Say Libro nen Enos

1 Nia, agawa a siak, Enos, lapu ed kabat ko a si amak sikato so maptek a too—imbañgat to ak ed dili a salita to, tan ontan met ed panagasikaso tan simbawa na Katawan—tan nagalang so ñgaran na Dios ko lapu ed saya—

2 Tan ibagak ed sikayo so impitulot ko ed arapan na Dios, sakbay a naawat ko so pamaandi na saray kasalanan ko.

3 Tan agawa, a linma ak a mañganop na saray ayep ed katakelan; tan saray salita a mabetbet ko a nareñgel ed kinen amak a sasalitaen to nipaakar ed andi-angaan a bilay, tan say gayaga na sasantos, saraya so tinmanek ed pusok.

4 Tan say kamareruak so nampirawat; tan siak so tinmalimukor ed arap na Manamalsak, tan siak so inmakis ed sikato ed baleg a pikakasi tan tagleey onkana ed dili a kamareruak; tan dia ed legan na sanagew siak so nanakis ed sikato; on, tan sanen sinmabi so labi siansia ni ya imbelyaw ko so voces ko kanian akasabi ed saray katawenan.

5 Tan sinmabi so sakey a voces ed siak, a nankuan: Enos, saray kasalanan mo apirdona la, tan sika so nabendicionan.

6 Tan siak, Enos, kabat ko a say Dios ag to nayarian so mantila; dia ed ontan, say liknaan na impankasalanan ko so naandi.

7 Tan inkuan ko: Katawan, panon so inkagawa to nia?

8 Tan inkuan to ed siak: Lapu ed pananisiam ed kinen Cristo, a sikato so ag mo ni kapiganman nadñgel odino anengneng. Tan dakel ni a panaon so ondalan sakbay ya ipatnag to so inkasikato dia ed laman; dia ed ontan, onla ka la, say pananisiam ginawa to ka a nagnap.

9 Natan, agawa a sanen nadñgel ko so saraya a salita sinmabi so pakaliknak na sakey a pilalek ya onkana ed pankaabigan na saray kaagian ko, a saray Nephite; dia ed ontan, initer ko ya amin so liknaan ko ed Dios lapu ed sikara.

10 Tan legan ko ya akipuligesgesan dia ed espiritu, nia, say voces na Katawan so sinmabi ed nunot ko lamet, a nankuan: Dalawen ko so saray kaagian mo unong ed saray seet da a manumpal ed saray gangan ko. Initer ko ed sikara so saya a dalin, tan saya so masanto a dalin, tan ag ko ayewen likud no say señgegan so say karelmeñgan; dia ed ontan, dalawen ko so saray kaagian mo unong ed asalitak; tan saray impankasalanan da awiten ko tekep na kaermenan ed saray ulo ra.

11 Tan kayari a siak, Enos, nadñgel ko so saraya a salita, ginmapo ya ag-nagiing so pananisiak ed Katawan; tan nampikasi ak ed sikato ed dakel ya andukey a pipupoligesgesan onkana ed saray kaagian ko, a saray Lamanite.

12 Tan agawa a kayarik a nampikasi tan nankimey a siseseet, say Katawan inkuan to ed siak: Iter ko ed sika so unong ed saray pilalek mo, lapu ed pananisiam.

13 Tan natan nia, saya so pilalek a nampilalekan ko ed sikato—no bilang onia so nagawa, a saray totook, say Nephite, so napelag ed kasalanan, tan dia ed antokaman a pamaakaran a sikara so naderal, tan, saray Lamanite so ag naderal, a say Katawan a Dios pagnayonen to so sakey a kasulatan nipaakar ed saray totook, saray Nephite; angan no bilang dia ed pakapanyari na masanto a taklay to, a saya so naawit ya ompaway ed arapen ya agew ed saray Lamanite, pian, ag la piga, sikara so naawit ed kilalaban—

14 Dia ed saraya a panaon saray pipupoligesgesan mi angapo so kana to ed pamapawil mi ed sikara ed tua a pananisia. Tan insamba ra ed sanok da, no nayari komon, deralen da so saray kasulatan mi tan sikami, tan ontan met ed amin a kagagawa na kaamaan mi.

15 Dia ed ontan, lapu ed pikakabat ko a say Katawan a Dios nayarian to ya iagel ed kadederal so saray kasulatan mi, siak so nannañgis ed sikato ya andi-tonda, lapu ed inkuan to ed siak: Antokaman a beñgatla a kerewen mo ed pananisia, a sisiaen mo a saya so naawat mo ed ñgaran nen Cristo, saya so naawat mo.

