Ang Basahon ni Jarom

1 Karon tan-awa, ako, si Jarom, mosulat og pipila ka pulong sumala sa sugo sa akong amahan, nga si Enos, aron ang among kasaysayan sa kagikanan matipigan.

2 Ug tungod kay gagmay kini nga mga palid, ug kay kining mga butanga gisulat alang sa katuyoan nga mabulahan ang among kaigsoonan nga mga Lamanita, busa, gikinahanglan nga mosulat ako og diyotay; apan dili ako mosulat sa mga butang nga akong gipanagna, ni sa akong mga pagpadayag. Kay unsa pa may akong ikasulat og dugang sa gipangsulat sa akong mga amahan? Kay wala ba kini magpadayag sa plano sa kaluwasan? Sultihan ko kamo, Oo; ug igo na kini kanako.

3 Tan-awa, kinahanglan kaayo nga daghan ang buhaton alang niini nga katawhan, tungod sa katig-a sa ilang mga kasingkasing, ug sa kabungol sa ilang mga dalunggan, ug sa pagkabuta sa ilang mga hunahuna, ug sa katikig sa ilang mga liog; bisan pa niana, hilabihan ka maloloy-on ang Dios ngadto kanila, ug wala pa molaglag kanila sa ibabaw sa yuta.

4 Ug daghan kanamo ang nakadawat og daghang mga pagpadayag, kay dili tanan nila mga tikig og liog. Ug kutob sa dili tikig og liog ug nagbaton og pagtuo, adunay pagpakigdait sa Balaang Espiritu, nga nagpadayag ngadto sa mga anak sa tawo, sumala sa ilang pagtuo.

5 Ug karon, tan-awa, duha ka gatos ka tuig na ang milabay, ug ang katawhan ni Nephi nagkalig-on sa yuta. Naninguha sila sa pagtuman sa balaod ni Moises ug sa pagbalaan sa adlaw nga igpapahulay ngadto sa Ginoo. Ug wala sila magpasipala; ug wala sila manamastamas. Ug ang mga balaod sa yuta hilabihan ka higpit.

6 Ug nagkatibulaag sila sa daghang dapit ibabaw sa yuta, ug mao usab ang mga Lamanita. Ug labaw pa sila ka daghan kay sa mga Nephita; ug ganahan silang mopatay ug moinom sa dugo sa mga mananap.

7 Ug nahitabo nga sa makadaghang higayon misulong sila kanamo, nga mga Nephita, aron makig-away. Apan ang among mga hari ug ang among mga pangulo mga tawo nga may lig-ong pagtuo sa Ginoo; ug gitudloan nila ang katawhan sa mga pamaagi sa Ginoo; busa, among gisuklan ang mga Lamanita ug gilaglag sila gikan sa among mga yuta, ug misugod sa paglig-on sa among mga siyudad, o sa bisan asang dapit nga among kabilin.

8 Ug midaghan kami sa hilabihan, ug mikatap sa ibabaw sa yuta, ug nahimong hilabihan ka adunahan sa bulawan, ug sa pilak, ug sa bililhong mga butang, ug sa hanas nga pagkahimo nga mga ginama sa kahoy, sa mga gambalay, ug sa mga makinarya, ug usab sa puthaw ug sa kobre, ug sa bronse ug sa asero, naghimo sa tanang matang sa kahimanan sa matag matang aron sa pag-ugmad sa yuta, ug sa mga hinagiban sa gubat—oo, ang mahait nga talinis nga panâ, ug ang udyongan, ug udyong, ang bangkaw, ug ang tanan nga pagpangandam alang sa gubat.

9 Ug tungod kay andam na sa pagsugat sa mga Lamanita, wala sila mouswag batok kanamo. Apan ang pulong sa Ginoo napamatud-an, nga gipamulong niya ngadto sa among mga amahan, nag-ingon nga: Ingon nga kamo naghupot sa akong mga sugo kamo mouswag diha sa yuta.

10 Ug nahitabo nga ang mga propeta sa Ginoo mipasidaan sa katawhan ni Nephi, sumala sa pulong sa Dios, nga kon dili sila motuman sa mga sugo, apan makahimo og kalapasan, pagalaglagon sila sa ibabaw sa yuta.

11 Busa, ang mga propeta, ug ang mga pari, ug ang mga magtutudlo, nagkugi sa agpagtrabaho, labihan ka mainantosong nag-awhag nga ang katawhan magmakugihon; nagtudlo sa balaod ni Moises, ug sa katuyoan sa paghatag niini; nag-agni kanila nga magpaabot sa Mesiyas, ug motuo nga siya moabot sama nga siya miabot na. Ug sa ingon niini nga paagi gitudloan nila sila.

12 Ug nahitabo nga pinaagi sa pagbuhat niini ilang gipugngan ang ilang pagkalaglag sa ibabaw sa yuta; kay sa tinuoray gitandog nila ang ilang mga kasingkasing pinaagi sa pulong, padayon nga nag-awhag kanila sa paghinulsol.

13 Ug nahitabo nga milabay ang duha ka gatos ug katloan ug walo ka tuig—sa kapanahonan sa gubat, ug panagbingkil, ug panagsumpaki, sulod sa dugay nga panahon.

14 Ug ako, si Jarom, wala na magsulat pa og dugang, kay gagmay ang mga palid. Apan tan-awa, akong kaigsoonan, mahimo ra kamong mosusi sa laing mga palid ni Nephi; kay tan-awa, anaa diha nakulit ang mga talaan sa among mga pakiggubat, sumala sa gisulat sa mga hari, o niadtong ilang gipasulat.

15 Ug ihatag ko kini nga mga palid ngadto sa mga kamot sa akong anak nga si Omni, aron matipigan kini sumala sa mga sugo sa akong mga amahan.