1 Na afei, hwɛ, mo nuanom, dɛ mbrɛ mekãa kyerɛɛ hom dɛ mebɛhyɛ nkɔm no, hwɛ, iyi nye mo nkɔnhyɛ—dɛ ndzɛmba no a dɛm nkɔnhyɛnyi Zenos kãe, a ɔfa Israelfifo ho, dza ɔdze too ngo dua pa ho no, wɔ dɛ ɔba mu ampa.

2 Na da no a ɔbɛtsen ne nsa mu bio wɔ ne mpɛn a otsĩa ebien dze atwetwe no dɔm no, nye da no, nyew, mber a odzi ekyir no, Ewuradze no nkowaa no bɔkɔ wɔ no tum mu ekogugu no wenyin ture mu ndua ase fa na woeyiyi ho; na ɔno ekyir, ɔnnkɛkyɛr na ewiei no aba.

3 Na mbrɛ hɔn a wɔdze ahoɔdzen ayɛ edwuma wɔ no wenyin ture no mu nhyira si bɔdɔɔ sõ a; na mbrɛ hɔn a wɔbɔtow hɔn egu hɔnankasa hɔn bea do no mpaa si bɔdɔɔ sõ a! Na wɔdze ogya bɛhyew wiadze.

4 Na mbrɛ hɛn Nyankopɔn si wɔ ehumbɔbɔr ma hɛn a, osiandɛ ɔkaa Israel fifo, nyew ne ndwow na n’abaw nyinara; na ɔtsen ne nsa ma hɔn da no nyina mu; na wɔyɛ akɔnkyefo na ekyingyefo; na mbom dodowara a wonnkepirim hɔn akoma no wobɛgye hɔn nkwa wɔ Nyame n’ahenman no mu.

5 Dɛm ntsi, mo nuanom adɔfo, mototɔ serɛ hom wɔ ahobrɛadze mu dɛ hom nnu homho, na hom mfa akoma pa ntakyer Nyame dɛ mbrɛ ɔtakyer hom no. Na dɛ mbrɛ ɔtsen n’ehumbɔbɔr abasa wɔ hom do wɔ adzekyee nyinara no, mma hom mmpirim hom akoma.

6 Nyew, ndɛ da yi, sɛ hom tsie ne ndze a, mma hom mmpirim hom akoma; ebɛn ntsi na hom bowu?

7 Na hwɛ, ana wɔdze Nyankopɔn n’asɛmpa no amee hom da no mu nyinara ekyir no, hom bɔsow eduaba bɔn ma woeetwa hom akyen ogya no mu?

8 Hwɛ, ana hom bɔpow nsɛm yi? Ana hom bɔpow nkɔnhyɛfo no nsɛm; na hom bɔpow nsɛm a wɔakã a ɔfa Christ ho wɔ aber a nkɔnhyɛfo pii akã noho nsɛm na hom apow Christ ne nsɛmpa, na Nyankopɔn no tum, na Sunsum Krɔnkrɔn n’akyɛdze, na woedum Sunsum Krɔnkrɔn no, na woesi ɔpon nhyehyɛɛ no a wɔayɛ ato hɔ ama hom no atwetwe?

9 Hom nnyim dɛ sɛ hom yɛ dɛm ndzɛmba yi a, ɔpon tum no na wusoɛr a ɔwɔ Christ mu no dze hom bɛba enyimguase nye afɔdzi kɛse mu wɔ Nyankopɔn n’asɛndzipon enyim?

10 Na dɛ mbrɛ pɛrpɛr no tum tse no, worummbu enyi nngu pɛrpɛrdzi do, na otwar dɛ hom kɔ ogya baka na brimstone no a ne gyaframee nndum da no mu, na no wusiw fow kɔ sor afebɔɔ kesi afebɔɔ no, dɛm ogya baka na brimstone no yɛ ahohyehye a onnyi ewiei.

11 O, dɛm ntsi, mo nuanom adɔfo, hom nnu homho, na hom nhɛn abow a ɔtsen no mu, na hom nkɔdo nnantsew wɔ kwan tseatseaba no mu, nkodu dɛ hom benya onnyiewiei nkwa no.

12 O hom nhu nyansa; ebɛn asɛm bio na menka?

13 Mewie, makra hom, kesi dɛ mibehyia hom wɔ Nyankopɔn n’enyigye asɛndzipon no enyim, asɛndzipon a ɔdze hu kɛse na suro twitwa emumuyɛfo no. Amen.