Say Libro nen Jarom

1 Natan nia, siak, Jarom, so mansulat na pigara a salita unong ed gangan nen amak, Enos, pian say uksoy na kapolian mi so nisinop.

2 Tan lapu ed saraya a piligo so melag, tan unong a saraya a beñgatla so nisulat ed gagala a pankaabigan na saray kaagian mi a saray Lamanite, dia ed ontan, nakaukolan a daiset labat so isulat ko; balet ag ko la isulat so saray beñgatla a nipaakar ed saray profesiyak, ni saray puyan ed siak. Tan anto ni so nisulat ko a niarum ed insulat la na kaamaan mi? Ag da kasi imparungtal so plano na kilalaban? Ikuan ko ed sikayo, On; tan saya so magenap la ed siak.

3 Nia, dakel ni so nepeg a gawaen ed limog na saraya a totoo, lapu ed awet na saray puso ra, tan inkatelek na saray layag da, tan inkabulag na saray nunot da, tan say inkatalker na saray teñger da; manwari ya ontan, say Dios mapalalo so panañgasi to ed sikara, tan sikara so ag to ni inekal ed tapew na dalin.

4 Tan dakel ed limog mi so awalaan na dakel a puyan, lapu ed aliwa a sikara ya amin matalker so teñger da. Tan no kaonoñgan kinarakel so ag-matalker so teñger da tan walaan na pananisia, sikara so akitalusan ed Masanto ya Espiritu, a sikato so omparungtal ed saray anak na totoo, unong ed pananisia ra.

5 Tan natan, nia, duara a lasus a taon la so linmabas, tan saray totoo nen Nephi binmiskeg la ra ed saya a dalin. Sinumpal da ya inonor so gangan nen Moises tan say agew na ñgilin pinasanto da ed Katawan. Tan sikara so ag-nanmodmura; ni say nansamba ra. Tan saray gangan ed saya a dalin so mapalalo a malet.

6 Tan sikara so ataytayak ed pasen ed tapew na dalin, tan ontan met ed saray Lamanite. Tan sikara so mapalalo a dakel nen saray Nephite; tan inaro ra so panagpatey tan iinumen da so dala na ayayep.

7 Tan agawa a pinmegdat ira ya aminpiga sumpa ed sikami, saray Nephite, pian labanan da kami. Balet saray arari mi tan saray pañgulo mi so totoo a mabiskeg ed pananisia ed Katawan, tan imbabañgat da ed saray totoo so saray dalan na Katawan; dia ed ontan, nialagey mi so inkasikami sumpa ed saray Lamanite tan pinanis mi ra a sinunson ed paway na dalin mi, tan ginapoan mi a pinabiskeg so saray ciudad mi, odino angan pasen a tawir mi.

8 Tan dinmakel kami a mapalalo, tan minakmakan mi so tapew na dalin, tan nanmaliw kami a mapalalo a mayaman ed balitok, tan pilak, tan saray ankabli a beñgatla, tan mararakep ya inkagawa na saray kiew, dia ed saray paalagey, tan makinaria, tan ontan met ed balatyang tan tanso, tan gansa tan asero, a ginagawa mi so amin a nengneng na kagawaan a panagkimey ed dalin, tan saray agamil ed bakal—on, say makdem tan mautok a pana, tan say pabekang, tan say melag a pana, tan say gayang, tan amin a paraan ya onkana ed bakal.

9 Tan dia ed onia so impamparaan mi a miabet ed saray Lamanite, kanian ag ira tinmaluna sumpa ed sikami. Balet say salita na Katawan so asekderan, a sinalita to ed kaamaan mi, ya inkuan to: Unong a sumpalen yo so saray gangan ko, sikayo so onaliguas ed dalin.

10 Tan agawa a saray profeta na Katawan pinasakbayan da so saray totoo nen Nephi, unong ed salita na Dios, no ag da onoren so saray gangan, balet sikara so napelag ed pankasalanan, a sikara so naderal ed tapew na dalin.

11 Dia ed ontan, saray profeta, tan saray sacerdote, tan saray managbañgat, so nankimey a siseseet, a sikara so nampapaliwawa ed amin ya andukey a panaganos ed saray totoo a manseet; ya imbabañgat da so gangan nen Moises, tan say getma na inkiiter na saya; a kinokuyong da ra ya mantalaran ed Mesias, tan manisia ra ed sikato a siñga ayari la a sinmabi. Tan dia ed onia a kanengneñgan so impambañgat da ed sikara.

12 Tan agawa a dia ed impangawa da na onia nipaliis ira ed kadederal ed tapew na dalin; lapu ed atanek so puso ra ed panamegley na salita, a saya so andi-tonda a mamapagalaw ed sikara onkana ed pambabawi.

13 Tan agawa a duara a lasus tan talomplo tan walora a taon so linmabas—ed kanengneñgan na saray bakal, tan baliñgaan, tan saluñgatan, ed loob na dakel a panaon.

14 Tan siak, Jarom, ag ko la mansulat na arum ni, lapu ed saray piligo so melag. Balet nia, kaagian ko, nayarian yo so onla ed saraman so sananey a piligo nen Nephi; tan nengneng yo, dia ed saraya nisulat so saray bakal, unong ed kasulatan na saray arari, odino saray ingangan da ya isulat.

15 Tan iawat ko so saraya a piligo ed lima na anak ko a laki si Omni, pian saraya so nisinop unong ed saray gangan na kaamaan mi.