1 Ere chiney e yibi buch u tomuren boech e duw ni ke yaen, me yib beeʼ nib moʼon nga fithikʼ fapi gidiiʼ ku Nephi, ni fithingan e Sherem.

2 Me yibi buch ni tabab ko machib u fithikʼ fapi gidiiʼ, me weliy nga fithikʼraed ni dariy Kristus. Me machib nag boʼor banʼen ni be sabaenbaen nag fapi gidiiʼ; ma biney e rinʼ ni gomanga yigi yog ni kireb nag e machib rokʼ Kristus.

3 Me muruwel ni rib gel ni gomanga yigi yog ni wawliy ngoʼorel gumʼirchaʼen fapi gidiiʼ, ni aram rogon ni wawliy ngoʼorel e gumʼirchaʼ nib yoʼor; ma bachan e manang ni gag, Jacob, e bay e mich rog ngakʼ Kristus nra yib, me gay rogon ni gomanga yigi yog ni yib ngog.

4 Ma beeʼ ni rib llowaenʼ, ni rib felʼ rogon ni manang e thin ko fapi gidiiʼ; ere, rayog ni nge sabaenbaen nagraed, me yoeg e thin nib mangingʼ u tiliy, u rogon fare gelingin ni bay rokʼ moʼoniyanʼ.

5 Ma be athapeg ni nge rurugeg ko mich rog, ni aram rogon nib yoʼor e yiʼiy ni ke yib ngog nge pinʼen nib yoʼor ni kug guy ni morngaʼagen e pinnʼey; ya rriyulʼ ni kug gguy e angel, ma kar pigpig gaed ngog. Ma ku arragon, ni kug rungʼag fare lam rokʼ Somoel ni be non ngog, u bingyalʼ ngo bingyalʼ; ere, dabiyog nra rur e mich rog.

6 Me yibi buch ni yib ngog, ni baʼaray rogon ni non ngog, ni gaʼar: Walageg ni Jacob, ke yoʼor yay ni kug gay rogon ni gomanga yigi yog nug non ngom; ya kug rungʼag ma kug manang ni gur e gabe yaen iyaen, ni gabe machib ni pinʼen ni gabe yoeg e fare gospel, ara fare machib rokʼ Kristus.

7 Ma kam wawliy ngoʼorel boech e pi gidiiʼ ney nib yoʼor ma kar thilyeged fabin nib matʼaw i woʼen Got, ma darur fol gaed ko fare motochiyel rokʼ Moses niʼir e bin nib matʼaw e kanawoʼ; ma kar thilyeged fare motochiyel rokʼ Moses ni ngan liyoer ngakʼ beeʼ niʼir e gabe yoeg ni bay yib nib yoʼor miriʼay e duw make taw. Ere chiney e musap, I gag, Sherem, e gube yoeg ngom ni biney ni gabe rinʼ e ba togopluw ngakʼ Got; ya dariy beeʼ nib moʼon ni manang e tiney e banʼen; ya dabiyog ni nge yoeg beeʼ e tin ni bay yib banʼen. Ere aray rogon ni i togopluw Sherem ngog.

8 Machane musap gaed, fare Somoel ni Got e puʼoeg e Kan ni Thothup rokʼ nga dakeanag, ma arame gu athkuy laniyaenʼ u gubin e pi thin rokʼ.

9 Mug gaʼar ngakʼ: Gabe fek yathin Kristus niʼir e ra yib? Me gaʼar: Faʼanra bay ba Kristus, ma dab gu fek yathin; machane gumnang ni dariy Kristus, ma da immoy, ma ku dabi yib.

10 Mug gaʼar ngakʼ: Ba mich u wunʼum fapi chep ni thothup? Me gaʼar ngog, Arragon.

11 Mug gaʼar ngakʼ: Ere damur nang fan, ya rriyulʼ ni yaed be micheg morngaʼagen Kristus. Musap, gube yoeg ngom ni dariy reb fapi profet ni yol, ara prophesy, ni gathi morngaʼagen Kristus e be weliy.

12 Ma gathi kemus aray—ya kun dag ngog, ma kug rungʼag ma kug guy; ma kuʼun dag ngog u gelingin fare Kan ni Thothup; Ere, gumnang ni faʼanra dab ni ngongliy bbayul ma gubin e gidiiʼ ma ra malog.

13 Me yibi buch ni gaʼar ngog: Mu dag ngog ba pow u dakean gelingin fare Kan ni Thothup, niʼir e ri gamnang morngaʼagen.

14 Mug gaʼar ngakʼ: Gag miniiʼ ni nggu sikeng nag Got ni nge dag ngom ba pow u morngaʼagen e pinʼen ni gur ma gamnang nib riyulʼ? Machane gabe fek yathin, ni bachan e kam gabliyem ko fare moʼoniyanʼ. Yug aray rogon, ma gathi laninʼug ni ngan rinʼ; ya faʼanra Got e nge liiʼem, mpag nge mang ba pow ngom ni bay gelingin, ni ruw yang, u tharmiy ngu fayleng; nge ku arragon, ni ba pow ngom ni Kristus e ra yib. Ere laninʼum, O Somoel, ni ngan rinʼ, ma gathi gag.

