1 Tan natan agawa a kayari pigara a taon so linmabas, wala so sakey a too a sinmabi ed limog na saray totoo nen Nephi, a say ñgaran to Sherem.

2 Tan agawa a ginapoan to so mampulong ed limog na saray totoo, tan mañgipalapag ed sikara ya angapo so Cristo. Tan sikato so nampulong na dakel a beñgatla a makaayat ed saray totoo; tan saya so ginawa to ag la piga nasalatan to so doctrina nen Cristo.

3 Tan sikato so nankimey a siseseet pian niarawi to so puso na saray totoo, lapu ed saya dakel so saray puso a niarawi to; tan lapu ed kabat to a siak, Jacob, so awalaan na pananisia ed si Cristo a sikato so onsabi, inanap to so baleg a pankanawnawa pian onla ed siak.

4 Tan sikato so marunong, ya awalaan na nagnap a pikakabat ed salita na saray totoo; kanian, nayarian to ya ikana so dakel a panagayat, tan baleg a pakayari ed panagsalita, unong ed pakapanyari na demonyo.

5 Tan wala so ilalo to a natenyeg to ak ed pananisia, manwari ya ontan a dakerakel a puyan tan dakel ni a beñgatla so anengneng ko nipaakar ed saraya a beñgatla; lapu ed petepeteg ya akanengneng ak na saray angeles, tan sikara so nampulong ed siak. Tan ontan met, nadñgel ko so voces na Katawan ya akisalita ed siak ed nipaakar ed salita, ed panapanaon; dia ed ontan, ag ak la natenyeg.

6 Tan agawa a sikato so linma ed siak, tan dia ed onia sikato so nansalita ed siak, a nankuan: Agi a Jacob, inanap ko so baleg a pankanawnawa pian makapisalita ak ed sika; lapu ed nadñgelan ko tan kabat ko met a dakel la so impanliber-liber mo, ya ipopulong mo so tatawagen mo ya evangelio, odino doctrina nen Cristo.

7 Tan dakel so apatumbok mo a niarawi ed saraya so totoo kanian pinikewet da so tua a dalan na Dios, tan ag da susumpalen so gangan nen Moises a saya so tua a dalan; tan impanmaliw mo so gangan nen Moises a panagpikasi ed sakey a katao a kuan mo a sikato so onsabi kayari ya ilabas na dakerakel a lasus a taon manlapu natan. Tan natan nia, siak, Sherem, ibagak ed sika a saya so sakey ya ag-pañgikabkabilañgan ed Dios; lapu ed angapo so too a makapikabat ed onia ra a beñgatla; lapu ed ag to nayarian ya ibaga so saray beñgatla ya onsabi. Tan dia ed onia a kanengneñgan so impibaliñgaan nen Sherem ed siak.

8 Balet nengneng yo, say Katawan a Dios inkalbo to so Espiritu to ed kamareruak, kanian sikato so kewkewen ko ed saray salita to.

9 Tan inkuan ko ed sikato: Iburim si Cristo a sikato so onsabi? Tan inkuan to: No wala so sakey a Cristo, sikato so ag ko iburi; balet kabkabat ko ya angapo so Cristo, ni say wala nen saman, ni say dia ed arapen.

10 Tan inkuan ko ed sikato: Manisia ka ed saray masanto a kasulatan? Tan kuan to, On.

11 Tan inkuan ko ed sikato: Sirin saraya so ag mo atalusan; lapu ed sikara so peteg a mamapaneknek ed si Cristo. Nia, kuan ko ed sika ya angapo ed saray profeta so añgisulat, odino namprofesiya, likud no sikara so nansalita nipaakar ed saya a Cristo.

12 Tan aliwa ni a saya ya amin—saya so niparungtal ed siak, lapu ed nadñgel tan anengneng ko; tan saya met so imparungtal ed siak ed panamegley na pakapanyari na Espiritu Santo; dia ed ontan, kabat ko ya no angapo so bagat a pamaandi na kasalanan ya agawa amin a katooan so andi-saew a nabalang.

13 Tan agawa ya inkuan to ed siak: Ipanengneng mo ed siak so sakey a pakapatnagan ed panamegley na saya a pakapanyari na Espiritu Santo, a dia ed saya dakel la so akabatan mo.

14 Tan inkuan ko ed sikato: Anto ak a manukso ed Dios pian ipanengneng to ed sika so pakapatnagan na sakey beñgatla a kabat mo a tua? Iñgen saya, so iburim ni, lapu ed sakey ka a kayarian na demonyo. Manwari ya ontan, aliwa a say linawak so nagawa; balet no say Dios so mamakbak ed sika, saya la so pakapatnagan ed sika a sikato awalaan na pakapanyari, mandapag dia ed tawen tan dia ed dalin; tan ontan met, a si Cristo so onsabi. Tan say linawam, O Katawan, so nasumpal, tan aliwa a siak.

