1 Kag karon natabo ini nga pagkatapos nga naglabay ang pila ka tuig, may nag-abot nga isa ka tawo sa tunga sang katawhan ni Nefi, nga ang ngalan amo si Serem.

2 Kag natabo ini nga nagsugod sia sa pagwali sa tunga sang katawhan, kag sa pagpahayag sa ila nga mangin wala sang Cristo. Kag nagwali sia sing madamo nga butang nga nagapanginto sa katawhan; kag ini iya ginhimo agud maguba niya ang doktrina ni Cristo.

3 Kag nagpangabudlay sia sing matutum agud nga madala niya palayo ang mga tagipusuon sang katawhan, sa bagay nga nadala niya palayo ang madamo nga tagipusuon; kag bangod nahibal-an niya nga ako, si Jacob, may pagtuo kay Cristo nga magakari, nangita sia sing madamo nga oportunidad agud nga makapalapit sia sa akon.

4 Kag may tinun-an sia, sa bagay nga may perpekto sia nga ihibalo sang panghambal sang katawhan; gani, mahimo sia nga makagamit sing tuman nga pagpang-into, kag makakumbinsi nga panghambal, suno sa gahum sang yawa.

5 Kag naglaum sia sa pag-uyog sa akon halin sa pagtuo, bisan pa sang madamo nga rebelasyon kag sang madamo nga butang nga akon nakita parte sining mga butang; kay matuod gid nga nakakita ako sang mga anghel, kag nag-alagad sila sa akon. Kag amo man, nakabati ako sang tingug sang Ginuo nga nagahambal sa akon sa pulong mismo, sa nagkalain-lain nga tion; gani, indi ako mahimo nga mauyog.

6 Kag natabo ini nga nagkadto sia sa akon, kag sa sini nga paagi naghambal sia sa akon nga nagasiling: Utod Jacob, nangita ako sing madamo nga oportunidad agud nga makighambal ako sa imo; kay nabatian ko kag nahibal-an man nga dalayon ka nga nagalibot, nga nagawali sinang imo ginatawag nga ebanghelyo, ukon ang doktrina ni Cristo.

7 Kag nadala nimo palayo ang madamo sining katawhan sa bagay nga ginapatiko nila ang husto nga dalanon sang Dios, kag wala nagatuman sang layi ni Moises nga amo ang husto nga dalan; kag ginliwat ang layi ni Moises sa pagsimba sing isa ka persona nga imo ginasiling nga magakari madamo nga ginatos ka tuig sugod subong. Kag karon tan-awa, ako, si Serem, nagapahayag sa imo nga isa ini ka pagpasipala; kay wala sing tawo nga nakahibalo sang amo sina nga mga butang; kay indi sia makasugid sang mga butang nga magaabot. Kag sa amo nga paagi si Serem nakigbais sa akon.

8 Apang tan-awa, ginbubo sang Ginuong Dios ang iya Espiritu sa akon kalag, sa bagay nga natapna ko sia sa tanan niya nga pulong.

9 Kag nagsiling ako sa iya: Ginapanghiwala mo bala ang Cristo nga magakari? Kag nagsiling sia: Kon mangin may isa ka Cristo, indi ko sia pag-ipanghiwala; apang nahibal-an ko nga wala sang Cristo, wala sadto, kag wala na sing magaabot pa.

10 Kag nagsiling ako sa iya: Nagapati ka bala sa balaan nga mga kasulatan? Kag nagsiling sia, Huo.

11 Kag nagsiling ako sa iya: Kon amo wala mo mahangpi ang mga ini; kay matuod gid nga nagasaksi ang mga ini parte kay Cristo. Tan-awa, ginasiling ko sa imo nga wala sing mga propeta nga nagsulat, ukon nagpropesiya, luwas lang nga naghambal sila parte sa sini nga Cristo.

12 Kag indi lamang amo ini—ginpakita ini sa akon, kay nakabati ako kag nakakita; kag ginpakita man ini sa akon paagi sa gahum sang Balaan nga Espiritu; gani, nahibal-an ko nga kon wala sing pagbayad-sala nga ginhimo ang tanan nga tawo pat-od gid nga madula.

13 Kag natabo ini nga nagsiling sia sa akon: Magpakita ka sa akon sing isa ka tanda paagi sa sining gahum sang Balaan nga Espiritu, nga sa sini madamo ka sing nahibal-an.

14 Kag nagsiling ako sa iya: Ano ako agud nga sulayon ko ang Dios sa pagpakita sa imo sing isa ka tanda sa butang nga imo nahibal-an nga matuod? Apang ipanghiwala mo ini, bangod iya ikaw sang yawa. Apang, indi ang akon kabubut-on ang matuman; apang kon sakiton ka sang Dios, ina mangin isa ka tanda sa imo nga sia may gahum, pareho sa langit kag sa duta; kag amo man, nga si Cristo magakari. Kag ang imo kabubut-on, O Ginuo, ang matuman kag indi ang akon.