15 Me yibi buch u napʼan ni gag, Jacob, e kug weliy e pi thin ney, ma fare gelingin fare Somoel e yibi aw nga dakean, ma arame thig riy nge aw nga dakean e buutʼ. Me yibi buch ni un duruwʼiy nib yoʼor e rran.

16 Me yibi buch ni gaʼar ngakʼ fapi gidiiʼ: Mu ulung gaed nga taʼabang gabul, ya bay gumʼ; ere, gu baʼadag ni nggu non ko pi gidiiʼ u mʼon riy ning gumʼ.

17 Me yibi buch ni faʼani rebo rran riy ma fare ulung i gidiiʼ e kar mukun gaed nga taʼabang; me weliy ni rib tamilang ngoraed me yoeg ni deriyulʼ fapinʼen ni ke fil ngoraed, me micheg ni riyulʼ Kristus, nge gelingin fare Kan ni Thothup, nge pigpig ko pi angel.

18 Me weliy ngoraed ni rib tamilang, ni fare moʼoniyanʼ e ke baen nag. Me weliy morngaʼagen e infierno, nge morngaʼagen e yafos ni gubinechubog, nge morngaʼagen e gechig ni gubinfen.

19 Me gaʼar: Kug rus ya kug bucheg fare denen ni dabiyog i nʼaegfan, ya kug baen nag Got; ni kugog ni deriyulʼ Kristus, ma kugog nib mich u wunʼug fapi chep ni thothup; ma rriyulʼ nibe micheg morngaʼagen. Ma bachan e kug baen nag Got ere kar gu rus nib gel ya rib tomal e kireb rog; machane kug pogofay nag ngakʼ Got.

20 Me yibi buch u napʼan ni ke muʼ i yoeg e pi thin ney ma arame dakiyog ni non, me yimʼ nge chuw fare yaʼel rokʼ.

21 Ma napʼan ni guy fare ulung i gidiiʼ ni ke weliy e pinnʼey ko ngiyalʼ inʼen nibe yaen ni ngar dar gow fare yaʼel, me gin owcharaed ngay; ma arame yib fare gelingin Got nga dakeanraed, me poloʼ nga fithikʼ i doewraed mar thiggaed ngar aw gaed nga butʼ.

22 Chiney, e rennʼey e aray rogon rib mʼag u wunʼug, gag Jacob, ya arragon ni kug ning ngakʼ e Chitamag ni bay u tharmiy; ya ke rungʼag e mayoer rog me piiʼ e fulweg ko meybil rog.

23 Me yibi buch ni arame gapas nge fare murnguy rokʼ Got e kun sulweg bayay nga fithikʼ fapi gidiiʼ; mar biʼeged fapi chep ni thothup, ma dakur fol gaed ko fapi thin rokʼ e re moʼon ney nib kireb.

24 Me yibi buch nib yoʼor mite yalen nni muruwel ngay ni ngki yog bayay ni ngan sulweg fapi Lamanites ko fare naʼab u morngaʼagen e tin riyulʼ; machane gubin nib mʼay fan, ya ri yaed baʼadag e mael nge puʼoeg rachaʼ, ma bay ba fananikan roraed ngomaed ni gubinfen, ni gamaed pi walagraed. Ma yaed be gay rogon u gelingin e pi talin e cham roraed ni ngar liiʼed gamaed ngay ni darur talgaed.

25 Ere, fapi gidiiʼ ku Nephi e ra gel niged yaed ngar cham gaed ngoraed ko pi talin e cham roraed, nge poloʼ i gelingrad, nibe pagaenʼraed ngakʼ fare Got nge war ko thap roraed; ere, ki paer riy ni aram rogon, mi yaed mang tagech ko pi toʼogor roraed.

26 Me yibi buch ni gag, Jacob, e gube pilibthir iyaen; nge fare chep ko pi gidiiʼ ney e kan chaʼariy u dakean yug yuyang e plates rokʼ Nephi, ere, nggu ning e biney e chep, ni gube yoeg ni kuggu yoloey u rogon ni gumnang, ni yibe yoeg ni fare ngiyalʼ innʼem e ke un ngodaed ke thimur, nge ku yafos rodaed e ki yaen ni gowa ba likʼay ngodaed, ni gadaed bogi gidiiʼ ni kirbaenʼ, nge gidiiʼ nib miyuluyaenʼ, nge tamilekag, ni kan chuweg daed u Jerusalem, ma un gargeleg daed nga fithikʼ e gafgowaenʼ, u lan ba wuruʼ e binaw, ma be fananikay daed pi walagdaed, niʼir e kʼaring e mael nge maleʼeg thin; ere, gu pired u fithikʼ e kirbaenʼ ko pi rran romaed.

27 Ere gag, Jacob e kug gguy ni dab ki nʼuw napʼan ma kan tayeg nga lan e loew; ere, gguʼar ngakʼ fakag i Enos: Mu fek e pi plates ney. Mug weliy ngakʼ fapinʼen ni walageg i Nephi e motochiyel nag ngog, me micheg nra fol ko pi motochiyel. Ma arame gu tileg e yol rog nga dakean e tiney e plates, ni bogi yol ni rib buchʼuw; ma gimed e pi tapow babyor e gube fingichiymed, ni gube athapeg ni gomanga yoʼor pi walageg nra poeyed e pi thin rog. Pi walageg, kefelʼ.