1 Im kiiō, lo, ro jeiū im jatū, āinwōt Iaar ba n̄an kom̧ bwe Inaaj kar kanaan, lo, en̄in ej aō kanaan—bwe men ko rikanaan in Zinōs eaar kōnono, kōn m̧weo im̧ōn Israel, eo im eaar keidi er n̄an juon wōjke olive eawiie, em̧ool rej aikuj kūrm̧ool.

2 Im ra eo Enaaj bar likūt Pein alen kein karuo n̄an lo̧mo̧o̧ren armej ro An, ej raan eo, aaet, em̧ool iien eo āliktata, bwe ro rikarejeran Irooj renaaj ilo̧k ilo kajoor eo An, n̄an naajdik im jepi jikin kallib eo An; im ālikin jem̧ļo̧k eo em̧ōkaj an itok.

3 Im ewi jon̄an an jeraam̧m̧an ro raar niknik jerbal ilo jikin kallib eo An; im ewi jon̄an an lia ro raar joļo̧k er ijoko jikier make! Im laļ Enaaj bwil kōn kijeek.

4 Im ekōjkan an Anij tūriam̧okake kōj, bwe E ej keememej m̧weo im̧ōn Israel, okar ko im ra ko jim̧or; im E ej erļo̧ke Pein n̄an er ium̧win aolepān raan eo; im er rej juon armej ekijn̄en̄e kōnwaer im rej akwāālel; a jon̄an wōt eo e jamin kapene burueer renaaj mour ilo Aelōn̄ in Anij.

5 Kōn menin, ro jeiū im jatū rejitōnbōro, Ij akweļap n̄an kom̧ ilo naan ko realikkar bwe kom̧in ukeļo̧k, im itok kōn lukkuun m̧ool in bōro, im eddāp n̄an Anij āinwōt E ej eddāp n̄an kom̧. Im ke pā in tūriam̧o eo Pein ej erļo̧kwaj n̄an kom̧ ilo meram in raan, jab kapene būruōmi.

6 Aaet, rainin, eļan̄n̄e kom̧ naaj ron̄jake ainikien, jab kapene būruōmi; bwe etke kom̧ naaj kōņaan mej?

7 Bwe lo, ālikin kar naajdik kom̧ jān naan eo em̧m̧an an Anij ium̧win aolepān raan eaetok, kom̧in ke kwaļo̧k leen enana, bwe kom̧in aikuj jokak im joļo̧k ilo kijeek?

8 Lo, kom̧in ke naaj jamin bōk naan kein? Kom̧in ke naaj jab bōk naan ko an rikanaan ro; im kom̧in ke naaj jab bōk aolep naan ko kar kōnono kaki kōn Kraist, ālikin elōn̄ ro kar kōnono kake E; im kariab naan em̧m̧an an Kraist, im kajoor in Anij, im mennin letok eo an Jetōb Kwōjarjar, im kajejtokjān Jetōb Kwōjarjar, im kajjirere kōn karōk eļap in lo̧mo̧o̧r, eo kar kōpooj n̄an kom̧?

9 Kom̧ij jab jeļā ke bwe n̄e kom̧ naaj kōm̧m̧ani men kein, bwe kajoor in lo̧mo̧o̧r eo im jerkakpeje, eo ej ilo Kraist, naaj bōk tok kom̧ n̄an jutak ilo jook im bōd im̧aan jikin ekajet an Anij?

10 Im ekkar n̄an kajoor in jim̧we, bwe jim̧we jamin bōbrae, kom̧ naaj ilo̧k ilo ļwe in kijeek im brimstone, eo urur ko an rej jamin kun, im eo baat eo an ej wanlōn̄ļo̧k indeeo im indeeo, eo ļwe in kijeek im brimstone ej en̄taan ejjeļo̧k jem̧ļo̧kin.

11 O innām, ro jeiū im jatū rejitōnbōro, kom̧in ukeļo̧k, im deļo̧n̄ ilo kōjām erānin̄, im wōnm̧aanļo̧k ilo iaļ eo eaidik, m̧ae iien kom̧ naaj bōk mour indeeo.

12 O kom̧in mālōtlōt; ta Imaron̄ ba eļapļo̧k?

13 Āliktata, Ij bar iakiakwe kom̧, m̧ae iien Inaaj ioon kom̧ im̧aan ilo m̧ōņōņō im̧aan jikin ekajet an Anij, eo ej jikin ekajet im̧ōk rinana kōn lōļn̄o̧n̄ im mijak ekanooj nana. Amen.