16 Tan siak so awalaan na pananisia, tan iniakis ko ed Dios ya iagel to ed kadederal so saray kasulatan; tan akipaknaan ed siak ya awiten to ya ipaway ed saray Lamanite ed panaon na dili a kaliktan to.

17 Tan siak, Enos, kabat ko a saya so nagawa unong ed paknaan a ginawa to; dia ed onia say kamareruak so nampainawa.

18 Tan say Katawan inkuan to ed siak: Saray kaamaan mo onia met so kinaukolan da ed siak ed saya a beñgatla; tan saya so nagawa ed sikara unong ed pananisia ra; lapu ed say pananisia ra siñga met ed sika.

19 Tan natan agawa a siak, Enos, linma ak a nanliber-liber ed limog na saray totoo nen Nephi, a namprofesiya nipaakar ed saray beñgatla ya onsabi, tan pinaneknekan ko so saray beñgatla a nadñgel tan anengneng ko.

20 Tan paneknekan ko a saray totoo nen Nephi sineetan da ya ipawil so saray Lamanite ed tua a pananisia ed Dios. Balet saray sagpot mi angapo so asumpalan to; say busol da so ag-nagiing, tan sikara so iwawanwan na mauges ya inkaugali ra kanian sikara so nanmaliw a maatap, tan masibeg, tan sakey a napgaan na dala a totoo, napno na panaglingkor ed saray talintao tan karutakan; mamañgan ira na saray ayayep a managpatey; manaayam ira ed abong-abong ya abel, tan akarakar ira ed saray kalawakan ya akabalkes ira na antitikey a katat ed saray balambang da tan kalbo so saray ulo ra; tan say karonuñgan da dia ed pabekang, tan dia ed panagtastas, tan say wasay. Tan dakel ed sikara angapo so kakanen da likud ed tariwa a karne; tan sikara so andi-tonda ya aanapen da so panderal ed sikami.

21 Tan agawa a saray totoo nen Nephi so nandalus ed dalin, tan nampadakel na nambabañgil a dawa, tan buñga na kiew, tan simpok na ayayep, tan amin a kanengneñgan na baka, tan kanding, tan atap a kanding, tan ontan met a dakel a kabayo.

22 Tan wala so dakerakel a profeta ed limog mi. Tan saray totoo so totoo a matalker so teñger da, mairap a talusan.

23 Tan angapo so antokaman a beñgatla likud lambeñgat ed mapalalo a sanok, panagpulong tan panagprofesiya ed bakal, tan baliñgaan, tan panagderal, tan andi-tonda a panagpanunot ed sikara nipaakar ed patey, tan say kabayag na andi-angaan, tan saray panañgokom tan say pakapanyari na Dios, tan saraya ya amin a beñgatla—lawas saraya so panetenyeg da pian pagnayon da so takot ed Katawan. Ikuan ko ya angapo so kakulañgan ed saraya a beñgatla, tan say mapalalo ya inkalinew na panagsalita, so mañgaamper ed masiglat ya ilasur da ed kadederal. Tan dia ed saya a kanengneñgan so impañgisulat ko nipaakar ed sikara.

24 Tan anengneng ko so saray bakal ed baetan na saray Nephite tan saray Lamanite legan na saray agew ko.

25 Tan agawa a ginmapo ak la ya ontakken, tan sanlasus tan pitumplo tan siam a taon so linmabas la nanlapu ed saman so panaon a si ama mi a Lehi so tinmaynan ed Jerusalem.

26 Tan anengneng ko a magano ak la ya onlasur ed lubok ko, kayari a siak so atibukel ed pakapanyari na Dios kanian siak so kaukolan a mampulong tan mamprofesiya ed saya a totoo, tan ibawag so saraya a salita unong ed katuaan a wala ed si Cristo. Tan saya so imparungtal ko sanlegan na amin ya agew ko, tan saya so nanliketan ko nen say saman so wala ed tapew na mundo.

27 Tan magano ak la ya onla ed pasen a pampainawaan ko, a dia ed Mananundon ko; lapu ed kabat ko a dia ed sikato siak so mankapampainawa. Tan mangayaga ak ed agew sano say laman ko ya ompatey so nakawesan ya ag-ompatey, tan onalagey ak ed arap to; dia ed ontan nanengneng ko so lupa to ed liket, tan ikuan to ed siak: Dago ka ed siak, sika ya abendicionan, wala so pasen a niparaan ya onkana ed sika dia ed panagayaman nen Amak. Amen.