1 Ug karon, tan-awa, akong kaigsoonan, kay miingon man ako kaninyo nga ako managna, tan-awa, mao kini ang akong panagna—nga ang mga butang nga gipamulong ni propeta Zenos mahitungod sa balay ni Israel, diin sila iyang gitandi ngadto sa usa ka maayong kahoy nga olibo, sa pagkatinuod mahitabo gayod.

2 Ug ang adlaw diin andamon niya ang iyang kamot sa ikaduhang higayon aron sa pagbawi sa iyang katawhan, mao ang adlaw, oo, gani ang kataposang higayon, nga ang mga sulugoon sa Ginoo mopadayon uban sa iyang gahom, aron sa pag-alima ug pagpul-ong sa iyang ubasan; ug human niana ang kataposan sa dili madugay moabot.

3 Ug pagkabulahan kanila nga makugihong nagtrabaho sa iyang ubasan; ug pagkadako sa tunglo kanila nga isalikway ngadto sa ilang kaugalingong dapit! Ug ang kalibotan sunogon sa kalayo.

4 Ug pagkamaloloy-on sa atong Dios ngari kanato, kay nahinumdom siya sa balay ni Israel, sa mga gamot ug sa mga sanga; ug iyang gitunol ang iyang mga kamot ngadto kanila sa adlaw nga tanan; ug sila mga tikig og liog ug masinupakon nga katawhan; apan kadtong dili magmagahi sa ilang kasingkasing maluwas sa gingharian sa Dios.

5 Busa, hinigugma kong kaigsoonan, magpakiluoy ako kaninyo sa maligdong nga mga pulong nga maghinulsol kamo, ug moduol inubanan sa bug-os nga katuyoan sa kasingkasing, ug magpabiling matinud-anon sa Dios sama nga siya nagpabiling matinud-anon kaninyo. Ug samtang ang iyang bukton sa kaluoy gidalit nganha kaninyo samtang hayag pa, ayaw pagpatig-a sa inyong mga kasingkasing.

6 Oo, karong adlawa, kon maminaw kamo sa iyang tingog, ayaw ipatig-a ang inyong kasingkasing; kay nganong gusto man kamong mamatay?

7 Kay tan-awa, human kamo maalimahan sa maayo nga pulong sa Dios sa tibuok adlaw, mamunga ba kamo og daotan nga bunga, aron pamutlon kamo ug itambog sa kalayo?

8 Tan-awa, isalikway ba ninyo kini nga mga pulong? Isalikway ba ninyo ang mga pulong sa mga propeta; ug isalikway ba ninyo ang tanan nga gipamulong mahitungod ni Kristo, human nga daghan ang namulong mahitungod kaniya; ug ipanghimakak ang maayo nga pulong ni Kristo, ug ang gahom sa Dios, ug ang gasa sa Espiritu Santo, ug pugngan ang Balaang Espiritu, ug biay-biayon ang mahinungdanong plano sa katubsanan, nga gipahiluna alang kaninyo?

9 Wala ba kamo masayod nga kon buhaton ninyo kining mga butanga, ang gahom sa katubsanan ug pagkabanhaw, nga anaa ni Kristo, modala kaninyo aron mobarog sa kaulaw ug makalilisang nga pagbasol sa atubangan sa hukmanan sa Dios?

10 Ug sumala sa gahom sa hustisya, kay ang hustisya dili ikadumili, kinahanglan nga itambog kamo sa linaw sa kalayo ug asupri, kansang mga siga dili mapalong, ug kansang mga aso padayon nga mosaka hangtod sa kahangtoran, diin ang mao nga linaw sa kalayo ug asupri mao ang walay kataposan nga hilabihang pagsakit.

11 O unya, hinigugma kong kaigsoonan, paghinulsol kamo, ug sulod sa higpit nga ganghaan, ug padayon sa pig-ot nga agianan, hangtod maangkon ninyo ang kinabuhing dayon.

12 O pagmaalamon; unsa pa ang akong ikasulti nga labaw pa niini?

13 Sa kataposan, manamilit na ako kaninyo, hangtod makita ko kamo sa atubangan sa makahimuot nga hukmanan sa Dios, diin nga hukmanan mosilot sa mga daotan sa makalilisang nga kakuyaw ug kahadlok. Amen.