nanon ana nne ni kurebe; ao ai korakorara rekenikaia ake a na teweaki nakon nneia! Ao e na kabuekaki te aonaba n te ai.

4 Ai korakorara ana nanoanga te Atua nakoira, ngkai e uringa te bata are Iteraera, aika wakaa ma mwanga; ao e arora baina nakoia i nanon te bong ae bwanin; ao bon aomata ngaia aika a bonotaninga ma ni ngurengure i buakoia; ma a na bane ni kamaiuiaki ni kabane ake a aki kamatoai nanoia nako nanon uean te Atua.

5 Mangaia ae tariu aika a tangiraki, I kamatoa au bubuti nakoimi bwa kam na rairinanomi, ao ni karaoia ma te nano ni koaua ae bwanin, ao n teimatoa i nanon te Atua ngkai e na teimatoa ma ngkami. Ao kam na tai kamatoa nanomi ngkai e arora baina n nanoanga nakoimi n ootan te ngaina.

6 Eng, ngkana kam ongo bwaanana n te bong aio, ao tai kamatoai nanomi; bwa bukin teraa ngkai kam mate?

7 Bwa taraia, kam a tia ni kamwarakeaki n ana taeka te Atua ae raoiroi i nanon te bong ae bwanin, e koaua bwa kam na karaoa ae buakaka, bwa kam aonga ni karenakoaki nako nanon te ai?

8 Taraia, kam na rawa n ongo taeka aikai? Kam na rawa n ongo aia taeka burabeti; ao kam na aki kan ongo naba n taian taeka ni kabane ake a tia n taekinaki ni kaineti ma Kristo, e ngae ngkai a mwaiti ake a tia n taekinna; ao n aki kakoaua ana taeka Kristo ae raoiroi, ma mwaakan te Atua, ma te bwaintituaraoi ae te Tamnei ae Raoiroi, ma ni karekea ana kairiri te Tamnei ae Tabu, ma ni bwainikirina te babaire ae korakora ni kaboia, are e a tia ni katauraoaki ibukimi?

9 Kam aki ataia bwa ane e karaoi bwaai aikai, ao e na tei ma te kamamaeaki ao namakinan te bure imatan ana kai ni motikitaeka te Atua, ni mwaakan te kaboaki ma te mangauti are e mena iroun Kristo?

10 Ao n aron naba mwaakan te moti, bwa e aki kona ni kaakeaki te moti, ao e na nako nanon te nei n ai ma te burimton, ae aki kona ni katokaki urana, ma bubuna ae waerake n aki totoki, ae te nei n ai ma te burimton ao te kammarakaki ae aki totoki.

11 O ngaia ae tariu aika kam tangiraki, kam na rairinanomi, ao kam na rin i nanon te mataroa ae wariki, ao ni waaki iaon te kawai ae irariki, ni karokoa reken te maiu ae akea tokina.

12 O kam na kawanawanaingkami; tera ae N na kona riki n taekinna?

13 Ni kabanean au taeka, I a kaboo nakoimi, ni karokoa te tai are N na manga kaitibo iai ma ngkami imatan ana kai ni motikitaeka te Atua ae kakukurei, ae te kai ae e na kaonia aika a buakaka n te maaku ae korakora. Amen.