15 Tan agawa a sanen siak, Jacob, so nansalita na saraya a salita, say pakapanyari na Katawan sinmabi ed sikato, kanian sikato so niparukol ed dalin. Tan agawa a sikato so tanagano ed dakel ya agew.

16 Tan agawa ya inkuan to ed saray totoo: Mantitipon kayo nabuas, lapu ed siak la so ompatey; dia ed ontan, pilalek ko so misalita ed saray totoo sakbay ya ompatey ak.

17 Tan agawa a dia ed kaimbuasan saray karaklan so nantitipon; tan sikato so nansalita a malinlinew ed sikara tan binenegan to so saray beñgatla ya imbabañgat to ed sikara, tan impatua to si Cristo, tan say pakapanyari na Espiritu Santo, tan say panagtalima na saray angeles.

18 Tan sikato so nansalita ed sikara a malinlinew, a sikato so apalikdo na pakapanyari na demonyo. Tan sinalita to so nipaakar ed infierno, tan say andi-angaan, tan say andi-angaan a dusa.

19 Tan inkuan to: Mapaga ak ag la piga ya akagawa ak na kasalanan ya ag-napirdona, lapu ed nantila ak ed Dios; lapu ed imburik si Cristo, tan inkuan ko a manisia ak ed saray masanto a kasulatan; tan saraya so peteg a mamaneknek ed sikato. Tan lapu ed onia akapantila ak ed Dios baleg so takot ko ag la piga a say kipapasen ko so makapataktakot; balet mampatua ak ed Dios.

20 Tan agawa a sanen imbalikas to so saraya a salita ag la makaesel, tan inawat to so espiritu to.

21 Tan sanen say karaklan anengneng da a sikato so nansalita na saraya a beñgatla a ñgalñgali to la iawat so espiritu to, sikara so mankelaw a mapalalo; lapu ed saya say pakapanyari na Dios sinmabi ed sikara, tan sikara so atalagnaw kanian niparukol ira ed dalin.

22 Natan, saya a beñgatla so makapaliket ed siak, Jacob, tan saya so kinerew ko ed Amak a wala ed tawen; lapu ed dineñgel to so nañgis ko tan inebatan to so pikakasik.

23 Tan agawa a say kareenan tan panañgaro na Dios so nipawil lamet ed limog na saray totoo; tan sinukait da so saray masanto a kasulatan, tan ag la ra dinmeñgedeñgel ed saray salita na saya a marelmeng a too.

24 Tan agawa a dakel a pamaakaran so ginawa ra pian nabawi tan nipawil da ed saray Lamanite ed pikakabat na katuaan; balet amin angapo so nansumpalan to, lapu ed nanliketan da so bakal tan pamaterter na dala, tan wala so andi-angaan a busol da sumpa ed sikami, a kaagian da. Tan nampilalekan da ed panamegley na pakapanyari na saray kagawaan da ed pibabakal a deralen da kami ya andi-tonda.

25 Dia ed ontan, saray totoo nen Nephi pinabiskeg da so isumpa ed sikara ed saray ikakana ra ed bakal, tan dia ed amin a pakayari ra, a sitatalek ed Dios tan bato a dampay na kilalaban da; dia ed ontan, sikara ni a siansia so tinmaluna ed saray kabusol da.

26 Tan agawa a siak, Jacob, ginapoan ko la so ontakken; tan lapu ed say kasulatan na saya a totoo so wala ed sananey a piligo nen Nephi, dia ed ontan, sampotan ko la so saya a kasulatan, ya ibagak a nansulat ak unong ed sankaabigan a pikakabat ko, dia ed pañgikuan ko a say panaon so linmabas ed sikami, tan ontan met saray bilay mi so linmabas ed sikami a siñga labat sakey a kugip, lapu ed sikami so sakey a maermen ed inkabukbukor tan sakey a mareen a totoo, manaakar-akar ya alis-alis, a nibantak nanlapu ed Jerusalem, a nianak ed kairapan, dia ed kailalakan, tan kabusol na saray kaagian mi, a nanseñgegan na bakal tan pambaliñgaan; dia ed ontan, sikami so maermen ed saray agew mi.

27 Tan siak, Jacob, anengneng ko a magano ak la ya onlasur ed lubok ko; dia ed ontan, inkuan ko ed laki ya anak ko a si Enos: Awat mo so saraya a piligo. Tan imbagak ed sikato so saray beñgatla ya ingangan nen agik a Nephi ed siak, tan insipan to so panañgonor ed saray gangan. Tan sampotan ko la so pansulat ed saraya a piligo, saya a sulat so melag; tan dia ed saray mambasa siak la so mampatanir, mailalo a dakel ed saray kaagian ko so nabasa da komon so saray salitak. Kaagian, mampatanir ak la.