15 Kag natabo ini nga sang ako, si Jacob, nakahambal sining mga pulong, ang gahum sang Ginuo nagtupa sa iya, sa bagay nga natumba sia sa duta. Kag natabo ini nga ginsagod sia sa sulod sang madamo nga inadlaw.

16 Kag natabo ini nga nagsiling sia sa katawhan: Magtililipon kamo buwas, kay mapatay na ako; gani, luyag ko nga maghambal sa katawhan antes ako mapatay.

17 Kag natabo ini nga pagkaaga ang kadam-an nagtililipon; kag naghambal sia sing hayag sa ila kag ginpanghiwala ang mga butang nga iya ginpanudlo sa ila, kag nagtuad parte kay Cristo, kag sang gahum sang Balaan nga Espiritu, kag sang pag-alagad sang mga anghel.

18 Kag naghambal sia sing hayag sa ila, nga ginpatalang sia sang gahum sang yawa. Kag naghambal sia parte sa impiyerno, kag sa wala’y katapusan, kag sa wala’y katapusan nga silot.

19 Kag nagsiling sia: Nagakahadlok ako nga basi nakahimo ako sing di-mapatawad nga sala, kay nagbutig ako sa Dios; kay ginpanghiwala ko ang Cristo, kag nagsiling nga nagapati ako sa balaan nga mga kasulatan; kag matuod gid nga nagasaksi ang mga ini parte sa iya. Kag bangod gani nagbutig ako sa Dios nagakahadlok gid ako nga ang akon kahimtangan mangin makahaladlok; apang nagakumpisar ako sa Dios.

20 Kag natabo ini nga sang mahambal niya ining mga pulong indi na sia makahambal pa sing dugang, kag nabugto ang iya ginhawa.

21 Kag sang masaksihan sang kadam-an nga naghambal sia sining mga butang samtang nagahana na sia nga mabugtuan sing ginhawa, naurungan sila sing tuman; sa bagay nga ang gahum sang Dios nagtupa sa ila, kag gindaug sila sa bagay nga nagkalatumba sila sa duta.

22 Karon, ining butang nakapahamuot sa akon, si Jacob, kay ginpangabay ko ini sa akon Amay nga yara sa langit; kay nabatian niya ang akon pagpakitluoy kag ginsabat ang akon pangamuyo.

23 Kag natabo ini nga ang paghidaet kag ang gugma sang Dios napanumbalik liwat sa tunga sang katawhan; kag nagtuon sila sang balaan nga mga kasulatan, kag wala na nagsapak sa mga pulong sining malain nga tawo.

24 Kag natabo ini nga madamo nga mga paagi ang ginplano sa pagbawi kag pagpanumbalik sang mga Lamanhon sa ihibalo sang kamatuoran; apang ini tanan wala sing kapuslanan, kay nagakalipay sila sa mga giyera kag pagpaagay sang dugo, kag may yara sila sing wala’y katapusan nga pagdumot sa amon, nga ila mga kauturan. Kag nagtinguha sila paagi sa gahum sang ila mga armas sa paglaglag sa amon sing dalayon.

25 Gani, ang katawhan ni Nefi nagpabakod sang ila depensa batok sa ila paagi sa ila mga armas, kag paagi sa tanan nila nga ikasarang, nga nagasalig sa Dios kag bato sang ila kaluwasan; gani, nangin mga tagsakop sila sang ila mga kaaway.

26 Kag natabo ini nga ako, si Jacob, nagsugod nga magtigulang; kag ang kasulatan sining katawhan bangod ginatago sa iban pa nga mga lamina ni Nefi, gani, ginatapos ko ini nga kasulatan, nga nagapahayag nga nagsulat ako suno sa malab-otan sang akon ihibalo, paagi sa pagsiling nga ang panahon naglabay na sa amon, kag ang mga tinuig sang amon mga kabuhi naglabay man pareho sing isa ka damgo sa amon, bangod isa kami ka masinulub-on kag seryoso nga katawhan, mga dalang-dalang, ginsikway halin sa Jerusalem, nabun-ag sa pag-antos, sa isa ka kamingawan, kag gindumtan sang amon mga kauturan, nga nagtuga sing mga giyera kag mga pagbinaisay; gani, ginkalisud namon ang amon mga adlaw.

27 Kag ako, si Jacob, nagalantaw nga pat-od gid nga manaog na ako sa indi madugay sa akon lulubngan; gani, nagsiling ako sa akon anak nga si Enos: Kuhaa ining mga lamina. Kag ginsugiran ko sia sang mga butang nga ginsugo sang akon utod nga si Nefi, kag nagpromisa sia sa pagtuman sang mga sugo. Kag ginatapos ko ang akon pagsulat sa sining mga lamina, nga ang amo nga sinulat diutay lamang; kag sa bumalasa ako nagapaalam, nga nagalaum nga madamo sang akon mga kauturan ang mahimo nga makabasa sang akon mga pulong. Mga kauturan, adios.